1. ¿Bin albotik te jnopojeletik ta swenta te bin-ora te slajibal kʼajkʼal, sok bin albotik te ya skʼan ya spasik?

 TE KʼALAL cheʼoxebxanix kʼajkʼal ya xlaj-a te Jesuse, ay chantul jnopojeletik yuʼun te la sjojkʼoybeyik bin señail ya xchiknaj te «kʼalal nopolix-a te slajibal kʼajkʼale» (Mat. 24:3). Te jnopojeletik laniwan skʼan ya snaʼik bin-ora ya yichʼ lajinel te Jerusalén sok te templo. Te bin la yal te Jesús ma jaʼuknax la yalbey skʼoplal te Jerusalén, jaʼnix jich ya yalbey skʼoplal te slajibal kʼajkʼal. Jaʼ yuʼun jich la yal: «Maʼyuk machʼa ya snaʼ te bin kʼajkʼalil sok te jayeb ora ya xtalon, ni jaʼuk te chʼul-abatetik ta chʼulchan ni jaʼuk te Nichʼanile; jaʼnax te Tatile». Sok albotik te consejo ini: «Kuxulukme awoʼtanik» sok «Wikʼilukme asitik ta spisil-ora» (Mar. 13:32-37).

2. ¿Bin yuʼun ya skʼan te wikʼiluk sitik te jchʼuunjeletik ta Jerusalén?

² Te jchʼuunjeletik ta sbabial siglo ya skʼan te wikʼiluk sitik ta spisil-ora yuʼun jich ma xlajik-a. Te Jesús la yalbey te jnopojeletik te bin ya skʼan ya staik ta ilel yuʼun ya snaʼik te nopol ya yichʼ lajinel te Jerusalén. Jich la yal: «Te kʼalal ya awilik te joytaybilix yuʼun soldadoetik te Jerusalén, naʼaikme te yuʼun nopol ya yichʼix lajinele». Te kʼalal jich ya yilike, ya skʼan te yakuk x-anik bael ta witstikil (Luc. 21:20, 21). Te machʼatik la schʼuunik te bin la yal te Jesús, anik lokʼel ta Jerusalén te kʼalal mato joytaybil yuʼun-a te Romanoetik.

3. ¿Bin ya jnoptik ta artículo ini?

 ³ Nopolix te slajibal kʼajkʼal, jaʼ yuʼun ya skʼan te ayuk jpʼijiltik sok wikʼiluk jsitik jich bitʼil te sbabial jchʼuunjeletik. Ta artículo ini, ya jnoptik bin ya skʼan ya jpastik yuʼun ma xjelawotik ta yalel bin ya skʼan ya yal te bintik yak ta kʼaxele. Jaʼnix jich ya jnoptik bin-utʼil ya jtsajtay jbatik sok bin-utʼil ya jtuuntestik ta lek te jayebxan tiempo jileme.

4. ¿Bin yuʼun mukʼ skʼoplal ya skʼan ya kiltik te bintik yak ta kʼaxel ta balumilal?

⁴ Mukʼ skʼoplal ya kiltik te bintik yak ta kʼaxel ta balumilal, melel ya yakʼ ta ilel te yak ta kʼoel ta pasel te albilkʼopetik te ay ta Biblia. Te Jesús la yal bintik ya xkʼot ta pasel te ya skoltayotik ta snaʼel te nopolix te slajibal kʼajkʼal yuʼun te balumilal yuʼun te Satanás (Mat. 24:3-14). Te jpuk-kʼop Pedro jaʼnix jich la yalbotik te yakuk kichʼtik ta wenta te bitʼil yak ta kʼoel ta pasel te albilkʼopetik, yuʼun jich ya stsak yip te schʼuunel koʼtantike (2 Ped. 1:19-21). Te libro yuʼun Apocalipsis jich ya yal ta sbabial versículo: «Jaʼ te bin la yakʼ ta naʼel te Jesucristo, te akʼbot snaʼ yuʼun te Dios, yuʼun jich ya yakʼbey yil te j-abatetik yuʼun te bintik nopol ya xkʼotix ta pasele» (Apoc. 1:1). Ta swenta-abi mukʼ skʼoplal ya kiltik te bintik yak ta kʼaxel ta balumilal sok te bitʼil yak ta kʼoel ta pasel te albilkʼopetike. Jaʼ yuʼun yaniwan jmulantik yalbeyel skʼoplal sok te kermanotaktik.

