1. ¿Bin yuʼun te ay baeltik ya xiwotik?

 TA JPISILTIK aynix baeltik te ya xiwotik. Pero, te Biblia yakʼojbotik jnoptik te ma skʼan ya jxiʼtik te machʼatik lajemikix, te pukujetik sok te bin ya xtal ta pajel chaʼbej. Pero kuxinemotik ta jun balumilal te nojel ta «bintik xiʼbantik sba», jich bin-utʼil te guerra, te utsʼinwanej sok te chameletik (Luc. 21:11). Yaniwan jxiʼtik te ajwaliletik, te jfamiliatik sok yantik ants winiketik te ya skontrainik te smelelil religión. Ay yantik te ya xiʼik te maba ya xjuʼ ya sitintay jun prueba ta ora ini sok ta pajel chaʼbej.

2. ¿Bin kʼot ta pasel kʼalal kʼot ta Gat te David?

² Kalbeytik skʼoplal te David, jtul j-abat yuʼun Dios te ay baeltik xiwe. Kʼalal yak ta leel yuʼun-a te Saúl yuʼun ya xmilot, bajt ta anel ta Gat, te jaʼ slumal te filisteoetik. Kʼalal albot te Akís, te ajwalil yuʼun Gat, te mero ya snaʼ yakʼel guerra te David sok te «la smil bayel ta lajunmil» ta tul filisteoetik, te David «bayel la xiʼ» (1 Sam. 21:​10-12). La smel yoʼtan yuʼun te ay bin ya xjuʼ ya yichʼ pasbeyel yuʼun te ajwalil. ¿Bin la spas te David yuʼun ma stsalot yuʼun te xiwele?

3. Jich bin-utʼil ya yal Salmo 56:​1-3, 11, ¿bin koltayot yuʼun te David ta stsalel te xiwele?

³ Ta Salmo 56, te David la yal te bin yaʼiyel la yaʼiy sba te kʼalal ay ta Gat. Ta salmo-abi la yal te bin yuʼun xiwe, pero jaʼnix jich la yal te bin koltayot yuʼun ma stsalot yuʼun te xiwel, jaʼ koltayot yuʼun te la smukʼulin yoʼtan te Jehová (kʼopona Salmo 56:​1-3, 11). Kʼax lek te la smukʼulin yoʼtan te Jehová. Ta swenta te bendición yuʼun te Jehová, te David ay bin chajpnax la spas sok ay bin lek lokʼ yuʼun-a, la spas sba te sojkem sjol. Kʼalal te Akís la yil te sojkem sjol te David, maba la xiʼix sok maʼyukix skʼoplal la yil-a. Jich te David lokʼ bael ta anel (1 Sam. 21:​13–22:1).

4. ¿Bin-utʼil ya xjuʼ ya kakʼbeytikxan yichʼ yip te smukʼul koʼtantik ta stojol te Jehová? Ala jun ejemplo.

 ⁴ Te smukʼul koʼtantik ta stojol Jehová jaʼme ya skoltayotik yuʼun ma stsalotik te xiwele. Pero ¿bin-utʼil ya xjuʼ ya kakʼbeytikxan yichʼ yip te smukʼul koʼtantik ta stojol te Jehová, kʼaxemtoxan-a te kʼalal ya xiwotike? Kaltik jun ejemplo. Te kʼalal ya kichʼtik tabeyel jun jchameltik, yaniwan xiwotik yuʼun. Pero snaʼel te ayotik ta skʼab jtul lekil doctor ya skoltayotik yuʼun maba ya xiwotik, melel ay machʼatik spoxtayojix ta swenta te chamel ini sok lekubenik. Ya schʼam yaʼiy ta lek te bin ya kaltik sok ya kiltik te ya xkʼot ta yoʼtan te bin yaʼiyel ya kaʼiy jbatike. Sok yaniwan yalbotik te ya yakʼbotik jun tratamiento te bayal machʼatik skoltayoj. Jaʼnix jich sok te Jehová, ya smukʼulinxan koʼtantik teme ya jnoptik te bin spasoj, te bin yak ta spasel sok te bin ya xbajt spas ta jtojoltik. Jich la spas te David. Te kʼalal ya kilbeytik bael skʼoplal cheʼoxeb versículo yuʼun te Salmo 56, jnoptik bin-utʼil ya kakʼbeytikxan yichʼ yip te smukʼul koʼtantik ta stojol te Jehová sok te manchuk ya stsalotik te xiwele.

