Te bintik ya sjojkʼoyik te machʼatik ya skʼopon te june
¿Yabal xjuʼ ya sle slekolik ta Internet te testigoetik yuʼun Jehová?
Te Jehová jaʼ ya skʼan te tseʼeluk yoʼtan te machʼatik ya xnujpunike sok te yakuk xjalaj te snujpunelike (Mat. 19:4-6). Teme ya akʼan ya xnujpunate, ¿bin-utʼil ya xjuʼ ya ata jun lekil inamil o mamalalil? Te bitʼil jaʼ spasojotik te Jehová, jaʼ ya snaʼ te bin ya skʼan ya jpastik te kʼalal yakalto jlekolinbel jbatik-ae o te kʼalal nujpunemotikix-ae. Ay bin lek ya xlokʼ-a teme ya jpas ta jkuxlejaltik te mantaliletik ya yal te Biblia. Kiltik chaʼoxchajpuk.
Ta sbabial, ya skʼan ya xkʼot ta koʼtantik te «mero jloʼloywanej te oʼtanile, cʼax hich a te bin utʼil spisil bintic ay. Cʼax chopol» (Jer. 17:9). Kʼalal ya xjajchik ta lokʼel te machʼatik ya skʼan ya xnujpunike, ya xjuʼ te jaʼnax ya xbajt yoʼtanik-a te bitʼil ya smulan sbaike. Teme ya skʼan ya xnujpunik yuʼun-nax ya smulan sbaik, ya xjuʼ te ya sta swokolik yuʼun (Prov. 28:26). Jaʼ yuʼun ma lek te kʼalal slekoltonax sbaik-a te ya xjajch yalbey sbaik ta ora te bitʼil ya smulan sbaik o teme ya yalik te ay bin ya skʼotesik ta pasel teme mato snaʼbeyoj sba sbaik ta leke.
Te Proverbios 22:3 jich ya yal: «Te machʼa pʼij yoʼtan ya yil te bin chopol, ya snacʼ sba ta stojol, yan te machʼa ma pʼijuc yoʼtan ya xcʼax xan bahel, ya xcʼax swocol yuʼun». ¿Bin wokolil ya xjuʼ ya staik te machʼatik ya sle slekolik ta Internet sok ta aplicacionetik? Te machʼatik jich spasojik staojik swokol yuʼun, melel te machʼatik snaʼbeyoj sbaik ta Internet jaʼnax ya x-utsʼinbot yoʼtanik. Jaʼnix jich ay ants winiketik te jaʼnax ya xloʼlaywanik yuʼun ya slokʼesik takʼin. Te bin kʼax chopolxane, jaʼ te ay ya skuy sbaik te jaʼik testigoetik yuʼun Jehová.
Kiltikxan yan wokolil. Ay sitioetik yuʼun Internet te ya stuuntesik te fórmulas matemáticas yuʼunlaj ya xjuʼ ya sta slekol ta skʼopik-a te machʼatik ya skʼan ya xnujpunike. Pero maʼyuk junuk prueba te yuʼun-nix jich ya xkʼot ta pasel-ae. ¿Leklajbal teme jaʼ ya jchʼuuntik te bin ya yal te Internet ta swenta te nujpunele? Maʼuk. Jun fórmula matemática ma xjuʼ ya spaj sba sok te bin ya yal te Biblia (Prov. 1:7; 3:5-7).
Ay bin mukʼxan skʼoplal ya yal ta Proverbios 14:15, jich ya yal: «Te machʼa ma snaʼ qʼuinal spisil ya schʼuhun, yan te machʼa pʼij yoʼtan ya stsahtay te banti ya xbehene». Yuʼun ya jnaʼtik teme ay machʼa lekil mamalalil o inamil ya xkʼot mukʼ skʼoplal te ya jnaʼbeytik sba ta lek. Pero ma xjuʼ ya jnaʼbeytik sba ta lek teme ta Internet ya jkʼopontike. Manchukme ya skʼasbey sbaik te snumeroik o te sfotoik yuʼun ya skʼopon sbaik, ¿yabal skʼan ya yal-abi te talel kʼaxel ya snaʼbey sbaik? Te machʼatik skuyojik te la staikix-a te machʼa ya skʼan ya xnujpunik soke chamnax yoʼtanik yuʼun te kʼalal la snaʼbeyik sba ta smelelil.
