1. ¿Bin talelil ya yakʼ ta ilel te lum yuʼun Jehová?

 AYIX TAL bayal jaʼbil te Biblia la yalbey skʼoplal bin-utʼil te lum yuʼun Jehová ya sjap sbaik ta abatinel ta stojol sok jaʼ ya xwolotik yuʼun te Jesús (Sal. 110:3). Te albilkʼop-abi, yak ta kʼoel ta pasel ta ora ini. Jujun jaʼbil te j-abatetik yuʼun Dios bayal ora ya scholik skʼop Dios, spasemal yoʼtan ya spasik sok ma skʼanik stojol. Jaʼnix jich ya stuuntes stiempoik yuʼun ya skoltayik te yermanotak ta swenta te bin ya xtuun yuʼunik, te bin yaʼiyel ya yaʼiy sbaik sok ta swenta te schʼuunel yoʼtanik. Te ancianoetik sok te siervo ministerialetik bayal tiempo ya yakʼbeyik ta schajpanel te s-asignacionik, te sdiscursoik sok ta yulaʼtayel te hermanoetik. ¿Bin ya xtijbot yoʼtanik ta spasel? Jaʼ te skʼuxul yoʼtanik ta stojol te Jehová sok te spatxujkik (Mat. 22:37-39).

2. Jich bitʼil ya yal Romanos 15:1-3, ¿bin ejemplo la yakʼbotik jilel te Jesuse?

² Te Jesús jaʼ mukʼ skʼoplal ta yoʼtan skoltayel te yantik sok te j-abatotik yuʼun Dios ya jpastik tulan ta stʼunel te ejemplo yuʼune (kʼopona Romanos 15:1-3). Teme jich ya jpastike, bayal bin lekilal ya jtatik. Te Jesús jich la yal: «Ha bayel xan yutsil te machʼa ay bin ya yacʼ te bin utʼil ay bin ya yichʼ» (Hech. 20:35).

3. ¿Bin ya kilbeytik skʼoplal ta artículo ini?

³ Ta artículo ini, ya jnoptik te bintik la spas te Jesús ta stojol te yantik sok ya kilbeytik skʼoplal te bin-utʼil ya jtʼunbeytik  te ejemplo yuʼun. Jaʼnix jich ya kiltik bin ya xjuʼ ya jpastik yuʼun ya jkoltaytikxan te yantike.

4. ¿Bin-utʼil la yakʼ ta ilel te Jesús te jaʼ mukʼ skʼoplal ta yoʼtan skoltayel te yantike?

⁴ Te Jesús la skoltay te yantik manchuk lujben-a. Jnop kaʼiytik bin-utʼil la yaʼiy sba kʼalal kʼot ta ilel yuʼun te ants winiketik kʼalal ay ta chʼujt wits te nopolniwan yiloj sba sok te Capernaúm. Te Jesús sjunal ajkʼabal yak ta spasel oración, jich yuʼun lujben ya yaʼiy sba-a. Kʼalal la yil te ants winiketik la snaʼbey yoʼbolil sba te pobreetik sok te machʼatik ayik ta chamel. Ma jaʼuknax la slekubteslan, jaʼnix jich la snojpteslan yuʼun ya yakʼbey smukʼul yoʼtanik (Luc. 6:12-20).

5. Kʼalal lujben ya yaʼiy sbaik te jolaletik ta familia ¿bin-utʼil ya stʼunik te ejemplo yuʼun te Jesús?

⁵ ¿Bin-utʼil ya stʼunik te ejemplo yuʼun te Jesús te jolaletik ta familia? Jnop kaʼiytik te ay jtul tatil te sjunal kʼajkʼal aʼtej sok lujben ya xkʼot ta sna. Pero ta ajkʼabal-abi, jaʼ yorail te ya yichʼik ta mukʼ Dios ta sjunal na. Te bitʼil jich ya yaʼiy sbae, yoʼtan-niwan ya spas ta yan kʼajkʼal, pero ya skʼanbey Jehová te yakuk x-akʼbot yip yoʼtan. Te Jehová ya yakʼbey sujtib te oración la spas sok ya snopik te sKʼop Dios jichnix te bin-utʼil ya spasik ta jujun semana. Ta ajkʼabal-abi, ay bin mukʼ skʼoplal la snopik te alnichʼanetik: te jaʼ mukʼ skʼoplal ta yoʼtanik te meʼil tatil te yichʼel ta mukʼ te Jehová.