¿BIN LA SPAS TE JEHOVÁ TA NAMEY?

5. ¿Bin la snopilan ta yoʼtan te David swenta ma stsalot yuʼun te xiwele? (Salmo 56:​12, 13).

⁵ Manchukme ya xjuʼ ya yichʼ milel-a te David ma jaʼuk bajt ta yoʼtan, jaʼ bajt ta yoʼtan snopel te bintik lek spasoj te Jehová ta namey (kʼopona Salmo 56:​12, 13). Spisil-ora jich la spas te David. La snopilan ta yoʼtan te bintik spastiklanoj te Jehová, jaʼ-abi ya xjultesbot ta yoʼtan te ay bayal yuʼel te Jehová sok te kʼux ta yoʼtan te ants winiketik (Sal. 65:​6-9). Jaʼnix jich la snopilan ta yoʼtan te bin spasoj te Jehová ta stojol te yantike (Sal. 31:19; 37:​25, 26). Pero, jaʼnix jich la slokʼes tiempo ta snopel te bin spasoj te Jehová ta stojol. Ta yalalilto koltayot sok kanantayot yuʼun te Jehová (Sal. 22:​9, 10). Snopilanel ta swenta-abi, jaʼ koltayot yuʼun te David yuʼun ya smukʼulinxan yoʼtan te Jehová.

6. Te kʼalal ya xiwotik, ¿bin ya skoltayotik yuʼun ya smukʼulinxan koʼtantik te Jehová?

⁶ Te kʼalal ya xiwat, jojkʼoybey aba: «¿Bin la spas te Jehová ta namey?». Jaʼnix jich, nopa ta swenta te bin spastiklanoj. Kʼalal ya kiltik bin-utʼil te Jehová ya skanantay te  jaʼmal mutetik sok te nichimetik —te ma la yichʼik pasel ta slokʼomba te Dios sok te ma xjuʼ ya yichʼik ta mukʼe—, ya smukʼulinxan koʼtantik te ya xbajt skanantayotik te Jehová (Mat. 6:​25-32). Jaʼnix jich nopa te bin spasoj te Jehová ta stojol te j-abatetik yuʼune. Yaniwan xjuʼ ya awilbey skʼoplal jtul j-abat yuʼun Dios ta namey kʼinal, yaniwan xjuʼ ya akʼopon jun experiencia yuʼun jtul hermano o jtul hermana ta kʼajkʼal ini. a Jaʼnix jich nopilana te bin-utʼil skanantayojat te Jehová. ¿Bin-utʼil la skoltayat yuʼun ya anaʼbey sba te smelelil religión? (Juan 6:44). ¿Bin-utʼil sutojbat te akʼope? (1 Juan 5:14). ¿Bin lekilal ya ata ta jujun kʼajkʼal ta swenta te la yakʼ ta lajel te jip jtul sNichʼane? (Efes. 1:7; Heb. 4:​14-16).

7. ¿Bin-utʼil koltayot te Vanessa te bin kʼax ta skuxlejal te j-alwanej Daniel?

