1. ¿Bin yuʼun kʼax mukʼ skʼoplal te Snaʼojibal slajel te Jesús? (Lucas 22:​19, 20).

 TE J-ABATOTIK yuʼun Jehová, kʼax mukʼ skʼoplal ta koʼtantik te Snaʼojibal slajel te Jesús te ya yichʼ pasel ta jujun jaʼbil. Jaʼ te bin la yal ta mantal te Jesús te ya yichʼ pasel (kʼopona Lucas 22:​19, 20). ¡Koʼtantikuk te ya xkʼotix te kʼajkʼal-abi! ¿Bin yuʼun? Kiltik cheʼoxeb swentail.

2. ¿Bintik yuʼun te ya jkʼantik te ya xkʼotix yorail te Snaʼojibal slajel te Jesús?

² Te Snaʼojibal slajel te Jesús ya skoltayotik ta snaʼel te kʼax mukʼ skʼoplal te stojol kolel. Ya sjultes ta koʼtantik chaʼoxchajp te bin ya xjuʼ ya jpastik yuʼun ya kakʼtik ta ilel te ya kaltik wokol te bitʼil la yakʼ sba ta lajel te Jesús (2 Cor. 5:​14, 15). Ya yakʼ te ya jokin jbatik sok te kermanotaktik sok te pajal ya kakʼbey jba smukʼul koʼtantike (Rom. 1:12). Jujun jaʼbil, bayal te machʼatik namajemik ta stojol te Jehová ya xkʼotik ta Snaʼojibal slajel te Jesús, sok ay chaʼoxtulik te ya skʼan ya xchaʼsujtik ta stojol te Jehová ta swenta te kʼuxul oʼtanil ya x-akʼbot yilik yuʼun te hermanoetik ta kʼajkʼal-abi. Jaʼnix jich, bayal ants winiketik ya smulanik te bin ya yilik sok te bin ya schʼam yaʼiyik, sok ya staik ta nopel te ya skʼan ya snopik te Biblia. Jaʼ yuʼun, spisil ini ya yakʼ te kʼax mukʼ skʼoplal ta koʼtantik te Snaʼojibal slajel te Jesuse.

3. ¿Bin-utʼil ya skoltayotik te Snaʼojibal slajel te Jesús ta yilel te jun-nax ay te lum yuʼun te Jehová? (Jaʼnix jich ilawil te dibujo).

³ Jaʼnix jich ya jkʼantik te ya xkʼotix te kʼajkʼal-abi, melel tey ya xchiknaj ta ilel-a te jun-nax ay te lum yuʼun te Jehová. Ta swolol balumilal, te testigoetik yuʼun Jehová ya stsob sbaik ta jujun lugar te kʼalal ya xmal bael te kʼajkʼale. Jpisiltik ya jchʼam kaʼiytik jun discurso te ya yal te kʼax mukʼ skʼoplal te stojol kolel, ya jkʼayojtaytik cheb kʼayojiletik, ya yichʼ kʼasesel te pan sok te vino, sok spisil koʼtantik ya kaltik «jichuk» ta  chaneb oración. Jich ya spasik ta swolol balumilal spisil te congregacionetik. Kʼax tseʼel yoʼtan ya yaʼiy sbaik te Jehová sok te Jesús te kʼalal ya yilik te jpisiltik ya kichʼtik ta mukʼ ta swolol balumilal.

4. ¿Bin jojkʼoyeletik ya kakʼbeytik sujtib ta artículo ini?

⁴ Ta artículo ini ya kakʼbeytik sujtib te jojkʼoyeletik ini: ¿bin-utʼil ya xjuʼ ya jchajpan jbatik ta swenta te Snaʼojibal slajel te Jesús?, ¿bin-utʼil ya xjuʼ ya jkoltaytik te yantik yuʼun ya sta slekilalik-euk? Sok ¿bin ya xjuʼ ya jpastik yuʼun ya jkoltaytik te machʼatik namajemik ta stojol te Jehová? Yakʼbeyel sujtib te jojkʼoyeletik-abi ya xbajt skoltayotik yuʼun chapalotik te kʼalal ya xkʼot yorail te Snaʼojibal slajel te Jesuse.

¿BIN-UTʼIL YA XJUʼ YA JCHAJPAN JBATIK TA SWENTA TE SNAʼOJIBAL SLAJEL TE JESÚS?

5. 1) ¿Bin yuʼun ya skʼan ya jnopilan ta koʼtantik te kʼax mukʼ skʼoplal te stojol kolele? (Salmo 49:​7, 8). 2) Chola te bin la anop ta video ¿Bin yuʼun laj te Jesuse?

