1-3. ¿Binwan-a te ya x-okʼotik yuʼune?

 JPISILTIK aynix bin-ora okʼemotik. Ayniwan okʼemotik yuʼun stseʼelil koʼtantik, pero jteb ma spisiluk-ora okʼemotik yuʼun mel-oʼtan. Jich bitʼil ayniwan ya x-okʼotik yuʼun ta skaj te ay machʼa laj kuʼuntik. Jtul hermana te ay ta Estados Unidos te Lorilei sbiil, * jich la yal: «Ay baeltik bayal ya jmel koʼtan ta skaj te laj te achʼix kuʼun, ya kaʼiy te maʼyuk bin ya yakʼbon smukʼul koʼtan. La jkuy te maʼyuk bin-ora ya xkujch kuʼun te jwokole».

² Ayniwan yan te bin yuʼun ya x-okʼotik yuʼun. Jtul precursora ta Japón te Hiromi sbiil, jich la yal: «Ay baeltik ya xchebaj koʼtan yuʼun te ma schʼam yaʼiyik te ants winiketik te skʼop Dios, sok ya x-okʼon ta stojol Jehová te yakuk skoltayon ta stael te machʼa ya skʼan ya snop te smelelil kʼope».

³ Te bitʼil la yaʼiy sbaik te hermanaetik-abi, ¿mabal jichuk te ay baeltik jich ya kaʼiy jbatik-euk? (1 Ped. 5:9). Te bin ya jkʼantike, jaʼ te ya x-abatinotik ta stojol Jehová sok stseʼelil koʼtantik, pero ayniwan ya jpastik sok mel-oʼtan ta skaj te ay machʼa laj kuʼuntik, te chebajem koʼtantik o ya jsitintaytik wokoliletik (Sal. 6:6; 100:2). ¿Bin ya jpastik teme jich ya kaʼiy jbatike?

4. ¿Bin ya kilbeytik skʼoplal ta artículo ini?

⁴ Ya skoltayotik te ejemplo yuʼun te Jesús. Ay baeltik te tulan la yaʼiy te swokol jaʼ yuʼun okʼ (Juan 11:35; Luc. 19:41; 22:44; Heb. 5:7). Ta artículo ini, jaʼ ya kilbeytik skʼoplal te bin yuʼun okʼ te Jesús. Ya kiltik bin ya jnoptik ta stojol te Jesús, ta stojol te Jehová sok bin ya jpastik kʼalal ya jsitintaytik wokoliletik te ya x-okʼotik yuʼun.

5. ¿Bin ya yakʼ jnoptik ta stojol te Jesús te bin ya yal te Juan 11:32-36?

⁵ Ta slajibal te jaʼbil 32, te Lázaro te yamigo te Jesús tsakot ta chamel sok laj (Juan 11:3, 14). Te Jesús kʼux ta yoʼtan te Lázaro, te María sok te Marta. Bayal la smel yoʼtanik ta skaj te laj te Lázaro. Te kʼalal lajemix-a te Lázaro, te Jesús bajt ta Betania te banti nainemik te María sok te Marta. Kʼalal la yaʼiy stojol te Marta te yak ta talel te Jesús, animalnax lokʼ ta stael. Jnop kaʼiytik bin yaʼiyel yaʼiyoj sba-a te kʼalal jich la yal: «Cajwal, te liʼuc ayate, ma ba cham te jbanquil te hichuque» (Juan 11:21). Kʼalal te Jesús la yil te yak ta okʼel te María sok te yantik ants winiketik, okʼ-euk (kʼopona Juan 11:32-36).

6. ¿Bin yuʼun okʼ te Jesús kʼalal laj te Lázaro?