5. ¿Bin yuʼun ya skʼan ya jtsajtay jbatik kʼalal ya kalbeytik skʼoplal te albilkʼopetik, sok bin ya skʼan ya jpastikix-a? (Jaʼnix jich ilawil te fotoetik).

⁵ Ya skʼan ya jtsajtay jbatik kʼalal ya kalbeytik skʼoplal te yak ta kʼoel ta pasel te albilkʼopetik te ay ta Biblia. ¿Bin yuʼun? Melel ma skʼan ya kaltik te bin ya jnoptik yuʼun maba ya xat sba-a te congregación. Jich bitʼil teme ay ya kaʼiytik te ya schap skʼopik te ajwaliletik yuʼun ya x-ayin lamalkʼinal sok te ya xlaj te wokolile, mame jnoptik te jaʼ yakix ta kʼoel ta pasel te albilkʼop ay ta 1 Tesalonicenses 5:3, jaʼ lek te jaʼ ya jchʼuuntik te bin ya yal te organización yuʼun te Jehová. Teme jaʼ ya kalbeytik skʼoplal te bin yaloj te organización yuʼun te Jehová, jich maba yanyantik-a te bin ya snop ta yoʼtanik te congregacione (1 Cor. 1:10; 4:6).

6. ¿Bin ya yakʼ jnoptik te 2 Pedro 3:11-13?

⁶ (Kʼopona 2 Pedro 3:11-13). Te jpuk-kʼop Pedro ya yalbotik bin yuʼun ya skʼan ya jtsajtay kiltik te albilkʼopetik. Ya stij koʼtantik ta smaliyel «te skʼajkʼalel te Jehová». ¿Bin yuʼun? Ma jaʼuk yuʼun te ya jkʼan ya jnaʼtik «te bin kʼajkʼalil sok te jayeb ora» ya xtal te Armagedón, jaʼ ta swenta te ya skʼan ya jtuuntestik ta lek te jayebxan tiempo jilem yuʼun ya jlekubtestik te jtaleltik sok te ya kakʼtik ta ilel te ya kichʼtik ta mukʼ te Diose (Mat. 24:36; Luc. 12:40). Jaʼ ya skʼan ya yal abi te lekuk te jtaleltik sok spisiluk te bin ya jpastik jaʼuk ya jpastik ta swenta te skʼuxul koʼtantik ta stojol te Jehová, jaʼ yuʼun ya skʼan ya jtsajtay jbatik.

7. ¿Bin ya skʼan ya jpastik yuʼun ya jtsajtay jbatik? (Lucas 21:34).

⁷ Te Jesús la yalbey te jnopojeletik yuʼun te yakuk yilik te bin yak ta kʼaxel ta balumilal, pero te jaʼuknix jich ya yilik bin-utʼil ay te schʼuunel yoʼtanik. Jich la yichʼ alel ta Lucas 21:34 (kʼopona).  Te Jesús jich la yal: «Tsajtayame abaik». ¿Bin ya skʼan ya yal te yakuk jtsajtay jbatike? Jaʼ te ma skʼan ya jpastik te bin ya xjuʼ ya yutsʼin te bitʼil kamigoinoj jbatik sok te Jehová. Yuʼun jich ya x-ayinotik ta skʼuxul yoʼtan te Diose (Prov. 22:3; Jud. 20, 21).

8. ¿Bin albotik te jchʼuunjeletik yuʼun te Pablo?

⁸ Te jpuk-kʼop Pablo la yalbey te jchʼuunjeletik te akʼa stsajtay sbaik. Jich la stsʼibaybey te jchʼuunjeletik ta Éfeso: «Tsajtayame abaik ta lek te manchuk jichukex te bin-utʼil machʼatik ma snaʼik kʼinale, jichukexme te bin-utʼil machʼatik ay spʼijil yoʼtanik» (Efes. 5:15, 16). Te Satanás yak ta spasel tulan yuʼun ya slajinbotik te schʼuunel koʼtantik. Jaʼ yuʼun te Biblia ya yalbotik te akʼa jnaʼtik «bin-a te skʼanojel yoʼtan te Jehová», yuʼun jich maba ya stsalotik-a te Satanás (Efes. 5:17).

