1. ¿Bin yilel ya xtal ta awoʼtan te Jehová?

 ¿AYBAL anopoj bin yilel te Jehová? Te kʼalal ya akʼopon, ¿bin yilel ya xtal ta awoʼtan? Manchukme ma xjuʼ ta ilel, te Biblia bayal bin-utʼil ya yakʼ jnaʼtik te bin yilele, ya yal te «ha cʼahcʼal soc mahquilal», sok «kʼajkʼ te ya xlajinwane» (Sal. 84:11; Heb. 12:29). Ta jun najalsitil, te j-alwanej Ezequiel la yal te Jehová jich kʼoem bin-utʼil tʼujbil yaxal ton, te bayal stsʼanabul sok jich bitʼil xojob (Ezeq. 1:​26-28). Te kʼalal jich ya jnoptik ta stojol te Jehová, yaniwan xnijk koʼtantik o ya xiwotik yuʼun.

2. ¿Bin yuʼun ay wokol ya yaʼiy te ants winiketik te ya xnoptsajik ta stojol te Diose?

² Te bitʼil ma xjuʼ ya kiltik te Jehová wokolniwan ya kaʼiytik schʼuunel te kʼuxotik ya yoʼtane. O ta swenta te bin kʼaxem ta jkuxlejaltik —jich bitʼil te ma kʼux la yaʼiyotik te jpapatik— yaniwan yakʼ jnoptik te maʼyuk bin-ora kʼux ya xbajt yaʼiyotik te Diose. Te Jehová ya xkʼot ta yoʼtan te bin yaʼiyel ya kaʼiy jbatik ta swenta te bintik kʼaxem ta jkuxlejaltik. Yuʼun ya xkʼot ta koʼtantik te kʼuxotik ta yoʼtane, ya yalbotik ta Biblia te tʼujbil taleliletik yuʼune.

3. ¿Bin yuʼun ya kalbeytik skʼoplal te Jehová sok te skʼuxul yoʼtan?

³ Te kʼopil te leknax ya yalbey skʼoplal te Jehová jaʼ te kʼuxul oʼtanil (1 Juan 4:8). Te talelil ini ya yalbey skʼoplal te spisil ya spas sok skʼuxul yoʼtan. Te skʼuxul yoʼtan kʼax mukʼ te jaʼnix jich kʼux ta yoʼtan te machʼatik ma kʼux ya x-aʼiyot yuʼune (Mat. 5:​44, 45). Ta artículo ini, ya kalbeytik skʼoplal te Jehová sok te skʼuxul yoʼtan. Kʼalal ya jnaʼbeytikxan sba, kʼux-xan ya kaʼiy ta koʼtantik.

KʼAX KʼUXOTIK TA YOʼTAN TE JEHOVÁ

4. ¿Bin yaʼiyel ya awaʼiy aba te kʼalal ya anop te ay skʼuxul yoʼtan te Jehová? (Jaʼnix jich ilawil te dibujo).

⁴ «Bayal kʼuxotik ta yoʼtan te Jehová» (Sant. 5:11). Ta Biblia, te Jehová ya spajaltay sba sok jtul mamail te bayal skʼuxul  yoʼtane (Is. 66:​12, 13). Nopa awaʼiy ta swenta jtul mamail te ya skanantay ta lek te yale. Sok skʼuxul yoʼtan ya yakʼ ta sjol yakan sok tʼujbilnax te bitʼil ya skʼopon. Te kʼalal ya x-okʼ te yal o ay bin kʼux ya yaʼiy, oranax ya yakʼbey te bin ya xtuun yuʼune. Jaʼnix jich, te Jehová ya sjokinotik te kʼalal ya jmel koʼtantik. Jaʼ yuʼun jtul salmista jich la stsʼibay: «Te cʼalal ay bayel bintic ya xcʼopoj coʼtan yuʼun, te smucʼubtesel-oʼtanil awuʼun la yaʼbon stseʼelil coʼtan» (Sal. 94:19).

5. ¿Bin ya anop ta swenta te skʼuxul yoʼtan te Jehová?

