1, 2. ¿Bin wokolil ya sitintayik te j-abatetik yuʼun Jehová?

 TA ORANAX ya xjuʼ ya xjelon te jkuxlejaltik. Kiltik cheʼoxeb ejemploetik. Jtul hermano te Luis a sbiil la yichʼ albeyel te yichʼoj cáncer sok te ma jalix ya xkuxin. Te Monika sok te smamalal, te jaʼ anciano, jun yoʼtan yakik ta abatinel ta stojol-a te Jehová. Pero ta patil la snaʼ stojol te ay bin ma lek yak ta spasel te smamalal. Te Olivia an lokʼel ta sna ta skaj te tal tulan yikʼal jaʼal. Kʼalal sujt yan buelta ta sna, la yil te jin ta jkʼaxel te snae. Ta oranax jelon te skuxlejalike. ¿Aybal jich kʼaxem ta atojol-euk?

² Te j-abatotik yuʼun Jehová ya xkʼax jwokoltik sok ya stsakotik chamel, jich bitʼil te yantik ants winiketike. Jaʼnix jich ya skʼan ya xkujch kuʼuntik te tenel o te kontrainel yuʼun te skontratak te Diose. Te Jehová ma skom te wokoliletik ya xkʼax ta jtojoltik, pero yaloj ta jamal te ya skoltayotik (Is. 41:10). Te bitʼil ya skoltayotik ma xchʼay te stseʼelil koʼtantik, lek te bin ya jtatik ta nopel sok jun koʼtantik manchukme ay jwokoltik. Ta artículo ini ya kiltik chanchajp te bin ya spas te Jehová yuʼun ya skoltayotik ta sitintayel te jwokoltik. Jaʼnix jich ya xbajt jnoptik te bin ya skʼan ya jpastik yuʼun ya skoltayotik-a te Jehová.

TE JEHOVÁ YA SKANANTAYOTIK

3. ¿Bin wokol ya kaʼiytik spasel kʼalal yak ta kʼaxel jwokoltik?

³ Teme yakotik ta kʼaxel ta tulan wokol, wokolniwan ya kaʼiytik spasel te bin lek sok te bin ya jtatik ta nopel spasele.  ¿Bin yuʼun? Melel te mel-oʼtan ya xjuʼ ya smakbotik jpensartik te ma jnaʼtikix bin ya jpastik yuʼune. Jich la yaʼiy sba te chaʼtul hermanaetik te la kalbeytik skʼoplal ta sbabial párrafo. Te Olivia jich ya yal: «Kʼalal kʼax te tulan yikʼal jaʼal, ma la jnaʼ bin la jpas». Kʼalal loʼlayot yuʼun smamalal te Monika, jich la yal: «Kʼax kʼux la kaʼiy te kʼalal la sloʼlayone, jich la kaʼiy te la stsʼapbonik cuchillo ta koʼtan. Ma xjuʼix kuʼun spasel-a te kaʼtel ta jujun kʼajkʼal. Maʼyuk jnopoj-a te jich ya xkʼax ta jtojole». ¿Bin-utʼil ya skoltayotik te Jehová te kʼalal jich ya kaʼiytik te ma xkujchix kuʼuntik te jwokoltike?

4. ¿Bin jamal ya yal te Jehová te yakʼbotik ta Filipenses 4:​6, 7?

⁴ Te bin ya spas te Jehová. Te Jehová ya yal te ya yakʼbotik «te lamalkʼinal» (kʼopona Filipenses 4:​6, 7). Te lamalkʼinal ya kaʼiytike jaʼ ta swenta te kamigoinoj jbatik sok te Jehová. Te lamalkʼinal ini «kʼax mukʼ, te maʼyuk jtuluk ants winik te ya xjuʼ ya xkʼot ta yoʼtan». ¿Aybal akʼoponoj te Jehová sok te patil lamalnax kʼinal la awaʼiy aba yuʼun? Jaʼme «te lamalkʼinal te ya yakʼ te Dios».

5. ¿Bin-utʼil ya xjuʼ ya skanantay te koʼtantik sok te snopojibal kuʼuntik «te lamalkʼinal te ya yakʼ te Dios»?