6. Ala kaʼiytik bin-utʼil te Jesús la slokʼes tiempo ta skoltayel te ants winiketik.

⁶ Te Jesús la slokʼes tiempo ta skoltayel yantik. Jnop kaʼiytik ta swenta ini, te Jesús snaʼbelto stojol te laj te yamigo te Juan J-akʼ-ichʼjaʼ sok bayalniwan ay ta mel-oʼtan. Te Biblia jich ya yal: «Cʼalal hich la yaʼiy te Jesús, stuquel locʼ bahel ta barco tey a, qʼuejel baht ta jochol qʼuinal» (Mat. 14:10-13). Yaniwan skʼan te stukel ya x-ayin. Ayniwan machʼatik stukel ya skʼan ya x-ayinik kʼalal ayik ta mel-oʼtan. Pero ma jichuk kʼot ta stojol te Jesús, melel bayal ants winiketik yakix ta maliyel yuʼun-a. ¿Bin la spas? Jaʼ la snop ta yoʼtan te bin yak ta kʼaxel ta stojol te ants winiketik sok  «la snaʼbe yoʼbolil sbahic». Kʼot ta yoʼtan te ya skʼanik koltayel ta swenta te schʼuunel yoʼtanik, jich yuʼun oranax jajch ta skoltaylanel. Jaʼ yuʼun «hich bayel bin hahch yaʼbe snopic» (Mar. 6:31-34; Luc. 9:10, 11).

7, 8. Ala jun ejemplo bin-utʼil ya stʼunbeyik stalel te Jesús te ancianoetik kʼalal ay machʼa ya yakʼbeyik koltayel.

⁷ ¿Bin-utʼil ya stʼunik te ejemplo yuʼun te Jesús te ancianoetik? ¿Mukʼbal skʼoplal ta koʼtantik te bintik ya spasik te ancianoetik? Bayal te bin ya spasik te ayniwan maba ya jnaʼtik stojole. Jich bitʼil te kʼalal ay machʼa ay ta doctor, te Comiteetik yuʼun Enlace ta swenta Hospital ya skoltay te hermanoetik te ayik ta wokole, sok ayniwan ya spasik te kʼalal ajkʼabalix-ae. Ta swenta te skʼuxul yoʼtanik jaʼ ya xtijbot yoʼtanik yuʼun ya snaʼbey yoʼbolil sbaik te hermanoetik. Ayniwan machʼatik oranax ya skʼanik koltayel ta skaj te la staik wokol, jaʼ yuʼun te hermanoetik ya x-aʼtejik ta Comiteetik yuʼun Enlace ta swenta Hospital oranax ya xbajtik ta skoltayel, ayniwan ya spasik te kʼalal kʼubenix-a te ajkʼabale. Pero ta swenta te skʼuxul yoʼtan te ancianoetik-abi sok te sfamiliaik, jaʼ mukʼ skʼoplal ta yoʼtanik skoltayel te hermanoetik.

⁸ Ay ancianoetik ya xkoltaywanik ta spasel sNail Tsoblejetik sok yantikxan naetik, jaʼnix jich ya xkoltaywanik te banti ya xkʼax wokolil ta skaj tulan yikʼal jaʼal, nijkel o yan wokolil. Soknix ya slokʼes stiempoik yuʼun ya xnojpteswanik, ya xkoltaywanik sok ya yakʼbeyik smukʼul yoʼtan te hermanoetik. Te ancianoetik-abi sok te sfamiliaik ya kutsilkʼoptaytik ta swenta te bin ya spasike sok te yakuk x-akʼbotik bendición yuʼun te Jehová. Jich bitʼil te ya  jpastik te j-abatotik yuʼun Dios, te ancianoetik ya skʼan te tsajtaybiluk ya yilik te bin ay ta swentaik spasel. Ma skʼan te jaʼ ya yakʼbeyik bayal tiempo te aʼtelil ta swenta Dios te maba ya yakʼbeyikix tiempo te sfamiliaik.

9. Jich bitʼil ya yal Filipenses 2:4, 5, ¿bin talelil ya skʼan ayuk kuʼuntik ta jpisiltik?

⁹ (Kʼopona Filipenses 2:4, 5). Manchukme ma ancianootik ta jpisiltik ya xjuʼ ya jpastik tulan jich bitʼil la spas te Jesús. Te Biblia ya yal te «la sloqʼues sba ta yoʼtan» (Filip. 2:7). ¿Bin ya yakʼ jnoptik? Te lekil j-abat jaʼ ya skʼan te lek ya x-ilot yuʼun te yajwale. Te bitʼil jaʼ j-abatotik yuʼun te Jehová sok te ya jkoltaytik te hermanoetik, jaʼ ya jkʼantik te ya xtuunotik yuʼun te Dios sok te ya x-abatinotik te stojol te hermanoetik. ¿Bin-utʼil ya jpastik? Kiltik cheʼoxebuk.