⁵ Te Jehová jun yoʼtan (Sal. 103:8). Maba ya yijkitayotik manchukme ya xchʼayotik. Bayal buelta, te israeletik la yijkitayik te Jehová; pero, te kʼalal ya sujtes yoʼtanik ya yakʼtiklanbey yil te kʼux ta yoʼtan. Ta jun buelta jich la yalbey te lum yuʼun: «Bayel acʼoblal ya caʼiy ta jtojol, ichʼbilat ta cuenta cuʼun soc cʼuxat ta coʼtan» (Is. 43:​4, 5). Sok maba jelonem stalel te Jehová. Ya schʼuun koʼtantik te jaʼnix jich kʼuxotik ta yoʼtan. Manchukme ay ya jpastik tulan mulil, maʼyuk bin-ora ya yijkitayotik. Teme ya jsujtes koʼtantik sok ya xnoptsajotik ta stojol, ya yakʼ kiltik te skʼuxul yoʼtane. Te Jehová jamal yaloj te «ya spas bayel perdón» (Is. 55:7). Te Biblia ya yal te kʼalal ya spas perdón te Jehová, ya yakʼ te xkuxetnax koʼtantik yuʼun (Hech. 3:19).

6. ¿Bin ya yakʼ jnoptik te Zacarías 2:8 ta stojol te Jehová?

⁶ (Kʼopona Zacarías 2:8). Te Jehová jich ya spajaltayotik bitʼil schʼuhlel sit. Te jsitik kʼax mukʼ skʼoplal ta jbakʼetaltik sok jtebnax stael. Jich kʼoem te jich yak ta yalel te Jehová: «Te kʼalal ay machʼa ya yutsʼinex, jich kʼoem te ya yutsʼinbon te bin kʼax bayal skʼoplal ta koʼtane». Te bitʼil kʼuxotik ta yoʼtan te Jehová ya smel yoʼtan yuʼun te bin yaʼiyel ya kaʼiy jbatik sok ya skʼan ya skanantayotik. Te kʼalal ya xkʼax jwokoltik, jaʼnix jich ya xkʼax swokol-euk, jaʼ yuʼun ya xjuʼ jich ya kalbeytik: «Canantayawon hich te bin utʼil schʼuhlel asit» (Sal. 17:8).

7. ¿Bin yuʼun ya skʼan ya schʼuun koʼtantik te kʼuxotik ta yoʼtan te Jehová?

⁷ Te Jehová ya skʼan te ya schʼuun awoʼtan te kʼuxat ta yoʼtan. Pero jaʼnix jich ya xkʼot ta yoʼtan te ayniwan ya awal te ma kʼuxat ta yoʼtan ta skaj te bin ya xkʼax ta  akuxlejal o te ay awokole. ¿Bin ya xbajt skoltayat ta schʼuunel te kʼuxat ta yoʼtane? Jaʼ te yakuk awil te bin-utʼil te Jehová ya yakʼ ta ilel te kʼux ta yoʼtan te Jesús, te machʼatik tsabilik yuʼun ya xbajtik ta chʼulchan sok ta jpisiltik. Jaʼ te bin ya xbajt jnopbeytik skʼoplal ta ora ini.

TE JEHOVÁ YA YAKʼ TA ILEL TE SKʼUXUL YOʼTAN

8. ¿Bin yuʼun schʼuunoj yoʼtan te Jesús te kʼux aʼiybil yuʼun te sTate?

⁸ Te Jehová sok te Jesús bayal jaʼbil sjokinoj sbaik. Jaʼ yuʼun jun-nax ayik sok kʼux ya yaʼiy sbaik. Jaʼ te machʼa bayal jaʼbil yamigoinoj sbaike. Ta Mateo 17:​5, te Jehová la yal te kʼux ta yoʼtan te Jesuse. Ma jaʼuknax la yal te kʼax lek yoʼtan yuʼune, jaʼnix jich la skʼan te ya jnaʼtik te kʼax kʼux ta yoʼtan sok te tseʼel yoʼtan ta stojol te Jesús sok te bin ya xbajt spas ta patil, jaʼ yuʼun jich la yal: «Jaʼ jNichʼan ini te mero kʼux ta koʼtane» (Efes. 1:7). Te Jesús schʼuunoj yoʼtan te kʼux aʼiybil yuʼun te Jehová. Jaʼ yuʼun bayal buelta la yalulan te kʼux aʼiybil yuʼun te sTat (Juan 3:35; 10:17; 17:24).

9. ¿Bin kʼopetik stuuntesoj te Jehová yuʼun ya yakʼ ta ilel te kʼux ta yoʼtan te machʼatik tsabilik? (Romanos 5:5).