⁵ Jun te bin-utʼil ya xjuʼ ya jchajpan jbatik ta Snaʼojibal slajel te Jesús jaʼ te kʼalal ya jnopilantik ta koʼtantik te kʼax mukʼ skʼoplal te la yakʼ sba ta lajel te Jesucristoe. Ta jtukeltik ma xjuʼ kuʼuntik te libre ya xjilotik ta swenta te mulil sok te lajele (kʼopona Salmo 49:​7, 8; jaʼnix jich ilawil te video ¿Bin yuʼun laj te Jesuse?). a Jaʼ yuʼun, te Jehová la yakʼ ta lajel te sNichʼan ta jtojoltik, kʼax mukʼ skʼoplal te bin la spasik ta schebalike (Rom. 6:23). Bayalxan skʼoplal ya kiltik te stojol kolel te kʼalal ya jnopilan ta koʼtantik te bin la spasik ta jtojoltik te Jehová sok te Jesús. Ta ora ini, ya xbajt kilbeytik skʼoplal cheʼoxeb te bin la slokʼes ta yoʼtanik spasel te Jehová sok te Jesús ta jtojoltik. Ta sbabial, ya kiltik te bin smakojbey skʼoplal te stojol kolele.

6. ¿Bintik smakojbey skʼoplal te stojol kolel?

⁶ Te stojol kolel jaʼ te bin ya yichʼ tojel swenta yuʼun ay bin ya kichʼtik sutbeyel. Te Adán toj la yichʼ pasel. Te kʼalal la sta smule, maba ya xjuʼ ya xkuxinix ta sbajtelkʼinal jaʼnix jich kʼot ta stojol-euk te stsʼumbale. Yuʼun ya yichʼ chaʼtael te bin la xchʼay te Adán, te Jesús la yakʼ te stojil kuxlejal ta milbil majtanil. Te jayeb tiempo kuxin te Jesús liʼ ta Balumilal, «maba la sle smul stukel sok maʼyuk la yaʼiy loʼlaywanej» (1 Ped. 2:22). Maʼyuk smul-a laj te Jesús, jaʼ yuʼun jaʼ pajal sok te skuxlejal la schʼay te Adán (1 Cor. 15:45; 1 Tim. 2:6).

7. Ala cheʼoxebuk pruebaetik te la sitintay te Jesús.

⁷ Kʼalal kuxin ta Balumilal te Jesús, spisil-ora la schʼuunbey skʼop te sTat te ay ta chʼulchan manchukme bayal prueba kʼax ta stojol. Kʼalal chʼinto-a te Jesús, la schʼuunbey skʼop te smeʼ stat manchukme maba tojik (Luc. 2:51). Kʼalal jchʼielix-a te Jesús, ayniwan la yichʼ tenel yuʼun ya skʼaxuntaybey skʼop te smeʼ stat o te ma junukix yoʼtan ta stojol-a te Jehová. Kʼalal ayix yaʼbilal-a te Jesús, la yichʼ pasel ta prueba yuʼun te Satanás ta swenta te jun yoʼtan ta stojol te Jehová (Mat. 4:​1-11). Te Satanás yakʼoj ta yoʼtan-a te yakuk sta smul te Jesús yuʼun jich ma xyakʼ te stojol kolel.

8. ¿Binxan pruebaetik la sitintay te Jesús?

⁸ Te Jesús jaʼnix jich la sitintay pruebaetik te kʼalal la schol skʼop Dios, la yichʼ kontrainel yuʼun te skontratak sok la yichʼ albeyel te ya xmilote (Luc. 4:​28, 29; 13:31). Jaʼnix jich la yil swokol ta swenta te bitʼil ma tojuk te jnopojeletik yuʼun (Mar. 9:​33, 34). Sok te kʼalal la yichʼ alel te ya yichʼ milele, la smajik sok bayal la stseʼlayik. Ta patil la smilik jich bitʼil jtul j-elekʼ sok kʼax bayal swokol (Heb. 12:​1-3). Sok te kʼalal nopol ya xlajix-a, te Jehová maba la skanantayix, jaʼ yuʼun  stukel kujch yuʼun te prueba te kʼalal laje (Mat. 27:46). b

9. ¿Bin yaʼiyel ya kaʼiy jbatik te kʼalal ya jnoptik ta swenta te la yakʼ sba ta lajel te Jesús? (1 Pedro 1:8).