⁶ ¿Bin yuʼun okʼ te Jesús kʼalal laj te Lázaro? Te Perspicacia para comprender las Escrituras, jich ya yal: «Ta skaj te laj te yamigo Lázaro sok te ayik ta mel-oʼtan te Marta sok te María, la spichʼ sba yoʼtan sok okʼ yuʼun». * Laniwan snop ta yoʼtan te Jesús te wokolil kʼax ta stojol te yamigo Lázaro kʼalal ay ta chamel sok te bin-utʼil la yaʼiy sba te kʼalal la snaʼ stojol te nopol ya xlajix-ae. Jaʼnix jich okʼ kʼalal la yil te ayik ta mel-oʼtan te María sok te Marta te bitʼil laj te Lázaro. Teme ay machʼa laj awuʼun o laj jtul awamigo, jichniwan awaʼiyoj aba. Ya kiltik oxchajp te bin ya yakʼ jnoptik te relato ini.

7. ¿Bin ya yakʼ jnoptik ta swenta Jehová te kʼalal okʼ te Jesús yuʼun te yamigotak?

⁷ Te Jehová ya xkʼot ta yoʼtan te bin yaʼiyel ya awaʼiy aba. Te Jesús «ha mero slopʼtayej sba a» te Diose (Heb. 1:3). Te kʼalal okʼe, la yakʼ ta ilel bin yaʼiyel ya yaʼiy sba te Jehová (Juan 14:9). Teme ay awokol yuʼun te ay machʼa laj awuʼune, ayuk ta awoʼtan te ma jaʼuknax ya yil Jehová te ayat ta mel-oʼtan, jaʼnix jich kʼux ya yaʼiy-euk te awokole. Ya skʼan «ya slecubtes te machʼa pichʼil yoʼtan» (Sal. 34:18; 147:3).

8. ¿Bin yuʼun schʼuunej koʼtantik te yananix schaʼkuxajtes-a te machʼatik lajem kuʼuntik te Jesuse?

 ⁸ Te Jesús ya skʼan ya schaʼkuxajtes te machʼatik lajem awuʼun. Te kʼalal mato x-okʼ-a te Jesús, jich la yalbey te Marta: «Ya xchaʼcuxaj te abanquile». Te Marta la schʼuun te bin albote (Juan 11:23-27). Te bitʼil ay schʼuunel yoʼtan ta stojol te Jehová, snaʼoj te ay machʼatik schaʼkuxajtesoj ta namey te j-alwanej Elías sok te Eliseo (1 Rey. 17:17-24; 2 Rey. 4:32-37). Sok laniwan yaʼiy stojol te ay machʼatik la schaʼkuxajtes te Jesuse (Luc. 7:11-15; 8:41, 42, 49-56). Jaʼnix jich te jaʼate, schʼuunejuk awoʼtan te ya awilbey sit yan buelta te machʼatik lajem awuʼune. Te kʼalal okʼ te Jesús la yakʼbey smukʼul yoʼtan te yamigotak, jaʼnix jich ya yakʼ jnaʼtik te ya skʼan ya schaʼkuxajtes te machʼatik lajemike.

9. Jich bitʼil la spas te Jesús, ¿yabal xjuʼ awuʼun skoltayel te machʼatik ayik ta wokol? Ala junuk ejemplo.

⁹ Ya xjuʼ awuʼun skoltayel te machʼatik ayik ta wokol. Te Jesús ma jaʼuknax okʼ sok te Marta sok te María, jaʼnix jich la schʼam yaʼiy te bin la yalik sok la yakʼtiklanbey smukʼul yoʼtan. Jaʼnix jich ya xjuʼ ya jpastik ta stojol te ay machʼatik lajem yuʼunik. Jtul anciano te Dan sbiil te nainem ta Australia, jich ya yal: «Te kʼalal laj te kiname, ya jkʼan te ayuk machʼa ya skoltayon. Bayal hermanoetik sok yinamik la yalik te ya xjuʼ ya jkʼoponlan ta biluk ora. La kaltiklanbey bin yaʼiyel ya kaʼiy jba sok maba kʼexawik yuʼun te okʼone. Kʼalal ma xyikʼbon koʼtan te bintik ya jpas, jich bitʼil te spokel jcarro, te ya xboon ta mercado sok te ya jpas weʼelil, jaʼnix jich la skoltayonik. Jteb ma spisiluk-ora la sjokinonik ta skʼoponel Dios. Jich la yakʼik ta ilel te jaʼ smelelil kamigotak sok kermanotak ‹ta yorahil wocol›» (Prov. 17:17).