⁹ Te Jehová jaʼnix jich ya yal te kʼux ta yoʼtan te machʼatik tsabilik te ya xbajtik ta chʼulchan (kʼopona Romanos 5:5). Jun diccionario te ya yalbey skʼoplal te Biblia ya yal te kʼopil «malbilix» ya skʼan ya yal te jich kʼoem bitʼil jaʼ te ya xtal ta jtojoltik. ¡Tʼujbilnax kʼopetik ya stuuntes te Jehová yuʼun ya yakʼ ta naʼel te kʼux ta yoʼtan te machʼatik tsabilike! Te machʼatik tsabilik snaʼojik te kʼux aʼiybilik yuʼun te Dios (Jud. 1). Ta spisilik jich ya yaʼiy sbaik bitʼil ya yal te jpuk-kʼop Juan: «¡Ilawilik kʼaxto kʼuxotik ta yoʼtan te Tatile, melel ya kichʼtik albeyel te yal snichʼnabotik te Diose!» (1 Juan 3:1). ¿Jaʼnaxbal kʼux ta yoʼtan Jehová te machʼatik tsabilik? Maʼuk, jich bitʼil ya jnoptik bael, yakʼoj ta ilel te kʼux ta yoʼtan spisil te j-abatetik yuʼun.

10. ¿Bin-utʼil yakʼojbat awil te Jehová te kʼuxat ta yoʼtan?

¹⁰ ¿Bin-utʼil yakʼoj ta ilel te Jehová te kʼuxotik ta yoʼtane? Jaʼ te stojol kolel. Jich la yakʼ ta ilel te kʼax kʼuxotik ta yoʼtane (Juan 3:16; Rom. 5:8). Te Jehová la yakʼ ta lajel te sNichʼan ta jtojoltik swenta ya jtatik perdón yuʼun te jmultik sok te ya xjuʼ kamigointik (1 Juan 4:10). Kʼalal ya jnopilan ta koʼtantik te bin la spas ta jtojoltik te Jehová sok te Jesús, ya xkʼotxan ta koʼtantik jayebto kʼuxotik ta yoʼtan ta jujuntul (Gál. 2:20). Te Jehová la yakʼ te stojol kolel ta skaj te kʼuxotik ta yoʼtan. Te Jehová la yakʼ ta ilel te kʼuxotik ta yoʼtan kʼalal la yakʼ ta lajel te sNichʼan ta jtojoltik.

11. ¿Bin ya yakʼ jnoptik ta Jeremías 31:3?

¹¹ Jich bitʼil la kiltikix, te Jehová ma jaʼuknax te kʼuxotik ta yoʼtan, jaʼnix jich ya yakʼ ta ilel (kʼopona Jeremías 31:3). Yikʼojotik tal ta stojol ta swenta te kʼuxotik ta yoʼtan (paja sok Deuteronomio 7:​7, 8). Maʼyuk machʼa ya spitotik lokʼel ta skʼuxul yoʼtan te Dios (Rom. 8:​38, 39). ¿Bin yaʼiyel ya awaʼiy aba yuʼun-abi? Ta ora ini ya kilbeytik skʼoplal te Salmo 23. Kʼalal ya kiltik bael, ilawil bin yaʼiyel la yaʼiy sba te David ta swenta te skʼuxul yoʼtan te Jehová sok nopa te bin-utʼil ya xjuʼ ya skoltayat-euk.

¿BIN YAʼIYEL YA AWAʼIY ABA YUʼUN TE KʼUXAT TA YOʼTAN TE JEHOVÁ?

12. ¿Bin-utʼil ya awal ta chaʼoxpʼalnax kʼop te Salmo 23?

¹² (Kʼopona Salmo 23:​1-6). Ta Salmo 23, te David la yal te schʼuunoj yoʼtan te kʼux aʼiybil yuʼun te Jehová sok te ya xkanantayot yuʼune. La yal te jaʼ Jkanan yuʼun te Jehová, sok te yamigoinoj sba sok. Te David  kanantaybil la yaʼiy sba, melel snaʼoj te jaʼ ya xtojobtesot yuʼun te Jehová sok jkʼaxel smukʼulinoj yoʼtan. Snaʼoj te maʼyuk bin-ora ya x-ijkitayot yuʼun te Jehová. Kiltik bin yuʼun la smukʼulin yoʼtan te Diose.

13. ¿Bin yuʼun te David snaʼoj te jaʼ ya xkanantayot yuʼun te Jehová?

¹³ «Mayuc bin ya spason falta». Te David jich la yaʼiy sba te kanantaybil ta lek yuʼun te Jehová, melel spisil ya x-akʼbot te bin ya xtuun yuʼune sok snaʼoj te lek ilbil yuʼun te Jehová. Jaʼ yuʼun, te David snaʼoj te ya x-akʼbot yuʼun Jehová te bin ya xtuun yuʼune. Snaʼoj te jaʼ mukʼxan te skʼuxul yoʼtan te Jehová te bitʼil te smel-oʼtan sok jaʼ akʼbot stseʼelil yoʼtan yuʼun abi (Sal. 16:11).