⁷ Jtul hermana te kuxinem ta Haití te Vanessa b sbiil ay bin la sitintay te akʼbot bayal xiwel yuʼun. Jtul winik te pajal slumal sok ya xkʼoponot yuʼun sok ya xtikunbot mensaje jujun kʼajkʼal sok ya sujot yuʼun ya slekolin sbaik. Te Vanessa jamal la yalbey te ma skʼane, pero ilin te winik sok la yal te ay bin ma lek ya xpasbote. ¿Bin la spas te Vanessa yuʼun maba ya stsalot yuʼun te xiwel? Ay bin la spas swenta ya skanantay sba sok jtul anciano la skoltay te Vanessa yuʼun ya skʼanbey koltayel te j-aʼtel patanetik. Pero jaʼnix jich la sjultes ta yoʼtan bin-utʼil te Jehová la skanantay te j-abatetik yuʼun ta namey kʼinal. Jich ya yal: «Te machʼa tal ta jpensar jaʼ te j-alwanej Daniel. Manchukme maʼyuk bin chopol la spas, la yichʼ chʼojel koel ta chʼen te nojel ta chojetik, pero te Jehová la skoltay te Daniel. La kalbey te Jehová te la jpasix te bin ay ta jwenta spasel sok te yakuk skoltayone, ta patil maba xiwonix-a» (Dan. 6:​12-22).

¿BIN YAK TA SPASEL TE JEHOVÁ TA ORA INI?

8. ¿Bin schʼuunoj yoʼtan te David? (Salmo 56:8).

⁸ Manchukme ya xjuʼ ya yichʼ milel te David kʼalal ay ta Gat, maba la yakʼ sba ta tsalel yuʼun te xiwele. Jaʼ bajt ta yoʼtan te bin yak ta spasel te Jehová ta stojol ta yorail-abi. La sta ta ilel te yak ta tojobtesel yuʼun te Jehová, te yak ta kanantayel yuʼun sok te ya xkʼot ta yoʼtan te bin yaʼiyel la yaʼiy sbae (kʼopona Salmo 56:8). Jaʼnix jich ya xkoltayot yuʼun sok ya x-akʼbot smukʼul yoʼtan yuʼun te yamigotak te jun yoʼtanik ta stojol, jich bitʼil te Jonatán sok te mukʼul sacerdote Ahimélec (1 Sam. 20:​41, 42; 21:​6, 8, 9). Manchukme te Saúl ya skʼan ya smil-a te David maba juʼ yuʼun. Te David schʼuunoj yoʼtan te snaʼoj te Jehová te bin yak ta kʼaxel ta stojol sok te bin yaʼiyel ya yaʼiy sbae.

9. ¿Bin snaʼoj te Jehová?

⁹ Teme yakat ta sitintayel jun tulan wokolil sok ya xiwat, julukme ta awoʼtan te Jehová ma jaʼuknax ya snaʼ te bin yak ta kʼaxel ta atojol, jaʼnix jich ya snaʼ bin yaʼiyel ya awaʼiy aba. Jun ejemplo, te kʼalal ayik ta mosoinel-a te israeletik ta Egipto, te Jehová snaʼoj-a te bin kʼux ya yaʼiyik sok «te swocolique» (Éx. 3:7). Ta jun kʼayojil, te David la yal te Jehová yak ta yilel te tulan wokolil yak ta kʼaxel ta stojolike (Sal. 31:7). Jaʼnix jich kʼalal ya xkʼax swokol te israeletik ta skaj te ya skʼaxuntayik mantal, te Jehová «ha nix hich la yaʼiy wocol» (Is. 63:9). Ya yakʼ smukʼul koʼtantik snaʼel te ya xkʼot ta yoʼtan te Jehová te kʼalal ya xiwotik sok ya skʼan ya skoltayotik ta stsalel te xiwele.

10. ¿Bin ya yakʼ schʼuun awoʼtan te ya smel yoʼtan ta atojol te Jehová sok te spisil-ora ya skoltayate?