⁵ Ta swenta «te lamalkʼinal te ya yakʼ te Dios», te Filipenses 4:7 jaʼnix jich ya yal: «Ya skanantaybeyex te awoʼtanik sok te snopojibal awuʼunik». Te kʼopil te kʼasesbil «ya skanantaybeyex» jaʼ jpʼal kʼopil te ya yichʼ tuuntesel ta swenta te soldadoetik te ya skanantayik te lum yuʼun maba yichʼik ochintayel. Te machʼatik ayik ta yutil te lum jun-nax yoʼtan ya xwayik, melel snaʼojik te kanantaybil yuʼun soldadoetik te yochibal te lume. Jichnix kʼoem ta jtojoltik, kʼalal «te lamalkʼinal te ya yakʼ te Dios» ya skanantay te koʼtantik sok te jpensartik, lamalnax kʼinal sok kanantaybil ya kaʼiy jbatik (Sal. 4:8). Manchukme ma orauk ya xkʼax te jwokoltik ya xjuʼ ya jtatik lamalkʼinal, jich bitʼil kʼax ta stojol te Ana (1 Sam. 1:​16-18). Jich ya xjuʼ ya jnoptik ta lek te bin ya skʼan ya jpastike.

6. ¿Bin ya xjuʼ ya jpastik yuʼun ya kaʼiytik te lamalkʼinal te ya yakʼ te Diose? (Jaʼnix jich ilawil te fotoetik).

⁶ Te bin ay ta jwentatik spasel. Jich bitʼil te machʼatik kuxinemik ta mukʼul lum te ya xjuʼ ya skʼanbeyik jtul soldado te yakuk xkanantayotik yuʼune, jaʼnix jich te joʼotik ya xjuʼ ya jkʼanbeytik te Jehová te yakuk skanantayotike. Jkʼopontik jaʼto teme la yakʼbotik «te lamalkʼinal» (Luc. 11:9; 1 Tes. 5:17). Jich la spas te Luis sok te yinam te kʼalal la yichʼik albeyel te ma jal ya xkuxinix te Luis. Jich la yal: «Te kʼalal jich ya xkʼax ta jtojoltike, kʼax wokol stael ta nopel  ta swenta te bin poxiletik ya kichʼtik sok yantikxan te bin ya xkʼot ta pasel. Pero te oración skoltayojotik swenta ma xchʼay kuʼuntik te lamalkʼinal». La yalik te spisil yoʼtanik ya skʼoponik-a te Jehová sok te ya skʼanbeyik te yakuk x-akʼbotik lamalkʼinal, te yakuk xkanantaybotik te yoʼtanik sok te yakuk x-akʼbot spʼijilik yuʼun lek te bin ya staik ta nopel spasel. Sok jich la yaʼiyik te jakʼbotik skʼopik yuʼun te Jehová. Teme yak ta kʼaxel tulan awokole, mame xa akom aba ta skʼoponel te Dios. Yame awil bin-utʼil te Jehová ya yakʼbat lamalkʼinal sok bin-utʼil ya skanantaybat te awoʼtan sok te snopojibal awuʼune (Rom. 12:12).

TE JEHOVÁ YA SKOLTAYOTIK

7. ¿Bin yaʼiyel ya kaʼiy jbatik te kʼalal yakotik ta kʼaxel ta tulan wokol?

⁷ Teme yakotik ta kʼaxel ta tulan wokol, maniwan jtatik ta nopel te bin lek ta pasel jich te bin-utʼil ya jpastik te kʼalal lek ayotike. Jichniwan ya kaʼiytik te bayal bin ya stenotik, te jich kʼoem bitʼil te sbul te yip te mar te ya smajulan te barco. Jich kʼax ta stojol te Ana te kʼalal laj te Luis. Jich ya yal: «Ay baeltik te kʼax ya jmel koʼtan sok kʼax oʼbol jba ya kaʼiy. Pero ay baeltik te ya x-ilinon ta skaj te maba liʼ ayix te Luis». Jaʼnix jich ya yal te ay baeltik stukel ya yaʼiy sba sok te ya xlujb ta swenta te bin ya sta ta nopel spasel, melel jaʼ ya spas-a te Luise. Jich ya yaʼiy te ay ta yolil tulan yikʼal jaʼal ta mar. ¿Bin-utʼil ya skoltayotik te Jehová te kʼalal ma lek ya kaʼiy jbatik sok te kʼalal ma xjuʼix kuʼuntik ya kaʼiytike?

