1. ¿Bin ya skʼan ya spas te machʼa ya skʼan ya xkʼopoj sok te ajwalil yuʼun Persiae?

JNOP KAʼIYTIK te kuxinotik ta Persia te ayix tal dos mil quinientos jaʼbile. Ay bin mukʼ skʼoplal ya jkʼan ya kalbeytik te ajwalil, jich yuʼun ya xbootik ta sna te ajwalil ta Susa. Pero ma xjuʼ ya x-ochotik te banti ay te ajwalil teme maba akʼbilotik permisoe, melel ya xjuʼ ya kichʼtik milel (Est. 4:11).

2. ¿Bin-utʼil ya skʼan te Jehová te ya kaʼiy jbatik te kʼalal ya jkʼopontike?

² Ya kaltik wokol yuʼun te ma jichuk stalel Jehová te bitʼil te ajwalil yuʼun Persia. Manchukme jaʼ kʼax mukʼxan skʼoplal te bitʼil jtul ajwalil ta Balumilale, ya xjuʼ ya jkʼopontik ta biluk-ora sok ya skʼan te libre ya kaʼiy jbatik ta skʼoponele. Ay bitʼil naʼbil sba te Jehová te ya yakʼ ta naʼel te kʼax mukʼ yaʼtele, jich bitʼil te Mukʼul Jpaswanej, Machʼa spisil ya xjuʼ yuʼun sok Mukʼ Ajwalil, pero jaʼ ya skʼan te yakuk kalbeytik «Jtatic» (Mat. 6:9). Kʼax tseʼel koʼtantik yuʼun te jaʼ ya skʼan te lek ya kil jbatik soke.

3. ¿Bin yuʼun ya xjuʼ ya kalbeytik «Jtatic» te Jehovae sok bin ya jnopbeytik skʼoplal ta artikulo ini?

³ Ya xjuʼ ya kalbeytik «Jtatic» te Jehovae, melel jaʼ yakʼojbotik te jkuxlejaltike (Sal. 36:9). Jich bitʼil te jaʼ jTatike ya skʼan ya jchʼuunbeytik te smantale. Teme ya jpastik te bin ya yalbotike yame jmulanbeytik yutsilal bayal bendisionetik (Heb. 12:9). Jun bendision te ya yakʼbotike jaʼ te ya xkuxinotik sbajtelkʼinal ta Balumilal o ta chʼulchan. Pero jaʼnix jich ya xjuʼ ya jmulantik bayal lekilal ta ora ini. Ta artikulo ini ya jnoptik te bin-utʼil ya yakʼ kiltik Jehová te jaʼ jTatik te ay skʼuxul yoʼtan sok te bin yuʼun ya xjuʼ seguro ayotik te maʼyuk bin-ora ya yijkitayotike. Pero ta nail ya  kiltik bin yuʼun ya xjuʼ ya smukʼulin koʼtantik te kʼax kʼuxotik ta yoʼtan sok te ya skanantayotik te jTatik te ay ta chʼulchane.

4. ¿Bin yuʼun te ay machʼatik wokol ya yaʼiyik te jich ya yilik bitʼil sTatik te Jehovae?

⁴ ¿Wokolbal ya kaʼiytik te ya kiltik jich bitʼil jTatik te Jehovae? Ayniwan machʼatik jich ya yaʼiyik te maʼyuk skʼoplalik ta sit te Diose sok maniwan ya schʼuunik te ya yichʼotik ta wenta ta jujuntul te Machʼa spisil ya xjuʼ yuʼune. Pero te jTatik te ay skʼuxul yoʼtan ma skʼan te jich ya kaʼiy jbatik ta stojole. La yakʼbotik te jkuxlejaltik sok jaʼ ya skʼan yoʼtan te yakuk jletik sok ya jtatik ta leel. Kʼalal ay la yalbey skʼoplal-abi te jpuk-kʼop Pablo ta stojol te ants winiketik ta Atenase la yal te «ma ba namal ay ta jtojoltic» te Jehová ta jujuntulotik (Hech. 17:24-29). Te Jehová jaʼ ya skʼan te ya xnoptsajotik ta stojol jich bitʼil ya spas jtul chʼin alal ta stojol te spapa te kʼux aʼiybil yuʼune.

