TA MIÉRCOLES 18 yuʼun enero 2023 la yichʼ akʼel jun anuncio especial ta jw.org: te hermano Gage Fleegle sok te Jeffrey Winder la yichʼ yaʼtelik ta Cuerpo Gobernante yuʼun te testigoetik yuʼun Jehová. Ta schebalik jun yoʼtan yakʼoj sbaik ta abatinel ta stojol te Jehová.

Te hermano Fleegle chʼi ta Pensilvania (Estados Unidos). Nojptesot ta skʼop Dios yuʼun te smeʼ stat. Kʼalal jchʼielto-a, bajtik ta kuxinel ta jun lugar te banti ya skʼanikxan koltayel ta scholel skʼop Dios. Ta patil, la yichʼ jaʼ ta 20 yuʼun noviembre ta 1988.

Spisil-ora albot yuʼun te smeʼ stat te yakuk x-abatin ta tiempo completo ta stojol te Jehová. Ya yikʼik ta snaik te superintendenteetik yuʼun circuito sok te betelitaetik, sok jich la yil te bayal stseʼelil yoʼtan te hermanoetik ini. Ta 1 yuʼun septiembre ta 1989 te kʼalal la yichʼojix jaʼ-a, och ta precursor regular. Cheb jaʼbil ta patil la skʼotes ta pasel te smeta te yakʼoj ta yoʼtan te kʼalal ay 12 yaʼbilal-a, jaʼ te ya xbajt ta Betel. Jajch ta abatinel ta Betel ta Brooklyn ta octubre ta 1991.

Aʼtej waxakeb jaʼbil ta Departamento yuʼun Imprenta, ta patil ta Departamento yuʼun Servicio. Ta yorail-abi, koltaywan ta jun congregación te ya xkʼopojik ta ruso. Ta 2006 nujpun sok te Nadia, teyto tal-abi schebal ayik ta abatinel ta Betel. Abatinik ta jun congregación te ya xkʼopojik ta portugués, ta ora ini ayix lajuneb jaʼbil te ayik ta congregación español. Te hermano Fleegle bayal jaʼbil aʼtej ta Departamento yuʼun Servicio, patil la yichʼ tikunel bael ta Oficina yuʼun Comité yuʼun Enseñanza sok ta Oficina yuʼun Comité yuʼun Servicio. Ta marzo yuʼun 2022 la yichʼ yaʼtel ta jkoltaywanej yuʼun te Comité yuʼun Servicio yuʼun te Cuerpo Gobernante.

 Te hermano Winder chʼi ta Murrieta (California). Nojptesot ta swenta skʼop Dios yuʼun te smeʼ stat —te jaʼik Testigoetik—, sok la yichʼ jaʼ ta 29 yuʼun marzo ta 1986. Jun u ta patil och ta precursor auxiliar, bayal la smulan jich yuʼun maba la yijkitay spasel, cheʼoxeb u ta patil, ta 1 yuʼun octubre ta 1986 och ta precursor regular.

Kʼalal jchʼielto-a te hermano Winder bajt yulaʼtay te chaʼtul sbankiltak te ayik ta abatinel ta Betel. Jaʼ tijbot yoʼtan yuʼun ya yotses te solicitud te kʼalal ya sta te yaʼbilale. Ta mayo yuʼun 1990 la yichʼ ikʼel ta Betel yuʼun Wallkill.

Bayal ta chajp aʼteliletik la spas tey-a, jich bitʼil ta Departamento yuʼun Limpieza, Departamento yuʼun Hacienda sok ta Oficina yuʼun Betel. Ta 1997 nujpun sok te Angela, schebalik jun yoʼtanik ayik ta abatinel ta Betel. Ta 2014 bajtik ta Warwick, te banti te hermano Winder koltaywan ta aʼtel ta spasel te central mundial. Ta 2016 bajtik ta Centro yuʼun Pʼijubtesel yuʼun Watchtower ta Patterson sok aʼtej ta Servicio yuʼun Audio sok Video. Chaneb jaʼbil ta patil bajtik yan buelta ta Warwick, te hermano Winder la yichʼ yaʼtel ta Oficina yuʼun Comité yuʼun Personal. Ta marzo yuʼun 2022 och ta jkoltaywanej yuʼun te Comité yuʼun Personal yuʼun te Cuerpo Gobernante.

Te winiketik ini jaʼik majtanil te yakʼbeyojotik te Jehová (Efes. 4:8). Ya jkʼanbeytik te Jehová te yakuk x-akʼbotik bayal bendición ta swenta te yaʼtel ya spasik yuʼun te Wentainel.