TA JPISILTIK jnaʼojtik te Jehová ya stojobtes sok ya skanantaybey schʼuunel yoʼtan te lum yuʼun ta «slajibal cʼahcʼal» ini (2 Tim. 3:1). Pero ay ta jwentatik ta jujuntul schʼuunbeyel te skʼope. Te jkuxlejaltik jaʼ pajal sok te skuxlejal te israeletik te kuxinik ta jochol takin kʼinal. Te kʼalal ya yaʼiyik te ya yichʼ okʼesinel te kornetae, ya skʼan te ay bin ya spasike.

Te Jehová la yalbey te Moisés te akʼa spas cheb korneta ta plata te tenbil ta martiyo te ya xtuun swenta «stsobel te pueblo soc yuʼun shachel te campamento» (Núm. 10:2). Te saserdoteetik ya skʼan te yanyantik-a te bitʼil ya yokʼesinik te korneta yuʼun ya snaʼik te bin ya spasik te israeletike (Núm. 10:3-8). Jaʼnix jich ta kʼajkʼal ini, yanyantiknax-a te bitʼil ya yichʼ okʼesinel kʼoem te korneta ta jtojoltike. Kiltik oxeb ejemplo te pajal sok te bitʼil la yichʼ okʼesinel te korneta ta nameye, jaʼ te kʼalal ya kichʼtik ikʼel ta mukʼul tsoblejetik, kʼalal ya yichʼik pʼijubtesel te machʼatik ay yaʼtelik ta wentainwanej sok te kʼalal ay bintik yachʼil ya yichʼ akʼbeyel spas te kongregasione.

Kʼalal te Jehová ya skʼan ya stsob «spisil te pueblo» ta yochibal te nailpakʼ templo, te saserdoteetik ya yokʼesinik schebal te kornetae (Núm. 10:3). Te israeletik te spasoj skampamentoik ta schanjejchelul te nailpakʼ temploe, ya yaʼiyik ta lek te kʼalal ya yichʼ okʼesinel te kornetae. Te israeletik te nopol ayik ta nailpakʼ templo oraniwan ya xkʼotik, pero te machʼatik namal ayik maniwan ora ya xkʼot stukelik. Chikan teme namal o nopol ayik, te Jehová ya skʼan te spisil ya stsob sbaik sok te ya yaʼiyik te bin ya yale.

Jaʼnix jich ta kʼajkʼal ini ya kichʼtik ikʼel ta mukʼul tsoblejetik. Manchukme maba ya jtsob jbatik ta nailpakʼ templo, ya jtsob jbatik ta mukʼul tsoblej yuʼun oxeb kʼajkʼal sok yantikxan mukʼul tsoblejetik banti ya kichʼtik nojptesel sok tojobtesel te kʼax mukʼ skʼoplalike. Te j-abatetik yuʼun Dios ta swolol Balumilal jun-nax te bin ya snopik te kʼalal ya xbajtik ta tsoblejetik-abi, jich bitʼil jun-nax lum te tseʼel yoʼtanike. Swenta ya xkʼotik ta tsoblejetik-abi, ay machʼatik te namalto ya xtalike, pero ta spisilik leknax ya yaʼiy sbaik yuʼun te la spasik tulane.

Jaxan te machʼatik kʼejelto ay slumalike, ¿bin-utʼil ya yaʼiyik te tsobleje? Ta swenta te teknolojia, bayal machʼatik ya smulanbeyik yutsilal-euk te programa sok jich ya yaʼiyik te tey ayik-ae. Jich bitʼil kʼalal jtul representante yuʼun te sentral mundial bajt yulaʼtay te sukursal ta Benín,  la yichʼ kʼasesel te programa ta chʼin lum Arlit (Níger) te ay ta jochol takin kʼinal ta Sahara. Kʼotik 21 ta tul ermanoetik sok yantik ants winiketik. Manchukme ma sjokinej sbaik sok te 44,131 ta tul te kʼotik ta tsobleje jich la yaʼiyik-euk te tey ayik-ae. Jtul ermano jich la yal: «Kʼax wokolawalik yuʼun te la awakʼ kiltik te programa ini. La yakʼ kiltik te bantito kʼalal kʼuxotik ta awoʼtanike».

Kʼalal te saserdoteetik jun-nax korneta ya yokʼesinik, jaʼnax ya stsob sbaik ta nailpakʼ templo te jwolwanejetik yuʼun te mil ta tul israeletike (Núm. 10:4, TNM). Ta tsoblej-abi, te Moisés la yakʼtiklanbey snaʼ sok la spʼijubteslan ta swenta te bitʼil ya spasik te yaʼtelik ta jwolwanej yuʼun te jujun tsʼumbalile. Te jichuk jwolwanejotik-euke, ¿mabal lajuk jpastik tulan yuʼun ya xkʼootik ta tsoblej-abi?