10. ¿Bin ya yichʼ albeyel skʼoplal ta Lucas 19:36-40?

¹⁰ Ta 9 yuʼun nisán ta jaʼbil 33, te Jesús bajt ta Jerusalén. Kʼalal yak ta noptsajel bael, bayal ants winiketik la stsob sbaik sok la slimtiklanik smukʼul kʼuʼik te banti yak ta kʼaxel, yuʼun jaʼ ya skʼanik te ya x-och ta Ajwalil. Ya jnaʼtik ta lek te tseʼelnax yoʼtanik ta kʼajkʼal-abi (kʼopona Lucas 19:36-40). Jich yuʼun te jnopojeletik chamnax yoʼtanik yuʼun kʼalal la yilik te bin la spas te Jesús, melel «te cʼalal cʼoht ta nopol Jerusalén soc te cʼalal la yil, la yoqʼuetay». Yak ta okʼel-a te Jesús, kʼalal la yal te bin ya xkʼot ta pasel ta stojol te machʼatik ayik ta Jerusalén (Luc. 19:41-44).

11. ¿Bin yuʼun okʼ te Jesús yuʼun te machʼatik ayik ta Jerusalén?

¹¹ Manchukme tseʼel yoʼtanik te ants winiketik ta kʼajkʼal-abi, pero te Jesús smeloj yoʼtan, melel snaʼoj te jteb ma spisiluk te judioetik ma skʼan ya yaʼiyik stojol te bin la schol ta swenta te Wentainel yuʼun Dios. Jaʼ yuʼun te Jerusalén ya yichʼ lajinel sok te judioetik te kuxul ya xjilik ya yichʼik chukel bael (Luc. 21:20-24). Mel-oʼtantik sba te jich kʼot ta pasel te bitʼil la yal te Jesús, jteb ma spisiluk te ants winiketik pʼajot yuʼun. ¿Yabal smulanik yaʼiyel skʼop Dios te ants winiketik te banti yakat ta kuxinel? Manchukme ya apas tulan ta scholel te skʼop Dios, pero teme maʼyuk bayal machʼatik ya smulanik yaʼiyel, ¿bin ya yakʼbat anop te kʼalal okʼ te Jesús? Kiltik oxchajpuk.

12. ¿Bin ya yakʼ jnoptik ta swenta Jehová kʼalal okʼ te Jesús yuʼun te spatxujke?

¹² Te Jehová kʼux ta yoʼtan te ants winiketik. Te kʼalal okʼ te Jesús jaʼ ya sjultes ta  koʼtantik te ay skʼoplal ta yoʼtan Jehová te ants winiketik. Melel «ma scʼan te ay machʼa chʼayel ya xbaht, ha ya scʼan te yacuc suhtes yoʼtanic spisilic» (2 Ped. 3:9). Teme ya jpastik tulan te yakuk xkʼot ta yoʼtanik te lek yachʼil kʼop, jichme ya kakʼtik ta ilel te kʼux ta koʼtantik te jpatxujktike (Mat. 22:39). *

13, 14. 1) ¿Bin-utʼil la yakʼ ta ilel te Jesús te la snaʼbey yoʼbolil sba te ants winiketik? 2) ¿Bin-utʼil ya kakʼtik ta ilel te talelil-abi?

¹³ Te Jesús la spas tulan ta scholel skʼop Dios. Te bitʼil kʼux ta yoʼtan te ants winiketike, la sle te bin-utʼil la scholtiklanbey skʼop Dios (Luc. 19:47, 48). Jaʼ tijbot yoʼtan ta spasel ta skaj te la snaʼtiklanbey yoʼbolil sba. Ay baeltik te maba weʼik te Jesús sok te jnopojeletik yuʼun te bitʼil bayal ants winiketik ya skʼan yaʼiyik stojol te bin ya yakʼik ta nopele (Mar. 3:20). Kʼalal bajt ta ilel yuʼun jtul winik ta ajkʼabal, te Jesús la schʼambey yaʼiy te skʼope (Juan 3:1, 2). Jteb ma spisiluk te ants winiketik la yaʼiyik stojol te bin la yal te Jesús maba ochik ta jnopojel, melel spisil cholbotik yaʼiy. Ta kʼajkʼal ini, ya jkʼantik te spisiluk te ants winiketik ya yaʼiyik stojol te lek yachʼil kʼope (Hech. 10:42). Yuʼun ya xjuʼ kuʼuntik spasel, ayniwan banti ya skʼan ya jeltaytik te bin-utʼil ya jcholtik te skʼop Diose.