10. ¿Bin ya jojkʼoybey jbatik yuʼun ya jnaʼtik te bin yilel jtaleltik?

¹⁰ Ilawil te bin yilel atalel. Jojkʼoybey aba: «¿Yabal jpas tulan ta skoltayel te yantik? ¿Bin ya jpas teme ya yalbonik te ya xbajt kulaʼtay jtul hermano o hermana te ayix yaʼbilalik yuʼun ya kikʼ bael ta tsoblejetik? ¿Yabal jap jba ta spasel te limpieza kʼalal ya yichʼ pasel te mukʼul tsoblej o ta slekubtesel te sNail Tsoblej?». Kʼalal la kakʼ jbatik ta stojol Jehová la kalbeytik ta jamal te ya jtuuntestik spisil te bin ay kuʼuntik swenta ya x-abatinotik ta stojol, tey ochem skʼoplal-a te jtiempotik sok te bintik ay kuʼuntik. Jich yuʼun tseʼel yoʼtan te Jehová kʼalal ya yil te sok spasemal koʼtantik ya jtuuntestik te bin ay kuʼuntik yuʼun ya jkoltaytik te yantik. Jaʼ yuʼun, ¿bin ya jpastik teme ya kiltik te ayto banti ya skʼan ya jlekubtestik te jtaleltike?

11. ¿Bin-utʼil ya skoltayotik te oración yuʼun ya jpastik tulan ta skoltayel te yantik?

¹¹ Kʼopona sok spisil awoʼtan te Jehová. Teme wokol ya awaʼiy slekubtesel te atalele, kʼopona sok spisil awoʼtan te Jehová. Albeya ta jamal te bin yaʼiyel ya awaʼiy aba sok kʼanbeya te ya apas «te bin lec ya scʼan yoʼtan stuquel» (Filip. 2:13).

12. ¿Bin-utʼil ya xkoltaywanik ta organización te jchʼieletik te yichʼojikix jaʼ?

¹² Teme jchʼielat sok awichʼojix jaʼ kʼanbeya te Jehová te yakuk akʼan te ya x-abatinatxan ta congregación. Ay lugaretik te jaʼ bayalxan te ancianoetik sok jaʼ ma bayaluk te ministerialetik, pero ay ministerialetik te ayix yaʼbilalik. Te bitʼil yak ta chʼiel te organización ya skʼan te ayuk jchʼiel hermanoetik yuʼun ya skoltayik te ancianoetik ta yilel te lum yuʼun te Jehová. Teme ya ajap aba yuʼun ya xkoltaywanat te banti ya skʼanikxan koltayel, tseʼelme awoʼtan, melel ya atseʼentesbey yoʼtan te Jehová, lek akʼoplal ta stojol sok lek ya awaʼiy aba ta swenta te ya akoltay te yantike.

13, 14. ¿Bin-utʼil ya jkoltaytik te hermanoetik? (Ilawil te dibujo ta yelaw te revista).

¹³ Ilawil te bin ya xtuun yuʼun te yantik. Te jpuk-kʼop Pablo jich la stsʼibay ta stojol te hebreoetik: «Ma me xchʼay ta awoʼtanic spasel te bin lec soc te talel cʼaxel yac acoltay abahic, como hich yilel milbil mahtaniletic ini te lec yoʼtan Dios yuʼune» (Heb. 13:16). ¡Bayal tuun yuʼunik te bin la yichʼik albeyel! Te kʼalal mato jaluk yichʼbelik-a te carta te hermanoetik ta Judea la yijkitayik te snaik, te snegocioik sok te sfamiliaik te ma jaʼuk j-abatetik yuʼun Dios soknix bajtik ta anel ta witsetik (Mat. 24:16). Ta yorail-abi, mukʼ skʼoplal te talel kʼaxel  ya skoltay sbaik. Teme ay spasojikix ta skuxlejalik te bin la yal te Pablo te ya yakʼbey sbaik te bin ay yuʼunik, maba wokol la yaʼiyik te ya xkʼayik te banti bajtik ta kuxinele.