⁹ Kʼax mukʼ skʼoplal te bin la spas te Jesús yuʼun ya stoj te jkoleltik. Te kʼalal ya jnop ta koʼtantik spisil te bintik la spas te Jesús ta jtojoltik, kʼux-xan ya kaʼiy ta koʼtantik (kʼopona 1 Pedro 1:8).

10. ¿Bin la spas te Jehová yuʼun ya stoj jkoleltik te Jesús?

¹⁰ ¿Bin la spas te Jehová yuʼun ya stoj te jkoleltik te Jesús? Jich bin-utʼil ya jnaʼtik, te Jehová sok te sNichʼan kʼax lek ya yil sbaik (Prov. 8:30). Jnop kaʼiytik te bin yaʼiyel la yaʼiy sba te Jehová te kʼalal la yil te bayal pruebaetik kʼax ta stojol te Jesús liʼ ta Balumilal. Ya jnaʼtik te kʼux la yaʼiy te kʼalal la yil te ya x-utsʼinbot, te ma xkʼanot sok te bayal la yakʼbeyik swokol te sNichʼane.

11. ¿Bin ejemplo ya skoltayotik yuʼun ya xkʼot ta koʼtantik te bin yaʼiyel la yaʼiy sba te Jehová te kʼalal la yichʼ milel te sNichʼane?

¹¹ Te meʼil tatiletik te lajem yal snichʼnabik ya snaʼik te kʼax kʼux ta aʼiyel te kʼalal jich ya xkʼot ta pasele. Manchukme ay schʼuunel koʼtantik ta swenta te chaʼkuxajel, kʼuxnanix ya kaʼiytik-a te kʼalal ya xlaj te machʼa kʼux ta koʼtantike. Te ejemplo ini ya skoltayotik ta yichʼbeyel swentail te bin yaʼiyel la yaʼiy sba te Jehová te kʼalal la yil te kʼax bayal swokol te sNichʼan sok te la yichʼ milel ta jaʼbil 33 (Mat. 3:17). c

12. ¿Bin-utʼil ya xjuʼ ya jtuuntestik ta lek te jtiempotik te bitʼil ayto skʼan te ya xkʼot skʼajkʼalel te Snaʼojibal slajel te Jesús?

¹² Te bitʼil ayto skʼan te ya xkʼot skʼajkʼalel te Snaʼojibal slajel te Jesús, ¿bin yuʼun maba ya anop ta swenta te stojol kolel kʼalal ya anop ta atukel te Biblia o te kʼalal ya awichʼ ta mukʼ te Dios sok te afamilia? Tuuntesa te Sleojibal temaetik yuʼun te testigoetik yuʼun Jehová o yantik publicacionetik yuʼun ya awilbeyxan skʼoplal te tema-abi. d Jaʼnix jich tʼuna te skʼoponel te Biblia te ya yichʼ akʼel ta semana yuʼun te Snaʼojibal slajel te Jesús te ya xchiknaj ta Sjunal kaʼteltik ta swenta tsoblej: Jkuxlejaltik sok Kaʼteltik ta swenta Dios. Sok ilame te yichʼel ta mukʼ te Dios ta jujun sab te chajpanbil ta skʼajkʼalel te Snaʼojibal slajel te Jesús. Teme ya jchajpan jbatik ta swenta te kʼajkʼal-abi, jaʼnix jich ya xjuʼ ya jkoltaytik te yantik yuʼun ya sta slekilalik-euk (Esd. 7:10).

 JKOLTAYTIK TE YANTIK TA SNAʼOJIBAL SLAJEL TE JESÚS

13. ¿Bin-a te nail ya skʼan ya jpastik yuʼun ya jkoltaytik te yantik ta skʼajkʼalel te Snaʼojibal slajel te Jesús?

¹³ ¿Bin-utʼil ya xjuʼ ya jkoltaytik te yantik yuʼun ya sta slekilalik ta skʼajkʼalel te Snaʼojibal slajel te Jesús? Ta sbabial, ya skʼan ya kikʼtik yuʼun ya xkʼotik ta kʼajkʼal-abi. Pero, ma jaʼuknax ya jpuktik te invitación ta scholel skʼop Dios, jaʼnix jich ya xjuʼ ya jpastik jun lista te banti ya jtsʼibaytik te sbiil te machʼatik ya jkʼan ya kikʼtik ta kʼajkʼal-abi, jich bitʼil te jfamiliatik, te joytik ta aʼtel, te joytik ta escuela sok yantikxan te machʼatik ya jnaʼbeytik sbae. Teme laj koʼtantik ta spukel te invitación te pasbil imprimir, ya xjuʼ ya jtikunbeytik jun enlace te banti ya xjuʼ ya staik te invitación. Ma jnaʼtik te jaytul ya xkʼotik ta lokʼele (Ecl. 11:6).