Jtul salmista, jich la yal: «Maʼyuc la join te jpas-lotetique, ma ba jun coʼtan jba soc te jcheb-oʼtanetique» (Sal. 26:4, TZOXCH). Bayal ants winiketik ya spasik lot kʼalal ay bin ya smojtesik ta Internet yuʼun ma xyalik te machʼatiknix ta smelelil-ae. Ma xchiknaj ta ilel ta smensajeik te bin-nix yilel-a te stalelik o te bin ma lek ya spasik. Ayniwan ya yalik te testigoetik yuʼun Jehová, pero ¿yichʼojikbal jaʼ? ¿Tulanbal schʼuunel yoʼtanik? ¿Yamigoikbal te Jehová? ¿Yabal x-ichʼotik ta mukʼ ta scongregacion? O ¿chopol ejemploetik sok lekikbal ta jokinel? (1 Cor. 15:33; 2 Tim. 2:20, 21). ¿Librebal ay yuʼun ya xnujpun jich bitʼil ya yal te Biblia? Mukʼ skʼoplal te yakuk jnaʼtike, pero wokol ta naʼel teme ma jojkʼoybeytik yantik hermanoetik te ya snaʼbeyik sba ta lek te ants winik-abi (Prov. 15:22). Te smelelil j-abat yuʼun Dios, mananix kʼan snop-a te jun «yugo» sok te maba ya xnujpun sok te machʼa maba yichʼoj jaʼe (2 Cor. 6:14; 1 Cor. 7:39).
Te bitʼil ya xjuʼ ya yotsesotik ta wokolil te sleel jlekoltik ta Internet sok ta aplicacionetik, ¿bantiwan yan ya xjuʼ ya jletik o ya jnaʼbeytik sba te machʼa ya jkʼan ya xnujpunotik sok? Te kʼalal ya xjuʼ ya jtsob jbatike, ya xjuʼ ya jnaʼbeytik sba yantik Testigoetik ta tsoblejetik, ta mukʼul tsoblejetik o yantikxan.
Te kʼalal ya skʼasesik tiempo ta schebalik, jich ya xjuʼ ya yilik te bin snopoj ya spasik ta stojol te Jehová sok teme pajal spensarike.
Te bitʼil ma xjuʼ ya jtsob jbatik ta snail tsoblejetik ta skaj te COVID-19, ya jtuuntestik te Internet yuʼun ya xjuʼ ya jtsob jbatik, tey ya xjuʼ ya jnaʼbeytik sba yantik testigoetik-a te mato ba nujpunemik. Ya xjuʼ ya kiltik sok ya kaʼiytik te bin-utʼil ya yak ta ilel schʼuunel yoʼtanik te kʼalal ya yakʼ scomentarioik (1 Tim. 6:11, 12). Jaʼnix jich ya xjuʼ ya xkʼopojik te kʼalal ya xlaj te tsoblej ta chʼin salaetik te banti ya stsob sba chaʼoxtulnax hermanoetik. Yan te bin-utʼil ya xjuʼ ya yichʼ pasele, jaʼ te kʼalal ya stsob sba chaʼoxtul hermanoetik ta Internet yuʼun ya xkʼopojik. Tey ya xjuʼ ya jtatik ta ilel-a te bin yilel ya yil te yantik sok te bin-nix yilel stalel-a (1 Ped. 3:4). Te kʼalal yakik ta snaʼbeyel sba sbaik-ae, ta schebalik ya xjuʼ ya yilik teme pajal te bin ya skʼan ya spasik ta stojol te Jehovae.
Teme ya schʼuun te bin ya yal te mantaliletik te ay ta Biblia te machʼa ya skʼan ya xnujpune, ya xjuʼ te ya sta stseʼelil yoʼtan ta snujpunel. Jich bitʼil ya yal te texto ini: «Te machʼa ya sta yihnam [o smamalal] ha ya sta te bin lec soc ya sta cʼuxultayel yuʼun Dios» (Prov. 18:22).