 ¹⁰ Teme yakotik ta sitintayel jun tulan wokolil te ya yakʼbotik xiwel, maniwan ya jtatik ta ilel bin-utʼil yak skoltaybelotik te Jehová. ¿Bin ya xjuʼ ya jpastik? Jkʼanbeytik te yakuk skoltayotik ta yilel te bin yak ta spasel ta jtojoltik (2 Rey. 6:​15-17). Patil jnoptik ini: ¿Labal yakʼ yip koʼtantik jun discurso o jun comentario te la kaʼiytik ta tsoblej? ¿Labal stij koʼtantik jun publicación, jun video o jun kʼayojil? ¿Aybal jtul hermano o hermana te la skʼoponbotik jun texto o la yakʼbotik smukʼul koʼtantik? Ya xjuʼ ya xchʼay ta koʼtantik te jaʼ majtanil yuʼun Jehová te mukʼul oʼtanil ya yakʼbotik ta swenta te Biblia sok te skʼuxul yoʼtan te kermanotaktike (Is. 65:13; Mar. 10:​29, 30). Te majtaniletik-abi ya yakʼ kiltik te ya smel yoʼtan ta jtojoltik sok te ya skʼan ya smukʼulin koʼtantik (Is. 49:​14-16).

11. ¿Bin koltayot yuʼun te Aida ta stsalel te xiwele?

¹¹ Jtul hermana te Aida sbiil te jaʼ slumal te Senegal la sitintay jun tulan wokolil sok la yil bin-utʼil koltayot yuʼun te Jehová. Te bitʼil jaʼ ba alal, te smeʼ stat ya skʼanik-a te yakuk x-aʼtej yuʼun ya sta bayal takʼin yuʼun ya swentain sba te Aida sok yuʼun ya xkanantayotik-euk. Pero, te Aida ma jichuk la spas, la sta ta nopel te ya x-och ta precursora, jaʼ yuʼun ma bayal takʼin ya sta. Te sfamilia ilinik sok la slabanik te Aida. Te Aida jich la yal: «Bayal la yakʼbon xiwel te ma xbajt juʼuk kuʼun skanantayel te jmeʼ jtat sok te ma lek jkʼoplal ya yalbonik te yantike. La kakʼbey smulin te Jehová te bitʼil batsʼej te wokolile». Pero jun buelta ay bin la yaʼiy ta jun discurso te bayal koltayot yuʼune: «Te hermano la sjultes ta koʼtantik te Jehová ya snaʼ ta lek te bin ya yakʼbotik jxiweltik. Jaʼnix jich, te ancianoetik sok yantik hermanoetik ay bin la yalbonik yuʼun ya skoltayonik ta yilel te kʼuxon ta yoʼtan te Jehová, jich kʼunkʼun lek la kaʼiy jba. Jajch jkʼoponxan te Jehová sok kʼalal la kil bin-utʼil la sjakʼbon te jkʼope, la yakʼbon bayal slamalil koʼtan». Ta patil la sta jun yaʼtel te ma jaʼuknax koltayot yuʼun ya x-abatin ta precursora, jaʼnix jich yuʼun ya skoltay te smeʼ stat sok yantik ants winiketik. Jich ya yal: «Jnopoj te ya smukʼulin koʼtan ta jkʼaxel te Jehová. Te kʼalal ya jkʼopone, ya xchʼay bael te jxiwele».

 ¿BIN YA XBAJT SPAS TA PAJEL CHAʼBEJ TE JEHOVÁ?

12. Jich bin-utʼil ya yal Salmo 56:​9, ¿bin snaʼoj-a te David?

¹² (Kʼopona Salmo 56:9). Te versículo ini ya yakʼ jnaʼtik te bin yan la spas te David yuʼun maba ya stsalot yuʼun te xiwel te kʼalal yak ta leel yuʼun ya yichʼ milel, la snopilan ta yoʼtan te bin ya xbajt spas te Jehová ta stojol ta pajel chaʼbej. Snaʼoj-a te ya xbajt koltayotuk yuʼun te Dios ta mero yorail. Te Jehová jamal yalojix-a te jaʼ ya x-och ta ajwalil te David ta Israel (1 Sam. 16:​1, 13). Te David, jaʼnix jich snaʼoj teme jamal yalojix te Jehová, yananix xkʼot ta pasel-a.