14. ¿Bin lek ya xlokʼ-a te kʼalal joʼotiknix ya kakʼbeytik te invitación te machʼa ya jnaʼbeytik sbae? Ala junuk experiencia.

¹⁴ Mame jkuytik te maʼyuk bin lek ya xlokʼ kuʼuntik-a te kʼalal ya jpuktik jun invitación. Jun buelta, jtul hermana chamnax yoʼtan yuʼun te kʼalal albot yuʼun te smamalal te ya xjokinot bael ta Snaʼojibal slajel te Jesús. ¿Bin yuʼun te chamnax yoʼtan te hermana? Melel bayal buelta la skʼanbey te smamalal te yakuk xjokinot baele, pero maʼyuk bin-ora baem. Pero, ¿bin yuʼun te ya skʼan ya xbajtix ta ora ini? Te hermana cholbot yaʼiy yuʼun te smamalal te akʼbot jun invitación yuʼun jtul anciano te ya snaʼbey sbae. Te smamalal te hermana kʼot ta Snaʼojibal slajel te Jesús ta jaʼbil-abi sok ta yantikxan jaʼbiletik.

15. ¿Bin ya skʼan ya xjul ta koʼtantik te kʼalal ay machʼa ya kikʼtik ta Snaʼojibal slajel te Jesús?

¹⁵ Juluk ta koʼtantik te kʼalal ay machʼa ya kikʼtik ta Snaʼojibal slajel te Jesús, bayalniwan jojkʼoyeletik ya xjuʼ ya spasbey sba, kʼaxtoxan-a teme maʼyuk kʼoem ta tsoblejetik kuʼuntike. Jaʼ yuʼun lek teme ya jnoptik te bin jojkʼoyeletik ya xjuʼ ya spasbey sba sok bin sujtib ya kakʼbeytik (Col. 4:6). Yaniwan xjuʼ te jich ya sjojkʼoybey sba: «¿Bin ya yichʼ pasel tey-a? ¿Jayeb tiempo ya xjalaj te tsoblej? ¿Bin-utʼil ya skʼan ya jchajpan bael jba? ¿Yabal skʼan ya jtoj te ochibal?  ¿Yabal xkʼax yichʼ kʼanel takʼin tey-a?». Jaʼnix jich ya xjuʼ ya jojkʼoybeytik te machʼa la kikʼtik teme ay jojkʼoyel yuʼun sok ya jcholbeytik yaʼiy te bin ya skʼan ya snaʼe. Jaʼnix jich ya xjuʼ ya jtuuntestik te videoetik Snaʼojibal slajel te Jesús sok ¿Bin ya yichʼ pasel ta tsoblejetik kuʼunkotik? Sok ta lección 28 yuʼun te libro Mulana ya schol kaʼiytik te bin ya xjuʼ ya jcholbeytik yaʼiy te ants winike.

16. ¿Binxan jojkʼoyeletik ya xjuʼ ya spasbey sba te machʼa ya xkʼot ta Snaʼojibal slajel te Jesús?

¹⁶ Te kʼalal kʼaxemix-a te Snaʼojibal slajel te Jesús, ayniwan jojkʼoyeletik te ya spasbey sba te machʼa kʼote. Yaniwan sjojkʼoybey sba: ¿bin yuʼun te maʼyuk (o maʼyuk bayal machʼa) la sweʼ te pan sok la yuchʼ te vino? Jaʼnix jich yaniwan xjuʼ ya sjojkʼoybey sba jayeb buelta ya jpastik te Snaʼojibal slajel te Jesús. Sok yaniwan skʼan ya snaʼ teme jich ya jpastik ta jujun tsoblej kuʼuntik. Manchukme te discurso ta swenta te Snaʼojibal slajel te Jesús ya yalbey skʼoplal ta swenta-abi, yaniwan skʼan ya jcholbeytikxan yaʼiy ta lek te ants winike. Yuʼun ya kakʼbeytik sujtib cheʼoxeb te jojkʼoyeletik yuʼune, ya xjuʼ ya jtuuntestik te artículo te ay ta jw.org «¿Bin yuʼun te stestigotak Jehová yan bitʼil ya spasik te Weʼel Uchʼel yuʼun Kajwaltik te bitʼil yantik religione?». Ya skʼan ya jpastik te ban kʼalal ya xjuʼ kuʼuntik te kʼalal mato kʼoem yorail, ta yorail sok te kʼalal kʼaxix-a te Snaʼojibal slajel te Jesús yuʼun ya jkoltaytik te machʼatik «jich yoʼtanik» yuʼun ya sta slekilalik ta kʼajkʼal-abi te kʼax mukʼ skʼoplale (Hech. 13:48).

