1, 2. 1) ¿Bin yuʼun ma chamuknax koʼtantik te kʼalal ya xkʼax jwokoltik? 2) ¿Bin ya jnoptik ta artículo ini?

 TE J-ABATOTIK yuʼun te Jehová ma chamuknax koʼtantik te kʼalal ya xkʼaxotik ta wokolil, melel te Biblia jich ya yal: «Ya skʼan ya xkʼax jwokoltik yuʼun ya x-ochotik ta Wentainel yuʼun te Diose» (Hech. 14:22). Jaʼnix jich jnaʼojtik te ay wokoliletik te jaʼto ya xlaj skʼoplal ta achʼ balumilal te banti «maʼyukix lajel, maʼyukix mel-oʼtan, okʼel sok te bin kʼux» (Apoc. 21:4).

² Te Jehová maba ya slokʼesbotik te jwokoltik, pero ya skoltayotik ta stsʼikel. Kiltik te bin la yal te jpuk-kʼop Pablo ta stojol te jchʼuunjeletik ta Roma. Te kʼalal lajix yoʼtan yalbel-a te bintik wokolil yak ta kʼaxel ta stojolike, jich la yal: «Wokolayal te machʼa kʼux la yaʼiyotik ta yoʼtane, ya xjuʼ kuʼuntik stsalel spisil ini» (Rom. 8:35-37). Jaʼ ya skʼan ya yal-abi te Jehová ya yakʼ te ay bin lek ya xlokʼ kuʼuntik te kʼalal yakotik ta sitintayel-a te wokolile. Kiltik te bin la spas te Jehová yuʼun lek lokʼ spisil te bin la spas te José sok te bin-utʼil ya xjuʼ ya skoltayotik ta ora ini.

3. ¿Bin-utʼil oranax jelon skuxlejal te José?

³ Jamal chikan ta ilel-a te kʼax kʼux ya x-aʼiyot yuʼun  stat te José (Gén. 37:3, 4). Jaʼ yuʼun, te sbankiltak jajch sbikʼtal yoʼtanik ta stojol. Te kʼalal juʼ yuʼunike, la schonik bael sok te madianitaetik. Te winiketik-abi la yikʼik bael ta Egipto te José te kʼax namal sbelal sok tey la schaʼchonik ta stojol te Potifar te capitán yuʼun soldadoetik te ya skanantayik te faraón. Oranax jelon skuxlejal te José, melel ta nail kʼax kʼanbil-a, pero ta patil och ta mosoinel ta Egipto (Gén. 39:1).

4. ¿Bin ya xjuʼ ya xkʼax ta jtojoltik te jaʼnix jich kʼax ta stojol te José?

⁴ Te Biblia ya yal te «ay bintic ya xcʼoht ta stojol spisilic» (Ecl. 9:11). Ayniwan ya xkʼax ta jtojoltik wokoliletik te jaʼnix jich ya xkʼax ta stojol-euk te yantike (1 Cor. 10:13). Ayniwan ya kichʼtik labanel o kontrainel ta skaj te jnopojelotik yuʼun te Jesús (2 Tim. 3:12). Chikan biluk-a te ya xkʼax ta jtojoltik, te Jehová ya yakʼ te ay bin lek ya xlokʼ kuʼuntik-a. Kiltik bin-utʼil la skoltay te José.

5. ¿Bin la sta ta ilel te Potifar? (Génesis 39:2-6).

⁵ (Kʼopona Génesis 39:2-6). Te Potifar la yil te kʼax pʼij sok te mero ya x-aʼtej te José. Kʼot ta yoʼtan te bin yuʼune, melel la yil «te joquinbil yuʼun Jehová» sok te jaʼ ya yakʼ te lek ya xkʼot ta lokʼel spisil te bin ya spase. b Ta patil bael, te Potifar la yakʼbey swentain te José spisil te bintik ay yuʼune. Ta swenta-abi la sta bayal bendición te Potifar.

6. ¿Binwan yaʼiyel la yaʼiy sba te José?

⁶ Jnop kaʼiytik te joʼukotik te José. ¿Bin ya skʼan-a te José? ¿Jaʼbal te lek ya x-ilot yuʼun te Potifar? Te binwan la skʼane jaʼ te libreuk ay sok te ya sujt bael sok te stat. Ta melel, manchukme akʼbot mukʼ yaʼtel, mosoinbil yuʼun jtul winik te yichʼoj ta mukʼ lotil diosetik. Te Jehová maba la yakʼ te ya xjil ta libre te José sok yato xbatsʼejxan-a te swokole.

