1. ¿Bin-ora ya xbajtik ta chʼulchan spisil te machʼatik chʼultesbilike?

 AYIX talel jaʼbil, te j-abatotik yuʼun te Jehová jich ya jojkʼoybey jbatik-a: «¿Bin-ora ya x-ikʼotik bael ta chʼulchan te slajibal te machʼatik chʼultesbilike?». Ay jun tiempo la jnoptik te machʼatik chʼultesbilik ya xkuxinik jilel ta nichimal kʼinal kʼalal kʼaxix-a te Armagedón sok te patil ya yichʼik ikʼel bael ta chʼulchan. Pero ta La Atalaya 15 yuʼun julio 2013 la jnoptik te machʼatik chʼultesbilik ya x-ikʼotik bael ta chʼulchan te kʼalal mato jajchem-a te Armagedón (Mat. 24:31).

2. ¿Bin ya xjuʼ ya sjojkʼoybey sbaik? Sok ¿bin ya kilbeytik skʼoplal ta artículo ini?

² Pero ayniwan jich ya jojkʼoybey jbatik: ¿bin ya xkʼot ta stojol te «yantik tuminchijetik» te ayik ta Balumilal te kʼalal ya xkʼax te «tulan wokolil»? (Mat. 24:21; Juan 10:16). Ayniwan machʼatik jich ya yaʼiy sbaik te ma snaʼ te bin ya spasik o te ijkitayotik jilel yuʼun te machʼatik ya xbajtik ta chʼulchane. Ya kiltik cheb relatoetik te bin yuʼun jich ya xjuʼ ya snopike. Jaʼnix jich ya kiltik chaʼoxchajp skʼoplal te bin yuʼun ma skʼan ya jmel koʼtantike.

TE BIN MA XKʼOT TA PASEL

3, 4. ¿Binwan ya sjojkʼoybey sbaik sok bin yuʼun?

³ Ayniwan machʼatik ya sjojkʼoybey sbaik teme ya yijkitayik te smelelil religión te yantik tuminchijetik te kʼalal ya xbajtik ta chʼulchan te machʼatik chʼultesbilike. ¿Bin yuʼun? Kiltik cheʼoxebuk relatoetik te ya xjuʼ ya yakʼ kiltik te bin yuʼun jich ya xjuʼ ya snopike. Te sbabial jaʼ ta swenta te mukʼul  sacerdote Jehoiadá, te jaʼ jtul lekil j-abat yuʼun Dios. Te Jehoiadá sok te yinam Jehosabeat la skanantayik jtul alal te Jehoás sbiil sok la skoltayik yuʼun lekil ajwalil ya xkʼot. Kʼalal kuxulto-a te Jehoiadá, te Jehoás maba namaj ta stojol te Jehová. Pero te kʼalal laj te Jehoiadá, te Jehoás jajch spas te bin ma lek ta sit te Jehová. La yakʼ sba ta loʼlayel yuʼun te principaletik sok la yijkitay te Jehová (2 Crón. 24:​2, 15-19).

⁴ Te schebal ejemplo ya kiltik jaʼ ta swenta te jchʼuunjeletik ta schebal siglo. Te Juan, te slajibal jpuk-kʼop, la yakʼ ta ilel lekil ejemplo ta stojol te jchʼuunjeletik, melel koltaywan yuʼun junuk yoʼtan ya yakʼ sbaik ta stojol te Jehová (3 Juan 4). Jichnix te bitʼil la spasik te jpuk-kʼopetik te jun yoʼtan la yakʼ sbaik ta stojol te Jesús, te Juan la spas tulan yuʼun maba ya skontrainik Dios te jchʼuunjeletik (1 Juan 2:18). Pero te kʼalal laj te Juan, te jchʼuunjeletik jajch skontrainik te Dios, sok cheʼoxebnax jaʼbil ta patil te congregación jich jajch spasik-euk.

5. ¿Bin ya yakʼ jnoptik te cheb relatoetik ini?

⁵ ¿Jichbal ya spasik-euk te yantik tuminchijetik kʼalal ya xbajtik ta chʼulchan te machʼatik chʼultesbilike? ¿Yabal yijkitayik te Jehová jich bitʼil la spas te Jehoás? ¿Yabal xjajch skontrainik te Dios jich te bitʼil la spasik te jchʼuunjeletik ta schebal siglo? ¡Maʼuk! Melel jnaʼojtik te manchukme ma ya xjilik ta Balumilal te machʼatik chʼultesbilik, te yantik tuminchijetik jun yoʼtan ya yakʼ sbaik ta stojol te Jehová sok ya yichʼik kanantayel ta lek. ¿Bin-utʼil ya jnaʼtik?

