Manchukme jich-abi, te Jehová ya skʼan te ayuk slamalil koʼtantik ta smaliyel te bin-ora yaloj te ya skoltayotike. ¿Bin yuʼun ya skʼan te Jehová te jichuk ya jpastike? Sok ¿Bin ya skoltayotik yuʼun ma xchʼay te stseʼelil koʼtantik te bitʼil yakotik ta smaliyele?

¿BIN YUʼUN YA SKʼAN TE JEHOVÁ TE YAKUK JNAʼTIK SMALIYEL?

Kiltik te bin ya yal te Biblia: «Pero te Jehová yac ta smahliyel te ya scʼuxultayex; tseʼel yoʼtan te ya yaʼbeyex awilic te scʼuxul yoʼtan, como te Jehová ha Dios te toj ya xchahpanwan. ¡Bayel me yutsilic spisil machʼatic jaʼ ya smahliyic!» (Is. 30:18). Jich la yalbey te Isaías te judioetik te ma schʼuunik mantal (Is. 30:1). Ta yorail-abi, ay judioetik te jun yoʼtanik ta stojol te Jehová. Te kʼopetik-abi akʼbotik bayal smukʼul yoʼtanik, jaʼnix jich ya xjuʼ ya yakʼbotik smukʼul koʼtantik ta ora ini.

Jich yuʼun, ¿bin yuʼun ya skʼan ya jmaliytik sok slamalil koʼtantik? Melel te Jehová jaʼnix jich yak ta smaliyel sok slamalil yoʼtan. Jaʼ snaʼoj stukel te bin ora sok bin kʼajkʼalil ya xbajt slajin te chopol Balumilal ini. Jaʼ yuʼun yak ta smaliyel te yorail (Mat. 24:36). Kʼalal ya xkʼot te yorail abi, yame yichʼ naʼel te jaʼ lotil te bin yaloj te Satanás ta stojol te Jehová sok ta stojol te j-abatetik yuʼun. Yame yichʼ lajinel te Satanás sok te machʼatik jaʼ ya spasik te bin ya yale. Pero te Jehová yaloj te ya yakʼbey yil skʼuxul yoʼtan te j-abatetik yuʼune.

Te bitʼil yakotikto ta smaliyele, maniwan ya slajin spisil te jwokoltik te Jehová. Pero ya yalbotik ta jamal te ya xjuʼ te tseʼel koʼtantike. Jich bitʼil la yal te Isaías, ya xjuʼ te tseʼeluk koʼtantik te kʼalal yakotik ta smaliyel te bintik tʼujbil ya xbajt spas ta pajel chaʼbej te Jehová (Is.30:18). a ¿Bin-a te ya xjuʼ ya jpastik? Kiltik chanchajp bin-a te ya xjuʼ ya jpastik.

¿BIN-UTʼIL YA XJUʼ TE TSEʼELUK KOʼTANTIK TE BITʼIL YAKOTIK TA SMALIYEL?

Jaʼ akʼa kiltik te bintik lek. Te ajwalil David bayal bintik chopol la yil te la yichʼ pasel ta skuxlejal (Sal. 37:35). Manchukme jich-abi, jich la stsʼibay: «Chʼaban me ta stojol te Jehová soc junucme awoʼtan xamahliy. Ma me xʼilinat yuʼun te machʼa ay bin lec ya xcʼoht ta loqʼuel yuʼun, te machʼa ya spas te bin chopole» (Sal. 37:7). Jaʼnix la spas te tojobtesel ini. ¿Bin-utʼil? Melel jaʼ la yakʼ ta yoʼtan te bin albot ta jamal yuʼun te Jehová te ya xkoltayot yuʼun, jaʼnix jich mukʼ skʼoplal la yil te bintik lek la spas te Dios ta stojol (Sal. 40:5). Teme jaʼ ya xbajt ta koʼtantik te  bintik lek ya xkʼax ta jtojoltik, maniwan wokol ya kaʼiytik smaliyel te ay bin ya spas ta jtojoltik te Jehová.

