1, 2. ¿Bintik temail ya jmulantik yalbeyel skʼoplal te bitʼil testigootik yuʼun Jehovae?

TE BIN mukʼ skʼoplal ta koʼtantik jaʼ te ya xkoltaywanotik yuʼun ya yichʼ chʼultesel te sbiil te Jehová sok te ya jkoltaybeytik skʼoplal te jaʼnax mukʼ Ajwalil stukele. Te testigootik yuʼun Jehová ya jmulantik yalbeyel skʼoplal-abi. Jaʼukmeto, ¿jun-naxbal o cheb-bal skʼoplal te temaetik-abi? Jun-nax skʼoplal.

² Jpisiltik jnopojtik te mukʼ skʼoplal te ya jchʼultesbeytik sbiil te Diose sok te ya kakʼtik ta ilel te jaʼnax te Jehová te lek ya swentainotike. Jich yuʼun ya skʼan ilbeyel ta lek skʼoplal-abi.

3. ¿Bintik smakojbey skʼoplal te sbiil te Jehová?

³ Te sbiil te Jehová tey ochem skʼoplal-a te bintik yilel stalel soknix te bin-utʼil ya xwentainwan. Teme ya kaltik te jaʼ mukʼxan skʼoplal te ya jchʼultesbeytik sbiil te Diose, yakotik ta yalel te ya skʼan ya kakʼtik ta ilel te jaʼ lekxan te bitʼil ya xwentainwan te Jehová. Te sbiile jun-nax stsakojbey sba skʼoplal sok te bitʼil jaʼnax Ajwalil stukel ta chʼulchan sok ta Balumilal (ilawil te rekuadro « Te bintik smakojbey skʼoplal te kʼop jajcheme»).

4. 1) ¿Bin ya yal te Salmo 135:13 ta swenta te sbiil te Diose? 2) ¿Bintik jojkʼoyeletik ya kakʼbeytik sujtib ta artikulo ini?

⁴ Te sbiil te Jehová kʼax mukʼ skʼoplal sok maʼyuk bin ya spaj (kʼopona Salmo 135:13). ¿Binwan yuʼun te kʼax mukʼ skʼoplale? ¿Bin-ora la yichʼ kontrainel ta sbabial buelta te sbiile? ¿Bin ya spas te Dios yuʼun ya schʼultes te sbiile? ¿Bin-utʼil ya xjuʼ ya jkoltaybeytik skʼoplal? Ta artikulo ini ya kakʼbeytik sujtik te jojkʼoyeletike.

5. Kʼalal ya kalbeytik skʼoplal te schʼultesel te sbiil te Diose, ¿bin ya xjuʼ ya sjojkʼoybey sbaik te ants winiketike?

⁵ Te Jesús la yal te bin mukʼ skʼoplal te ya jkʼantik te kʼalal  ya jkʼopontik te Diose, jaʼ ini: «Akʼa yichʼ chʼultesel te abiile» (Mat. 6:9, TNM). ¿Bin ya skʼan ya yal-abi? Te kʼalal ay bin ya yichʼ chʼultesel ya skʼan ya yal te ya yichʼ lekubtesel o sakubtesel. Pero ayniwan machʼa jich ya snop: «¿Yuʼunbal maba sak sok maba chʼultesbil te sbiil te Jehovae? ¿Bin yuʼun te ya skʼan chʼultesele?». Yuʼun ya jtabeytik sujtib-abi, ya skʼan ya jnaʼtik te bin yuʼun mukʼ skʼoplal te biilile.

6. ¿Bin yuʼun mukʼ skʼoplal te biilile?

⁶ Te biilil ma jaʼuknax te ya yichʼ tsʼibayel ta jun o te ya yichʼ alele. Te Biblia ya yal: «Ha lec xan te lec cʼoblalil te bin utʼil bayel cʼulejalil» (Prov. 22:1; Ecl. 7:1). ¿Bin yuʼun te kʼax mukʼ skʼoplale? Melel tey ochem skʼoplal-a te bintik ya yalik te yantik ta swenta te machʼa yichʼoj te biilil-abi. Jaʼ yuʼun ma jaʼuk mukʼ skʼoplal te bin-utʼil ya yichʼ tsʼibayel o ya yichʼ alel te biilile, jaʼ mukʼ skʼoplal te bin ya snop te ants winiketik kʼalal ya yilik o ya yaʼiyik te biilile.