¹⁴ Lea bin-utʼil ya acholxan te skʼop Dios. Teme maba ya jelbeytik yorail te kʼalal ya jcholtik skʼop Dios, maniwan ya jtatik te machʼatik ya smulanik yaʼiyel te lek yachʼil kʼope. Jtul precursora te Matilda sbiil, jich ya yal: «Te joʼon sok te jmamalal yanyantik ora ya jcholtik te skʼop Dios. Ta sab ya jcholtik skʼop Dios ta negocioetik. Ta olil kʼajkʼal te kʼalal ay bayal ants winiketik ta calle, ya jtuuntestik te carrito. Sok ta mal kʼajkʼal ya jtatikxan ants winiketik ta snaik». Mame jaʼuk ya jtsatik te jayeb ora ya xjuʼ kuʼuntik, jaʼukme ya jcholtik skʼop Dios te jayeb ora ya jtatikxan te ants winiketik. Teme jich ya jpastike, ya jnaʼtik te tseʼel yoʼtan kuʼuntik te Jehová.

15. Jich bitʼil ya yal te Lucas 22:39-44, ¿bin la spas te Jesús te kʼalal nopol ya xlajix-ae?

¹⁵ Ta ajkʼabal 14 yuʼun nisán ta jaʼbil 33, te Jesús bajt ta jun lugar te Getsemaní sbiil sok tey la yalbey Jehová te bin yaʼiyel la yaʼiy sbae (kʼopona Lucas 22:39-44). Ta yorail-abi, «tulan awon soc ocʼ ta scʼoponel» (Heb. 5:7). ¿Bin la skʼan te Jesús ta ajkʼabal te kʼalal nopol ya xlajix-ae? La skʼanbey Jehová te yakuk x-akʼbot yip yoʼtan yuʼun ya spasbey te skʼanojel yoʼtane. Te Jehová la yaʼiybey skʼop te sNichʼan jich la stikun jtul chʼul-abat yuʼun ya yakʼbey yip yoʼtan.

16. ¿Bin yuʼun smeloj yoʼtan te Jesús kʼalal la skʼopon Dios ta Getsemaní?

¹⁶ Te Jesús okʼ kʼalal ay ta Getsemaní, melel jaʼ la smel yoʼtan yuʼun teme ya skuyik te ants winiketik te la sbolkʼoptaybey sbiil te Dios. Jaʼnix jich snaʼoj te bin ay ta swenta spasel: jaʼ te ya schʼultesbey sbiil te sTate. Teme yakat ta kʼaxel ta tulan wokolil te ya yakʼ ta prueba te bitʼil jun awoʼtan ta stojol te Jehová, ¿bin ya yakʼbat anop te kʼalal okʼ te Jesús? Kiltik oxchajpuk.

17. ¿Bin ya yakʼ jnoptik ta swenta Jehová te kʼalal la yakʼbey sujtib te s-oracion te Jesús?

¹⁷ Te Jehová ya yaʼiy stojol te bin ya akʼanbeye. Te Jehová la yaʼiy stojol te kʼalal kʼoponot yuʼun te sNichʼan. ¿Bin yuʼun? Melel te bin mukʼxan skʼoplal ta yoʼtan te Jesús, jaʼ te junuk yoʼtan ta stojol te sTat sok te ya schʼultesbey te sbiile. Teme jaʼ mukʼxan skʼoplal ta koʼtantik te junuk koʼtantik ta stojol Jehová sok te ya jchʼultesbeytik te sbiile, yame yakʼbotik te bin ya jkʼanbeytik (Sal. 145:18, 19).

