TE Jehová la yal ta mantal ta Ley yuʼun Moisés te ya xjuʼ ya yakʼik ta majtanil te xpuliwoketik sok te tsumutetik. Melel ta schaʼchajpal te mutetik-abi, te ley ya yal te ya xjuʼ ta akʼel ta chikʼbil majtanil. Jaʼ yuʼun te israeletik ya xjuʼ ya yakʼik te xpuliwoketik o te yane (Lev. 1:14; 12:8; 14:30). Lek la yilik te jich la yichʼik albeyel, melel wokol ta tael te xpuliwoketik. Kiltik bin yuʼun.

Te xpuliwoketik jaʼnax ayik ta Israel te kʼalal kʼux te kʼajkʼale. Ta octubre ya xbajtik ta yantik nacionetik te banti kʼux-xan te kʼajkʼale, ta patil ya sujtik tal ta Israel kʼalal kʼaxix-a te yorail sik (Cant. 2:11, 12; Jer. 8:7). Jaʼ yuʼun te israeletik ma staik xpuliwoketik ta yorail sik yuʼun ya yakʼik ta chikʼbil majtanil.

Yan te tsumutetik spisil-ora ayik ta Israel sok ya schʼitesik ta snaik (paja sok Juan 2:14, 16). Ta jun libro ya yal te ta spisil naetik sok puebloetik ta lugar-abi, «te ants winiketik ya schʼitesik tsumutetik. Ta jujunwol na ay spechech tsumutetik ta pajkʼ te banti ya xkuxinik» (paja sok Isaías 60:8).

¿Bin ya yakʼ jnoptik te Jehová? Jaʼ te ay skʼuxul yoʼtan sok ya yichʼ ta wenta bin yilel te jkuxlejaltik, te majtanil mutetik la yakʼ te israeletik lek la yil te Jehová.