1. ¿Bin yuʼun ya awal wokol yuʼun te Bibliae?

 ¡YA KALBEYTIK bayal wokol te Jehová yuʼun te la yakʼbotik te Biblia! Tey ya jtatik consejoetik te ya xtuun kuʼuntik kʼalal ayotik ta wokol. Jaʼnix jich ya yakʼ jnaʼtik te ay bin tʼujbil ya yakʼ jmaliytik ta pajel chaʼbej. Pero, te bin mukʼxan skʼoplale jaʼ te ya yakʼ jnaʼtik te bin yilel stalel te Jehová. Snopilanel ta koʼtantik te tʼujbil taleliletik yuʼun te Jehová ya stij koʼtantik yuʼun ya xnoptsajotik ta stojol sok yuʼun ya kamigointik (Sal. 25:14).

2. ¿Bin-utʼil yakʼoj sba ta naʼel te Jehová?

² Te Jehová ya skʼan te yakuk xnaʼbot sba yuʼun te ants winiketik. Ta namey kʼinal, la yakʼ sba ta naʼel ta swenta wayichiletik, najalsitiletik sok ta chʼul-abatetik (Núm. 12:6; Hech. 10:3, 4). Te manchuk la yichʼ tsʼibayel spisil ini, ma xjuʼ ya jnaʼtik te jichuke. Jaʼ yuʼun, te Jehová la stuuntes chaʼoxtul winiketik yuʼun ya stsʼibayik «ta libro» te bin ya skʼan te yakuk jnaʼtike (Jer. 30:2). Te Dios «cʼax lec te be yuʼune», jaʼ yuʼun ya jnaʼtik te yananix skoltayotik-a te bin la yakʼ ta tsʼibayele (Sal. 18:30).

3. ¿Bin la spas te Jehová yuʼun maba laj skʼoplal te Bibliae? (Isaías 40:8).

³ (Kʼopona Isaías 40:8). Te Biblia la yichʼ tsʼibayel ta bintik oranax ya xkʼaʼ sok ta ora ini maʼyukix te namey junetik-abi. Pero, ta bayalix tal jaʼbil te j-abatetik yuʼun Dios bayal koltaybilik yuʼun te Biblia. Te Jehová la yakʼ ta lokʼtayel ta yantik junetik te sKʼope. Leknax la spasik te machʼatik la slokʼtayike manchukme jmulawiletik. Jtul winik te pʼijuben ta lek jich la yal ta swenta te Escrituras Hebreas: «Ya xjuʼ ya kaltik te maʼyuk yan namey libro te tsʼakal la yichʼ lokʼtayele». Manchukme jmulawiletik te machʼatik  la stsʼibayik te ayix tal jaʼbile sok manchukme oranax ya xkʼaʼ te banti la yichʼ tsʼibayele, te bintik ya jkʼopontik ta Biblia ta ora ini, jaʼ te bin lokʼem tal ta yoʼtan te Jehová.

4. ¿Bin ya jnoptik ta artículo ini?

⁴ «Spisil te bintik lek akʼbilotik sok te lekil majtaniletik» talem ta stojol te Jehová, pero te Biblia jaʼ te kʼax lekil majtanil yakʼbeyojotike (Sant. 1:17). Jun majtanil bayal bin ya yakʼ jnaʼtik ta swenta te machʼa la yakʼbotike. Ya yakʼ jnaʼtik teme ya snaʼbotik jbatik sok teme ya snaʼ te bin ya xtuun kuʼuntike. Jich ya xjuʼ ya kaltik ta swenta te Biblia. Te kʼalal ya jkʼopontik, bayal bin ya jnoptik ta stojol te Jehová, ya xchiknaj ta ilel te ya snaʼbotik jbatik ta lek sok te ya snaʼ te bin ya xtuun kuʼuntik. Ta artículo ini ya jnoptik oxeb talelil yuʼun te Jehová te ya yakʼ ta nopel te Biblia: jaʼ te spʼijil yoʼtan, te toj bin ya spas sok te skʼuxul yoʼtan. Nail kilbeytik skʼoplal bin ya yal te Biblia ta swenta te spʼijil yoʼtan.

5. ¿Bin-utʼil ya xchiknaj ta ilel ta Biblia te spʼijil yoʼtan te Diose?