14. ¿Bin-utʼil ya yakʼ kiltik skʼuxul yoʼtan te Jehová?

¹⁴ Te Jehová ya skanantayotik sok skʼuxul yoʼtan, kʼaxtoxan-a te kʼalal ya xkʼax jwokoltik. Kiltik te bin kʼax ta stojol te Claire, a te kʼaxemix ta 20 jaʼbil te ay ta Betel. La yal te maʼyuk bin juʼ yuʼun spasel kʼalal tal wokol ta stojolik, melel te spapa akʼbot derrame cerebral, te yijtsʼin ta achʼix la yichʼ lokʼesel ta congregación, laj te snegocioik sok maʼyuk sna jilik. ¿Bin-utʼil la yilik te kanantaybilik yuʼun te Jehová? Te Claire jich ya yal: «Te Jehová la yakʼbey te jfamilia te bin ya xtuun yuʼunik ta jujun kʼajkʼal. Kʼaxemtoxan akʼbotik-a te bitʼil jnopoj-ae. Ay ta koʼtan te bin-utʼil yakʼoj ta ilel skʼuxul yoʼtan ta jtojol te Jehová, sok spisil-ora ya jnopilan ta koʼtan. Ya skoltayon kʼalal ya xkʼaxon ta wokol».

15. ¿Bin-utʼil la staxan yip yoʼtan te David? (Jaʼnix jich ilawil te dibujo).

¹⁵ «Ya yaʼbon xan yachʼil yip coʼtan».  Te David bayal wokolil yak ta kʼaxel ta stojol te baeltik ya smel yoʼtan yuʼun (Sal. 18:​4-6). Kʼalal la yil te skʼuxul yoʼtan sok te yutsil yoʼtan te Jehová, akʼbotxan yip yoʼtan yuʼun. Te David jich la yaʼiy te ikʼot bael yuʼun Jehová ta «yaxal aquiltic» sok ta «banti lamal te haʼe», jich la staxan yip sok abatinxan ta stojol Jehová sok stseʼelil yoʼtan (Sal. 18:​28-32).

16. ¿Bin-utʼil awiloj te yakʼojbat yip awoʼtan te Jehová?

¹⁶ Kʼalal ya jsitintaytik wokoliletik, jaʼnix jich ya xjuʼ te jich ya kaltik: «Ha ta scuenta scʼuxul yoʼtan Jehová te ma ba lajemotic» (Lam. 3:22; Col. 1:11). Kiltik bin kʼax ta stojol te Rachel. Bayal la smel yoʼtan kʼalal te smamalal la yijkitay te Jehová sok ijkitayot-euk ta yorail te COVID-19. ¿Bin la spas te Jehová ta stojol? Te Rachel jich ya yal: «La yakʼbon jnaʼ te kʼux aʼiybilone. La yakʼbon bayal kamigotak te ya sjokinonik, ya yichʼbonik bael weʼelil, ya stikunbonik tʼujbil mensajeetik, ya stikunbonik textoetik te ya yakʼbon smukʼul koʼtan, ya stseʼejinon sok, sok ya sjultesbonik ta koʼtan te jaʼ ya skanantayon te Jehová. Ya kalbey bayal wokol te Jehová ta swenta te familia ini sok te bayal skʼuxul yoʼtanik».

17. ¿Bin yuʼun jich la yal te David: «Mayuc bin chopol ya jxiʼ»?

¹⁷ «Mayuc bin chopol ya jxiʼ, como haʼat ajoquinejon». Kʼax chopol te skontratak te David sok bayal buelta kʼan yichʼ milel. Manchukme jich-abi, kanantaybil la yaʼiy sba yuʼun te skʼuxul yoʼtan te Jehová. Jich la yaʼiy te spisil-ora jokinbil yuʼun te Jehová. Jaʼ yuʼun jich la yal ta kʼayoj: «La yacʼon ta libre yuʼun spisil te jxiwele» (Sal. 34:4). Yuʼun-nix jich kʼax ta skuxlejal-a te David, pero jaʼ bayalxan yip te skʼuxul yoʼtan te Jehová.

18. Kʼalal ya jsitintaytik wokoliletik te ya xiwotik yuʼune, ¿bin-utʼil ya skoltayotik snaʼel te kʼuxotik ta yoʼtan te Jehová?