TE SMELELIL YICHʼEL TA MUKʼ TE DIOS MA XBOLOB SKʼOPLAL

6. ¿Bin oxchajp ya xbajt kilbeytik skʼoplal?

⁶ ¿Bin yuʼun ya jnaʼtik te maba ya xbolob skʼoplal te yichʼel ta mukʼ te Dios manchukme ya xtal tulan wokolil? Melel te Biblia ya yal te maba pajaluk te tiempo te kuxinemotik sok te tiempo te kuxinik te israeletik sok te jchʼuunjeletik ta schebal siglo. Jaʼ yuʼun kiltik oxchajp te bin koem ta pasel: 1) ta stiempo te lum Israel, 2) te kʼalal lajik te jpuk-kʼopetik sok 3) «te kʼalal ya xkʼot yorail te ya yichʼ chaʼlekubtesel spisil te bintik la yal Dios», ya skʼan ya yal abi, te jaʼ te jkʼajkʼaleltike (Hech. 3:21).

7. ¿Bin yuʼun maba chebaj yoʼtan te israeletik te kʼalal la skʼaxuntayik mantal te lum israel sok te ajwaliletike?

⁷ Ta stiempo te lum Israel. Te kʼalal mato xlaj-a te Moisés, jich la yalbey te israeletik: «Como jnaʼoj te cʼalal chamenonix a ya me abohlobtes abahic sok ya me awihquitayic te be te la jcaʼbeyex atʼunic» (Deut. 31:29). Jaʼnix jich la yaltiklanbey teme ya skʼaxuntayik mantal ya yichʼik ikʼel bael ta chukel (Deut. 28:​35, 36). ¿Kʼotbal ta pasel te bin la yal te Moisés? Kʼot. Ta bayal jaʼbiletik te ajwaliletik la skʼaxuntaybeyik smantal te Jehová sok jichnix la spas-euk te lume. Jaʼ yuʼun, te Jehová la yakʼtiklanbey castigo te jkʼaxunkʼopetik sok maba la yakʼ te ya x-ayinxan ajwaliletik ta Israel (Ezeq. 21:​25-27). Pero kʼalal la yilik te kʼot ta pasel te bin la yal te Jehová te israeletik te jun yoʼtan la yakʼ sbaik, akʼbot smukʼul yoʼtanik (Is. 55:​10, 11).

8. ¿Bin yuʼun ma chajpuk ya kiltik-a te bolob skʼoplal te congregación ta schebal siglo?

⁸ Te kʼalal laj te jpuk kʼopetik. Ma chajpuk ya kiltik-a te bolob te congregación ta schebal siglo. ¿Bin yuʼun? Melel te Jesús la yal te ya skontrainik te Diose (Mat. 7:​21-23; 13:​24-30, 36-43). Ta sbabial siglo, te jpuk kʼop Pablo, te Pedro sok te Juan la yalik te jajchix te skontrainel te Dios te la yalbey skʼoplal te Jesuse (2 Tes. 2:​3, 7;  2 Ped. 2:1; 1 Juan 2:18). Te kʼalal laj te slajibal jpuk-kʼop, te machʼatik la skontrainik te Dios ochik ta Mukʼul Babilonia, jaʼ spisil te lotil religionetike. Jich chaʼ kʼot ta pasel te bin la yichʼ alele.

9. ¿Bin yuʼun maba pajal te tiempo te kuxinemotik sok te cheb tiempo te la yichʼix albeyel skʼoplale?

