ARTIKULO YUʼUN ESTUDIO 26
«Suhtanic tal ta jtojol»
«¡Suhtanic tal ta jtojol, hich ya suhton tal ta atojolic!» (MAL. 3:7).
KʼAYOJIL 102 Kakʼtik yip-oʼtanil
¿BIN YA KILBEYTIK SKʼOPLAL? *
1. ¿Bin yaʼiyel ya yaʼiy sba te Jehová kʼalal ya sujt talel ta stojol te stuminchije?
JICH BITʼIL la kiltik ta yan artikuloe, te Jehová ya spaj sba sok jtul jkanantuminchij te ya skanantay sok yutsil yoʼtan te tuminchijetik sok te ya sle te kʼalal ya chʼayike. Jich la yalbey te israeletik te namajik ta stojole: «¡Suhtanic tal ta jtojol, hich ya suhton tal ta atojolic!». Jnaʼojtik te jichnix ya yal ta kʼajkʼal ini, melel jich ya yal: «Ma ba ya xyanij coʼtan» (Mal. 3:6, 7). Te Jesús la yal te ya x-akʼbot bayal stseʼelil yoʼtan te Jehová sok te chʼul-abatetik kʼalal jkojt tuminchij ya sujt talel (Luc. 15:10, 32).
2. ¿Bin ya kilbeytik skʼoplal ta artikulo ini?
2 Ta artikulo ini ya jnopbeytik skʼoplal oxeb lokʼombakʼop te la yalbey skʼoplal te Jesús te ya yakʼ jnoptik te bin-utʼil ya jkoltaytik te machʼatik namajemik ta stojol te Jehovae. Ya kiltik bintik talelil ya skʼan ya kakʼtik ta ilel yuʼun ya jkoltaytik swenta ya sujtik tal sok ya kiltik bin yuʼun mukʼ skʼoplal te ya jpastik tulan yuʼun ya jkoltaytik te machʼatik pejkʼajem te schʼuunel yoʼtanike.
JLETIK TE TAKʼIN TE CHʼAYEME
3, 4. Jich bitʼil ya yal Lucas 15:8-10, ¿bin yuʼun te ants la spas tulan ta sleel te stakʼin te chʼayem-ae?
3 Ya skʼan ya jpastik tulan ta sleel te machʼatik ya skʼan ya sujtik tal ta stojol te Jehovae. Ta Ebanjelio yuʼun Lucas, ya jtabeytik skʼoplal jun lokʼombakʼop te la yal te Jesús ta swenta jtul ants te la spas tulan ta sleel jun drakma takʼin te mukʼ skʼoplal ta yoʼtan te chʼayem yuʼun-ae. Te bin mukʼ skʼoplal ta lokʼombakʼop ini jaʼ te la spas tulan ta sleel te bin chʼay yuʼune (kʼopona Lucas 15:8-10).
4 Jich yilel te ta skʼajkʼalel te Jesuse, te kʼalal ya xnujpun te judia-antsetike ya xkʼebanbotik lajunsejp drakma takʼin yuʼun te smamaike. Te ants ta lokʼombakʼop jaʼniwan chʼay yuʼun jsejp te takʼin-abi. Te bitʼil chʼayniwan koel yuʼune, ya stsum skʼajkʼ sok ya sle yil, pero maba ya sta. Ta skaj te maba ya yakʼ lek xojobil te skʼajkʼe maba ya sta ta ilel. Jaʼ yuʼun ya xkaj smes ta lek te snae. Kʼalal stsobojix-a te skʼaʼpale la sta ta ilel te ay bin ya xtile, ¡jaʼ te stakʼine! Te Jesús la yal te xkuxetnax kʼinal la yaʼiy te antse sok te tseʼelnax yoʼtan bajt yikʼ talel te yamigatak soknix te spatxujk yuʼun ya yalbey te la staix te stakʼine.
5. ¿Bin yuʼun ya skʼan ya jpastik tulan ta sleel te inaktiboetike?