8. ¿Bin jamal yalojbotik te Jehová ta Isaías 33:6 te ya yakʼbotike?

⁸ Te bin ya spas te Jehová. Jamal yaloj te ya skoltayotik (kʼopona Isaías 33:6). Kʼalal jun barco ay ta yolil tulan yikʼal jaʼal, tulan ya xjajch syukʼilan sba. Bayal barcoetik ay bin yichʼojik ta yeʼtal te ya xkoltayot yuʼun ma bayal ya xyukʼilanot yuʼun te tulan yikʼal jaʼal. Jich maba tulan ya syukʼilan sba te barco sok kanantaybil ya yaʼiy sbaik te machʼatik moemik tey-ae. Sok te bin ay ta yeʼtal te barco lekxan ya x-aʼtej teme yak ta beel te barcoe. Jaʼnix jich te joʼotik, teme ya jkʼantik te ya skoltayotik te Jehová te kʼalal yakotik ta kʼaxel ta tulan wokole, ya skʼan te ma jkom jbatik ta abatinel ta stojol.

9. ¿Bin-utʼil ya skoltayotik te aʼtejibaletik te ya yakʼbotik te organización yuʼun te Jehová? (Jaʼnix jich ilawil te fotoetik).

⁹ Te bin ay ta jwentatik spasel. Teme yakotik ta kʼaxel ta tulan wokoliletike, jpastik tulan yuʼun ma xpejkʼaj te schʼuunel koʼtantik. Maniwan xjuʼ ya jpastik bayal te bitʼil ta nailto, pero ayuk ta koʼtantik te ya xkʼot ta yoʼtan te Jehová (paja sok Lucas  21:​1-4). Nopa te Biblia ta atukel sok nopilana ta awoʼtan. Ta swenta te organización, te Jehová yakʼbeyojotik articuloetik sok videoetik te ya skoltayotik yuʼun lek ya kaʼiy jbatik. Yuʼun ya ata te bin ya xtuun awuʼune, ya xjuʼ ya atuuntes te JW Library^®, Índice de las publicaciones Watch Tower sok te Sleojibal temaetik yuʼun te testigoetik yuʼun Jehová. Te Monika ya yal te ya stuuntes te aʼtejibaletik ini te kʼalal ma lek ya yaʼiy sba. Ay baeltik ya sle información ta swenta te ilinba, te loʼlaywanej, te jun oʼtanil sok jaʼto ya yijkitay skʼoponel-a teme lek la yaʼiy sbae. Jich ya yal: «Te kʼalal ay bin ya xjajch jle yuʼun ya jnop, animalnax ya xjajch ta aʼtel-a te koʼtan, pero te kʼalal ya xlaj koʼtan ta snopele lamalnax kʼinal ya kaʼiy, jich kʼoem te ya speton te Jehová. Kʼalal yak jkʼoponbel-a te información, ya xkʼot ta koʼtan te ya snaʼ bin yaʼiyel ya kaʼiy jba te Jehová sok te yak skoltaybelone». Jaʼnix jich, te Jehová ya xjuʼ ya skoltayat yuʼun ya xkujch awuʼun te wokol jaʼto teme lamaje (Sal. 119:​143, 144).

TE JEHOVÁ YA YAKʼ KIPTIK

10. ¿Binwan yaʼiyel ya kaʼiy jbatik kʼalal ya xkʼax jwokoltik?

¹⁰ Kʼalal ya xkʼaxotik ta tulan wokol, ay baeltik maba lek ya kaʼiy jbatik o maʼyuk kip ya kaʼiytik. Jichniwan ya kaʼiy jbatik bitʼil jtul ants winik te bayal ya x-animaj-a, pero te ma xjuʼix yuʼun ta ora ini ta skaj te wakʼ yok. Wokolniwan ya kaʼiytik spasel te bin kʼayemotik ta spasel-ae o maniwan jmulantikix spasel. Jichniwan ya kaʼiy jbatik bitʼil te Elías, te jaʼnax ya jkʼan ya jkux koʼtantik sok te ya xwayotike (1 Rey. 19:​5-7). ¿Bin yaloj Jehová te ya spas te kʼalal maʼyuk kip ya kaʼiy jbatike?