Akʼa kalbeytik yutsil skʼoplal spisil-ora te Jehová. Te machʼa la stsʼibay te Salmo 71, jaʼniwan te David, jich la yal ta stojol te Jehová: «Pero te hoʼon, spisil me ora ay smucʼul coʼtan, soc ta jujun buelta cʼax to xan jich ya calbat yutsil acʼoblal» (Sal. 71:14). ¿Bin la spas yuʼun la yalbel yutsil skʼoplal? La yalbey skʼoplal ta stojol yantik ta swenta te Jehová sok la skʼayojtay kʼayojiletik ta stojol (Sal. 71:​16, 23). Te joʼotik ya xjuʼ ya jkʼayinbeytik stalel te David, ta yalbeyel yutsil skʼoplal te Dios kʼalal ya jcholtik te skʼop, kʼalal ya kalbeytik skʼoplal te Jehová ta stojol te kamigotaktik, jfamiliatik sok kʼalal ya jkʼayojtaytik te kʼayojiletik. Jaʼ yuʼun ta yan buelta teme la akʼayojtay jun kʼayojil chʼama awaʼiy ta lek te sletraul te ya yakʼ smukʼul koʼtantik. Spisil ini ya yakʼ te ma xchʼay te stseʼelil koʼtantik te kʼalal yakotik ta smaliyel te ay bin ya spas ta jtojoltik te Jehová.

Akʼa jokintik te kermanotaktik. Kʼalal la sitintay wokoliletik te David, jich la yalbey te Jehová: «Yame smucʼulin coʼtan te abihil, como ha lec stuquel ta stojol te machʼatic awuʼun te chʼultesbilique» (Sal. 52:9). Jich bitʼil te David la sjokin yantik j-abatetik yuʼun te Jehová sok jich la sta smukʼul yoʼtan, jaʼnix jich te joʼotik ya xjuʼ ya jokintik te kermanotaktik ta tsoblejetik, ta scholel skʼop Dios sok chikan biluk-ora (Rom. 1:​11, 12).

Akʼa kakʼbeytik yichʼ yip te smukʼul koʼtantik. Te Salmo 62:5 jich ya yal: «Ha nax ta stojol Dios ya jta lamal qʼuinal, ha ya xtal ta stojol stuquel te smucʼul coʼtane». Muk skʼoplal te schʼuunoj koʼtantik te ya xkʼot ta pasel te bin yakotik ta smaliyel, kʼaxtoxan-a teme ma orauk ya xtal te slajibal kʼajkʼal te bin-utʼil jnopojtike. Chikan jayeb ya skʼan ya jmaliytik ya skʼan te schʼuunoj koʼtantik te ya xkʼot ta pasel te bin jamal yaloj ya spas te Jehová. ¿Bin-utʼil ya kakʼbeytik yichʼ yip te smukʼul koʼtantike? Jaʼ te kʼalal ya jnoptik te skʼop Dios sok ya kiltik te yak ta kʼoel ta pasel te albilkʼopetik ya yal te Biblia, te bitʼil pajalnax te bin ya yalbey skʼoplal ini ay bin ya yakʼ jnoptik ta swenta te Jehová (Sal. 1:​2, 3). Jaʼnix jich ya skʼan te maba ya jkom jbatik ta skʼoponel te Jehová sok ta skʼanbeyel te schʼul espíritu yuʼun ya skoltayotik ta yamigoinel te bitʼil yakotik ta smaliyel te ya yakʼbotik te jkuxlejaltik ta sbajtelkʼinal (Jud. 20, 21).

Jich bitʼil te ajwalil David, ya xjuʼ ya schʼuun koʼtantik-euk te sit te Jehová ay ta stojol te machʼatik ya snaʼik smaliyel te jaʼ ya xkoltayotik yuʼun sok te ya x-akʼbot yilik te skʼuxul yoʼtan te ma x-ijkitaywan (Sal. 33:​18, 22). Jich yuʼun, swenta ya jmaliytik sok stseʼelil koʼtantik te Jehová jaʼuk ya xbajt ta koʼtantik te bintik lek ya xkʼax ta jtojoltik, akʼa kalbeytik yutsilal te Dios, akʼa jokintik te kermanotaktik sok kakʼbeytik yichʼ yip te smukʼul koʼtantike.