Akʼbot yilik kʼuxul oʼtanil
TE Yomara, te Marcelo sok Hiver sbankil yijtsʼin sbaik te ma xyilik kʼinal sok te kuxinemik ta jun chʼin lum ta Guatemala. Te Yomara jajch snop te Biblia sok te Testigoetik, ta patil jajch snopik-euk te Marcelo sok Hiver. Pero te bin ya xmakotike, jaʼ te ma snaʼik skʼoponel braille. Jaʼ yuʼun te machʼa ya xnojptesotik yuʼun jaʼnix ya skʼopon te parrafoetik sok te textoetik.
Jaʼnix jich wokol la yilik te ya xbajtik ta tsoblej, melel 40 minuto sbelal te sNail Tsoblej sok ma xjuʼ ya xbajtik ta stukelik. Jaʼ yuʼun, te hermanoetik ta congregación ya sjel sbaik ta yikʼel bael ta tsoblejetik. Sok te kʼalal jajch skʼasesik asignación ta tsoblej, ya xkoltayotik yuʼun te hermanoetik yuʼun ya snopik sok ya xjil ta yoʼtanik te bin ya yalike.
Ta mayo yuʼun 2019 jajch yichʼ pasel tsoblejetik tey ta slumalik sok tey kʼotik ta nainel jtul hermano sok yinam te jaʼik precursor regular. Jaʼ jajch snojptesik te Yomara, te Marcelo sok te Hiver ta skʼoponel sok ta tsʼibajel ta braille manchukme ma snaʼik-euk-a. Jaʼ yuʼun bajtik ta jun biblioteca yuʼun ya snopik bin-utʼil ta tuuntesel te libroetik yuʼun braille.
Te Marcelo yak ta yakʼel scomentario ta jun tsoblej.
Ta cheʼoxebnax u te Yomara, te Marcelo sok te Hiver la snopik skʼoponel te braille, jich mukʼubxan te schʼuunel yoʼtanik. a Ta ora ini, yoxebalik jaʼik precursor regular, te Marcelo jaʼ siervo ministerial. Bayal tiempo yakʼojbeyik te spasel te yaʼtel Dios ta jujun semana. Jamal chikan ta ilel te bayal sbujtsʼ yoʼtanik.
Te Yomara, te Marcelo sok te Hiver bayal ya yalik wokol yuʼun te koltayel sok te kʼuxul oʼtanil yakʼojik ta ilel ta stojolik te hermanoetike. Te Yomara jich ya yal: «Jaʼto te kʼalal la jnaʼbeytik sba te hermanoetik la yakʼbotik kiltik te smelelil kʼuxul oʼtanil». Te Marcelo jich ya yalxan-euk: «Ay jtaojtik lekil kamigotaktik ta congregación ta swenta te kʼuxul oʼtanil jun-nax ayotik sok te hermanoetik ta swolol balumilal». Te Yomara, te Marcelo sok Hiver yoʼtanuk ya yilikix te ya xkʼot yorail te ya xkʼatpʼuj ta nichimal kʼinal te Balumilal (Sal. 37:10, 11; Is. 35:5).
a Te folleto Aprenda a leer braille jaʼ pasbil yuʼun ya yichʼ koltayel te machʼatik ma xyilik kʼinal o ay schamel sitik yuʼun ya snopik skʼoponel sok tsʼibajel ta braille.
Yaniwan amulan-euk sk'oponel ini
YA JPASKOTIK JUNETIK SOK YANTIK TE BINTIK LOKʼEM TA BIBLIA
Video: «Ma jnaʼ bin ya jpas te manchuk ay kuʼun ini»
Chʼama awaʼiy te bin ya yal jtul winik te ma xyil kʼinale, sok bin-utʼil staoj bayal koltayel ta swenta te Biblia lokʼem ta braille.
TE MAJTAN TAKʼIN
Chʼin puntoetik te ya sjel kuxlejalil
Ma jaʼuknax ya jpastik publicacionetik ta braille, jaʼnix jich ya jnojptestik te ants winiketik ta skʼoponel.