5. ¿Bin ya jnoptik ta swenta te bin yaʼiyel la yaʼiy sba jtul ermanae?

⁵ Ay yan swentail te bin yuʼun ay machʼatik ma xjuʼ ya yilik jich bitʼil sTatik te Jehovae. Jaʼ ta skaj te ma akʼbotik yil skʼuxul yoʼtan yuʼun te spapaike. Jtul ermana jich la yal: «Te jpapa bayal bin chopol la spasbon. Kʼalal jajchon ta yichʼel te kurso yuʼun Bibliae wokol la kaʼiy te nopol ayon ta stojol te jTatik ay ta chʼulchane. Pero ma jichuk la kaʼiyix jba-a kʼalal la jnaʼbey sba ta lek te Jehovae». ¿Aybal jich ya kaʼiy jbatik te joʼotike? Teme jiche, seguro ayukotik te jaʼnix jich ya xjuʼ ya kiltik bitʼil kʼax lekil Tatil te Jehovae.

6. Jich bitʼil ya yal Mateo 11:27, ¿bin-utʼil skoltayojotik te Jehová yuʼun jich ya kiltik te bitʼil jTatik te kʼuxotik ta yoʼtane?

⁶ ¿Bin-utʼil skoltayojotik te Jehová yuʼun jich ya kiltik te bitʼil jTatik te kʼuxotik ta yoʼtan? Jun te bitʼil spasoje jaʼ te la yakʼ ta tsʼibayel ta Biblia te bin la yal sok te bin la spas te Jesuse (kʼopona Mateo 11:27). Te Jesús la yakʼ ta ilel ta lek te stalel te sTate, jaʼ yuʼun jich la yal: «Te machʼa yilojonix, ha nix yilojix te Tatile» (Juan 14:9). Te Jesús bayal buelta la yalbey skʼoplal te bin spasoj te Jehová jich bitʼil jtul papail. Ta chaneb Ebanjelioetik la yalbey 165 buelta jTat te Jehovae. ¿Bin yuʼun te bayal buelta la yalbey skʼoplal te Jehovae? Jun swentail jaʼ te la skʼan te yakuk snaʼ te ants winiketik te jaʼ jtul Tatil te ay skʼuxul yoʼtane (Juan 17:25, 26).

7. ¿Bin ya jnoptik ta swenta te Jehová kʼalal ya kiltik te bin la spas ta stojol te sNichʼane?

⁷ Kilbeytik skʼoplal te bin la spas Jehová ta stojol te sNichʼane sok kiltik bin ya yakʼ jnoptik ta swenta. Te Dios spisil-ora la yaʼiybey sok la sutbey skʼop te sNichʼane (Juan 11:41, 42). Te Jesús spisil-ora la yaʼiy ta yoʼtan te kʼux aʼiybil sok te koltaybil yuʼun te sTate chikan bin prueba ya xkʼax ta stojol (Luc. 22:42, 43).

8. ¿Bintik-utʼil kanantayot yuʼun Jehová te Jesuse?

⁸ Te Jesús la yal te jaʼ akʼbot skuxlejal yuʼun te Jehová sok te jaʼ akʼbot spisil te bin ya xtuun yuʼun swenta ya xkuxin-ae. Jich la yal: «Cuxulon ta swenta te Jtate» (Juan 6:57, TZOXCH). Te Jesús jkʼaxel la smukʼulin yoʼtan te Jehová sok jaʼ akʼbot te bin ya xtuun yuʼune. Pero te bin mukʼxan skʼoplale jaʼ te koltayot swenta jun yoʼtan ya yakʼ sba ta stojol (Mat. 4:4).

9. ¿Bin-utʼil la yakʼ ta ilel Jehová te kʼux ta yoʼtan te Jesuse?