13. ¿Bin-a te jnaʼojtik te ya xbajt spas ta pajel chaʼbej te Jehová?

¹³ ¿Bin jamal yalojbotik te Jehová? Te Jehová ma yalojbotik te ma xkʼax jwokoltike. c Pero chikan biluk wokolil ya jsitintaytik ta ora ini, te Jehová jamal yaloj te ta achʼ balumilal ya xbajt slajin spisil te wokoliletike (Is. 25:​7-9). Ay yuʼel yuʼun ya schaʼkuxajtes te machʼatik lajemikix, yuʼun ya slekubtesotik sok yuʼun ya slajin spisil te jkontrataktik (1 Juan 4:4).

14. ¿Bin ya xjuʼ ya jnopilantik?

¹⁴ Te kʼalal ya xiwat, nopilana ta awoʼtan te bin ya xbajt spas ta pajel chaʼbej te Jehová. Nopa awaʼiy bin yilel ya xkʼot te kuxlejalil kʼalal maʼyukix-a te Satanás, kʼalal maʼyukix-a te chopol ants winiketik sok jaʼnax ay ants winiketik te lek stalelike, sok te kʼalal kʼunkʼun ya xchʼay bael te mulile. Ta 2014 ta jun mukʼul tsoblej yuʼun oxeb kʼajkʼal la yichʼ akʼel ta ilel jun demostración te ya xjuʼ ya skoltayotik ta snopilanel te bin yakotik ta smaliyele. Tey-a jtul hermano yak ta yalel sok te sfamilia te bin ya yal 2 Timoteo 3:​1-5 te jaʼuk jun j-albilkʼop te ya yalbey skʼoplal te bin yilel ya xkʼot te kuxinel ta Nichimal Kʼinal, jich la yal: «Ta achʼ balumilal kʼax tʼujbil ya xkʼot spisil, melel te ants winiketik kʼux ya yaʼiy ta yoʼtan te spatxujkik, ya xbikʼtaj yoʼtanik yuʼun te kʼulejalil te ay ta Biblia, ma stoy sbaik, pekʼel yoʼtanik, ya yichʼik ta mukʼ te Dios, ya schʼuunbey smantal smeʼ statik, ya snaʼik yalel wokol sok jun yoʼtanik, bayal skʼuxul yoʼtanik, ya x-ayin acuerdo ta yoʼtanik, lek ya xkʼopojik ta stojol te yantik, ya snaʼ skomel sbaik, manso yoʼtanik, bayal skʼoplal ta yoʼtanik te bintik leke, ya smukʼulin koʼtantik te ants winiketik sok ay razón ta yoʼtanik, maʼyuk stoybail ta yoʼtanik, jaʼ kʼux ta yoʼtanik te Diose ma jaʼuk te bin mulantik sba ta balumilal sok smelelil ya yichʼik ta mukʼ te Diose. Jokinlaname». ¿Kʼayemotikbal ta yalbeyel skʼoplal sok te jfamiliatik o sok te hermanoetik te bin yilel ya xkʼot te kuxlejalil ta achʼ balumilal?

15. ¿Bin koltayot yuʼun te Tanja ta stsalel te xiwel?