⁵ Te Jehová ya snaʼ te ya xtuun kuʼuntik te consejoetik yuʼune. Jaʼ yuʼun la yakʼbotik te Biblia, tey ya jtatik-a te spʼijil yoʼtane. Te consejoetik yuʼun te ay ta Biblia bayal skoltayoj te ants winiketik sok sjeltayojbey te skuxlejalik. Kʼalal te Moisés la stsʼibay te sbabial libroetik yuʼun te Biblia, jich la yalbey te israeletik: «Ma haʼuc te bin mayuc scʼoblal awuʼunic, ha me acuxlejalic» (Deut. 32:47). Te machʼatik ya schʼuunik spasel te bin ya yal te Biblia ya sta stseʼelil yoʼtanik sok lek ya xlokʼ te bin ya spasik (Sal. 1:2, 3). Manchukme bayalix jaʼbil la yichʼ tsʼibayel te Biblia, ya xjuʼ ya sjeltaybey skuxlejal te ants winiketik. Ta jw.org te banti ya yal «Jelontesbot skuxlejalik yuʼun te Biblia», ya ata 50 ta chajp experienciaetik yuʼun ants winiketik te la sjeltay te skuxlejalik te kʼalal la spasik te bin ya yal te Biblia (1 Tes. 2:13).

6. ¿Bin yuʼun ya kaltik te maʼyuk yan libro te pajal sok te Bibliae?

⁶ Maʼyuk yan libro te pajal sok te Biblia. ¿Bin yuʼun? Melel te machʼa lokʼem tal ta yoʼtan jaʼ te Jehová, te Machʼa spisil ya xjuʼ yuʼun, te sbajtelkʼinal ay sok te maʼyuk machʼa ya spajbey te spʼijil yoʼtane. Ay yantik libroetik te yato yichʼ kʼoponel manchukme lajemix te machʼa la spase, pero ay ma xtuunix kuʼuntik te bin ya yale. Yan stukel te consejoetik yuʼun te Biblia maʼyuk bin-ora ya xpejkʼaj skʼoplal, ta bayalix tal jaʼbil skoltayoj bayal ants winiketik. Kʼalal ya jkʼopontik te Biblia sok ya jnopilan ta koʼtantik te consejoetik yuʼune, te schʼul espíritu te Jehová ya skoltayotik yuʼun ya jpas ta jkuxlejaltik (Sal. 119:27; Mal. 3:16; Heb. 4:12). Te machʼa lokʼem tal ta yoʼtan te Biblia ya skʼan ya skoltayat. ¿Mabal jichuk te ya stijbat awoʼtan yuʼun ya akʼaytes aba ta skʼoponel te Bibliae?

7. ¿Bin-utʼil koltaywan te Biblia yuʼun jun-nax ayinik te lum yuʼun Dios ta namey kʼinal?

⁷ Yanxan te bin-utʼil ya xchiknaj ta ilel ta Biblia te spʼijil yoʼtan te Diose, jaʼ te ya yakʼ te jun-nax ayik te lum yuʼune. Kʼalal te israeletik ochik ta Kʼinal te banti albil skʼoplal ya yichʼike, yanyantik banti kuxinik. Ay machʼatik te aʼtejik ta stsakel chay, ta schʼitesel chambalametik sok ay yantik te la yaʼiyik tsʼunbajel. Jaʼ yuʼun, te israeletik juʼniwan te chʼay ta yoʼtanik te machʼatik  nainemik ta yan lugar. Pero, te Jehová la yakʼ te ya stsob sbaik ta yaʼiyel te sKʼope sok te ay bin ya snopikxane (Deut. 31:10-13; Neh. 8:2, 8, 18). Nopanax awaʼiy binwan yaʼiyel la yaʼiy sba jtul israel-winik te kʼalal ya xkʼot ta Jerusalén sok tey ya sjokin sba sok bayal millón ta tul israeletik te talemik ta yanyantik lugar ta yichʼel ta mukʼ te Jehová. Jich koltayotik yuʼun te Jehová yuʼun jun-nax ya x-ayinik. Ta patil bael ta sbabial siglo, ta congregación ay machʼatik te yanyantik skʼopik, te ay skʼulejalik sok ay machʼatik te maʼyuke. Pero, te bitʼil kʼux ta yoʼtanik te Biblia, jun-nax abatinik ta stojol te Jehová. Sok te machʼatik jajchik ta ochel ta congregación kʼot ta yoʼtanik te sKʼop Dios, melel jaʼ ya scholbotik yaʼiyik yuʼun te jchʼuunjeletik sok te ya stsob sbaik (Hech. 2:42; 8:30, 31).

