1, 2. ¿Bin yuʼun ya xbootik ta jujun jaʼbil ta spasel te Snaʼojibal slajel te Jesús?

 JTEB ma sta 2 mil jaʼbil, te Jesús la yakʼ skuxlejal ta jtojoltik, ta swenta-abi ya xjuʼ ya xkuxinotik ta sbajtelkʼinal. Ta ajkʼabal te kʼalal nopol ya xlajix-ae, la spas jun tsoblej sok te jnopojeletik yuʼun te banti la stuuntes pan sok vino. Sok la yaltiklanbey te jichuk ya spasulanik yuʼun ma xchʼay ta yoʼtanik te bin la spas sok skʼuxul yoʼtan (1 Cor. 11:23-26).

² Te j-abatotik yuʼun Dios ya jchʼuuntik te mantalil-abi, melel kʼux ta koʼtantik te Jesús (Juan 14:15). Kʼalal nopolix-a te Snaʼojibal slajel te Jesús, ya kakʼtik ta ilel te mukʼ skʼoplal ta koʼtantik te bin la spas. Ya jlokʼestik tiempo ta skʼoponel Dios sok ta snopilanel te bin yuʼun laj te Jesús. Jaʼnix jich ya jmulantik scholelxan skʼop Dios yuʼun ya kikʼtik bayal ants winiketik yuʼun ya sjokinotik ta skʼajkʼalel-abi. Sok maʼyuk bin ya kakʼ smakotik yuʼun ya xbootik ta Snaʼojibal slajel te Jesús.

3. ¿Bin ya kilbeytik skʼoplal ta artículo ini?

³ Te j-abatotik yuʼun Dios jpasojtik tulan ta snaʼulanel te slajel te Jesús. Ta artículo ini ya kilbeytik oxchajp skʼoplal te yuʼun-nix jich-ae: 1) ya jpastik te Snaʼojibal  slajel te Jesús jichnix te bitʼil la yale, 2) ya kikʼtik yantik yuʼun ya xkʼotik-euk sok 3) ya jpastik manchukme ay jwokoltik.

4. 1) ¿Bintik ya yichʼ cholbeyel skʼoplal ta jujun jaʼbil ta Snaʼojibal slajel te Jesús? (Lucas 22:19, 20). 2) ¿Bin yuʼun mukʼ skʼoplal te ya xkʼot ta koʼtantik te bin ya yichʼ cholbeyel skʼoplale?

⁴ Ta jujun jaʼbil, kʼalal ya xbootik ta Snaʼojibal slajel te Jesús ya jchʼam kaʼiytik jun discurso te lokʼem ta Biblia. Tey ya jnoptik bin yuʼun ya xtuun kuʼuntik te bin la spas te Jesús sok te bin-utʼil te skuxlejal jtulnax winik ya yakʼ jtatik te perdón yuʼun te jmultike. Ya kichʼtik albeyel machʼatiknax ya xjuʼ ya sweʼik te pan sok ya yuchʼik te vino soknix te bin swentaile (kʼopona Lucas 22:19, 20). Kʼalal yak ta kʼaxel-a te discurso, ya jnoptik te bendicionetik te ya yichʼik te machʼatik ya xkuxinik ta Balumilal (Is. 35:5, 6; 65:17, 21-23). Kʼax mukʼ skʼoplal ya skʼan ya kiltik te bin ya jnoptike. Bayal millón ta tul ants winiketik ma xkʼot ta yoʼtanik sok ma mukʼuk skʼoplal ya yilik te laj ta jtojoltik te Jesús. Jaʼnix jich, ma jichuk ya spasik te Snaʼojibal slajel te Jesús te bitʼil la yal jilele. ¿Binwan yuʼun?