¹⁵ Jtul hermana te talem ta Macedonia del Norte te Tanja sbiile juʼ yuʼun stsalel te xiwel kʼalal la snopilan ta yoʼtan te bin jamal yaloj ya spas te Jehová. Te Tanja ya yal te kʼalal jajch snop te Biblia, bayal ilin te smeʼ stat, jich ya yal: «Kʼot ta pasel te bin jxiʼoj-ae. Jujun buelta te ya sujton ta tsoblej ya smajon te jmamae. Te jmeʼ jtat la yalbonik te ya smilonik teme ya x-ochon ta Testigo». Tenot lokʼel ta sna. ¿Bin la spas? Jich ya yal: «Jaʼ la kakʼ ta koʼtan snopilanel teme jun koʼtan ya kakʼ jba ta stojol te Jehová tseʼel koʼtan ya kaʼiy jba ta sbajtelkʼinal. La kalbey jba te manchukme ay bin ya xchʼay kuʼun ta ora ini, ta achʼ balumilal te Jehová ya xbajt smajtanteson sok ya xbajt yakʼ chʼayuk ta koʼtan te bin ma lek kʼaxem ta jkuxlejale». Te Tanja jun yoʼtan la yakʼ sba ta stojol te Jehová, sok la sta jun lugar te banti ya xkuxin. Nujpunem sok jtul lekil  hermano sok tseʼel yoʼtan ya x-abatinik ta stojol te Jehová ta tiempo completo.

KAKʼBEYTIKXAN YICHʼ YIP TE SMUKʼUL KOʼTANTIK TA STOJOL TE JEHOVÁ TA ORA INI

16. ¿Bin ya xbajt skoltayotik yuʼun maba ya xiwotik kʼalal ya xkʼot ta pasel te bin ya yal Lucas 21:​26-28?

¹⁶ Ta yorail te tulan wokolil, te ants winiketik ya «xchʼay kʼinal yaʼiyik yuʼun xiwel». Pero te j-abatotik yuʼun te Jehová maba ya xiwotik sok jun koʼtan ya kakʼ jbatik (kʼopona Lucas 21:​26-28). ¿Bin yuʼun? Melel kʼayemotik-a te ya smukʼulin koʼtantik te Jehová. Te Tanja ya yal te bin kʼax ta skuxlejal ta namey ya xkoltayot ta ora ini ta sitintayel tulan wokoliletik, jich ya yal: «Kiloj te spisil-ora ya skoltayotik te Jehová sok ya yakʼbotik te sbendicione. Jich yilel te jaʼ ay ta skʼab te ants winiketik te bin ya xkʼax ta jkuxlejaltik, pero ma xjuʼ ya xjelawik, melel jaʼ ayxan yuʼel te Jehová. Manchukme kʼax tulan te wokolile, yananix laj-a».

17. ¿Bin-utʼil ya xbajt skoltayotik te texto yuʼun te jaʼbil 2024? (Ilawil te foto ta yelaw te revista).

¹⁷ Manchukme te balumilal ini nojel ta bintik ya yakʼbotik xiwel, jichotik bitʼil te David sok ma xkakʼ te ya stsalotik te xiwele. Te texto yuʼun te jaʼbil 2024 jaʼ te bin la yal te David ta stojol te Jehová: «Cʼalal ya xtal xiwel ta coʼtan, haʼat ya smucʼulinat coʼtan» (Sal. 56:3). Jun libro te ya yilbey skʼoplal te Biblia jich la schol ta alel ta swenta te versículo ini: «Te David ma jaʼuk ya snop te bin ya x-akʼbot xiwel yuʼune sok ma jaʼuk ya xbajt ta yoʼtan te swokole, jaʼ ya smukʼulin yoʼtan te machʼa ya xjuʼ ya xkoltayot yuʼune». Ayuk ta awoʼtan ta sjunal jaʼbil te texto ini, kʼaxtoxan-a teme ya asitintay jun tulan wokolil. Lokʼesa tiempo yuʼun ya anopilan ta awoʼtan te bin la spas te Jehová, te bin ya spas ta ora ini sok te bin yato spas ta pajel chaʼbeje. Teme jich ya apase, jich bitʼil te David, ya xjuʼ ya awal: «Ha ya smucʼulin coʼtan te Diose, ma ba ya xiwon» (Sal. 56:4).