⁹ «Te kʼalal ya xkʼot yorail te ya yichʼ chaʼlekubtesel spisil». Te tiempo te kuxinemotik maba pajal sok te tiempo yuʼun te lum Israel sok te schebal siglo, kʼalal te sbabial congregación la skontrainik te Dios. ¿Bin sbiil te tiempo te kuxinemotike? Ya kaltik te jaʼ «te slajibal kʼajkʼale» (2 Tim. 3:1). Pero te Biblia ya yal te jajch yan tiempo sok te kʼax mukʼ skʼoplale. Jaʼ «te kʼalal ya xkʼot yorail te ya yichʼ chaʼlekubtesel spisil» (Hech. 3:21). Jajch ta 1914 sok ya xlaj te kʼalal tojikix-a te ants winiketik sok ya xkʼatpʼuj ta nichimal kʼinal te Balumilal te wentainbil yuʼun te Jesús. ¿Bintik la schaʼlekubtes te Jehová ta 1914? Te Jesús jajch ta wentainwanej ta chʼulchan, jaʼ yuʼun te Jehová la yakʼ jtul ajwalil, jaʼ te stsʼumbal te David. Pero ma jaʼuknax-abi. Ta patil te smelelil yichʼel ta mukʼ te Dios la yichʼ chaʼlekubtesel (Is. 2:​2-4; Ezeq. 11:​17-20). ¿Yabal yichʼ bolobtesel yan buelta?

10. 1) ¿Bin ya yal te Biblia ta swenta te smelelil yichʼel ta mukʼ te Dios ta jkʼajkʼaleltik? (Isaías 54:17). 2) ¿Bin yuʼun ya yakʼ smukʼul koʼtantik te bin la yal te Isaías?

¹⁰ (Kʼopona Isaías 54:17). Te albilkʼop ini jich ya yal: «Mayuc aʼtejibal yuʼun guerra te ya xhuʼ ya stsalat». Te versículo ini yak ta kʼoel ta pasel. Pero jaʼnix jich yak ta kʼoel ta pasel te bin ya yal te texto ini: «Spisil te awal-anichʼnabic ya yichʼic nohptesel yuʼun te Jehová, soc ya xpʼohl te lamal quinal ya yaʼiyic te awal-anichʼnabique. Yac awichʼ chʼalel ta bin toj ta pasel. […] Mayuc bin yac axiʼ; namal ya xhil awuʼun te tulan xiwel, ma ba ya xnohpoj tal ta atojol» (Is. 54:​13, 14). Ni jaʼuk «te dios yuʼun te balumilal», te Satanás, ay yuʼel yuʼun ya skom te nojptesel te ya yakʼ te lum yuʼun te Jehová (2 Cor. 4:4). Te smelelil yichʼel ta mukʼ te Dios la yichʼix chaʼlekubtesel. ¡Maʼyuk bin-ora ya yichʼ chaʼ bolobtesel! Maʼyuk aʼtejibal yuʼun guerra te ya xjuʼ ya slajin.

TE BIN YA XKʼOT TA PASEL

11. ¿Bin yuʼun ya jnaʼtik te maba stukel ya xjilik te machʼatik ya xjilik ta balumilal te kʼalal ya xbajtik ta chʼulchan te machʼatik chʼultesbilike?

¹¹ ¿Bin-a te ya xkʼot ta pasel te kʼalal bajtikix ta chʼulchan-a te machʼatik chʼultesbilike?  Juluk ta koʼtantik te jaʼ Jkanan kuʼuntik te Jesús sok jaʼ jolal yuʼun te congregación. Melel, jaʼnix la yal: «Jtulnax te Jwolwanej awuʼunike, jaʼ te Cristo» (Mat. 23:10). Te ajwalil kuʼuntik spisil-ora ya xbajt skanantayotik. Jaʼ yuʼun te kʼalal ya xwentainwan te sNichʼan te Jehová liʼ ta Balumilal maʼyuk bin ya xbajt jxiʼtik. Melelnix-a te maba ya jnaʼtik te bin ya xbajt spas te Jesús ta stojol te lum yuʼun te Jehová ta kʼajkʼal-abi. Pero ay cheʼoxeb ejemploetik ta Biblia te ya yakʼbotik slamalil koʼtantik. Akʼa kiltik.

12. ¿Bin-utʼil la skanantay Jehová te lum yuʼun kʼalal laj te Moisés? Sok ¿bin-utʼil la spas te kʼalal te Elías bajt ta abatinel ta yan lugar? (Jaʼnix jich ilawil te dibujo).

