TA NAMEY KʼINAL te kʼalal ay machʼa ya xnujpune, te kereme ya yakʼbey smajtan te sfamilia te achʼix te ya xnujpun soke. Te majtanil ya yakʼike, jaʼniwan chambalam o takʼin. Jaʼnix jich ay baeltik ya x-aʼtejik ta sna te achʼixe, jich te bitʼil kʼax ta stojol te Jacob te kʼalal nujpun sok te Raquel. Te Jacob la sjap sba ta aʼtel jukeb jaʼbil ta stojol te snial mamal (Gén. 29:17, 18, 20). ¿Bin yuʼun te jich la spasik te ya yakʼik majtanil te kʼalal ay machʼa ya xnujpune?

Te Carol Meyers te ya yilbey skʼoplal te Biblia jich ya yal: «Te majtanil ya yichʼ te familia, jich kʼoem te jaʼ stojol te achʼix ya xnujpun, melel ma x-aʼtejix tey-a. Kʼax mukʼ skʼoplal ya yilik te majtanil te familiaetik te jaʼnax ya x-aʼtejik ta skʼinalik». Te majtanil jaʼnix jich ya skʼan ya yal te jun-nax ya x-ayinikix ta schebal te familiaetik. Sok te kʼalal ay swokolik talel kʼaxel ya skoltay sbaik. Jaʼnix jich te majtanil ya yakʼ ta naʼel te jaʼ ya xwentainotix yuʼun te smamalal ma jaʼukix te smeʼ state.

Te majtanil ya yichʼ akʼbeyel te sfamilia te achʼix ma skʼan ya yal te ya yichʼ manel o chonel bitʼil biluketik. Te libro Instituciones del Antiguo Testamento ya yal: «Te yakʼel takʼin o yanxan te pajal sok ta stojol te sfamilia te achʼix, jich kʼoem te la yichʼ manel. Jaʼnax […] ya yakʼbeyik smajtan te sfamilia te achʼixe ma jaʼuk te ya smanike». *

Ta kʼajkʼal ini, ay cheʼoxeb nacionetik te yato yichʼ akʼel majtanil. Teme j-abatetik yuʼun Dios te meʼil tatiletik sok ma bayaluk ya skʼanik te majtanile, te ants winiketik ya yilik te lek yoʼtanik (Filip. 4:5; 1 Cor. 10:32, 33). Jich ya yakʼik ta ilel te ma «xbiqʼuet ta yoʼtanic taqʼuin» (2 Tim. 3:2). Teme ma bayaluk ya skʼanik te majtanile, te kerem ma sujbiluk ya yaʼiy te patilto ya xnujpun ta skaj te ya sle te jayeb ya xkʼanbote. Sok teme ochem ta precursor, ma xyijkitay te servicio ta skaj te ya x-aʼtej ta stael te takʼine.

Ta swolol Balumilal ay nacionetik yakʼojik leyetik te ya yal jayeb ya yichʼ akʼel te majtanile. Ta lugaretik-abi, te meʼil tatiletik te jaʼ j-abatetik yuʼun Dios ya yichʼik ta wenta te leyetike. Jich ya spasik, melel te Dios ya skʼan te ya «yacʼ sbahic ta cuentahinel yuʼun te machʼatic mucʼ yaʼtelic» sok ya schʼuunik te leyetik te maba skontrainoj te ley yuʼun te Diose (Rom. 13:1; Hech. 5:29).