5. Te kʼalal lajikix-a te jpuk-kʼopetik, ¿bin-utʼil jajch spasik te Snaʼojibal slajel te Jesús te ants winiketike?

⁵ Te kʼalal mato jaluk slajelik-a te jpuk-kʼopetik, jajchik ta chiknajel ta congregación te lotil jchʼuunjeletik (Mat. 13:24-27, 37-39). La «yakʼik ta nopel lotil kʼopetik, jich ya sloʼlay te jnopojeletik swenta jich ya xtʼunotik yuʼun» (Hech. 20:29, 30). Jun te «lotil kʼopetik» te jajch yakʼik ta nopel ta swenta te Jesús jaʼ te malaj «jun-nax buelta la yichʼ akʼel ta lajel yuʼun jich ya skuchbey smul spisil te ants winiketike». La yakʼik ta nopel te bayal buelta ya skʼan ya yakʼ sba ta lajel te Jesús, pero ma jichuk ya yal te Biblia (Heb. 9:27, 28). Bayalto ants winiketik ta ora ini te jichto schʼuunojik. Ya xbajtik ta iglesia ta jujun semana o ta jujun kʼajkʼal yuʼun ya spasik te sacrificio de la misa b te jich naʼbil sba yuʼunike. Pero ay yantik religionetik te baeltikto ya snaʼik te slajel te Jesuse, pero ma spisiluk ya snaʼik bin swentail te laje. Ayniwan machʼa jich ya sjojkʼoybey sba: «¿Yuʼun-nixbal ya xjuʼ ya kichʼ pasbeyel perdón ta swenta te laj te Jesuse?». Ay machʼatik jich ya sjojkʼoybey sbaik, melel albilik te malaj kichʼtik pasbeyel perdón yuʼun te jmultik manchukme laj te Jesuse. Pero, ¿bin spasojik te smelelil jnopojeletik yuʼun Cristo?

6. ¿Bin kʼot ta yoʼtanik ta jaʼbil 1872?

⁶ Ta 1870, te Charles Russell sok yantikxan jajch snopbeyik skʼoplal ta lek te sKʼop Diose. Ya skʼan ya snaʼik bin yuʼun laj te Jesús sok bin-utʼil ya skʼan ya yichʼ pasel te snaʼojibal te slajel. Ta 1872 kʼot ta yoʼtanik te laj ta jtojoltik te Jesús. Maba la smukik te bin kʼot ta yoʼtanik, la spukik ta alel ta libroetik, periodicoetik sok revistaetik. Tey-abi jajch spasik te Snaʼojibal slajel te Jesús jun buelta ta jun jaʼbil, jich bitʼil la spasik te jchʼuunjeletik ta sbabial siglo.

7. ¿Bin-utʼil ya xtuun kuʼuntik te bin la snopbeyik skʼoplal ta namey?

 ⁷ ¿Bin-utʼil ya xtuun kuʼuntik te bin la snopbeyik skʼoplal ta namey? Te Jehová ya skoltayotik ta snaʼbeyel swentail bin yuʼun laj te Jesús sok bin-utʼil ya skoltayotik (1 Juan 2:1, 2). Jaʼnix jich jnopojtik ta Biblia te majtanil ya yichʼik te machʼatik ya schʼuunbeyik smantal te Dios: te ya xkuxinik ta chʼulchan te maʼyuk bin-ora ya xlajik o, te ya xkuxinik ta sbajtelkʼinal ta Balumilal. Sok nopol ya kaʼiy jbatik ta stojol te Jehová kʼalal ya jnopilantik te kʼax kʼuxotik ta yoʼtan sok te bintik lekilal ya jtatik te bitʼil la yakʼ sba ta lajel te Jesús (1 Ped. 3:18; 1 Juan 4:9). Jaʼ yuʼun, jich te bin-utʼil la spasik te hermanoetik ta namey, ya kikʼtik te ants winiketik ta spasel te Snaʼojibal slajel te Jesús jich bitʼil la yal jilel.

8. ¿Bin jpasojtik te j-abatotik yuʼun Jehová yuʼun ya xkʼotik ta Snaʼojibal slajel te Jesús te ants winiketike? (Ilawil te fotoetik).

⁸ Ta bayalix jaʼbil te j-abatetik yuʼun te Jehová ya yikʼik te ants winiketik ta Snaʼojibal slajel te Jesús. Ta 1881, te revista ini la stijbey yoʼtan te hermanoetik ta Estados Unidos te akʼa spasik ta jun na ta Allegheny (Pensilvania). Ta patil jajch spasik te Snaʼojibal slajel te Jesús ta jujun congregación. Pero, ta marzo ta 1940 albotik te publicadoretik te ya xjuʼ ya spasik invitar te ants winiketik. Ta 1960, te Betel la stikun invitacionetik ta congregacionetik. Jaʼto  tal-abi, te testigootik yuʼun Jehová bayal millón invitacionetik jpukojtik. ¿Bin yuʼun jpasojtik tulan ta spukel te invitacionetik?