18. ¿Bin yuʼun ya kaltik te Jesús jaʼ jtul amigo te ya xkʼot ta yoʼtan te bin yaʼiyel ya kaʼiy jbatike?

¹⁸ Te Jesús ya xkʼot ta yoʼtan te bin yaʼiyel ya awaʼiy abae. Kʼalal ya jmel koʼtantik, tseʼel koʼtantik yuʼun teme ay kamigotik te ya xkʼot ta yoʼtan te bin yaʼiyel ya kaʼiy jbatik, sok teme ay jich kʼaxem ta stojol te bin ya jmel koʼtantik yuʼune. Te Jesús jaʼ te amigo-abi. Ya snaʼ te kʼalal maʼyuk kiptik sok te ya jkʼantik koltayel. Jaʼnix jich snaʼoj te bin-utʼil pasbilotik sok ya skoltayotik «ta yorahil te jwocoltique» (Heb. 4: 15, 16). Jich bitʼil la spas te Jesuse, ma la spʼaj te koltayel akʼbot yuʼun te chʼul-abat ta Getsemaní, jaʼnix jich te joʼotik ma skʼan ya jpʼajtik te koltayel ya yakʼbotik te Jehová, chikan teme ta swenta jun publicación, jun video, jun discurso, te kʼalal ya yulaʼtayotik jtul anciano o jtul kamigotik te tulan schʼuunel yoʼtane.

19. ¿Bin ya yakʼbat yip awoʼtan teme yakat ta kʼaxel ta wokolil? Ala junuk ejemplo.

¹⁹ Te Jehová ya yakʼbat lamalkʼinal. ¿Bin-utʼil ya yakʼbotik yip koʼtantik te Jehová? Kʼalal ya jkʼopontik, ya jtatik «te lamal qʼuinal te ya yacʼ te Diose, te cʼax mucʼ te ma xhuʼ cuʼuntic snaʼel» (Filip. 4:6, 7). Te lamalkʼinal ya yakʼbotik te Jehová, ya slamantes koʼtantik sok ya skoltayotik yuʼun lek te bin ya jtatik ta nopel spasel. Jich la yaʼiy sba te hermana te Luz sbiil, jich ya yal: «Ay baeltik te jtukel ya kaʼiy jba sok ya jkuy te ma kʼuxukon ta yoʼtan te Jehová. Pero ta oranax ya jcholbey yaʼiy te Jehová te bin yaʼiyel ya kaʼiy jbae. Jaʼ ya skoltayon te oración». Jich bitʼil kʼax ta stojol te hermana, te oración ya yakʼbotik lamalkʼinal.

20. ¿Bin la yakʼ jnoptik te kʼalal okʼ te Jesús?

²⁰ Te bin la jnoptik ta swenta te kʼalal okʼ te Jesús ya yakʼ smukʼul koʼtantik sok bayal ya skoltayotik. Melel ya sjultes ta koʼtantik te ya skʼan ya jkoltaytik te kamigotaktik te ayik ta wokol sok te ya smukʼulin koʼtantik te ya skoltayotik te Jehová sok te Jesús kʼalal ay machʼa ya xlaj kuʼuntik. Te kʼalal ya jnaʼbeytik yoʼbolil sba te ants winiketik, jaʼ ya stij koʼtantik ta scholbeyel skʼop Dios sok ta snojptesel, melel te Jehová sok te Jesús ya yakʼik ta ilel te tʼujbil talelil-abi. Kʼalal okʼ te Jesús ya yakʼ smukʼul koʼtantik, melel ya yakʼ kiltik te ya snaʼ te bin yaʼiyel ya kaʼiy jbatik soknix-euk te Jehová, jaʼnix jich ya xkʼot ta yoʼtanik te ay banti ya xchʼayotik sok ya skʼan ya skoltayotik ta stsʼikel te jwokoltik. Jaʼ yuʼun, akʼa jpastik tulan ta spasel te bin la jnoptikix jaʼto teme kʼot skʼajkʼalel te ya xkʼot ta pasel ini: «Ya me xcusticlambot yaʼlel sitic yuʼun te Diose» (Apoc. 21:4).