5 Ta lokʼombakʼop te la yal te Jesuse, ya yakʼ jnoptik te ya skʼan ya jpastik tulan swenta ya jtatik ta leel te bin chʼayeme. Jichnix ya skʼan ya jpastik te kʼalal ya jletik te inaktiboetike. Ayniwanix bayal jaʼbil te maʼyukik ta kongregasione. Bajtikniwan ta kuxinel ta yan lugar te banti ma xnaʼbot sbaik yuʼun te ermanoetike. Pero jnaʼojtik te ay machʼatik ya skʼan ya sujtik ta stojol Jehová ta ora ini. Ya skʼanik te jun-nax ya x-abatinik yan buelta sok te yermanotakike, pero ya skʼanik koltayel.
6. ¿Bin-utʼil ya xjuʼ ya xkoltaywan te kongregasion ta sleel te inaktiboetike?
6 ¿Machʼatik ya xjuʼ ya xkoltaywanik ta sleel te inaktiboetike? Spisil te kongregasione, jich bitʼil te sfamilia, te ansianoetik, te prekursoretik sok te publikadoretike. ¿Aybal jtul kamigotik o jfamiliatik te inaktibo aye? ¿Aybal jtaojtik jtul inaktibo te kʼalal yakotik ta scholel skʼop Dios ta karrito o ta nanatik? Jojkʼoybeya teme ya smulan ya yichʼ ulaʼtayel swenta ya kakʼbeytik te ansianoetik te sdireksion sok te snumero stelefono teme jich yoʼtane. Pero ya skʼan ya kichʼtik ta wenta teme maba ya jkʼaxuntaytik jun ley yuʼun te ajwalil ta jnasiontike.
7. ¿Bin ya anop ta swenta te bin la yal jtul ansiano te Thomas sbiile?
7 ¿Bin ya skʼan ya spasik te ansianoetik yuʼun ya staik ta leel te machʼatik ya skʼan ya sujtik ta stojol te Jehovae? Kiltik te bin la yal jtul ansiano te kuxinem ta España te Thomas sbiile. * Te ermano-abi skoltayoj kʼaxem ta 40 ta tul Testigoetik yuʼun ya sujtik ta kongregasion. Jich la yal: «Nail ya jojkʼoybey te ermanoetik te snaʼojikniwan te banti yakik ta kuxinel te inaktiboetike o teme ya xjul ta yoʼtanik teme ay jtul ermano te ma xkʼotix ta tsobleje. Jteb ma spisilik ya skʼan ya xkoltaywanik. Ta patil, kʼalal ya kulaʼtay te ermano o ermana te inaktibo aye ya jojkʼoy ta swenta te yal snichʼnabik o te sfamiliaike. Ay chaʼoxtul inaktiboetik te ya yikʼik bael ta tsoblejetik-a te yal snichʼnabik sok te ochikniwan ta publikadore. Jaʼnix jich ya xjuʼ ya jkoltaytik-euk yuʼun ya sujtik ta stojol te Jehová».
JKOLTAYTIK TE SNICHʼNAB JEHOVÁ TE CHʼAYEMIKE
8. Ta swenta te bin ya yal Lucas 15:17-24, ¿bin yilel ilot yuʼun spapa te nichʼanil te la sut yoʼtane?
8 ¿Bintik talelil ya skʼan ya kakʼtik ta ilel teme ya jkʼan ya jkoltaytik te machʼatik ya skʼan ya sujtik tal ta stojol te Jehovae? Kiltik te bin ya yakʼ jnoptik te lokʼombakʼop yuʼun te nichʼanil te chʼayem-ae (kʼopona Lucas 15:17-24). Te Jesús la yal te la sujtes yoʼtan te kerem sok te la snop te ya sujt ta snae. Te spapa oranax lokʼ sta sok la smey sok skʼuxul yoʼtan, jich la yakʼbey snaʼ te kʼuxto ta yoʼtane. Te kerem ya smel yoʼtan yuʼun te bintik chopol la spase sok jich ya yaʼiy te maba snujpʼix te ya x-ilot bitʼil snichʼane. Te papail tijbot yoʼtan yuʼun te la sjam yoʼtan te snichʼan sok te sujtesojix yoʼtane. Jich yuʼun la spas kʼin sok la yakʼbey slap lekil kʼuʼil. Ta swenta-abi jich la yakʼbey snaʼ te maba ya yil bitʼil jtul j-aʼtel, jich la yil bitʼil snichʼan.