7. ¿Bin-utʼil yichʼoj kontrainel te sbiil te Diose?

⁷ Kʼalal ay machʼa ya yal lotil ta stojol te Jehová yak ta sbolobtesbeyel skʼoplal te sbiile. Te sbabial kontrainel ta stojol te sbiil te Diose, jaʼ te bin kʼot ta pasel ta tsʼunbil kʼinal Edén. Kiltik bin ya xjuʼ ya jnoptik ta swenta te bin kʼot ta pasele.

8. 1) ¿Bin snaʼojik-a te Adán sok te Evae? 2) ¿Bin ya xjuʼ ya jojkʼoybey jbatik?

⁸ Te Adán sok te Eva snaʼojik-a te sbiil te Diose sok te bintik spasoje, jich bitʼil te jaʼ Jpaswanej sok te akʼbotik skuxlejalik, akʼbotik jun Nichimal Kʼinal te banti ya xkuxinik sok te bitʼil toj ta schebalike (Gén. 1:26-28; 2:18). Jaʼukmeto, ¿labal snopilan ta yoʼtanik te bintik akʼbotik yuʼun te Jehovae? ¿Labal yakʼbeyikxan yip te skʼuxul yoʼtanik sok labal snaʼik yalel wokol? Te sujtib te jojkʼoyeletik-abi la yichʼ naʼel kʼalal te skontra te Dios la spas ta prueba te Adán sok te Evae.

9. Jich bitʼil ya yal ta Génesis 2:16, 17 sok 3:1-5, ¿bin-a te albotik yuʼun Jehová te Adán sok te Eva sok bin-utʼil la sjel te Satanás te bin la yal te Jehovae?

⁹ (Kʼopona Génesis 2:16, 17; 3:1-5). Ta swenta jkojt chan te Satanás la sjojkʼoybey te Eva: «¿Hich bal la yalbat te Diose: Ma me xaloʼbe sit spisil te teʼetic ayic ta tsʼumbil qʼuinal, xchi bal te Diose?». La sjel te jojkʼoyele sok la yotses lotil tey-a. Te bin albotik yuʼun te Diose  jaʼ te ya xjuʼ ya sloʼbeyik sit spisil te teʼetike, jaʼnax jpejt teʼ te ma xjuʼ ya sloʼbeyik te site. Te Adán sok te Eva akʼbotik bayal ta chajp sit teʼetik te ya xjuʼ ya sloʼike (Gén. 2:9). Chikan ta ilel te la yakʼ ta ilel yutsil yoʼtan te Jehová ta stojolik. Pero albotik yuʼun te ay jpejt teʼ te ma xjuʼ ya sloʼbeyik site. Jaʼ yuʼun ta swenta te jojkʼoyel la spas te Satanás la sjelbey skʼoplal te bin smelelil sok la yakʼ ta naʼel te maʼyuk yutsil yoʼtan te Diose. Te Eva laniwan sjojkʼoybey sba teme ay bin ma akʼbil yuʼun te Diose.

10. ¿Bin lotil la yal te Satanás ta swenta te sbiil te Dios sok bintik kʼot ta pasel yuʼun?