¹² Te Moisés laj te kʼalal mato ochemik ta kʼinal te albil skʼoplal te ya yichʼik te israeletik. ¿Stukelbal jil te lum yuʼun te Dios te kʼalal laj te Moisés? Maʼuk, melel te Jehová spisil-ora la skanantaylan te kʼalal jun yoʼtan la yakʼ sbaike. Te kʼalal mato lajem-a te Moisés, te Jehová la yalbey te jaʼ ya xjelolinot jilel yuʼun te Josué, jtul winik te bayal jaʼbil la spʼijubtes te Moisés (Éx. 33:11; Deut. 34:9). Jaʼnix jich ay bayal winiketik te pʼijubenik ta skanantayel te lum yuʼun te Dios jaʼik te: jwentainwanejetik yuʼun te 1,000, 100, 50 sok te 10 (Deut. 1:15). Te lum yuʼun te Dios kʼax lek kanantaybil-a. Jaʼnix jich ay yan ejemplo kuʼuntik, jaʼ te Elías. Ta bayal jaʼbil la skoltay te israeletik yuʼun ya yichʼik ta mukʼ te Jehová. Pero ta patil, te Jehová la stikun bael ta Judá te Elías (2 Rey. 2:1; 2 Crón. 21:12). ¿Stukelbal jilik te j-abatetik yuʼun te lajunchajp stsʼumbal te Israel? Maʼuk, melel te Elías bayalix jaʼbil spʼijubtesoj-a te Eliseo. Jaʼnix jich kanantaybilik yuʼun-a te snichʼan te j-alwanejetik te pʼijubenik ta leke (2 Rey. 2:7). Jich bin-utʼil ya kiltik, spisil-ora ay winiketik yuʼun ya skanantayik te lum yuʼun te Diose. Jaʼ yuʼun, te Jehová la skʼotes ta pasel te skʼanojel yoʼtan sok la skanantay te j-abatetik yuʼun te jun yoʼtanike.

13. ¿Bin jamal ya yalbotik te Hebreos 13:5b? (Jaʼnix jich ilawil te fotoetik).

¹³ Ta swenta te ejemplo te la kiltikixe, ¿binwan ya akuy te ya xkʼot ta pasel ta stojol te j-abatetik te ya xjilik liʼ ta balumilal te kʼalal ya yichʼik ikʼel bael ta chʼulchan te machʼatik chʼultesbilike? Te Biblia jamal ya yal te Jehová maʼyuk bin-ora ya spijteslan (kʼopona Hebreos 13:5b). Jich bin-utʼil te Moisés sok te Elías, te jtsojb  jchʼuunjeletik te chʼultesbilik te ya swentainik te lum yuʼun te Jehová ta kʼajkʼal ini ya snaʼik te mukʼ skʼoplal te ya spʼijubtesik te yantike. Bayalix talel jaʼbil, te Cuerpo Gobernante spʼijubtesoj winiketik te jaʼik te yantik tuminchijetik yuʼun ya swentainik te aʼtelile. Jich bitʼil, yichʼoj pasel escuelaetik yuʼun ya yichʼ pʼijubtesel te ancianoetik, te superintendenteetik yuʼun circuito, te Comiteetik yuʼun Betel, te superintendenteetik yuʼun Betel sok yantikxan. Jaʼnix jich, te machʼatik ya x-aʼtejik ta Cuerpo Gobernante yakik ta schajpanel hermanoetik yuʼun ya xkoltaywanik ta comiteetik yuʼunik. Te jkoltaywanejetik ini, bayalix aʼtelil yakik ta spasel ta lek. Jaʼ yuʼun chapalik ta lek ta skanantayel te tuminchijetik yuʼun te Cristo.

14. ¿Bin mukʼ skʼoplal la jnoptik ta artículo ini?

¹⁴ Te artículo ini ya yakʼ jnoptik te kʼalal ya yichʼik ikʼel bael ta chʼulchan te machʼatik chʼultesbilik, te kʼalal nopol xlajix-a te tulan wokolil, te lum yuʼun te Dios jun yoʼtan ya xbajt yichʼik ta mukʼ te Jehová liʼ ta Balumilal. Te bitʼil jaʼ Jwolwanej yuʼunik te Cristo, te j-abatetik yuʼun te Dios maba ya xchebaj yoʼtanik. Melelnix-a te ta tiempo-abi ya yichʼik utsʼinel yuʼun te Gog yuʼun Magog (Ezeq. 38:​18-20). Pero maba ya xjalaj sok maba ya xbajt juʼuk yuʼun te ya skom te lum yuʼun te Dios yuʼun te ya yichʼik ta mukʼe, melel te Jehová ya xbajt skoltaylan. Ta jun najalsitil, te jpuk-kʼop Juan la yil te «kʼax bayal ta tul ants winiketik» yuʼun te yantik tuminchijetik yuʼun te Cristo sok jaʼnix jich la yil te «kʼax bayal ta tul ants winiketik» ya xkolik jilel «ta tulan wokolil». Jaʼ yuʼun ma xbajt yichʼik lajinel (Apoc. 7:​9, 14).