9. ¿Bintik talelil ya skʼan te ayuk kuʼuntik yuʼun ya jkoltaytik te inaktiboetik yuʼun ya sujtik ta stojol te Jehovae? (Ilawil te rekuadro « ¿Bin-utʼil ya jkoltaytik te machʼatik ya skʼan ya sujtik tale?»).
9 Te Jehová jaʼ jich kʼoem te bitʼil te papail ta lokʼombakʼop ini. Kʼux ta yoʼtan te kermanotaktik te inaktibo ayik sok ya skʼan te ya sujtik ta stojole. Teme ya jnopbeytik stalel te Jehová ya xjuʼ ya jkoltaytik yuʼun ya sujtik tal. Swenta jich ya jpastik ya skʼan te ma xlujbotik ta skoltayel, te ya xkʼot ta koʼtantik te bitʼil ya yaʼiy sbaik sok te ayuk skʼuxul koʼtantike. ¿Bin yuʼun ya skʼan ya kakʼtik ta ilel te oxeb talelil-abi sok bin-utʼil ya kakʼtik ta ilel?
10. ¿Bin yuʼun ma skʼan ya xlujbotik ta skoltayel jtul inaktibo?
10 Yame skʼan te ma xlujbotik ta skoltayel jtul inaktibo, melel yame yichʼ bayal tiempo yuʼun ya yamigoin yan buelta te Jehovae. Bayal ermanoetik te inaktibo ayik-ae la yalik te ulaʼtayotik bayal buelta yuʼun te ansianoetik sok te ermanoetik ta kongregasion swenta ya sujtik ta stojol te Jehovae. Jtul ermana te kuxinem ta Asia te Nancy sbiil, jich la yal: «Jtul kamiga ta kongregasion te jich la yilon bitʼil swix, bayal la skoltayon. Ya sjultesbon ta koʼtan-a te bin lek la jpas ta jchebalkotike. Kʼalal ya kalbey-a te bin yaʼiyel ya kaʼiy jbae, ya schʼam yaʼiy sok ya stojobteson. Yuʼun-nix lekil kamiga-a sok spisil-ora la skoltayon».
11. ¿Bin yuʼun ya skʼan ya xkʼot ta koʼtantik te bitʼil ya yaʼiy sba te machʼa ay bin chopol la yichʼ pasbeyele?
11 Teme ya xkʼot ta koʼtantik te bitʼil ya yaʼiy sba te yantike, jichme kʼoem te ya kakʼbeytik pomada te yejchene. Ay inaktiboetik te ayix jaʼbil te skʼejoj yilinbaik ta skaj te ay machʼa ay bin chopol pasbot yuʼun ta kongregasion. Jaʼ yuʼun ma skʼan ya sujtik ta stojol te Jehovae. Ayniwan yantik te ya snopik te ay bin ma stojiluk la yichʼik pasbeyele. Yaniwan skʼanik te ay machʼa ya x-aʼiybot skʼop yuʼunik sok te ya xkʼot ta yoʼtanik te bin yaʼiyel ya yaʼiy sbaike (Sant. 1:19). Jtul ermana te María sbiil te inaktiba ay-ae, jich la yal: «Ya jkʼan-a te ay machʼa ya yaʼiybon te jkʼope, te ya skoltayon sok te ya yakʼbon smukʼul koʼtan te kʼalal ya x-okʼone».
12. ¿Bin yuʼun pajal sok jun laso te skʼuxul yoʼtan te Jehovae?
12 Te Biblia ya yal te skʼuxul yoʼtan te Jehová ta stojol te j-abatetik yuʼune pajal sok jun laso. ¿Bin-utʼil? Kakʼtik jun ejemplo. Nopa awaʼiy te yakat ta sjikʼanel jaʼ ta mukʼul jaʼ te bayal yipe, pero ay machʼa ya schʼojbat tal jun laso. Kʼax tseʼel awoʼtan yuʼun, melel jaʼ ya skoltayat yuʼun ma xyikʼat bael te jaʼe. Pero ma tikʼuk-a te ya atsak te lasoe. Ta skaj te bayal yip te jaʼe, ya skʼan te ayuk machʼa ya snitat lokʼel sok te laso yuʼun ma xlajat-a. Te Jehová jich la yalbey te israeletik te namajik ta stojole: «La jnit [...] ta lazo scuenta cʼuxul-oʼtanil» (Os. 11:4). Jich ya skʼan ya spas te Jehová ta stojol te inaktiboetik te yakik ta sjikʼanel jaʼ kʼoem yuʼun te swokolike. Ya skʼan te yakuk snaʼik te kʼux ya yaʼiy ta yoʼtan sok te ya skʼan te yakuk sujtik tale. Te Jehová ya xjuʼ ya stuuntesotik yuʼun ya yakʼ ta ilel te skʼuxul yoʼtan ta stojolik.
