1. ¿Bin la spas te Jehová te kʼalal skʼaxuntayojikix mantal-a te Adán sok te Eva? (Génesis 3:15).

 TE KʼALAL skʼaxuntayojikix mantal-a te Adán sok te Eva, te Jehová la yakʼbey smukʼul yoʼtan te stsʼumbal ta swenta jun albilkʼop te kʼax mukʼ skʼoplal. Ya xjuʼ ya jtatik te bin la yal tey ta Génesis 3:15 (kʼopona).

2. ¿Bin yuʼun kʼax mukʼ skʼoplal te albilkʼop ay ta Génesis 3:15?

² Te albilkʼop-abi ya jtatik ta sbabial libro yuʼun te Biblia. Jaʼnix jich spisil te yantik libroetik snitojbey sba skʼoplalik. Jich bitʼil te lazo te jun-nax ya syom ta chukel te siʼe, te bin ya yal te Génesis 3:15 ya yakʼ te jun-nax ay spisil te yantik libroetik ta Biblia sok jun-nax te bin ya yale. ¿Bin-a te ya yale? Jaʼ te ya stikun tal jtul Jkoltaywanej te Dios yuʼun ya slajin te Pukuj sok spisil te machʼatik ya xtʼunot yuʼune. b ¡Te bin ya yale kʼax tʼujbil ya kaʼiytik te machʼatik kʼux ta koʼtantik te Jehová!

3. ¿Bin ya kilbeytik skʼoplal ta artículo ini?

³ Ta artículo ini ya kakʼbeytik sujtib cheʼoxeb jojkʼoyeletik ta swenta te Génesis 3:15: ¿machʼatik-a te ya yalbey skʼoplal te albilkʼop ini?, ¿bin-utʼil yak ta kʼoel ta pasel? Sok ¿bin-utʼil ya skoltayotik ta ora ini?

4. ¿Machʼa-a te chane, sok bin-utʼil ya jnaʼtik?

⁴ Ta Génesis 3:14, 15 ya yalbey skʼoplal jkojt chan, stsʼumbal te chane, jtul ants sok stsʼumbal te antse. Ta swenta te Biblia ya xjuʼ ya jnaʼbeytik sba machʼatik-a te ya yalbey skʼoplale. c  Ya xjajch kilbeytik skʼoplal ta swenta te chane. Manix jaʼuk-a te smelelil chane melel te jichuke ma kʼot ta yoʼtan te bin la yal te Jehová te ya xkʼot ta stojole. Ya skʼan ya yal-abi te ay spʼijile. Te Biblia ya yalbotik ta jamal machʼa-a. Ta Apocalipsis 12:9 ya yal te jaʼ Satanás, te Diablo «te antiguo chan». ¿Machʼatik-a te stsʼumbal te chane?

5. ¿Machʼatik-a te stsʼumbal te chane?

⁵ Kʼalal te Biblia ya stuuntes te kʼopil tsʼumbalil, ya skʼan ya yal te jaʼ te machʼatik pajal spensarik sok ya stʼunbeyik stalel te machʼa statik kʼoeme. Jich yuʼun te stsʼumbal te chane jaʼik te pukujetik sok te ants winiketik te ya skontrainik te Jehová sok te lum yuʼune, jich bitʼil ya spas te Satanás. Tey ochem skʼoplalik-euk-a te chʼul-abatetik te la yijkitayik te yaʼtelik ta chʼulchan ta skʼajkʼalel te Noé sok te ants winiketik te chopolik te jich stalelik te bin-utʼil statik, te Diablo (Gén. 6:1, 2; Juan 8:44; 1 Juan 5:19; Jud. 6).

6. ¿Bin yuʼun ma jaʼuk te Eva te ants ya yalbey skʼoplal Génesis 3:15?

⁶ Jnoptik ta ora ini machʼa-a te antse, ¿jaʼbal te Evae? Ma jaʼuk. Jnop kaʼiytik ta swenta ini. Te albilkʼop ya yal te stsʼumbal te ants ya stsʼoʼbey ta tekʼel sjol te chane. Jich bitʼil la kiltikix, te chane jaʼ te Satanás. Jaʼ yuʼun te stsʼumbal te Eva, te jaʼnix jich jmulawil-euke, ma xjuʼ ya slajin te Satanás. Jich yuʼun, ¿bin-utʼil ya yichʼ lajinel te Satanás?

7. ¿Bin-utʼil ya skoltayotik te Apocalipsis 12:1, 2, 5, 10 ta snaʼel machʼa-a te ants ya yalbey skʼoplal ta Génesis 3:15?