⁹ Te Jehová la yakʼ ta ilel ta jaʼ jtul Tatil te ay skʼuxul yoʼtan te kʼalal la yakʼbey snaʼ te Jesús te yak ta skoltayele (Mat. 26:53; Juan 8:16). Manchukme maba spisil-ora la skanantay swenta ma sta swokol te Jesuse, pero la skoltay ta stsʼikel. Te Jesús snaʼoj-a te jkʼaxelnax te wokoliletik ya xtal ta stojole (Heb. 12:2). Te Jehová la yakʼ ta ilel te ya skanantay te sNichʼan kʼalal la yaʼiybey te skʼope, la yakʼbey te bin ya xtuun yuʼun, la snojptes sok la skoltay (Juan 5:20; 8:28). Ta ora ini kiltik bin-utʼil ya skanantayotik  te jTatik ay ta chʼulchan jich bitʼil la spas ta stojol te Jesuse.

10. Ta swenta te bin ya yal te Salmo 66:19, 20, ¿bin-utʼil ya yakʼ kiltik te kʼuxotik ta yoʼtan te Jehovae?

¹⁰ Te Jehová ya yaʼiybotik te jkʼoptike (kʼopona Salmo 66:19, 20). Te Jehová ma skʼan te ay bin ya jmak jbatik yuʼun ma jpastik-a te orasione, ya yalbotik te yakuk jkʼopontik spisil-ora (1 Tes. 5:17). Ya xjuʼ ya jkʼopontik sok spekʼelil koʼtantik biluk-ora sok chikan banti ayotik. Maʼyuk bin-ora kʼax makal te ma xjuʼ ya yaʼiy jkʼoptike, spisil-ora ya schʼam yaʼiy te bin ya kalbeytike. Kʼalal ya xkʼot ta koʼtantik te ya yaʼiy te jkʼoptike, ya jkʼan ya xnoptsajotikxan ta stojol. Jtul te machʼa la stsʼibay jun salmo jich la yal: «Cʼux ta coʼtan te Jehová yuʼun la yaʼiybon jcʼop» (Sal. 116:1).

11. ¿Bin-utʼil ya sut jkʼoptik te Jehovae?

¹¹ Te jTatike ma jaʼuknax ya yaʼiy te bin ya kalbeytike, jaʼnix jich ya sutbotik te jkʼoptike. Te jpuk-kʼop Juan jich la yakʼ jnaʼtik: «Teme hich ya jcʼambetic te bin ya scʼan yoʼtan stuquel, ya yaʼiyotic» (1 Juan 5:14, 15). Ayniwan ma jichuk jmaliyojtik-a te bitʼil ya sut jkʼoptik te Jehovae, pero ta swenta te ya snaʼ te bin-nix ya xtuun kuʼuntik-ae ayniwan ma xyakʼbotik te bin ya jkʼanbeytik o yaniwan yakʼ jmaliytik junchebuk kʼajkʼal (2 Cor. 12:7-9).

12, 13. ¿Bintik-utʼil ya yakʼbotik Jehová te bin ya xtuun kuʼuntike?

¹² Te Jehová ya yakʼbotik te bin ya xtuun kuʼuntike. Jich ya spas te Jehovae, melel jich yalojbey spas-euk te jolaletik ta nae (1 Tim. 5:8). Ya yakʼbey te bin ya xtuun yuʼun te yal snichʼnabe, ma skʼan te ya jmel koʼtantik ta swenta te jweʼeltik, te jkʼuʼ jpakʼtik o te banti ya xnainotike (Mat. 6:32, 33; 7:11). Ta swenta te kʼuxotik ta yoʼtane jaʼnix jich ay bin spasoj swenta ayuk spisil te bin ya xtuun kuʼuntik ta pajel chaʼbeje.