13. Ta swenta te bin kʼax ta skuxlejal te Pablo, ¿bin-utʼil ya jkoltaytik te inaktiboetik yuʼun ya sujtik ta stojol te Jehová teme ya kakʼtik ta ilel skʼuxul koʼtantike?
13 Mukʼ skʼoplal te ya kakʼbeytik snaʼ te inaktiboetik te kʼux aʼiybilik yuʼun te Jehová soknix te kʼux ta koʼtantik-euke. Te Pablo te la kalbeytik skʼoplal ta yan artikuloe, kʼaxem ta 30 jaʼbil te inaktibo ay-ae, jich la yal: «Ta jun buelta te lokʼon tal ta jna ta sab, la spatbon koʼtan jtul ermana te ayix yaʼbilal te sok skʼuxul yoʼtan la skʼoponon. Kajon ta okʼel sok la kalbey te ermana te jich ya kaʼiy te jaʼ tikunot tal yuʼun te Jehovae. Teyto-abi la jta ta nopel te ya sujton ta stojol te Jehovae».
JKOLTAYTIK SOK SKʼUXUL KOʼTANTIK TE MACHʼA PEJKʼAJEM SCHʼUUNEL YOʼTAN
14. Jich bitʼil ya yal Lucas 15:4, 5, ¿bin ya spas jtul jkanantuminchij kʼalal ya sta te stuminchij te chʼayeme?
14 Kʼalal sujtikix tal ta kongregasion-a te inaktiboetike yato skʼanik te ya jkoltaytik sok te ya kakʼbeytik smukʼul yoʼtanike. Bayalniwan ya smel yoʼtanik jich bitʼil te nichʼanil te chʼayem-a te la yalbey skʼoplal ta lokʼombakʼop te Jesuse. Ta skaj te lokʼeliktonax tal ta balumilal yuʼun te Satanase, pejkʼajem te schʼuunel yoʼtanike. Jaʼ yuʼun ya skʼan ya jkoltaytik yuʼun ya yichʼxan yip te schʼuunel yoʼtanike. Ta lokʼombakʼop te la yal te Jesús ta swenta te tuminchij te chʼayeme, te jkanantuminchij ya skajan ta snejkʼel yuʼun ya yikʼ bael te banti ay te yantik tuminchijetike. Te jkanantuminchij spasojix tulan sok jalajix ta sleel-a te stuminchije, pero ya snaʼ te ya skʼan ya skoltay sujtel melel maʼyuk yip (kʼopona Lucas 15:4, 5).
15. ¿Bin-utʼil ya jkoltaytik yuʼun ya sujtik ta stojol Jehová te machʼatik pejkʼajem schʼuunel yoʼtanike? (Ilawil te rekuadro « Jun foyeto te bayal ya xkoltaywane»).
15 Yaniwan skʼan ya jlokʼestik bayal tiempo sok ya jpastik tulan ta skoltayel te inaktiboetik yuʼun ya yichʼxan yip te schʼuunel yoʼtanike (Rom. 15:1). Swenta ya xjuʼ kuʼuntik spasel-abi, ya skoltayotik te chʼul espiritu, te Biblia sok te publikasionetik te ya yakʼbotik te organisasion yuʼun te Jehová. ¿Bin-utʼil ya xjuʼ ya jkoltaytik? Jtul ansiano te bayalix spʼijil jich la yal: «Kʼalal ya snopik te ya sujtik tale, jteb ma spisil te inaktiboetik ya skʼanik te ya xkoltayotik yuʼun jtul publikador ta snopel te Bibliae». * Jich yuʼun, teme ya skʼanbotik jtul ansiano te ya jkoltaytik jtul inaktibo, akʼa jpastik sok sbujtsʼ koʼtantik. Jich ya yalxan te ansianoe: «Te inaktiboetik ya skʼanik te jaʼuk lekil amigo sok te yakuk xjuʼ ya yakʼik smukʼul yoʼtanik ta stojol te publikador te ya xkoltayotik yuʼune».