¹⁰ Ta yorail-abi, te Eva kʼoem ta yoʼtan-a te jaʼ Ajwalil yuʼun te Jehovae, melel la yalbey te Satanás te bin jamal albil yuʼun te Diose. Jaʼnix jich la yalbey te ma xjuʼ ya spikik ta jkʼaxel te jpejt teʼe. Snaʼojik ta lek teme ya skʼaxuntayik te mantalil-abi, ya xlajik yuʼun. Jich yuʼun jich la yal ta jamal te Satanase: «Ma ba ya xchamex yuʼun» (Gén. 3:2-4). Jaʼ-abi jaʼ mukʼul leel ta kʼop ta stojol te sbiil te Diose, melel la yakʼ ta nopel te Satanás te lotil-laj te bin la yal te Jehovae. Jich kʼatpʼuj ta jleaw ta kʼop te Satanás. Jich la yichʼ loʼlayel te Eva sok la schʼuunbey skʼop te Satanás (1 Tim. 2:14). Jaʼ la yakʼxan smukʼul yoʼtan ta stojol te Satanás, ma jaʼuk ta stojol te Jehová, jkʼaxel maba lek te bin la sta ta nopele, melel la skʼaxuntaybey smantal te Diose sok la sloʼbey sit te teʼ te ma xjuʼ ta loʼele. Ta patil, la yakʼbey-euk te Adane (Gén. 3:6).

11. ¿Bin snujpʼ la yalik te Adán sok Eva te jichuke?

¹¹ Jnop kaʼiytik te binwan-utʼil juʼ la sutbey skʼop Satanás te Evae. Juʼ te jichuk la yalbey ini: «Te jaʼate ma jnaʼbat aba, yan stukel te Jehová te jTate ya jnaʼbey sba, kʼux ta koʼtan sok ay smukʼul koʼtan ta stojol. Spisil te bin ay kuʼun sok te Adane jaʼ yakʼojbotik te Jehovae, ¿bin yuʼun te ya xtal awal te bin chopol ta stojole? ¡Ma xtal awutsʼinon!». Te jichuk la yal te Evae, akʼbot stseʼelil yoʼtan te Jehová, melel jich la yakʼ ta ilel te skʼuxul yoʼtan sok te jun yoʼtan ta stojole (Prov. 27:11). Pero ni jaʼuk te Eva sok te Adán la yakʼik ta ilel te kʼux ta yoʼtanik te Jehová. Jaʼ yuʼun ma la skoltaybeyik skʼoplal sbiil te sTatike.

12. ¿Bin-a te la yakʼbey ta yoʼtan Eva te Satanase sok bin-a te maba la spasik te Adán sok te Evae?

¹² Jich bin-utʼil la kiltikix, te Satanás jajch sbolobtesbey skʼoplal te Jehová kʼalal jajch yotsesbey ta yoʼtan te Eva te malaj lekil Tatiluk te Jehovae. Patil, te Adán sok te Eva ma la skoltaybeyik skʼoplal te sbiil te Jehová. Jich la schʼuunbeyik skʼop te Satanás sok la skʼaxuntaybeyik smantal te sTatike. Ta kʼajkʼal ini, te Satanás jichnix ya stuuntes te lotiletik-abi. Ya skontrainbey te sbiil te Diose, ta swenta-abi te machʼatik ya schʼuunik te lotiletike maba ya skʼanik te ya xwentainotik yuʼun te Jehovae.

13. ¿Bin-utʼil ya yalbey skʼoplal te Ezequiel 36:23 te bin mukʼ skʼoplal ya yal te Bibliae?

¹³ ¿Aybal bin la spas te Jehová ta swenta te  la yichʼ leel ta kʼope? Ay. Ta spajkal te Biblia ya schol te bin spasoj te Jehová yuʼun ya yakʼ ta ilel te lotil te bin la yal te Satanás ta tsʼunbil kʼinal Edén (Gén. 3:15). Ta melel, te bin mukʼ skʼoplal ya schol te Biblia jaʼ te ya schʼultes sbiil te Jehová ta swenta te Wentainel yuʼun te ay ta skʼab te sNichʼane sok te ya yakʼ lamalkʼinal yan buelta sok te bin toj ta pasel liʼ ta Balumilal. Te Biblia ya skoltayotik ta snaʼel te bin-utʼil ya schʼultes sbiil te Jehovae (kʼopona Ezequiel 36:23).

14. ¿Bin-utʼil schʼultesoj sbiil te Jehová ta swenta te bin-utʼil la schajpan te kʼop te jajch ta tsʼunbil kʼinal Edén?