15, 16. Jich bin-utʼil ya yal Apocalipsis 17:​14, ¿bin ya xbajt spas te jchʼuunjeletik te chʼultesbilik ta guerra yuʼun Armagedón sok bin yuʼun ya yakʼ smukʼul koʼtantik?

¹⁵ Pero ayniwan yan jojkʼoyel: ¿Bin ya xbajt spasik te machʼatik ya xbajtik ta chʼulchane? Te Biblia jamal ya yal te ajwaliletik yuʼun te balumilal ya xbajt «yakʼbeyik guerra te Jkolel Tuminchij», pero ya xbajt «yichʼik tsalel». ¿Machʼatik ya skoltay  te Jesús yuʼun ya yaʼiy tsalaw? Te versículo jich ya yal: «Jaʼik te machʼatik ikʼbilik, te tsabilik sok te jun yoʼtanike», jaʼik te machʼatik chʼultesbilik te ayikix ta chʼulchan-a (kʼopona Apocalipsis 17:14). Ya skʼan ya yal-abi te kʼalal spisil ayikix ta chʼulchan-a te machʼa chʼultesbile, te sbabial aʼtelil ya yichʼike, jaʼ te ya xbajt koltaywanukik ta yakʼel guerra. ¡Kʼax mukʼ skʼoplal te bin ya xbajt spasike! Ay chaʼoxtul te machʼatik chʼultesbilik te ya smulanik majtamba te kʼalal mato Testigoukik-ae. Ay chaʼoxtulik ochemik ta soldadoil-a, pero la snaʼbeyik sba te Jehová sok la yijkitayik te majtamba (Gál. 5:22; 2 Tes. 3:16). Pero te kʼalal ya xbajtik ta chʼulchan ya xbajt skoltayik te Cristo sok te chʼul-abatetik ta yakʼel te slajibal guerra ta stojol te skontratak te Diose.

¹⁶ Jnoptik ta swenta ini ay chaʼoxtul te machʼatik chʼultesbilik te kuxinemik ta Balumilal te ayix yaʼbilalik sok maʼyukix bayal yipik. Pero te kʼalal ya xkuxinik ta chʼulchan, maba ya xlajikix sok ya xbajt yichʼik akʼbeyel yuʼelik yuʼun ya yakʼik guerra sok te ajwalil Jesucristo. Te kʼalal ya xkʼax te guerra yuʼun te Armagedón, ya xbajt koltaywanukik yuʼun toj ya xkʼotik te ants winiketike. Bayalxan bin ya xbajt spasik ta stojol te yermanotakik kʼalalto ta chʼulchan te ma spaj te bin-utʼil la spasik te kʼalal kuxinemik ta Balumilal-ae.

17. ¿Bin-utʼil ya jnaʼtik te spisil te j-abatetik yuʼun te Dios maba ya xlajik ta yorail te guerra yuʼun te Armagedón?

¹⁷ Teme joʼotik te yantik tuminchijotik te bin-nax ya xbajt skʼan ya jpastik ta yorail te guerra yuʼun te Armagedón, jaʼ te ya smukʼulin koʼtantik te Jehová sok te ya jchʼuuntik te tojobtesel ya xbajt yakʼbotike. Teyniwan ochem skʼoplal-a te bin ya yal te Isaías 26:20: «Ochan bahel ta ana, maca te tiʼnahiletic awuʼun; nacʼa aba jtsʼihnuc, ha to cʼalal ya xcʼax te yilimba». Ya yakʼ slamalil koʼtantik te j-abatotik yuʼun te Dios ta chʼulchan sok ta Balumilal maba ya xlajotik ta yorail-abi. Jich bin-utʼil te jpuk-kʼop Pablo, schʼuunoj koʼtantik te «ni jaʼuk te ajwaliletik, ni jaʼuk te bintik yak ta kʼoel ta pasel ta ora ini ni jaʼuk te bin ya xkʼot ta pasel ta pajel chaʼbej, […] ya xjuʼ ya slokʼesotik ta stojol te skʼuxul yoʼtan te Dios» (Rom. 8:​38, 39). Mame xchʼay ta awoʼtan te kʼuxat ta yoʼtan te Jehová sok maʼyuk bin-ora ya xbajt spʼijtesat.