¹³ Pero te bin mukʼxan skʼoplale, jaʼ te ya yakʼbotik te bin ya xtuun kuʼuntik swenta tulan te schʼuunel koʼtantike. Ta swenta te Biblia yakʼojix jnaʼtik te smelelil kʼop ta stojole, te skʼanojel yoʼtan, te bin swentail te kuxulotik sok te bin ya xkʼot ta pasel ta pajel chaʼbeje. Te kʼalal la jnoptik te smelelil kʼope la yakʼ ta ilel te ay jkʼoplaltik ta yoʼtan ta jujuntul, jaʼ yuʼun la stuuntes te jmeʼ jtatik o ermanoetik te tulan schʼuunel yoʼtanik swenta ya skoltayotik ta snaʼbeyel sba. Jaʼnix jich yato skoltayotik sok skʼuxul yoʼtan ta swenta te ansianoetik ta kongregasion sok yantik ermanoetik te tulan schʼuunel yoʼtanike. Sok ya snojptesotik ta tsoblejetik te banti ya jokintik te kermanotaktik ta snaʼbeyel sba te Jehovae. Ta swenta-abi sok yantikxan, ya yakʼ kiltik te jaʼ jtul lekil Tatil te ay jkʼoplaltik ta yoʼtane (Sal. 32:8).

14. ¿Bin yuʼun ya snojptesotik te Jehová sok bin-utʼil ya spas?

¹⁴ Te Jehová ya snojptesotik. Ma jichukotik bitʼil te Jesús te toj stukele. Jaʼ yuʼun swenta ya snojptesotik, te jTatik te ay skʼuxul yoʼtan ya stojobtesotik te kʼalal jich ya skʼan pasel ya yile. Ta Biblia ya sjultes ta koʼtantik te jaʼ «ya stojobtes te machʼa cʼux ta yoʼtan» (Heb. 12:6, 7). Ay bayal ta chajp te bitʼil ya stojobtesotike, jich bitʼil te kʼalal ya jkʼopontik te Biblia o te bin ya kaʼiytik ta tsoblejetik ya yakʼ kiltik te ya skʼan ya jel jtaleltike. Jaʼnix jich ya xjuʼ ya kichʼtik akʼbeyel te koltayel ya xtuun kuʼuntik ta swenta te ansianoetike. Chikan bitʼil ya kichʼtik te tojobtesele, te Jehová spisil-ora ya stojobtesotik ta skaj te kʼuxotik ta yoʼtane (Jer. 30:11).

15. ¿Bintik-utʼil ya skanantayotik te Jehovae?

¹⁵ Te Jehová ya skoltayotik yuʼun ya xkujch kuʼuntik te jwokoltik. Te jTatik ay ta chʼulchan ya skanantayotik te kʼalal ay jwokoltik jichnix te bitʼil ya spas jtul papail te kʼux ta yoʼtan te snichʼnabe. Ya stuuntes te schʼul espiritu swenta ma xlaj te schʼuunel koʼtantike  (Luc. 11:13). Jaʼnix jich ya skoltayotik te kʼalal ya jmel koʼtantike. Swenta jich ya skoltayotik ay bin kʼax lek ya yakʼ jmaliytik ta pajel chaʼbej te ya yakʼ kiptik ta stsʼikel te jwokoltike. Jnop kaʼiytik ini, te jTatik te ay skʼuxul yoʼtan ya slajin ta pajel chaʼbej chikan bin-a te ya yutsʼinotike. Te pruebaetik jkʼaxelnax stukel, pero te bendisionetik ya yakʼ te Jehová sbajtelkʼinal ya xjalaj (2 Cor. 4:16-18).

16. ¿Bin kʼot ta pasel kʼalal te Adán la skʼaxuntaybey smantal te sTate?

¹⁶ Jun te bin ya yakʼ ta ilel te kʼuxotik ta yoʼtan te Jehovae jaʼ te bin la spas te kʼalal kʼaxuntaybot smantal yuʼun te Adane. Ta skaj te bin kʼot ta spasele, te Adán sok te stsʼumbale maba jun ayikix sok-a te sfamilia te Diose (Rom. 5:12; 7:14). Pero te Jehová ay bin la spas ta swenta-abi.

17. ¿Bin la spas ta oranax te Jehová kʼalal kʼaxuntaybot smantal yuʼun te Adane?