11. ¿Binxan ya spas te Jehová yuʼun ya skoltayotik? (Salmo 94:18).

¹¹ Te bin ya spas te Jehová. Jamal yaloj te ya yakʼ kiptik (kʼopona Salmo 94:18). Jich bitʼil te ants winik te ya x-animaj te la swakʼ yok, yananix skʼan koltayel yuʼun ya xbeen-a, jaʼnix te joʼotik ya jkʼantik koltayel yuʼun ya x-abatinotikxan ta stojol te Jehová. Kʼalal jich ya xkʼax ta jtojoltik, jich ya yalbotik: «Hoʼon Jehovahon, te Dioson awuʼun, ya jtsacbat te awaʼel-cʼab soc ya calbat: Ma me xiwat, hoʼon ya jcoltayat» (Is. 41:13). Kʼalal te ajwalil David la sitintay bayal pruebaetik sok kontrainel, la sta ta ilel te jokinbil yuʼun te Jehová, jaʼ yuʼun jich la yal: «Scuentahinejon te awaʼel-cʼab» (Sal. 18:35). Pero ¿bin-utʼil ya yakʼ kiptik te Jehová?

12. Teme maba lek ya kaʼiy jbatik, ¿machʼa ya stuuntes te Jehová yuʼun ya skoltayotik?

 ¹² Bayal buelta te Jehová ya stuuntes te yantik yuʼun ya skoltayotik. Jun ejemplo, kʼalal te David chebajem yoʼtan-a, te yamigo Jonatán bajt yulaʼtay yuʼun ya yakʼbey smukʼul kʼinal yaʼiy te David (1 Sam. 23:​16, 17). Te Jehová la stsa te Eliseo yuʼun ya yakʼbey koltayel te Elías (1 Rey. 19:​16, 21; 2 Rey. 2:2). Jaʼnix jich ta jtojoltik, te Jehová ya stuuntes te jfamiliatik, te kamigotaktik sok te ancianoetik yuʼun ya yakʼ kiptik. Melelnix-a te kʼalal maba lek ya kaʼiy jbatik, ma jkʼantik te ay machʼa ya sjokinotik. Sok ya xkʼot ta oʼtanil te jich ya kaʼiy jbatike. Pero, ¿bin ya skʼan ya jpastik yuʼun ya skoltayotik te Jehová?

13. ¿Bin ya skʼan ya jpastik yuʼun ya jta jlekilaltik ta swenta te koltayel ya yakʼ te Jehová? (Jaʼnix jich ilawil te fotoetik).

¹³ Te bin ay ta jwentatik spasel. Jpastik tulan yuʼun maba ya xnamajotik ta stojol te yantik. Kʼalal ya xnamajotik ta stojol te yantik, jaʼnax ya xbajt ta koʼtantik snopilanel te jwokoltik. Jaʼ-abi ya xjuʼ ya yakʼ te ay bin ma lek ya jtatik ta nopel spasel (Prov. 18:1). Melelnix-a te ay baeltik te ya jkʼantik te jtukel ya x-ayinotik, kʼaxemtoxan-a te kʼalal ya xkʼaxotik ta wokol. Pero teme bayal tiempo jtukel ya kakʼ jbatik ya kakʼtik ta ilel te yakotik ta spʼajel te koltayel ya yakʼbotik te Jehová yuʼun ya yakʼ kiptik. Manchukme wokol ya kaʼiytik akʼa jkʼantik te koltayel ya yakʼbotik te jfamiliatik, te kamigotaktik sok te ancianoetik. Akʼa jnaʼtik te jaʼ te koltayel ya yakʼbotik te Jehová yuʼun ya yakʼ kiptik (Prov. 17:17; Is. 32:​1, 2).

TE JEHOVÁ YA YAKʼ SMUKʼUL KʼINAL KAʼIYTIK

14. ¿Bin ya xjuʼ ya yakʼ jxiweltik?