9, 10. ¿Machʼatik ya kikʼtik ta Snaʼojibal slajel te Jesús? (Juan 3:16).

⁹ Ya jkʼantik te ya xkʼotik te ants winiketik ta Snaʼojibal slajel te Jesús yuʼun ya snaʼik te bin spasoj ta jtojoltik te Jehová sok te Jesús (kʼopona Juan 3:16). Ya jkʼantik te ya snaʼbeyik sba te Jehová sok te ya x-abatinik ta stojol ta swenta te bin ya yilik sok ya yaʼiyik ta ajkʼabal-abi. Pero ma jaʼukiknax te ya xjuʼ ya xkʼotik.

¹⁰ Jaʼnix jich ya xjuʼ ya jpastik invitar te machʼatik namajemik ta stojol te Jehová. Ya jkʼantik te ya xjul ta yoʼtanik te kʼuxto ya x-aʼiyotik yuʼun te Diose. Ya yakʼ stseʼelil koʼtantik te aynix machʼatik ya xkʼotik, melel jich ya xjul ta yoʼtanik te tseʼel yoʼtanik-a te kʼalal abatinik ta stojol te Jehová. Kiltik te ejemplo yuʼun Mónica. c Ta yorail te COVID-19 jajch ta scholel skʼop Dios yan buelta. Kʼalal kʼot ta Snaʼojibal slajel te Jesús ta 2021, jich la yal: «Kʼax mukʼ skʼoplal kuʼun te jaʼbil ini, melel ayix 20 jaʼbil te ma jcholoj skʼop Dios sok te ya jpas invitar te ants winiketik ta Snaʼojibal slajel te Jesús. Sok spisil koʼtan la jpas, melel jich ya kalbey wokol te Jehová sok te Jesús te bin la spasik ta jtojole» (Sal. 103:1-4). Chikan teme ya xkʼot o maʼuk te ants winiketik, ya jpastik tulan ta yikʼel, melel jnaʼojtik te mukʼ skʼoplal ya yil te Jehová.

11. ¿Bin-utʼil yakʼojbotik bendición te Jehová te bitʼil jpasojtik tulan ta spasel invitar te ants winiketik? (Hageo 2:7).

¹¹ Te Jehová yakʼojbotik bendición te bitʼil jpasojtik tulan ta yikʼel te ants winiketik ta Snaʼojibal slajel te Jesús. Jich bitʼil ta 2021, manchukme ay te COVID-19 kʼotik 21,367,603 ta tul ants winiketik. Kʼax bayal ants winiketik kʼotik te ma testigoukik yuʼun Jehová. Pero, te Jehová ma jaʼuk mukʼ skʼoplal ya yil te jaytulike, jaʼ mukʼ skʼoplal ya yil te ants winiketik (Luc. 15:7; 1 Tim. 2:3, 4). Te Jehová jaʼ ya stuuntes te campaña yuʼun te Snaʼojibal slajel te Jesús yuʼun ya skoltayotik ta stael te ants winiketik te lek yoʼtanik (kʼopona Hageo 2:7).

12. ¿Bin wokoliletik ya xjuʼ ya smakotik ta spasel te Snaʼojibal slajel te Jesús? (Ilawil te foto).

¹² Te Jesús la yal te ta slajibal kʼajkʼal ya kichʼtik kontrainel yuʼun te jfamiliatik, ya kichʼtik utsʼinel, ay guerraetik, chamel sok yantikxan (Mat. 10:36; Mar. 13:9; Luc. 21:10, 11). Te wokoliletik ini ya xjuʼ ya smakotik yuʼun ma jpastik te Snaʼojibal slajel te Jesús. ¿Bin spasojik te hermanoetik te jich kʼaxem ta stojolik, sok bin-utʼil koltaybilik yuʼun te Jehová?

13. ¿Bin bendición la sta te Artiom te bitʼil la spas te Snaʼojibal slajel te Jesús?