⁷ Te slajibal libro yuʼun te Biblia ya yalbotik machʼa-a te ants te ya yalbey  skʼoplal ta Génesis 3:15 (kʼopona Apocalipsis 12:1, 2, 5, 10). Ma jaʼuk jtul ants te chʼichʼbakʼete, melel ay ta yeʼtal yok te u sok ay jun corona ta sjol te yichʼoj 12 ekʼetik. Jaʼnix jich ya x-ayin skerem-al te kʼax mukʼ skʼoplale, jaʼ te Wentainel yuʼun Dios. Te bitʼil ay ta chʼulchan te Wentainele, te antse jaʼnix jich ya skʼan ya yal te ay ta chʼulchane. Jaʼ skʼoplal te organización yuʼun Jehová ta chʼulchan, te jaʼik te chʼul-abatetik te jun yoʼtanike (Gál. 4:26).

8. ¿Machʼa-a te tsʼumbalil te mukʼ skʼoplale, sok bin-ora chiknaj? (Génesis 22:15-18).

⁸ Ta swenta te sKʼop Dios ya xjuʼ ya jnaʼtik machʼa-a te mukʼ skʼoplal stsʼumbal te antse. Te tsʼumbalil-abi ya skʼan ya xtal ta stsʼumbal te Abrahán (kʼopona Génesis 22:15-18). Soknix kʼot ta pasel te albilkʼope, melel te Jesús jaʼ stsʼumbal te Abrahán (Luc. 3:23, 34). Pero te tsʼumbalil ma jaʼuknax chʼichʼbakʼet, ya skʼan te ay yuʼel yuʼun ya stsʼoʼ ta tekʼel te Satanás sok ya slajin. Jaʼ yuʼun te kʼalal 30 yaʼbilal-a te Jesús, la yichʼ tsael ta swenta te chʼul espíritu, sok jich la yichʼ naʼbeyel sba bitʼil sNichʼan Dios. Ta yorail-abi, la yichʼ naʼbeyel sba te mukʼ skʼoplal tsʼumbalil yuʼun te antse (Gál. 3:16). Te kʼalal laj sok chaʼkuxaj, te Dios la yakʼbey «yutsilal soc ichʼel ta mucʼ» soknix la yakʼbey yaʼtel «ta chʼulchan soc ta bahlumilal», te jaʼnix jich «ya slajimbe yaʼtel te pucuje» (Heb. 2:7; Mat. 28:18; 1 Juan 3:8).

9, 10. 1) ¿Machʼatikxan skʼoplal te stsʼumbal te antse, sok bin-ora te jich kʼot ta pasele? 2) ¿Bin ya kilbeytik skʼoplal ta ora ini?

⁹ Jaʼnix jich ay yan stsʼumbal te antse. Te jpuk-kʼop Pablo la yakʼ ta naʼel machʼa-a te kʼalal la stsʼibaybey te jchʼuunjeletik te tsabilik te jaʼik judío sok yantik nacionetik: «Teme yuʼunex Cristo, hich stsʼumbalex Abraham, soc ya xʼaʼbotex awichʼic bendición hich te bin utʼil yaloj te Diose» (Gál. 3:28, 29). Kʼalal te Jehová ay machʼa ya stsa ta swenta chʼul espíritu, jich ya xkʼot-euk ta stsʼumbal te antse. Jaʼ yuʼun, ta tsʼumbalil-abi tey ochem-a te Jesucristo sok te 144 mil te ya xwentainwanik soke (Apoc. 14:1). Ta spisilik ya spasik tulan yuʼun jichuk stalelik sok snopojibal yuʼunik te bitʼil Jehová, te Tatil yuʼunike.

¹⁰ La kiltikix machʼatik skʼoplal te bin ya yal te Génesis 3:15. Ta ora ini ya jchaʼkiltik bin yak ta spasel te Jehová yuʼun ya skʼotes ta pasel te bin yaloje, sok ya kiltik bin-utʼil ya skoltayotik ta ora ini te albilkʼop-abi.

11. ¿Bin-utʼil ejchentesbot yit yok te stsʼumbal te antse?

¹¹ Ta Génesis 3:15 ya yal te chan ya yejchentesbey yit yok te stsʼumbal te antse. Jich kʼot ta pasel kʼalal te Satanás la stijbey yoʼtan te judioetik sok te romanoetik te ya smilik te sNichʼan Dios (Luc. 23:13, 20-24). Te kʼalal ay machʼa ya x-ejchenaj te yit yok ayniwan jun tiempo te maba ya xbeene. Jaʼ pajal sok te kʼalal laj te Jesús, ayin jun tiempo te maʼyuk bin juʼ la spas sok jteb ma oxeb kʼajkʼal jil ta mukenal (Mat. 16:21).