7. ¿Bin yuʼun ya xjuʼ ya kaltik te batsʼejxan te swokol te José? (Génesis 39:14, 15).

⁷ Jich bitʼil ya yal te capítulo 39 yuʼun  Génesis, te yinam te Potifar la smulan te José sok bayal buelta la yalbey te akʼa wayuk sok. Pero ma la skʼan te José. Jaʼ yuʼun bayal ilin te antse sok la yal te kʼanlaj tsak utsʼinotuk yuʼune (kʼopona Génesis 39:14, 15). Kʼalal la yaʼiy stojol te Potifar, bayal jaʼbil la yotses ta chukojibal te José (Gén. 39:19, 20). ¿Binwan yilel-a te chukojibal? Ta kʼopil hebreo te la stuuntes te José ta swenta te chukojibal ya yichʼ kʼasesel bitʼil «chʼen». Ya skʼan ya yal-abi te kʼax ijkʼ kʼinal tey-a sok te ya yakʼ mel-oʼtane (Gén. 40:15). Jaʼnix jich, te Biblia ya yal te ay la yichʼ chukbeyel yok ta cadena sok te la yichʼ xojbeyel takʼin ta snukʼ te José (Sal. 105:17, 18). Batsʼejxan te swokole, melel manchukme kʼanbil yuʼun-a te yajwal, otsesot ta chukojibal.

8. ¿Bin ya smukʼulin koʼtantik manchukme ya xbatsʼejxan bael te jwokoltike?

⁸ ¿Aybal kʼaxem jwokoltik te ya xbatsʼejxan bael manchukme la jkʼopontikix Dios? Aynix jich ya xkʼot ta pasel-a. Te Jehová maba ya skom te ya xkʼax jwokoltik ta balumilal ini te ay ta skʼab te Satanás (1 Juan 5:19). Pero ayotik ta yoʼtan te jTatik Jehová sok ya yil spisil te bin ya xkʼax ta jtojoltik (Mat. 10:29-31; 1 Ped. 5:6, 7). Sok jich ya yalbotik ta jamal: «Maʼyuk bin-ora ya kijkitayat sok maʼyuk bin-ora ya jpijtesat» (Heb. 13:5). Ta swentanax te koltayel yuʼun te Jehová ya xjuʼ ya xkujch kuʼuntik wokoliletik te maʼyuk schajpajibal yilel. Jich kʼax ta stojol te José.

9. ¿Bin ya yakʼ ta ilel te jokinot yuʼun Jehová te José te jayeb jaʼbil chukule? (Génesis 39:21-23).

⁹ (Kʼopona Génesis 39:21-23). Ta yorail swokol te José, te Jehová la yakʼ te lekuk ya xlokʼ te bin ya spas te José. ¿Bin-utʼil? Jichnix te bin-utʼil la spas te Potifar, te jkananchukojibal lek la yil te José, jaʼ yuʼun la yakʼbey swentain spisil te jchukeletike. Te Biblia ya yal te jkananchukojibal «maʼyuc bin la snop ta yoʼtan yuʼun te machʼatic la yaʼbe scuentain te José». Ta swenta-abi ma jichukxan-nix ya xkʼax kʼajkʼal yuʼun te José. ¿Mabal jichuk te chajp ta aʼiyel-a te akʼbot yaʼtel manchukme kuyot ta stsak yutsʼinel te yinam te Potifar? Jaʼ ta swenta te jokinbil yuʼun Jehová te José sok lek kʼot ta lokʼel yuʼun Jehová spisil te bin la spas jich bitʼil ya yal ta Génesis 39:23.

10. ¿Binwan yuʼun te José ma jichuk la yaʼiy te lek ya xlokʼ te bin ya spase?