¹³ Te chukojibal. Te hermanoetik te yichʼojik chukel ta skaj te schʼuunel yoʼtanik ya spasik tulan ta spasel te Snaʼojibal slajel te Jesús. Kiltik te ejemplo yuʼun te Artiom. Ta yorail te Snaʼojibal slajel te Jesús ta 2020 chukul-a, 17 metro snajtil sok sjamalul te banti makale, joʼtulto jchukeletik ya yotsesik tey-a. Manchukme wokol la yil, juʼ yuʼun stael te bintik ya xtuun yuʼun ta Snaʼojibal slajel te Jesús, sok la sta ta nopel te jaʼnix ya skʼases te discurso. Pero, te sjoʼtak ta chukel  bayal ya snukʼik cigarro sok ya yalik bolkʼopetik. ¿Bin la spasix-a? La sjojkʼoylanbey teme ya xjuʼ te ma xyalik bolkʼop o ya snukʼik cigarro ta jun ora. Te jchukeletik la yalik te leke. Jich la yal te Artiom: «La kaltiklanbey te ya xjuʼ ya jcholbeyik te bin ya yichʼ pasel ta Snaʼojibal slajel te Jesús». Manchukme la yalik te ma skʼanike, ta patil la sjojkʼoyikxan kʼalal la yilik te bitʼil la jpase.

14. ¿Bin-utʼil la yichʼ pasel te Snaʼojibal slajel te Jesús ta yorail te COVID-19?

¹⁴ Te chamel COVID-19. Ta skaj te chamele, te j-abatetik yuʼun Dios ma la stsob sbaik ta spasel te Snaʼojibal slajel te Jesús. Pero ma yuʼunuk ma la spasik. d Te hermanoetik te ay s-internetik la spasik ta videollamada. Pero ¿bin-utʼil la spasik te machʼatik maʼyuk s-internetik? Ay lugaretik te la yichʼ kʼasesel te discurso ta televisión o ta radio. Jaʼnix jich, te hermanoetik ta Betel la spasik grabar te discurso kʼaxem ta 500 kʼopiletik yuʼun ya yichʼik akʼbeyel te hermanoetik te nainemik  te banti maʼyuk Internet. Sok ay hermanoetik te jaʼ la yaʼtelinik spukel te grabacionetike.

15. ¿Bin ya yakʼ jnoptik te ejemplo yuʼun te Sue?

¹⁵ Te kontrainel yuʼun te jfamiliatik. Jaʼ te wokolil te kʼax tulanxan ta sitintayel ta yorail te Snaʼojibal slajel te Jesús. Jaʼ te bin kʼax ta stojol jtul estudiante te Sue sbiil. Ta 2021, te kʼalal junxan kʼajkʼal ya skʼan-a te Snaʼojibal slajel te Jesús, te Sue la yalbey te hermana te machʼa ya xnojptesot yuʼun te ma xjuʼ ya spas, melel ya x-ilin te sfamiliae. Te hermana la skʼoponbey te Lucas 22:44 sok albot te kʼalal ay jwokoltik, jaʼ lek te ya jtʼunbeytik te ejemplo yuʼun te Jesús sok te ya jkʼopontik te Jehová ta skʼanbeyel koltayel. Ta yan kʼajkʼal, te Sue la schajpan te pan sok te vino, sok la yil ta jw.org te yichʼel ta mukʼ Dios ta jujun sab ta swenta te Snaʼojibal slajel te Jesús. Ta mal kʼajkʼal, la smak sba ta scuarto sok la schʼam yaʼiy te discurso ta teléfono. Ta patil jich la stsʼibaybey bael te hermana: «Bayal la awakʼbon smukʼul koʼtan te wojey. La jpas tulan yuʼun ma jchʼay te Snaʼojibal slajel te Jesús, te Jehová la skoltayon. Kʼax tseʼel koʼtan sok bayal ya kal wokol yuʼun». Teme jich yak ta kʼaxel ta atojol, ¿yabal achʼuun te ya skoltayat te Jehová?

16. ¿Bin yuʼun jnaʼojtik te ya yakʼbotik bendición te Jehová teme ya xbootik ta Snaʼojibal slajel te Jesús? (Romanos 8:31, 32).

¹⁶ Bayal skʼoplal ya yil te Jehová te ya jpastik tulan ta spasel te snaʼojibal slajel te sNichʼan. Ya yakʼbotik bendición teme ya kaltik wokol ta swenta te bin spasoj ta jtojoltik (kʼopona Romanos 8:31, 32). Mame ayuk bin ya kakʼ smakotik yuʼun ya xbootik ta Snaʼojibal slajel te Jesús ta jaʼbil ini. Sok ayukxan bin ya jpastik ta stojol te Jehová.