¹⁴ Te Satanás spasoj tulan te bantito kʼalal ya xjuʼ yuʼun swenta ma xkʼot ta pasel te skʼanojel yoʼtan te Jehová, pero maba juʼem yuʼun. Te Biblia ya yakʼ ta naʼel te bin yilel stalel te Jehová sok ya yakʼ ta ilel te maʼyuk machʼa ya xpajot yuʼune. Melelnix-a te bayal smeloj yoʼtan yuʼun te Jehová ta skaj te la skʼaxuntay kʼop te Satanás sok te jayeb machʼatik tʼunot yuʼune (Sal. 78:40). Te Jehová snaʼoj schajpanel te kʼop sok spʼijil yoʼtan, stojil yoʼtan sok snaʼoj smaliyel. Jaʼnix jich bayal bintik-utʼil yakʼoj ta ilel te yuʼel te ma xlaje sok kʼaxemtoxan-a te skʼuxul yoʼtan te chikan ta ilel ta spisil te bintik ya spase (1 Juan 4:8). Te Jehová spisilnanix-ora ya schʼultes-a te sbiile.

15. ¿Bin-utʼil te Satanás maba skomoj sba ta sbolobtesbeyel skʼoplal sbiil te Jehová ta ora ini sok bintik lokʼem yuʼun-a?

¹⁵ Ta kʼajkʼal ini, te Satanás maba skomoj sba ta sbolobtesbeyel skʼoplal sbiil te Jehová. Yak ta yakʼbeyel snop te ants winiketik te malaj ayuk yuʼel, spʼijil, stojil yoʼtan sok skʼuxul yoʼtan te Diose. Jun ejemplo jaʼ te ya yakʼbey snop te ants winiketik te malaj ayuk te Jehovae. Teme aynix machʼatik ya schʼuunik te ay te Diose, ya yakʼbey snop te malaj tojuk te mantaliletik yuʼun sok te aylaj bin maba ya yakʼbotik jpastike. Jaʼnix jich ya yakʼ ta nopel te kʼax chopol-laj te Diose sok te yalaj schikʼ te ants winiketik ta infierno. Te machʼatik ya schʼuunik te lotil-abi, maniwan skʼan ya schʼuunbeyikix te tojil mantaliletik yuʼun te Jehová. Te bitʼil kuxulto te Satanás mananix ya skom sba ta leaw ta kʼop-a sok yananix spas  tulan te yakuk awijkitay te Jehovae. ¿Yabal xjuʼ yuʼun?

16. ¿Bin ya xjuʼ ya jpastik te joʼotik te maba la spas te Adán sok te Evae?

¹⁶ Manchukme jmulawilotik, te Jehová ya skʼan te ya jkoltaytik ta schʼultesel te sbiile. Jaʼ yuʼun ta jujuntulotik ya xjuʼ ya jpastik te bin maba la spas te Adán sok te Evae. Manchukme joytaybilotik yuʼun ants winiketik te ya sbolkʼoptayik sok te ya yalik lot ta stojol te sbiil te Jehová, ya xjuʼ ya kaltik ta jamal te bin smelelile: te jaʼ chʼul Dios stukel te Jehová, te toj yoʼtan, te lek yoʼtan sok te ay skʼuxul yoʼtan (Is. 29:23). Ya xjuʼ ya kakʼtik ta ilel te ya jkʼantik te ya swentainotike, jaʼ yuʼun ya kalbeytik te ants winiketik te jaʼ toj stukel te bitʼil ya xwentainwan sok te ya yakʼ talel lamalkʼinal sok tseʼel-oʼtanil ta stojol spisil te bintik spasoje (Sal. 37:9, 37; 146:5, 6, 10).

17. ¿Bin la spas te Jesús yuʼun la yakʼ ta naʼel te sbiil te sTate?