¹⁷ Manchukme te Jehová la yakʼbey kastigo te Adane ay bin la yakʼbey smaliy ta pajel chaʼbej te stsʼumbale. Oranax la yakʼ ta naʼel te ya x-ochik yan buelta ta sfamilia te ants winiketik te ya schʼuunbot skʼope (Gén. 3:15; Rom. 8:20, 21). Jich la spas ta swenta te la yakʼ ta lajel te sNichʼan te bayal kʼux ta yoʼtane. Te kʼalal la yakʼ ta jwentatik te sNichʼane, la yakʼ ta ilel te bayal kʼuxotik ta yoʼtane (Juan 3:16).

18. Manchukme ay ya kijkitaytik te Jehová, ¿bin yuʼun ya xjuʼ seguro ayotik te ya skʼanotik jich bitʼil snichʼane?

¹⁸ Manchukme jmulawilotik, te Jehová ya skʼan te ayukotik ta sfamiliae sok maba ya snop te ya kakʼbeytik swokol yuʼun te ya skoltayotike. Ayniwan ya kakʼbeytik smel yoʼtan o ayniwan ya kijkitaytik cheʼoxebuk kʼajkʼal, pero maʼyuk bin-ora ya spʼajotik ta jkʼaxel. Ta swenta te lokʼombakʼop yuʼun te kerem te la yijkitay jilel te spapae, te Jesús la yakʼ ta ilel te kʼax kʼuxotik ta yoʼtan te Jehovae (Luc. 15:11-32). Te papail te la yal ta lokʼombakʼop maʼyuk bin-ora chʼay te smukʼul yoʼtan te ya sujt tal yan buelta te snichʼane,  jaʼ yuʼun te kʼalal sujt tale te papail la yikʼ ochel sok yutsil yoʼtan. Teme ay la kijkitaytik te Jehová, pero teme la jsutix koʼtantike, ya xjuʼ seguro ayotik te ya skʼan ya yikʼotik yan buelta te jTatike.

19. ¿Bin ya xbajt spas te Jehová swenta ya slekubtes spisil te bintik ma lek kʼot ta pasel ta skaj te la skʼaxuntay mantal te Adane?

¹⁹ Te jTatik Jehová ya slekubtes spisil te bintik ma lek kʼot ta pasel ta skaj te la skʼaxuntay mantal te Adane. Kʼalal la skʼaxuntaybey smantal te Diose, te Jehová la stsa 144,000 ta tul ants winiketik te ya x-ochik ta ajwalil sok saserdote ta chʼulchan sok te sNichʼane. Te Jesús sok te ajwaliletik-abi ya skoltayik te ants winiketik te ya schʼuunik mantal swenta tojil ants winik ya xkʼotik ta achʼ balumilal. Ta kʼalal kʼaxix yuʼunik-a te slajibal pruebae, te Dios ya yakʼbey skuxlejalik ta sbajtelkʼinal. Te jTatik ya x-akʼbot bayal stseʼelil yoʼtan kʼalal ya yil te Balumilal te nojel ta snichʼnab te mero tojike. ¿Mabal jichuk te kʼax jelawen yutsile?

20. ¿Bintik-utʼil yakʼoj ta ilel te Jehová te kʼax kʼuxotik ta yoʼtane sok bin ya yalbey skʼoplal te yan artikuloe?

²⁰ Te Jehová yakʼoj ta ilel te kʼax kʼuxotik ta yoʼtane. Maʼyuk jtuluk papailte kʼax lek jich bitʼil te jTatik Jehová, melel ya yaʼiybotik te jkʼoptik, ya yakʼ te bin ya xtuun kuʼuntik ta swenta te jkuxlejaltik sok te schʼuunel koʼtantike. Ya snojptesotik sok ya skoltayotik. Jaʼnix jich schajpanoj kʼax lekil bendisionetik ta jtojoltik. ¿Mabal jichuk te ya yakʼ stseʼelil koʼtantik snaʼel te kʼuxotik ta yoʼtan sok te ya skanantayotik te jTatike? Te yan artikulo ya yalbey skʼoplal bintik-utʼil te joʼotik te yal snichʼanotik ya kalbeytik wokol yuʼun te kʼuxotik ta yoʼtane.