9. ¿Bin-utʼil ya jnaʼtik bin-a te skʼanojel yoʼtan te Jehová?

⁹ Te Biblia ma xyal spisil te bintik maniwan lek ya yil te Jehová. Bayal buelta ay bin ya skʼan ya jtatik ta nopel spasel te maba ya yalbey skʼoplal te Biblia. Swenta lek te bin ya jtatik ta nopel ya skʼan ya jnaʼtik «bin-a te skʼanojel yoʼtan te Jehová». ¿Bin-utʼil ya jnaʼtik? Jaʼ te spisiluk-ora ya jkʼopontik te Biblia sok te ya jnopilan ta koʼtantik. Teme kʼoem ta koʼtantik bin-a te skʼanojel yoʼtan te Jehová sok teme kichʼojbeytik «te snopojibal yuʼun te Cristoe», ayme jpʼijiltik yuʼun ya jtatik ta nopel te bin ya jpastik manchukme maba jamal ya yal te Bibliae (1 Cor. 2:14-16). Ay baeltik te ma wokol ta naʼel bin-a te ya skʼan ya jpʼajtik, pero ay yantik te wokol ta naʼele.

10. ¿Bintik-a te ya skʼan ya jpʼajtike?

¹⁰ Cheʼoxeb te bintik ya skʼan ya jpʼajtik, jaʼ te manchuk ya kakʼ jbatik ta mulanel, te manchuk ya xjelawotik ta weʼel uchʼel, te ya jtuuntestik kʼopetik te kʼuxik ta aʼiyel sok te ya jkʼasestik kʼajkʼal-a te bintik yichʼoj majtamba o pornografía (Sal. 101:3). Te jkontratik te jaʼ te Pukuje, spisil-ora yak ta sleel te bin-utʼil yakuk kijkitaytik ta yamigoinel te Jehová (1 Ped. 5:8). Teme maba ya jkanantay jbatik, ya xjuʼ ya yotses ta koʼtantik sok ta jpensartik te bikʼtal oʼtantaywanej, te loʼlaywanej, te kontrainwanej, te toybail sok te lab-oʼtanil (Gál. 5:19-21). Kʼunkʼun-niwan ya xjajch ta chiknajel ta koʼtantik. Pero, teme maba ya jlokʼestike, ya xjuʼ ya xmukʼubxan sok ya stsakxan yip jich te bin-utʼil jpejt chopol jaʼmal (Sant. 1:14, 15).

11. ¿Bin-a te kʼunkʼun ya yutsʼinotik sok bin yuʼun ya skʼan ya jpʼajtik?

¹¹ Kilbeytik skʼoplal junuk te bin kʼunkʼun ya xjuʼ ya yutsʼinotik, jaʼ te ya jokintik te machʼatik chopol stalelik. Jnop kaʼiytik te ay jtul joytik ta aʼtel te maba Testigouk. Te bitʼil ya jkʼantik te lek ya yil te testigoetik yuʼun Jehová, lekniwan koʼtantik ta stojol sok ya jkoltaytik, jaʼ yuʼun ayniwan baeltik ya xjajch jokintik ta weʼel, pero ta patil spisil-ora jich ya jpastikix. Te joytik ta aʼtel ay baeltik ya yalbey skʼoplal mulwej, pero ma lek ya kaʼiy jbatik yuʼun sok maba ya jchʼik jbatik-a, pero ta patil ya xkʼayotik ta yaʼiyel sok maʼyukix bin yaʼiyel ya kaʼiytik-a. Ta jun buelta ay bin ya yikʼotik ta yuchʼel te kʼalal ya xlaj koʼtantik ta aʼtel, jich ya xjajch jtʼuntik te snopojibal yuʼune. ¿Jayebniwan tiempo ya xkʼax yuʼun ya xjajch kʼayinbeytik stalel? Te bitʼil j-abatotik yuʼun te Diose lek koʼtantik  sok ya kichʼtik ta mukʼ te yantike. Pero mame xchʼay ya koʼtantik te yame jkʼayinbeytik stalel te machʼatik ya jokintike (1 Cor. 15:33). Teme ya jpastik te bin la yal te Jesús sok teme ya jtsajtay jbatik, maba ya jkʼasestik tiempo sok te machʼatik ma schʼuunik te mantaliletik yuʼun te Jehová (2 Cor. 6:15). Ya jpʼajtik te bintik ya yutsʼin te koʼtantik.