¹⁷ Kʼalal ya jkoltaybeytik skʼoplal sbiil te Jehová, yakotik ta skʼayinbeyel stalel te Jesucristo (Juan 17:26). Te Jesús ma jaʼuknax la stuuntesbey sbiil te sTate, jaʼnix jich la yakʼ ta nopel te bin-nix yilel-a te stalele. Jun ejemplo jaʼ te kʼalal te fariseoetik la yalbeyik skʼoplal te Jehová te jaʼlaj jun Dios te ya sujawan, te ma xkʼot ta yoʼtan te bin yaʼiyel ya kaʼiy jbatik, te tulan yoʼtan sok te ma snaʼ yoʼbolil jbatike, te Jesús la skoltay te ants winiketik te jichuk ya yilik te Jehová te bin-utʼil jtul tatil te maba ya sujawan, te ay slamalil yoʼtan, te ay skʼuxul yoʼtan sok te ya snaʼ yoʼbolil jbatike. Jaʼnix jich la skoltay te ants winiketik ta snaʼbeyel sba te Jehová, kʼalal te kʼax lek la skʼayinbey stalel te sTat ta jujun kʼajkʼal ta skuxlejal (Juan 14:9).

18. ¿Bin-utʼil ya kaltik ta jamal te ma smeleliluk te bintik ya yalik te skontratak te Jehovae?

¹⁸ Jich bitʼil te Jesús, ya xjuʼ ya kalbeytik yantik te bintik jnaʼojtik ta stojol te Jehová sok ya kalbeytik yaʼiyik te ay skʼuxul yoʼtan sok te ay yutsil yoʼtane. Jich ya kaltik ta jamal te ma smeleliluk te bintik ya yalik te skontratake. Ya jchʼultesbeytik te sbiil te Jehová sok ya jkoltaytik te ants winiketik te chʼultesbiluk ya yilik-euke. Manchukme jmulawilotik ya xjuʼ te ya jkʼayinbeytik stalel te Jehovae (Efes. 5:1, 2). Kʼalal ya kakʼbeytik yil te ants winiketik ta swenta jkʼoptik sok ta kaʼteltik te bin  yilel stalel te Jehovae, yakotik ta skoltayel ta schʼultesel te sbiile. Ya jkoltaybeytik skʼoplal te sbiil kʼalal ya jkoltaytik te ants winiketik yuʼun ya yijkitayik te bintik schʼuunejik te ma smeleliluke. * Jaʼnix jich ya jchʼultesbeytik te sbiil kʼalal jun koʼtan ya kakʼ jbatik ta stojol manchukme jmulawilotik (Job 27:5).

19. Jich bitʼil ya yal te Isaías 63:7, ¿bin ya jkʼantik ya xlokʼ-a te kʼalal ya kakʼtik nojptesel yuʼun Biblia?

¹⁹ Ay yan te bin ya xjuʼ ya jpastik yuʼun ya jchʼultesbeytik te sbiil te Jehová. Te kʼalal ya kakʼtik nojptesel yuʼun Biblia ya kakʼtik ta nopel te jaʼ ay ta swenta te Jehová te ya xpasawan ta mantal ta chʼulchan sok ta Balumilal. Manchukme mukʼ skʼoplal te ya kalbeytik skʼoplal te leyetik yuʼun te Diose, te bin mukʼxan skʼoplal ya skʼan pasele, jaʼ te ya jkoltaytik te ants winiketik te kʼuxuk ta yoʼtanik te Jehová sok te junuk yoʼtanik ta stojole. Jaʼ yuʼun ya skʼan ya kalbeytikxan skʼoplal te stalel te Jehová sok te bintik smakojbey skʼoplal te sbiile (kʼopona Isaías 63:7). Teme jich ya jpastik-abi, te ants winiketik kʼuxme ya yaʼiy ta yoʼtanik te Jehová sok yame schʼuunbeyik te smantal, melel ya skʼan te jun yoʼtan ya yakʼ sbaik ta stojole.

20. ¿Bin jojkʼoyel ya kakʼbeytik sujtib ta yan artikulo?

²⁰ Te bitʼil bayal bin smakojbey skʼoplal te schʼultesbeyel sbiil te Jehovae, ¿bin-utʼil ya xjuʼ ya jnaʼtik teme ya yalbey yutsil skʼoplal sbiil te Dios te jtaleltik, te bin-utʼil ya xnojpteswanotik sok te ya jkoltaytik te ants winiketik yuʼun ya xnoptsajik ta stojol? Ta yan artikulo ya kakʼbeytik sujtib te jojkʼoyel-abi.