Maniwan ayuk bayal jtiempotik yuʼun ya jnoptik te Biblia. Jaʼ yuʼun, ¿bin ya xjuʼ ya skoltayat yuʼun ya atuuntes ta lek te atiempoe? Sbabial, tuuntesa ta lek te atiempo kʼalal ya anop te Biblia. Jaʼ lek te jtebnax te bin ya anop ma jaʼuk te bayal sok te animalnax ya akʼopone.

Ila te bintik ya skʼan nopel (Efes. 5:15, 16). Ya xjuʼ ya apas ini:

• Kʼopona te Biblia ta jujun kʼajkʼal (Sal. 1:2). Ya xjuʼ ya akʼopon te capituloetik te ya yichʼ nopel ta tsoblej ta yolil semana.

• Nail xa achajpan te bin ya yichʼ nopel ta jujun tsoblej, jich bitʼil te bin ya yichʼ ilel ta revista Te J-ilkʼinal ta toyol soknix te tsoblej ta olil semana. Chajpana aba ta lek yuʼun ya awakʼ acomentario (Sal. 22:22).

• Teme aytoxan atiempo kʼopona-euk te revistaetik te ya yichʼ pukel, te videoetik, sok te bintik ya xlokʼ ta jw.org.

• Nopaxan ta lek te bin ya yal te Biblia. Ya xjuʼ ya ale información ta swenta te bin ya xkʼax ta atojol, jun jojkʼoyel te la apasbey aba o jun tema te ya akʼan ya awichʼbeyxan swentaile. Ta sección «Actividades para estudiar la Biblia» te ay ta jw.org, ya xjuʼ ya awil binxan ya xjuʼ ya anopbey skʼoplal.