¹⁴ Ayniwan hermanoetik te maba ya yalbotik te ya skʼanik koltayel. Jnop kaʼiytik te ay jtul hermano te laj te yiname. ¿Yabal skʼan te ay machʼa ya xkoltayot ta spasel te sweʼel, te ay banti ya kikʼtik bael ta jcarrotik o ya jkoltaytik ta yantikxan aʼtelil ta sna? Maniwan ya yalbotik ta skaj te maba ya skʼan ya yakʼbotikxan kaʼteltik. Pero seguro ayotik te ya yalbotik bayal wokol teme ya jkoltaytike. Mame jkuytik te ay yan machʼa ya skoltay o jaʼ ya yalbotik te bin ya xtuun yuʼune. Jojkʼoybey jbatik: «Te jichuk yak ta kʼaxel ta jtojol, ¿bin-utʼil ya xjuʼ ya skoltayonik?».

15. ¿Bin ya jpastik teme ya jkʼan ya jkoltaytik te yantik?

¹⁵ Ayuk yutsil awoʼtan. Ya jnaʼtik ta lek te ay hermanoetik sok hermanaetik ta jcongregaciontik te jich yoʼtanik te ya xkoltaywanik. Maba utsʼinel ya yaʼiyik te jich ya spasik. Ya jnaʼtik te spisil-ora ya skoltayotik sok ya jkʼantik te ya jtʼuntik te ejemplo yuʼunike. Jtul anciano te ayix 45 yaʼbilal te Alan sbiil, yakʼoj ta yoʼtan te ayuk yutsil yoʼtan ta stojol te yantik. La stʼunbey te ejemplo yuʼun te Jesús sok jich la yal: «Te Jesús spisil-ora ay bin yak ta spasel-a, pero ya xtal ta stojol te ants winiketik te yanyantik yaʼbilalik swenta ya skʼanbeyik koltayel. Snaʼojik te ya xnaʼbot yoʼbolil sbaik. Ya jkʼan te jichuk jtalel bitʼil te Jesús te ayuk yutsil koʼtan, skʼuxul koʼtan sok te ya jmel koʼtan ta stojol te yantike».

16. ¿Bin-utʼil ya skoltayotik te bin ya yal Salmo 119:59, 60 ta stʼunel te ejemplo yuʼun te Jesús?

¹⁶ Teme maba ya xjuʼ kuʼuntik spasel spisil  te bintik la spas te Jesús mame xchebaj koʼtantik (Sant. 3:2). Te kʼalal ay machʼa ay bin ya x-akʼbot snop, maniwan xjuʼ yuʼun spasel ta jkʼaxel jich bitʼil nojptesot, pero kʼunkʼun ya snop bael sok teme ya spas tulan ta stʼunbeyel te ejemplo yuʼun te machʼa ya xpʼijubtesot yuʼun. Jaʼ pajal sok teme ya jpas ta jkuxlejaltik te bin ya jnoptik ta Biblia sok te ya jpastik tulan ta slekubtesel te jtaleltik, jich ya xjuʼ kuʼuntik stʼunel te ejemplo la yakʼbotik te Jesús (kʼopona Salmo 119:59, 60).

17, 18. ¿Bin lekilal ya jtatik teme ya jtʼuntik te ejemplo yuʼun te Jesuse?

¹⁷ Kʼalal ay machʼa ya jkoltaytik, ya jtijbeytik yoʼtan te yantik yuʼun jichuknix ya spasik-euk. Jtul anciano te Tim sbiil, jich ya yal: «Ta jcongregacion ay jchʼiel hermanoetik te stsakoj yip te schʼuunel yoʼtanik sok ochemik ta siervo ministerial, melel jaʼ la yilik te lekil ejemplo yuʼun te yantike. Te bitʼil jich ya spasik skoltayoj bayal te hermanoetik sok te ancianoetik».

¹⁸ Te ants winiketik jaʼnax ya sleik te yutsil slekilik, pero te j-abatotik yuʼun Jehová ma jichuk ya jpastik. Jaʼ ya stij koʼtantik te bitʼil la spas tulan te Jesús sok ya kakʼ ta koʼtantik stʼunbeyel te ejemplo yuʼune. Maniwan ya xjuʼ kuʼuntik spasel spisil te bitʼil la spase, pero ya xjuʼ kuʼuntik spasel tulan ta skʼayinbeyel te stalele (1 Ped. 2:21). Teme jich ya jpastik tseʼelme koʼtantik, melel ya jnaʼtik te lek ilbilotik yuʼun te Jehová.