12. ¿Bin-ora sok bin-utʼil ya yichʼ stsʼoʼel ta tekʼel te sjol te chane?

¹² Swenta ya xkʼot ta pasel te bin ya yal Génesis 3:15, ma xjuʼ te ya xjil ta mukenal te Jesuse, melel te albilkʼop ya yal te stsʼumbal te antse ya stsʼoʼ ta tekʼel te sjol te chane. Jaʼ yuʼun te yejchen ta yit yok te Jesús ya xlekub. ¡Sok lekub ta jkʼaxel! Ta yoxebal kʼajkʼal slajel-a, te Jesús chaʼkuxaj bitʼil espíritu te ma xlaje. Soknix te kʼalal  ya xkʼot skʼajkʼalel te stsaoj te Dios ya slajin te Satanás (Heb. 2:14). Te machʼatik ya xwentainwanik sok te Cristo ya xkoltaywanik ta slajinel te skontratak te Dios liʼ ta Balumilal, te jaʼik te stsʼumbal te chane (Apoc. 17:14; 20:4, 10). d

13. ¿Bin-utʼil skoltayojotik te kʼot ta pasel te albilkʼope?

¹³ Teme j-abatat yuʼun Dios te awakʼojix akuxlejal ta stojol, yakix skoltaybelat ta akuxlejal te bitʼil kʼot ta pasel te albilkʼop ini. Te Jesús la yakʼ ta ilel ta lek te taleliletik yuʼun te sTat te kʼalal xtaluk ta Balumilale (Juan 14:9). Sok te ejemplo yuʼune, skoltayojotik yuʼun kʼuxuk ta koʼtantik te Jehová sok te ya jnaʼbeytik sbae. Jaʼnix jich te Jesús skoltayojotik te bin-utʼil ya xnojpteswan sok te bin-utʼil yak ta swentainel te congregación ta ora ini. Snojptesojotik bin-utʼil ya kakʼbeytik stseʼelil yoʼtan te Jehová ta jkuxlejaltik. Soknix te kʼalal la yichʼ ejchentesbeyel yit yok te Jesús —jaʼ te kʼalal laje— ya xjuʼ ya jta jlekilaltik yuʼun. Te kʼalal chaʼkuxaje, la yakʼ ta majtanil te schʼichʼel te jaʼ «ya spocbotic loqʼuel spisil jmultic» (1 Juan 1:7).

14. ¿Bin-utʼil ya jnaʼtik te ma orauk ya xkʼot ta pasel te albilkʼop la yal te Jehová ta Edén?

¹⁴ Te bin la yal te Jehová ta Edén la yakʼ ta naʼel te ma orauk ya xkʼot ta pasel te albilkʼope. Ya skʼan ya xkʼax tiempo swenta te ants ya x-ayin stsʼumbal te albil skʼoplale, yuʼun jich te Diablo ya stsob te machʼatik ya xtʼunot yuʼune sok ya skontrain sbaik te cheb grupo-abi. ¿Bin-utʼil ya skoltayotik snaʼel? Jaʼ te ya yakʼ jnaʼtik te ya kichʼtik pʼajel te j-abatotik yuʼun Jehová yuʼun te balumilal te swentainoj te Satanás. Bayal jaʼbil ta patil te Jesús jichnix la yalbey-euk te jnopojeletik yuʼun (Mar. 13:13; Juan 17:14). Kilojtik ta lek te ay kʼoem ta pasel jun parte yuʼun te albilkʼope, kʼaxtoxan-a te slajibal tal 100 jaʼbile. ¿Bin yuʼun te jich ya kaltike?

15. 1) ¿Bin yuʼun kʼaxtoxan ya skontrainotik te balumilal ta ora ini? 2) ¿Bin yuʼun ma skʼan ya jxiʼtik te Satanás?

¹⁵ Te Jesús och ta Ajwalil ta 1914, ma jal ta patil la sten lokʼel ta chʼulchan te Satanás. Ta ora ini te Diablo jaʼnax ya swentain te balumilal sok yak ta smaliyel yuʼun ya yichʼ lajinel (Apoc. 12:9, 12). Pero ma jaʼuknax te yak ta smaliyele, sok yilinba ya skontrain te lum yuʼun Dios sok ma staix bin ya spas (Apoc. 12:13, 17). Jaʼ yuʼun kʼaxtoxan ya skontrainotik-a te ants winiketik ta ora ini. Pero ma skʼan te ya jxiʼtik te Satanás sok te machʼatik ya xtʼunot yuʼune. Jaʼnix jich ya skʼan te ay ta koʼtantik te bin la yal te jpuk-kʼop Pablo te jich la yal: «Teme lec yoʼtan Dios ta jtojoltic, ¿machʼa ya xhuʼ ya scontrahinotic?» (Rom. 8:31). Ya xjuʼ ya kakʼ smukʼul koʼtantik ta jkʼaxel ta stojol te Jehová, melel jich te bitʼil la kiltikix jteb ma spisil te albilkʼop te ay ta Génesis 3:15 kʼoemix ta pasel.