¹⁴ Ayniwan baeltik te bayal ya xiwotike. Ta Biblia ya jtatik relatoetik yuʼun j-abatetik yuʼun Dios te la yalik te nijkik yuʼun te xiwel ta skaj te skontratakik sok te yantik wokoliletik (Sal. 18:4; 55:​1, 5). Te joʼotike ¿Yakbal kichʼbeltik kontrainel yuʼun te joʼtaktik ta escuela, ta aʼtel, te jfamiliatik o te ajwaliletik? ¿Stsakojotikbal jun tulan chamel te ya xjuʼ ya xlajotik yuʼune? Kʼalal jich ya xkʼax ta jtojoltik, jichniwan ya kaʼiy jbatik bin-utʼil jtul chʼin kerem te ma xjuʼ ya skoltay sba. ¿Bin ya spas te Jehová yuʼun ya skoltayotik?

15. Jich bitʼil ya yal Salmo 94:​19, ¿bin jamal yaloj te ya spas te Jehová?

¹⁵ Te bin ya spas te Jehová. Ya yakʼ smukʼul kʼinal kaʼiytik sok ya slamantes koʼtantik  (kʼopona Salmo 94:19). Jnop kaʼiytik ta swenta jtul chʼin achʼix te xiwen sok ma x-och swayel ta skaj te tulan jaʼal sok te chawuk. Pero ya xtal te spapa, ya spet sok ya smukʼubtesbey kʼinal yaʼiy jaʼto te kʼalal ya x-och swayel. Manchukme ayto te tulan jaʼal, maba ya xiw, melel petbil yuʼun te spapa. Jaʼnix jich te joʼotik, teme yakotik ta nijkel yuʼun te xiwel jich kʼoem te ya jkʼantik te yakuk spetotik te jTatik te ay ta chʼulchan jaʼto te kʼalal lek ya kaʼiy jbatike. ¿Bin ya skʼan ya jpastik yuʼun ya yakʼ smukʼul kʼinal kaʼiytik te Jehová?

16. ¿Bin ya skʼan ya jpastik yuʼun ya yakʼbotik smukʼul kʼinal kaʼiytik te Jehová? (Jaʼnix jich ilawil te fotoetik).

¹⁶ Te bin ay ta jwentatik spasel. Mukʼ skʼoplal te kʼayemotik ta skʼoponel te Jehová sok te Biblia (Sal. 77:​1, 12-14). Teme jich ya jpastike, jaʼ ya jletik koltayel ta stojol te kʼalal ya xkʼax jwokoltik. Kalbeytik te Jehová te bin ya jmel koʼtantik yuʼun sok te bin ya jxiʼtik, sok kakʼtik te ya sjakʼbotik te jkʼoptik soknix te ya yakʼ smukʼul kʼinal kaʼiytik ta swenta te Biblia (Sal. 119:28). Ay libroetik ta Biblia te ya yakʼ smukʼul kʼinal kaʼiytik, jich bitʼil te libro yuʼun Job, Salmos, Proverbios sok te bin la yal te Jesús ta capítulo 6 yuʼun Mateo. Teme ya akʼopon te Jehová sok ya akʼopon te Biblia, yame awil bin-utʼil ya yakʼbat smukʼul kʼinal awaʼiy.

17. ¿Bin ya skʼan ayuk ta koʼtantik?

¹⁷ Mame xchʼay ta koʼtantik te spisil-ora ya xbajt skoltayotik te Jehová te kʼalal ya xkʼax tulan jwokoltik sok mame ayuk bin-ora ya yijkitayotik (Sal. 23:4; 94:14). Jultes ta koʼtantik te jamal yaloj te ya skanantayotik, te ya skoltayotik, te ya yakʼ kiptik sok te ya smukʼubtes kʼinal kaʼiytik. Te Isaías jich la yalbey te Jehová: «Haʼat yac awacʼ te lamal qʼuinal ya yaʼiy te machʼa spisil ora yac snaʼbelat, como ha smucʼulinejat yoʼtan» (Is. 26:3). Jaʼ yuʼun akʼa smukʼulin awoʼtan te Jehová sok ma xa apʼaj te koltayel ya yakʼbat. Teme jich ya apase, yame xkujch awuʼun te tulan wokoliletik te ya xkʼax ta akuxlejale.