8. ¿Bin-utʼil te Jehová ya stuuntes te Biblia yuʼun jun-nax ya x-ayinik te j-abatetik yuʼun?

⁸ Ta kʼajkʼal ini, te Jehová yak ta stuuntesel te Biblia yuʼun ya snojptes te j-abatetik yuʼun sok te junuknax ya x-ayinik. Tey ya xlokʼ tal spisil te nojptesel ya kichʼtik. Te j-abatotik yuʼun Dios spisil-ora ya xbootik ta tsoblej sok ta mukʼul tsoblej te banti ya jkʼopontik te Biblia, ya kilbeytik skʼoplal sok bayalxan bin ya jnoptik. Te Jehová yak ta stuuntesel te Biblia «yuʼun pajal ya yacʼ sbahic ta aʼbatinel ta stojol» te j-abatetik yuʼune (Sof. 3:9).

9. ¿Bin talelil ya skʼan ayuk kuʼuntik yuʼun ya xkʼot ta koʼtantik te bin ya yal te Biblia? (Lucas 10:21).

 ⁹ Kiltikxan bin-utʼil ya yakʼ ta ilel te spʼijil yoʼtan te Jehová. Te kʼalal la yakʼ ta tsʼibayel te sKʼope, jaʼ la skʼan te jaʼuknax ya xkʼot ta yoʼtanik te machʼatik pekʼel yoʼtanike (kʼopona Lucas 10:21). Te Biblia bayal ya yichʼ kʼoponel ta swolol Balumilal. Jtul winik te pʼijuben ta lek la yal te «ma jaʼuknax te bayal ya yichʼ kʼoponel, te jaʼnix jich ilbil skʼoplal ta lek». Pero, jaʼnax te machʼatik pekʼel yoʼtanik ya xkʼot ta yoʼtanik sok ya spas ta skuxlejalik (2 Cor. 3:15, 16).

10. ¿Bin-utʼil ya xchiknajxan ta ilel ta Biblia te spʼijil yoʼtan te Jehová?

¹⁰ Kiltikxan bin-utʼil ya xchiknaj ta ilel ta Biblia te spʼijil yoʼtan te Jehová. Ya stuuntes te Biblia yuʼun ya snojptesotik sok ya yakʼ smukʼul koʼtantik ta jujuntul. Kʼalal ya jkʼopontik te Biblia, ya jtatik ta ilel te ay jkʼoplaltik ta yoʼtan te Jehová ta jujuntul (Is. 30:21). Kʼalal ayotik ta wokol-a, ¿aybal la jkʼopontik jun texto te bayal la skoltayotike? Bayalniwan buelta jich kʼaxem ta jtojoltik. Manchukme yanyantik-a te bin ya xkʼax ta jkuxlejaltik, ¿bin-utʼil-a te ya skoltayotik ta jujuntul te Bibliae? Jaʼ yuʼun te jaʼ lokʼem tal ta yoʼtan te Machʼa kʼax bayal spʼijile (2 Tim. 3:16, 17).

11. ¿Bin-utʼil la yakʼ ta ilel te Jehová te maba ya stsaawan te kʼalal la yakʼ ta tsʼibayel te Bibliae?

¹¹ Yanxan talelil yuʼun te Jehová jaʼ te toj te bin ya spase (Deut. 32:4). Te machʼa toj yoʼtan maba ya stsaawan, jich stalel te Jehová (Hech. 10:34, 35; Rom. 2:11). Jich la yakʼ ta ilel te kʼalal yanyantik kʼopil la yakʼ ta tsʼibayel te Biblia. Jteb ma spisil te 39 libroetik te nail la yichʼik tsʼibayel, la yichʼ tsʼibayel ta hebreo, jaʼ skʼopik-a te lum yuʼun Dios ta kʼajkʼal-abi. Pero, ta skʼajkʼalel te sbabial jchʼuunjeletik bayal ants winiketik ya xkʼopojik ta griego. Jaʼ yuʼun te 27 libroetikxan yuʼun te Biblia la yichʼ tsʼibayel ta griego. Te Jehová la yakʼ ta ilel te ma stsaawan te kʼalal ma junuknax kʼopil la stuuntes yuʼun ya yichʼ tsʼibayel te sKʼope. Ta kʼajkʼal ini, te jteb ma sta 8 mil millón ta tul ants winiketik ta Balumilal yanyantik skʼopik-a, jaʼ yuʼun, ¿bin-utʼil ya xjuʼ te jpisiltik ya jnaʼbeytik sba te Jehová?