16-18. ¿Bin-utʼil koltayotik te kʼalal kʼot ta yoʼtanik te bin ya yal Génesis 3:15 te Curtis, Ursula sok Jessica?

¹⁶ Te bin jamal la yal te Jehová ta Génesis 3:15 ya skoltayotik ta sitintayel chikan bin prueba ya xtal ta jtojoltik. Jtul hermano te Curtis sbiil, te jaʼ misionero ta Guam, jich ya yal: «Ay bintik kʼaxem ta jkuxlejal te wokol kaʼiyoj te jun koʼtan ya kakʼ jba ta stojol te Jehová. Pero snopilanel ta koʼtan ta swenta te albilkʼop te ay  ta Génesis 3:15, skoltayojon swenta ma xchʼay te smukʼul koʼtan ta stojol te jTat te ay ta chʼulchan». Te Curtis yoʼtanix ya xkʼot skʼajkʼalel te bin-ora ya slajin Jehová spisil te jwokoltike.

¹⁷ Jtul hermana te Ursula sbiil, te jaʼ slumal te Baviera (Alemania), ya yal te la schʼuunxan te jaʼ sKʼop Dios te Biblia te kʼalal kʼot ta yoʼtan te Génesis 3:15. Te bin maʼyuk bin-ora chʼay ta yoʼtan, jaʼ te yantik albilkʼopetik te ay ta Biblia jun-nax snitojbey sba skʼoplal sok te Génesis 3:15. Jich ya yal: «La stijbon koʼtan snaʼel bin-utʼil te Jehová la sle ta oranax te bin-utʼil ya yakʼbey smukʼul yoʼtan te ants winiketik».

¹⁸ Jtul hermana te Jessica sbiil, te jaʼ slumal te Micronesia, jich ya yal: «Yato xjul ta koʼtan te bin yaʼiyel la kaʼiy jba te kʼalal la jnop te smelelil kʼop te ay ta Biblia. ¡Yakix ta kʼoel ta pasel te albilkʼop te ay ta Génesis 3:15! Te kʼalal kʼot ta koʼtane la jta ta ilel te manix jaʼuk-a te lekil kuxlejalil te bitʼil yakotik ta kuxinel ta ora ini. Soknix te albilkʼop-abi ya yakʼbon kil te ya xlekubxan jkuxlejaltik ta ora ini teme ya x-abatinotik ta stojol Jehová sok kʼaxtoxan ta pajel chaʼbej».

19. ¿Bin yuʼun schʼuunoj koʼtantik te ya xkʼot ta pasel te albilkʼop te mato kʼoem ta pasele?

¹⁹ Jich te bin-utʼil la kiltikix, te Génesis 3:15 yak ta kʼoel ta pasel. La jnaʼtikix ta lek machʼa-a te stsʼumbal te antse sok te stsʼumbal te chane. Te Jesús jaʼ te machʼa kʼax mukʼ skʼoplal ta stsʼumbal te antse, lekub te yejchen ta yit yok sok ta ora ini jaʼix Ajwalil te ma xlaj sok bayal yutsilal. Jaʼnix jich nopol ya stsʼakayix te machʼatik ochem skʼoplal-euk ta stsʼumbal te antse. Te bitʼil ay kʼoemix ta pasel te albilkʼope, schʼuunoj koʼtantik te ya xkʼot ta pasel te bin mato kʼoem ta pasele: ¡ya yichʼ tsʼoʼel ta tekʼel te sjol te chane! Te kʼalal ya yichʼ lajinel te Satanás leknax kʼinal ya yaʼiyik te ants winiketik te jun yoʼtanik ta stojol Dios. Te bitʼil mato kʼoem ta pasele, ma skʼan ya xlujbotik. Snujpʼ te ya kakʼ smukʼul koʼtantik ta stojol te Dios kuʼuntik. Ta swenta te stsʼumbal te antse, ya yakʼbey bayal bendición «spisil nacionetic ta swohlol bahlumilal» (Gén. 22:18).