Ta ora ini, manchukme te ansianoetik jaʼ jwolwanejetik yuʼun te kongregasion, maba ya skuy sbaik ta «ajwalil» ta stojol te tuminchijetik yuʼun te Diose (1 Ped. 5:1-3). Ya spasik tulan ta skanantayel ta lek te tuminchijetike. Jaʼ yuʼun te kʼalal ya yichʼik ikʼel ta pʼijubtesel jich bitʼil ta Eskuela yuʼun Ministerio del Reino ya schʼuunik sok sbujtsʼ yoʼtanik. Jich ya snopik bitʼil ya spasikxan ta lek te yaʼtelik ta kongregasione. Ta swenta te nojptesel ya yichʼike, ya xjuʼ ya xnoptsajikxan ta stojol Jehová te ansianoetik, te ermanoetik sok te ermanaetike. Manchukme maba baemotik ta eskuela-abi ya jtatik lekilal yuʼun te bin snopojik te ansianoetike.

Ay baeltik te saserdoteetik yuʼun Israel xyal xmo te bitʼil ya yokʼesinik te kornetae. Te Jehová jaʼ jich ya yakʼbey snaʼ spisil te israeletik te ya skʼan ya xkajikix ta beele (Núm. 10:5, 6). Jaʼ ini ya yakʼ ta ilel te leknax chajpanbilik, pero ya skʼan ya spasik tulan ta spisilik. Ayniwan machʼatik wokolnix la yaʼiyik. ¿Bin yuʼun?

Ay machʼatik yaniwan snopik te jujuntsʼin ya yichʼ okʼesinel te korneta sok te ay ma maliybiluk yuʼunik-ae. Te Biblia ya yal te ay baeltik te «ya xhil te tocal cʼalal ta tibiltic ha to ta sacubel qʼuinal» sok ay baeltik te cheb kʼajkʼal, jun u o bayal u te ma stij sba te tokale (Núm. 9:21, 22). ¿Jayeb buelta la sjach skampamentoik te israeletike? Te kapitulo 33 yuʼun te Números ya yalbey skʼoplal kuarentaniwan lugar te banti la yakʼ skampamentoik te israeletike.

Ayniwan israeletik te ya staik jun lugar te banti ay axinal sok leknax ya yaʼiy sbaik tey-a, melel jochol takin kʼinal te banti ayike (Deut. 1:19). Jaʼ yuʼun ayniwan ya snopik te maba ya staikix lek slugarik te banti ya xkʼotike.

Manchukme spisil te israeletik ya yaʼiyik te kʼalal ya yichʼ okʼesinel te kornetae, maba pajal ya xkajik ta beel. Ay chaʼoxtul israeletik te yaniwan xlujbik ta smaliyel te sturnoike. Ta sbabial buelta te ya yokʼesinik te kornetae, jaʼ ya xjajchik ta beel te stsʼumbal Judá, Isacar sok Zabulón (Núm. 2:3-7; 10:5, 6). Te kʼalal jajchemikix ta beel te tsʼumbalil-abi, te saserdoteetik ya yokʼesinik yan buelta te korneta yuʼun jaʼ ya xjajchik ta beel te oxeb tsʼumbalil te ay ta sur yuʼun te nailpakʼ temploe. Jich ya yokʼesinik yan buelta jaʼto te kʼalal bajtikix ta spisilik-a te israeletike.

Ayniwan wokol ya kaʼiytik spasel te bin jelonem ta organisasion. Ayniwan ya jmel koʼtantik yuʼun te bayal bintik ya xjelon te ma maliybiluk kuʼuntik-ae. Ayniwan lek ya kaʼiytik te bitʼil yakotik ta spasel-ae, jaʼ yuʼun ma jkʼantik te ya xjelone. Chikan te bitʼil ya kaʼiy jbatike, ayniwan jich ya kaʼiytik te la yichʼ pasel ta prueba te slamalil koʼtantik sok te wokol ya xkʼayotike. Pero jnaʼojtik te jich ya skʼan ya jpastike. Teme ya jpastik tulan ta spasel yame jtatik bendision yuʼun te Jehovae.

Ta skʼajkʼalel te Moisés, te Jehová la stojobtes bael bayal miyon ta tul winiketik, antsetik sok alaletik ta jochol takin kʼinal. Te manchuk la yichʼik kanantayel sok tojobtesel yuʼun te Jehovae lajikniwan te jichuke. Ta slajibal kʼajkʼal ini te kʼax chujkultik sbae, te Jehová jaʼnix jich ya stojobtesotik sok ya skoltayotik yuʼun ayuk yip te schʼuunel koʼtantike. Jaʼ yuʼun, jpastik tulan te bantito kʼalal ya xjuʼ kuʼuntik ta schʼuunel mantal jich bitʼil la spasik te israeletik te la schʼuunik ikʼel kʼalal ya yichʼ okʼesinel-a te kornetae.