Te Jesús nojpteswan te ya skʼan te lamaluk koʼtantik. Pero ta jun buelta jich la yalbey te jpuk-kʼopetik yuʼun: «Ma me xacuyic te tal cacʼ lamal qʼuinal ta bahlumilal; ma ba tal cacʼ lamal qʼuinal, ha tal hach guerra, como talemon yuʼun ya scontrahin sba soc stat te winique, te achʼix ya scontrahin sba soc snan, soc te alibal ya scontrahin sba soc yalibmeʼel» (Mat. 10:34, 35). ¿Bin ya skʼan ya yal te kʼopetik ini?

Te Jesús ma jichuk skʼanojel yoʼtan te ya xat sba te familiaetik, pero ay jich ya xkʼot ta pasel. Te machʼatik ya skʼan ya x-ochik ta jnopojel yuʼun sok te ya yichʼik jaʼ, ya skʼan ayuk ta yoʼtanik te yaniwan xkontrainotik yuʼun te sfamiliaik. Pero aynix wokol ya yilik spasbeyel yaʼtel te Dios ta skaj te ya xkontrainot yuʼun te machʼa nujpunemik sok, o te sfamiliaik.

Te Biblia jich la yalbey te jchʼuunjeletik: «Lamaluc me awoʼtanic soc spisil ants-winiquetic» (Rom. 12:18). Pero te bintik la yakʼ ta nopel te Jesús jich kʼoem bitʼil jun «espada» ta stojol te familiaetik. Jich ya xkʼot ta pasel kʼalal ay machʼa ya spas te bintik ya yakʼ ta nopel te Jesús, pero ay yantik te ma skʼanik o te ya xkontrainwanik yuʼun. Jaʼ yuʼun, «te machʼatic ay yuʼun ta sna» skontra ya xkʼotik, melel yakik ta snopel te bin smelelile (Mat. 10:36).

Te jchʼuunjeletik te kuxinemik sok sfamiliaik te yan sreligionik-a, ya yil swokolik sok jich ya yakʼik ta ilel teme yuʼun-nix kʼux ta yoʼtanik-a te Jehová sok te Jesús. Ayniwan ya sujotik ta spasel kʼinetik te snitojbey sba skʼoplal sok te lotil religión. Te kʼalal jich ya xkʼot ta pasel, ya skʼan ya staik ta nopel machʼa ya schʼuunbeyik skʼop. Te Jesús jich la yal: «Te machʼa cʼax hich cʼux ta yoʼtan a te smeʼstat te bin utʼil te hoʼone, ma xtuhun cuʼun» (Mat. 10:37). Te Jesús ma jaʼuk yak ta yalel te ma skʼan kʼux ya kaʼiytik te jmeʼ jtatik. Te bin ya skʼan ya yale, jaʼ te yakuk jnaʼtik te bin mukʼ skʼoplal ta jkuxlejaltik. Teme jtul jfamiliatik te ma Testigouk ya skontrainotik ta swenta te ya kichʼtik ta mukʼ te Jehová, ma xlaj te skʼuxul koʼtantik ta stojol, pero ya skʼan te jaʼ kʼux-xan ta koʼtantik te Diose.

Kʼux ta aʼiyel te kʼalal ya skontrainotik te jfamiliatik. Pero te jnopojelotik yuʼun te Jesús kʼoem ta koʼtantik te kʼopetik ini: «Soc te machʼa ma ba ya yichʼ bahel scruz [o steʼ] soc ya stʼunon, ma ba ya xtuhun cuʼun» (Mat. 10:38). Jaʼ yuʼun jnaʼojtik ta lek te ya kichʼtik kontrainel te kʼalal ya jtʼuntik te Jesús, jich bitʼil te ya skontrainotik te jfamiliatik. Pero ta swenta te jtaleltik ya xjuʼ ya xjelon te snopojibal yuʼunik sok te ya smulanik snopel-euk te bin ya yal te Bibliae (1 Ped. 3:1, 2).