▪ Te Jesús och ta Mukʼul Saserdote ta jaʼbil 29 te kʼalal la yichʼ jaʼe. ¿Bin-utʼil ya jnaʼtik? Kilbeytik skʼoplal. Te kʼalal la yichʼ jaʼe la yakʼ ta ilel te ya skʼan ya yakʼ te skuxlejal ta skajtajib chikʼbil majtanil. Te skajtajib chikʼbil majtanile jaʼ señail skʼoplal te bin «la scʼan yoʼtan» te Diose (Gál. 1:4; Heb. 10:5-10). Te skajtajib chikʼbil majtanile jaʼto chiknaj tal-a te kʼalal la yichʼ jaʼ te Jesuse, jaʼ yuʼun ya jnaʼtik te jaʼnix jich chiknaj te mukʼul templo yuʼun Jehová ta yorail-abi, melel kʼax mukʼ skʼoplal te skajtajib chikʼbil majtanil ta templo yuʼun te Jehová. Te mukʼul templo yuʼun Jehová jaʼ señail skʼoplal spisil te bitʼil ya skʼan ichʼel ta mukʼ te Jehová ta swenta te la yakʼ sba ta lajel te Jesuse (Mat. 3:16, 17; Heb. 5:4-6).

Te bitʼil chiknaj te mukʼul templo yuʼun Jehová ya skʼan te ayuk mukʼul saserdotee. Jaʼ yuʼun te Jehová la stsa te Jesús ta swenta «Chʼul Espíritu soc yuʼel» (Hech. 10:37, 38; Mar. 1:9-11). Jich yuʼun, ¿bin-utʼil ya jnaʼtik te la yichʼ yaʼtel ta Mukʼul Saserdote te Jesús te kʼalal mato lajem sok chaʼkuxajem-ae? Ya jnaʼtik ta swenta te bitʼil la yichʼ yaʼtel te Aarón sok te yantik mukʼul saserdoteetike.

Te Ley la yakʼ te Jehová ta stojol te Moisés ya yal te jaʼnax te mukʼul saserdote ya xjuʼ ya x-och ta Mero Chʼul Awilal. Ay jun kortina te ya xat te Chʼul Awilal sok te Mero Chʼul Awilale, te mukʼul saserdote jaʼnax ya x-och ta Mero Chʼul Awilal ta sKʼajkʼalel sChʼayel te muliletike (Heb. 9:1-3, 6, 7). Te Aarón la yichʼ yaʼtel ta mukʼul saserdote te kʼalal mato x-och bael te banti ay te kortina yuʼun te nailpakʼ temploe. Jaʼ jich kʼot ta pasel ta stojol te Jesuse, la yichʼ akʼbeyel yaʼtel ta Mukʼul Saserdote ta mukʼul templo yuʼun Jehová te kʼalal mato xlaj-ae, patil och bael ta kortina te jaʼ «te sbaqʼuetale» swenta ya xkuxin ta chʼulchan (Heb. 10:20). Jaʼ yuʼun te jpuk-kʼop Pablo la yal te tal bitʼil «mucʼul sacerdote» te Jesús, ta patil «och [...] ta nahilpac templo te cʼax mucʼ soc te cʼax lec, te ma pasbiluc ta cʼabal», jaʼ-abi jaʼ te chʼulchane (Heb. 9:11, 24).

¿Bin-ora ay skʼoplal kʼot te yachʼil chapbilkʼop sok bin-ora jajch ta aʼtel?

▪ Te bin-ora ay skʼoplal kʼot te yachʼil chapbilkʼop jaʼnix jich jajch ta aʼtel. ¿Bin yuʼun te jich ya kaltike? Melel te kʼalal mo bael ta chʼulchan te Jesuse, la yakʼ ta stojol Jehová te stojol te skuxlejal te ya yakʼbey skolel te ants winiketike, jich ay skʼoplal kʼot te yachʼil chapbilkʼop soknix jajch ta aʼtel. Pero ay oxchajp te bintik nail kʼot ta pasel. ¿Bintik-a?

Sbabial, kʼot stejkʼan sba ta stojol te Jehová. Schebal, la yakʼbey te sTat te stojol skuxlejale. Yoxebal, te Jehová la stsak te stojol skuxlejale. Te kʼalal kʼot ta pasel-abi, jajch ta aʼtel te yachʼil chapbilkʼope.

Te Biblia maba ya yal te bin-ora la stsak Jehová te stojol te skuxlejal te Jesuse. Jaʼ yuʼun ma xjuʼ ya kaltik ta jamal te bin-ora ay skʼoplal kʼot te yachʼil chapbilkʼop sok te jajch ta aʼtele. Pero jnaʼojtik te mo bael ta chʼulchan te Jesús te kʼalal ayto skʼan lajuneb kʼajkʼal yuʼun te kʼin Pentekostes (Hech. 1:3). Ta tiempo-abi te Jesús la yakʼbey ta skʼab Jehová te stojol skuxlejale, sok la stsak te Jehovae (Heb. 9:12). Ta Pentekostes chiknaj ta ilel te la stsak Jehová te stojol te skuxlejal te Jesuse (Hech. 2:1-4, 32, 33). Sok chiknaj ta ilel te jajchix ta aʼtel-a te yachʼil chapbilkʼope.