¹⁰ Jnop kaʼiytik yan buelta te joʼotik te José. ¿Jichbal la yaʼiy te spisil lek ya xlokʼ yuʼun te bitʼil ay ta chukojibal manchukme maʼyuk smul?, ¿bin-a te ya skʼan-a te José?, ¿jaʼbal te lek ya x-ilot yuʼun te jkananchukojibal? Jaʼniwan ya skʼan-a te libre ya xjile. Jaʼ yuʼun la yalbey jtul winik te ya xlokʼix ta chukel te yakuk xkʼopoj ta stojol te faraón yuʼun ya x-akʼot ta libre (Gén. 40:14). Pero, te winik ma la skʼopon ta ora te faraón, jaʼ yuʼun jalajxan cheb jaʼbil ta chukojibal te José (Gén. 40:23; 41:1, 14). Pero ta swentanax te koltayel yuʼun te Jehová, lek kʼot ta lokʼel te bin la spas te José. ¿Binwan yuʼun?

11. ¿Bin koltayot ta snaʼbeyel swentail te José, sok bin-utʼil la stuuntes te Jehová yuʼun ya skʼotes ta pasel te skʼanojel yoʼtane?

¹¹ Kʼalal ayto ta chukojibal-a te José, te Jehová la yakʼ te ya xwayichin cheb  buelta te ajwalil ta Egipto. Te ajwalil ya skʼan ya snaʼ-a te bin swentail te swayiche, jaʼ yuʼun la stikun ta ikʼel te José kʼalal la yaʼiy stojol te ya snaʼbey swentail te wayichiletike. Ta swentanax te koltayel yuʼun te Jehová, te José ma jaʼuknax la yalbey te bin swentail te wayichiletike, jaʼnix jich la yalbey te bin ya skʼan ya spase, chamnax yoʼtan yuʼun te faraón. Kʼalal la yil te jokinbil yuʼun te Jehová, la yakʼbey swentain stsobel spisil te weʼelil ta spamal kʼinal (Gén. 41:38, 41-44). Bayal jaʼbil ta patil tal tulan wiʼnal ta Egipto, jaʼnix jich ta Canaán te banti kuxinem te sfamilia te José. Te bitʼil yichʼoj mukʼ yaʼtel te José la skoltay te sfamilia te banti lokʼ tal stsʼumbal te Mesías.

12. ¿Bin la spas te Jehová yuʼun lek ya xlokʼ-a te bin la spas te José?

¹² Jnop kaʼiytik te bintik kʼax ta skuxlejal te José. ¿Machʼa la stijbey yoʼtan te Potifar yuʼun ya yakʼbey yaʼtel te José? ¿Machʼa la stijbey yoʼtan te jkananchukojibal yuʼun ya yakʼbey yaʼtel te José ta skanantayel te yantik jchukeletik? ¿Machʼa la yakʼ te ya xwayichin te faraón sok machʼa akʼbot snaʼ te José te bin swentail te wayichiletike? ¿Machʼa la stijbey yoʼtan te faraón yuʼun ya yakʼbey yaʼtel te José ta stsobel weʼelil ta Egipto? (Gén. 45:5). Chikan ta ilel te jaʼ te Jehová te la yakʼ te lek ya xlokʼ spisil te bin la spas te José. Te Jehová la stuuntes te bin ma lek la snopik spasel te sbankiltak te José yuʼun ya skʼotes ta pasel-a te skʼanojel yoʼtane.

13. ¿Jaʼbal ya yakʼ xkʼax jwokoltik te Jehová?

¹³ Te bin kʼax ta skuxlejal te José ay bin ya yakʼ jnoptik. ¿Jaʼbal ya yakʼ xkʼax jwokoltik te Jehová yuʼun ay bin lek ya xlokʼ-a? Maʼuk, te Biblia ma jichuk ya yal (Ecl. 8:9; 9:11). Pero, te bin ya spas te Jehová jaʼ te ya yil te wokoliletik ya xkʼax ta jtojoltik sok ya yaʼiyotik te kʼalal ya jkʼopontik (Sal. 34:15; 55:22; Is. 59:1). Sok ma jaʼuknax-abi, jaʼnix jich  ya skoltayotik yuʼun ya xkujch kuʼuntik. ¿Bin-utʼil ya spas?

14. ¿Bin-utʼil ya skoltayotik te Jehová ta yorail wokolil?