JKOLTAYTIK TE MACHʼATIK NAMAJEMIK TA STOJOL TE JEHOVÁ

17. ¿Bin ya xjuʼ ya spasik te ancianoetik yuʼun ya skoltayik te machʼatik namajemik ta stojol te Jehová? (Ezequiel 34:​12, 16).

¹⁷ ¿Bin ya xjuʼ ya spas te ancianoetik ta yorail te Snaʼojibal slajel te Jesús yuʼun ya skoltayik te machʼatik namajemik ta stojol te Jehová? Jaʼ te kʼalal ya yakʼbeyik yil te ay skʼoplal ta yoʼtanik sok te kʼux ta yoʼtanike (kʼopona Ezequiel 34:​12, 16). Ancianoetik, te kʼalal mato xkʼot yorail-a te Snaʼojibal slajel te Jesús, kʼopona te hermanoetik te namajemik ta stojol te Jehová. Altiklanbeyaik te ya amel awoʼtanik ta stojol sok te  ya akʼan ya akoltayike. Ikʼaik ta Snaʼojibal slajel te Jesús sok teme ya xkʼotike, akʼbeya yil skʼuxul awoʼtanik. Te kʼalal kʼaxemix-a te Snaʼojibal slajel te Jesús, kʼoponaikxan te hermanoetik-abi sok koltayaik ta swenta te schʼuunel yoʼtanik yuʼun jich ya xjuʼ ya sujtik talel ta stojol te Jehová (1 Ped. 2:25).

18. ¿Bin-utʼil ya xjuʼ ya jkoltaytik te machʼatik namajemik ta stojol te Jehová? (Romanos 12:10).

¹⁸ Jpisiltik ya xjuʼ ya jkoltaytik te machʼatik namajemik ta stojol te Jehová te ya xkʼotik ta Snaʼojibal slajel te Jesús. ¿Bin-utʼil ya xjuʼ ya jpastik? Jaʼ te kʼalal ya kakʼbeytik yil te skʼuxul koʼtantik, slekil koʼtantik sok te ya kichʼtik ta mukʼ (kʼopona Romanos 12:10). Juluk ta koʼtantik te tuminchijetik yuʼun te Jehová wokolniwan ya yaʼiyik te ya xkʼotik yan buelta ta tsoblej. Yaniwan smel yoʼtanik yuʼun te bin yilel ya x-ilot yuʼun te hermanoetik. e Jaʼ yuʼun, mame jpastik jojkʼoyeletik o ay bin ya kaltik te ma lek ya yaʼiy sbaik yuʼune (1 Tes. 5:11). Jaʼik kermanotaktik sok tseʼel koʼtantik yuʼun te yan buelta pajalnax ya kichʼtik ta mukʼ te Jehová (Sal. 119:176; Hech. 20:35).

19. ¿Bintik lekilal ya jtatik-a te kʼalal ya jpastik te Snaʼojibal slajel te Jesuse?

¹⁹ Jich te bin-utʼil la kilbeytikix skʼoplal, ma chamuk koʼtantik yuʼun te la yal ta mantal te Jesús te yakuk jpastik te Snaʼojibal te slajele. Te kʼalal ya jpastike, ya jta jlekilaltik yuʼun, jaʼnix jich-euk te yantik ants winiketike (Is. 48:​17, 18). Ya skoltayotik yuʼun kʼux ya kaʼiytikxan ta koʼtantik te Jehová sok te Jesús. Ya skoltayotik yuʼun ya kakʼtik ta ilel te ya kaltik wokol yuʼun te bin la spasik ta jtojoltike. Jaʼnix jich ya skoltayotik yuʼun jun ya x-ayinotikxan sok te hermanoetik sok ya yakʼ te ya jkoltaytik te yantik ants winiketik ta snaʼel te bin ya skʼan ya spasik yuʼun ya smulanik te bendicionetik te ya yakʼ te stojol kolele. Jaʼ yuʼun jpastik tulan yuʼun chapalotik ta Snaʼojibal slajel te Jesús, te kʼajkʼal te kʼax mukʼ skʼoplal ta jujun jaʼbil.