12. ¿Bin-utʼil kʼoem ta pasel te Daniel 12:4 ta ora ini?

¹² Te Jehová la yakʼ ta naʼel ta swenta te j-alwanej Daniel te «ya xpʼohl te bintic ay ta naʼel» te kʼalal nopolix-a te slajibal kʼajkʼal, jaʼ ya skʼan ya yal te bayal ants winiketik ya xkʼot ta yoʼtanik te bin ya yal te Bibliae (kʼopona Daniel 12:4). Jich kʼoem ta pasel, melel te Biblia sok te yantik junetik te lokʼem ta Biblia yichʼoj kʼasesel ta bayal ta chajp kʼopiletik sok yichʼojik pukel. Maʼyuk yan libro jich bitʼil te Biblia te kʼasesbil ta bayal ta chajp kʼopiletik sok te yichʼoj pukele. Ay Bibliaetik te kʼax toyol stojol ya yichʼ chonel. Pero, te lum yuʼun Jehová kʼaxem ta 240 ta chajp kʼopil skʼasesojik ta spajkal o ta olilnax te Biblia sok machʼauk ya xjuʼ ya yichʼ, melel maba tojbiluk. ¿Bin lek lokʼem-a? Jaʼ te bayal millón ta tul ants winiketik te yanyantik snacionik yakik ta snopel «te lek yachʼil kʼop yuʼun te Wentainel» te bitʼil mato xtal te slajibal kʼajkʼale (Mat. 24:14). Te Jehová jaʼ jun Dios te toj yoʼtane sok ya skʼan te spisiluk te ants winiketik ya xnaʼbot sba yuʼun te kʼalal ya skʼoponik te Bibliae. ¿Bin yuʼun? Jaʼ ta swenta te kʼuxotik ta yoʼtane.

13. ¿Bin yuʼun ya kaltik te ya xchiknaj ta ilel ta Biblia te skʼuxul yoʼtan te Diose? (Juan 21:25).

¹³ Te Biblia jaʼnix jich ya yakʼ ta ilel te talelil te bayalxan skʼoplal ay yuʼun te Jehová, jaʼ te kʼuxul oʼtanil (1 Juan 4:8). Jnop kaʼiytik te bintik la yakʼ ta tsʼibayel ta Biblia te Jehová sok bintik-a te maʼuke. La yalbotik ta jamal te bin ya skoltayotik yuʼun ya kamigointik, yuʼun tseʼel koʼtantik sok yuʼun ya xkuxinotik ta sbajtelkʼinal. Pero, te bitʼil bayal ya skʼanotike maba la yakʼ ta tsʼibayel te bin ma xtuun kuʼuntike (kʼopona Juan 21:25).

14. ¿Bin-utʼil ya xchiknajxan ta ilel ta Biblia te skʼuxul yoʼtan te Dios?

¹⁴ Te Jehová jaʼnix jich ya yakʼ ta ilel skʼuxul yoʼtan te kʼalal ya skʼoponotik, melel ya yichʼotik ta mukʼ. Ta Biblia maba ya yakʼ jun mukʼul lista te banti ya yal te bin ma xjuʼ ya jpastik. Ya stuuntes te bin kʼax ta skuxlejal te yantik, te albilkʼopetik sok consejoetik te ya skoltayotik ta stael ta nopel ta lek te bin ya jpastik. Jich ya stij koʼtantik te Biblia yuʼun kʼux ya kaʼiy ta koʼtantik te Jehová sok yuʼun spisil koʼtantik ya jchʼuunbeytik te skʼope.