¹⁴ Te Jehová ya smukʼubtes kʼinal kaʼiytik te kʼalal ya xtuun kuʼuntik (2 Cor. 1:3, 4). Jich kʼax ta stojol te Eziz, jtul hermano ta Turkmenistán te cheb jaʼbil la yichʼ chukel ta swenta te schʼuunel yoʼtane. Jich ya yal: «Ta sakubel kʼinal te kʼalal la kichʼ ichʼel ta kʼop, jtul hermano la yakʼbon kil te Isaías 30:15 te jich ya yal: ‹Ta scuenta lamal-oʼtanil soc smucʼul-oʼtanil yac ata awipic›. Jaʼ la skoltayon yuʼun lamal koʼtan sok te ayuk smukʼul koʼtan ta stojol te Jehová. Snopel te versículo-abi la yakʼbon kip te kʼalal chukulon-a». ¿Aybal yakʼojbotik smukʼul kʼinal kaʼiytik te Jehová te kʼalal ayotik ta wokol-ae?

15, 16. ¿Bin ya yakʼ jnoptik te bin kʼax ta stojol te Tori?

¹⁵ Ay jaʼto ya jtatik ta ilel-a te la skoltayotik te Jehová te kʼalal kʼaxix-a te wokole. Jtul hermana te Tori sbiil la yil te yuʼun-nix jich-ae. Laj ta cáncer te skerem-al te Mason sbiil, wakeb jaʼbil la yil swokol. Kʼax kʼux la yaʼiy te Tori. Jich la yal: «Maʼyuk bin kʼax kʼux ta aʼiyel jich te bitʼil ya xlaj te kaltike, jnaʼoj te jich ya yalik-euk spisil te meʼil tatiletike. Jaʼ kʼax kʼuxtoxan ta aʼiyel te ya kiltik ya xkʼax swokol te kal jnichʼnabtik ma jaʼuk te kʼalal joʼotik ya xkʼax jwokoltik».

¹⁶ Manchukme tulan te bin kʼax ta stojol te Tori, ta patil jajch snop te bin-utʼil koltayot yuʼun te Jehová. Jich ya yal: «Kʼalal jich yak ta kʼaxel ta jtojoltik-ae, la kil te Jehová spisil-ora la skoltayotik  te kʼalal ay ta chamel-a te kale. Yato xjul ta koʼtan te kʼalal maʼyukix yip-a te Mason yuʼun ya skʼopon te yulaʼ-e, te hermanoetik ya xtalik ta hospital manchukme cheb ora sbelal. Spisil-ora ay hermanoetik ta hospital yuʼun ya skoltayotik sok ay la yakʼbotik takʼin te kʼalal kʼax tulan-a te jwokoltike. Spisil-ora ay bin ay kuʼuntik-a». Te Jehová la skoltay te Tori sok te Mason yuʼun ya xkujch yuʼunik-a (ilawil te recuadro « Te Jehová la yakʼbotik te bin ya xtuun kuʼuntik»).

17, 18. ¿Bin ya skoltayotik ta yilel sok ta yalel wokol ta swenta te koltayel ya yakʼbotik te Jehová te kʼalal ya xkʼax jwokoltik? (Salmo 40:5).

¹⁷ (Kʼopona Salmo 40:5). Te machʼa ya xmo bael ta wits aynanix-a te banti ya skux yoʼtan sok ya xtejkʼaj ta yilel te bintik ay ta sjoyobal. Jaʼnix jich kʼoem te kʼalal ya xkʼax jwokoltik, ya skʼan ya jnop kaʼiytik te bin-utʼil yak skoltaybelotik te Jehová yuʼun ya xkujch kuʼuntik te wokolil. Ta jujun kʼajkʼal jojkʼoybey jbatik: «¿Bin bendicionetik la yakʼbon te Jehová ta kʼajkʼal ini? Manchukme ayto te wokolil, ¿bin-utʼil yak skoltaybelon yuʼun ya xkujch kuʼun?». Jpastik tulan ta yilel te bin bendición ya yakʼbotik te Jehová ta jujun kʼajkʼal.

¹⁸ Ma chopoluk te ya jkʼanbeytik te Jehová te yakuk slajin te wokolil yak ta kʼaxel ta jtojoltike (Filip. 4:6). Pero mame xchʼay ta koʼtantik te bendicionetik yakʼojbotik ta ora ini, melel te Jehová ya yakʼbotik kiptik sok ya skoltayotik yuʼun ya xkujch kuʼuntik. Jaʼ yuʼun kaltik wokol yuʼun te koltayel te spisil-ora ya yakʼbotike. Teme jich ya jpastike, ya kiltik te ya skoltayotik te Jehová yuʼun lek ya xlokʼ te bin ya jpastik jich te bin-utʼil la skoltay te José (Gén. 41:51, 52).