AY TSEʼEL-OʼTANIL TA CHʼULCHAN SOK TA BALUMILAL
16. ¿Bin-utʼil ya jnaʼtik te ya skoltayotik te chʼul-abatetike?
16 Ay bayal eksperiensia te ya yakʼ ta ilel te ya skoltayotik te chʼul-abatetik ta stael te inaktiboetik te ya skʼan ya sujtik ta stojol te Jehovae (Apoc. 14:6). Jun ejemplo jaʼ te Silvio te kuxinem ta Ecuador te la skʼanbey sok spisil yoʼtan te Jehová te yakuk xkoltayot yuʼun ya sujt ta kongregasion. Yakto ta skʼoponel Dios-a kʼalal kʼot ta tijbeyel te stimbreul sna yuʼun chaʼtul ansianoetik. Teyto-abi jajch yakʼbeyik te koltayel ya xtuun yuʼune.
17. ¿Bin majtanil ya jtatik yuʼun te ya jkoltaytik te machʼatik pejkʼajem schʼuunel yoʼtanike?
17 Ya jtatik stseʼelil koʼtantik kʼalal ya jkoltaytik yuʼun ya sujtik tal ta stojol Jehová te machʼatik pejkʼajem schʼuunel yoʼtanike. Kiltik te bin ya yal jtul prekursor te Salvador sbiil te ya spas tulan ta skoltayel te inaktiboetike: «Ay ma xjuʼ ya kaʼiy te ma x-okʼon yuʼun te stseʼelil koʼtane. Ya yakʼbon stseʼelil koʼtan kʼalal ya kil te Jehová la skoltay lokʼel ta balumilal yuʼun Satanás te stuminchij soknix te koltaywanon-euke» (Hech. 20:35).
18. ¿Bin ya skʼan ay ta awoʼtan teme inaktibo ayate?
18 Teme namajemat ta stojol te lum yuʼun te Jehová, ya skʼan ayuk ta awoʼtan te kʼuxat ta yoʼtan sok ya skʼan te yakuk sujtat ta stojole. Pero ayme bintik ya skʼan ya apas. Juluk ta awoʼtan te papail ta lokʼombakʼop te la yalbey skʼoplal te Jesuse. Te Jehová yak smaliybelat yuʼun ya sujtat ta sfamilia.
KʼAYOJIL 103 sjj-S Nuestros pastores son un regalo de Dios
^ parr. 5 Te machʼatik ayix tiempo te ma xlokʼik ta scholel skʼop Dios sok te ma xbajtikix ta tsoblejetik, jich ya x-albotik yuʼun te Jehovae: «Suhtanic tal ta jtojol». Ta jpisiltik ya xjuʼ ya jtijbeytik yoʼtan te inaktiboetik te ya skʼan ya schʼuunik te inbitasion-abi. Ta artikulo ini ya kiltik bitʼil ya xjuʼ ya jkoltaytik yuʼun ya sujtik tal.
^ parr. 7 Ay yichʼoj jelel te biililetike.
^ parr. 15 Ay chaʼoxtul inaktiboetik te ya xkoltayotik snopel cheʼoxeb kapitulo yuʼun te libro Ayinanikme ta stojol te skʼuxul yoʼtan te Diose, pero ay yantik te jaʼ ya xkoltayotik snopel cheʼoxeb kapitulo yuʼun te libro Acerquémonos a Jehová. Te Komite yuʼun Serbisio ta Kongregasion ya staik ta nopel te machʼa ya xjuʼ ya skoltay te inaktibo ta snopel te Bibliae.
^ parr. 68 TE BIN YA XCHIKNAJ TA FOTOE: Oxtul ermanoetik ya skoltayik jtul inaktibo te ya skʼan ya sujt ta stojol te Jehovae. Jich ya spasik kʼalal ya stikunbeyik mensaje, te ya yakʼbeyik snaʼ te kʼux ta yoʼtanik sok te ya schʼambey yaʼiyik te skʼope.