15. 1) ¿Bin-utʼil ya yakʼ ta ilel te Biblia te bayal jkʼoplaltik ta yoʼtan te Jehová? 2) ¿Machʼa yak ta snopbeyel skʼoplal te chʼin achʼix, te jchʼiel hermano sok te hermana te ayix yaʼbilal te ya xchiknajik ta foto? (Gén. 39:1, 10-12; 2 Rey. 5:1-3; Luc. 2:25-38).

¹⁵ Te Biblia ya yakʼ ta ilel te bayal jkʼoplaltik ta yoʼtan te Jehová, melel ya yal bin yaʼiyel la yaʼiy sbaik te ants winiketik ta namey. Ya xkʼot ta koʼtantik te bin yaʼiyel la yaʼiy sbaik, melel jich la yaʼiy sbaik-euk «te bin-utʼil ya kaʼiy jbatike» (Sant. 5:17). Pero, te bin mukʼxan skʼoplale jaʼ te ya jtatik  ta ilel te «bayal kʼuxotik ta yoʼtan te Jehová sok te ya snaʼ yoʼbolil jbatike», melel jich la yakʼ ta ilel ta stojol te ants winiketik ta namey (Sant. 5:11).

16. ¿Bin ya yakʼ jnoptik ta swenta Jehová te bin kʼax ta skuxlejalik te machʼatik la spasik te bin ma leke? (Isaías 55:7).

¹⁶ Te Biblia ya yakʼ kiltikxan bin-utʼil ya yakʼ ta ilel te skʼuxul yoʼtan te Jehová. Ya yalbotik ta jamal te maba ya yijkitayotik te Jehová kʼalal ay bin ma lek ya jpastik. Bayal buelta te israeletik la skʼaxuntaybeyik smantal te Jehová, pero te kʼalal la sujtes yoʼtanik ta smelelil pasbotik perdón (kʼopona Isaías 55:7). Te jchʼuunjeletik ta sbabial siglo jaʼnix jich snaʼojik-a te kʼux aʼiybilik yuʼun te Jehová. Jun ejemplo, jaʼ te la stijbey yoʼtan te jpuk-kʼop Pablo yuʼun ya yalbey te jchʼuunjeletik te yakuk spasbeyik perdón sok ya yakʼbeyik smukʼul yoʼtan jtul winik te la sujtes yoʼtan yuʼun te mulwej la spase (1 Cor. 5:1-5; 2 Cor. 2:6, 7). Chamnax koʼtantik yuʼun te maba ya spʼaj ta jkʼaxel te j-abatetik yuʼun te ya spasik te bin ma leke. Sok skʼuxul yoʼtan la skoltaylan, la stojobteslan sok la yaltiklanbey te ya xjuʼ ya sujtik tal ta stojol. Ta ora ini, jichnix ya spas ta stojol te machʼa ya spas te bin ma lek sok te ya sujtes yoʼtane (Sant. 4:8-10).

17. ¿Bin yuʼun jaʼ tʼujbil majtanil te Bibliae?

¹⁷ Te Jehová yakʼojbotik jun tʼujbil majtanil. ¿Bin yuʼun kʼax mukʼ skʼoplal te Bibliae? Melel ya yakʼ jnaʼtik te toj yoʼtan te Jehová, te ay spʼijil yoʼtan sok te kʼax kʼuxotik ta yoʼtane. Te Biblia jaʼnix jich ya yakʼ jnaʼtik te jaʼ skʼanojel yoʼtan te Jehová te ya jnaʼbeytik sba sok te ya kamigointike.

18. ¿Bin-utʼil ya kakʼtik ta ilel te ya kaltik wokol yuʼun te Bibliae?

¹⁸ Te sKʼop Dios mukʼ skʼoplal ya skʼan ya kiltik, melel jaʼ jun lekil majtanil te yakʼojbotik te Jehová (Sant. 1:17). Jaʼ yuʼun kakʼbeytik yil ta spisil-ora te ya kaltik wokol yuʼun te majtanil ini. Jich ya jpastik te kʼalal nail ya jpastik oración te kʼalal ya xjajch jkʼopontik te Biblia sok te ya jnopilan ta koʼtantik. Te Jehová, te Machʼa lokʼem tal ta yoʼtan te Biblia, yame skoltayotik teme ya jpastik tulan sok jichme ya jnaʼbeytikxan sba (Prov. 2:5).