TE KʼOPIL ta griego te ya yichʼ kʼasesel jich bitʼil «carreta» ta Traducción del Nuevo Mundo yanyantik yilel-a te carretaetik te ya yalbey skʼoplal (Hech. 8:​28, 29, 38). Jich yilel te eunuco winik te talem ta Etiopía, yak ta bael ta jun mukʼul carreta, ma jaʼuk jun carreta yuʼun guerra o yuʼun animal. Kiltik cheʼoxeb skʼoplal te bin yuʼun jich ya kaltike.

Tulan yaʼtel te eunuco winik sok najt beenemix-a. Jaʼ «jtul winik te yichʼoj tulan yaʼtel ta swentainbeyel spisil skʼulejal te Candace, te ajwalil ants ta skʼinal Etiopía» (Hech. 8:27). Ta kʼajkʼal-abi, te Etiopia jaʼ spamal smakoj bael te Sudán ta ora ini sok te sur yuʼun te Egipto. Maniwan junuknax te carreta la stuuntes te eunuco winik, bayalniwan bin ya yichʼ bael, melel namal te banti bajte. Ta sbabial siglo ya stuuntesik bayal ta chajp carretaetik yuʼun ya xbeenik-a te ants winiketik. Jun, jaʼ te carreta te ay chaneb sllanta sok te lek makal. Jun libro te ya yalbey skʼoplal te Biblia, jich la yal ta jamal: «Bayal bin ya xjuʼ ya skuchik ta carretaetik abi, lek-nax te yutile sok animal ya xbeen» (Acts—An Exegetical Commentary).

Te eunuco winik yak ta skʼoponel-a te sjun j-alwanej Isaías te kʼalal noptsaj ta stojol te Felipe. Te relato jich ya yal: «Te Felipe animaj bael ta stsʼeel te carreta sok la yaʼiy stojol te tulan yak ta skʼoponel te sjun j-alwanej Isaías te winike» (Hech. 8:30). Te carretaetik abi, maba pasbil yuʼun animal ya xbeen. Jaʼ yuʼun, te eunuco winik ya xjuʼ ya skʼopon te sjun j-alwanej Isaías sok taot yuʼun te Felipe ta swenta te maba animal ya xbeen te scarreta.

Te eunuco winik «la skʼanbey wokol te Felipe te yakuk xmo ta carreta sok te ya xjokinot ta nakleje» (Hech. 8:31). Ta carreta yuʼun animal, te machʼatik ya stijik bael tekʼel ya xbajtik. Yan stukel te carreta te ya skuch ants winiketik mukʼ yutil, jaʼ yuʼun te Felipe sok te eunuco winik juʼ te najkajike.

Ta swenta te bin ya yal te capítulo 8 yuʼun te Hechos sok te pruebaetik te staojik ta ilel, maba ya yichʼix pasel jun dibujo ta junetik kuʼuntik te eunuco winik ta jun carreta yuʼun guerra o yuʼun animal, jaʼnax ya kakʼtik ta jun mukʼul carreta.