12. ¿Bin ya skʼan ya spasik-a te jnopojeletik yuʼun te Jesús te bitʼil yakik ta smaliyel te slajibal kʼajkʼal?

¹² ¿Jaʼnaxbal la spet skʼabik te jnopojeletik yuʼun te Jesús ta smaliyel te slajibal kʼajkʼal? Maʼuk, akʼbot yaʼtelik yuʼun te Jesús. Albotik te akʼa scholik skʼop Dios «ta Jerusalén, ta spamal skʼinal Judea sok ta Samaria, sok kʼalalto ta stiʼil te balumilale» (Hech. 1:6-8). Kʼax bayal te yaʼtelike. Pero, teme jaʼ ya xbajt ta yoʼtanik spasel, jich ya stuuntesik ta lek te stiempoike.

13. ¿Bin yuʼun ya skʼan ya jtuuntestik ta lek te jtiempotik? (Colosenses 4:5).

¹³ (Kʼopona Colosenses 4:5). Swenta ya jtsajtay jbatik, ya skʼan ya kiltik bin-utʼil yakotik ta stuuntesel te jtiempotik. Jich bitʼil ya yal te Eclesiastés 9:11, ya sta yorail te «ay bintic ya xcʼoht ta stojol  spisilic». Ma chikan bin-ora ya xjuʼ ya xlajotik.

14, 15. ¿Bin-utʼil ya jtuuntestik ta lek te jtiempotik? (Hebreos 6:11, 12; jaʼnix jich ilawil te fotoetik).

¹⁴ Teme ya jpasbeytik te skʼanojel yoʼtan te Jehová sok ya jmukʼubtestik te schʼuunel koʼtantik, jichme ya jtuuntestik ta lek te jtiempotik (Juan 14:21). Ya skʼan ya jchʼuuntik te consejo ini: «Junukme awoʼtanik, mame xtal xbajtuk awoʼtanik, sok jaʼukme spisil-ora ya xbajt ta awoʼtanik spasbeyel yaʼtel te Kajwaltike» (1 Cor. 15:58). Teme ya jpastik te ban kʼalal ya xjuʼ kuʼuntik ta stojol te Jehová, maba ya jmel koʼtantik teme ya xtal te slajibal kʼajkʼal yuʼun te balumilal ini o teme joʼotik ya xlajotik (Mat. 24:13; Rom. 14:8).

¹⁵ Jich bitʼil la yal jilel te Jesús yak ta skoltayel te jnopojeletik te yakik ta scholel skʼop Dios ta swolol Balumilal. Ta swenta te organización yuʼun te Jehová, te Jesús ya snojptesotik ta scholel te skʼop Dios sok ya yakʼbotik te aʼtejibaletik te ya xtuun kuʼuntik (Mat. 28:18-20). Te bin ya skʼan ya jpastik, jaʼ te maba ya jkom jbatik ta scholel skʼop Dios sok ta nojpteswanej soknix te ya stsajtay jbatik te bitʼil yakotik ta smaliyel te skʼajkʼalel te Jehová. Maba ya xchʼay te smukʼul koʼtantik «kʼalalto ta slajibal» teme ya jpastik te bin ya yal te Hebreos 6:11, 12 (kʼopona).

16. ¿Bin ya kakʼ ta koʼtantik spasel?

¹⁶ Te Jehová yakʼojbeyix skʼajkʼalel te bin-ora ya slajin te balumilal yuʼun te Satanás. Kʼalal ya xkʼot te kʼajkʼal-abi, ya skʼotes ta pasel te albilkʼopetik ay ta Biblia. Manchukme jich ya kiltik te yak ta jalajel te slajibal kʼajkʼal, pero «ma ba ya xhalaj» stukel te skʼajkʼalel te Jehová (Hab. 2:3). Jaʼ yuʼun kakʼ ta koʼtantik spasel te bin ya yal Miqueas 7:7: «Te hoʼone ya cacʼ jsit ta stojol te Jehová, ha ya jmahliy te Dios yuʼun te jcolele».