¹⁸ Kʼalal ya jsitintaytik wokoliletik te ya xiwotik yuʼune, ¿bin-utʼil ya skoltayotik snaʼel te kʼuxotik ta yoʼtan te Jehová? Jtul precursora te Susi sbiil la yal bin yaʼiyel la yaʼiy sba sok te smamalal kʼalal la smil sba te skerem-al: «Kʼalal ay bin xiʼbantik sba ya xkʼax ta jtojoltik, bayal ya yutsʼinotik sok ma jnaʼ bin ya jpastik. Pero kanantaybil ya kaʼiy jbatik yuʼun te skʼuxul yoʼtan te Jehová». Te Rachel te la kalbeytik skʼoplal ta párrafo 16, jich ya yal: «Ta jun buelta te kʼalal ayon ta mel-oʼtan-a, sok te ma xjuʼix kuʼun ya kaʼiy-ae, okʼon ta skʼoponel te Jehová. Ta oranax jich la kaʼiy te la speton te Jehová  yuʼun ya yakʼbon lamalkʼinal, jich bitʼil ya spas jtul mamail sok te yale. Ta patil leknax och jwayel, maʼyuk bin-ora ya xchʼay ta koʼtan-abi». Jtul anciano te Tasos sbiil la yichʼ otsesel chaneb jaʼbil ta cárcel ta skaj te ma la skʼan och ta soldadoil. Jaʼnix ya yal te leknax la yichʼ kanantayel yuʼun te Jehová: «Kʼax jich la yakʼbonxan-a te bitʼil ya xtuun kuʼun sok jich la smukʼulinxan koʼtan. Jaʼnix jich la yakʼbon te schʼul espíritu yuʼun ya yakʼbon stseʼelil koʼtan manchukme mel-oʼtantik sba te banti ayone. Jaʼ ini la yakʼbon jnop teme ay smukʼul koʼtan ta stojol te Jehová, kʼaxtoxan ya kaʼiy-a te skʼuxul yoʼtane. Jaʼ yuʼun te kʼalal ayon ta chukel-a ochon ta precursor regular».

NOPTSAJUKOTIK TA STOJOL TE DIOS KUʼUNTIK

19. 1) ¿Bin-utʼil ya jkʼopontik te Jehová te bitʼil ya jnaʼtik te kʼuxotik ta yoʼtane? 2) ¿Bin textoetik ya stijbatxan awoʼtan ta swenta te skʼuxul yoʼtan te Jehová? (Ilawil te recuadro « Versiculoetik te ya skoltayotik ta yilel te skʼuxul yoʼtan te Jehová»).

¹⁹ Te experienciaetik te la kalbeytikix skʼoplal ya yakʼ ta ilel te ay skʼuxul yoʼtan te Jehová (2 Cor. 13:11). Ay jkʼoplaltik ta yoʼtan ta jujuntul sok schʼuunoj koʼtantik te sjoytayojotik te skʼuxul yoʼtan (Sal. 32:10). Kʼalal ya jnopilan ta koʼtantik te bin-utʼil yakʼoj ta ilel skʼuxul yoʼtan ta jtojoltik, ya schʼuunxan koʼtantik te yuʼunix ay-a te Dios sok ya xnoptsajotikxan ta stojol. Jaʼ yuʼun ya xjuʼ ya jkʼopontik sok ya kalbeytik te bin ay ta koʼtantik yuʼun ya kalbeytik te ya jkʼantik te skʼuxul yoʼtan. Ya xjuʼ ya kalbeytik te bin ya jmel koʼtantik yuʼun sok schʼuunoj koʼtantik te ya xkʼot ta yoʼtan te bin yaʼiyel ya kaʼiy jbatik sok te ya skʼan ya skoltayotik (Sal. 145:​18, 19).

20. ¿Bin yuʼun ya yakʼ te ya xnoptsajotik ta stojol Jehová te skʼuxul yoʼtane?

²⁰ Te skʼuxul yoʼtan te Jehová jich kʼoem bitʼil te kʼajkʼ te ya skʼixnayotik ta yorail sik. Ma jkʼantik te ya xnamajotik ta stojol. Bayal yip te skʼuxul yoʼtan sok bayal yutsil. ¡Tseʼel koʼtantik yuʼun te kʼax kʼuxotik ta yoʼtan te Jehová! Jpisiltik jich ya jkʼan ya kaltik: «Cʼux ta coʼtan te Jehová» (Sal. 116:1).