1. ¿Bin-utʼil pajal te Satanás sok jtul jnutsojel?

JTUL jnutsojel te bin ya skʼan jaʼ te ya stsak o te ya smil te chambalame. Yuʼun ya stsak ya stuuntes bayal pejtsʼetik, jich bitʼil te bin la yal jtul yamigo te Job (Job 18:8-10). ¿Bin ya spas yuʼun ya xyal ta pejtsʼ jkojt chambalam? Jaʼ te ya yil ta lek te banti ya xbeen, te bin ya smulan sweʼel sok te bin ya xiʼ te chambalame. Te Satanás jaʼnix jich ya spas, ya yil ta lek te bintik ya jpastik, te bin ya jmulantik te jich ya yakʼ xyalotik ta spejtsʼ. Ta Biblia ya yalbotik te bin ya skʼan ya jpastik yuʼun ma xyalotik ta spejtsʼ sok te bin ya skoltayotik yuʼun ma sloʼlayotik.

2. ¿Bin pejtsʼetik ya stuuntes te Satanás?

² Te cheb pejtsʼetik ya stuuntes te Satanás jaʼ te toybail sok te bikʼtal oʼtanil. * Ayix bayal jaʼbil te jich yak ta spasele. Te Satanás jich kʼoem bitʼil jtsajtaywanej te kʼunkʼun ya smonbey yoʼtan te ants winiketik (Sal. 91:3). Ma skʼan te ya kakʼ jbatik ta loʼlayel, melel te Jehová yalojbotik te bintik pejtsʼetik ya stuuntes te Satanás (2 Cor. 2:11).

3. ¿Bin yuʼun te Jehová la yakʼ ta Biblia ejemploetik yuʼun ants winiketik te la stoy sbaik sok te ayin sbikʼtal yoʼtanik?

³ ¿Bin-utʼil ya yakʼbotik jnaʼtik te Jehová te maba lek te bikʼtal oʼtanil sok te toybail? Ay tsʼibaybil ejemploetik ta Biblia te ay bin ya yakʼ jnoptik. Ya kiltik bin-utʼil te Satanás  sloʼlayoj te j-abatetik yuʼun te Jehová. ¿Jaʼbal ya skʼan ya yal-abi te ma xjuʼ ya jkoltay jbatik? Maʼuk. Te Jehová la yakʼ jilel ta tsʼibayel ta Biblia yuʼun ya «stsitsotic» (1 Cor. 10:11). Ya snaʼ te ay bintik ya yakʼ jnoptik yuʼun jich ma xjuʼ ya sloʼlayotik-a te Pukuje.

4. ¿Bin ya xkʼot ta stojol te machʼa ya stoy sba?

⁴ Te Satanás jaʼ ya skʼan te ya jtoy jbatik. Teme ya yuʼuntay koʼtantik te talelil ini, jich ya xkʼootik bitʼil te Satanás sok maba ya xkuxinotik ta sbajtelkʼinal (Prov. 16:18). Jaʼ yuʼun te Pablo la yal teme ay machʼa ya stoy sba «pajal ya xʼaʼbot stoj smul soc te pucuje» (1 Tim. 3:6, 7). Jpisiltik ya xjuʼ te jich ya xkʼot ta jtojoltik chikan jayebix jaʼbil ayotik ta abatinel ta stojol te Jehová.

5. Jich bitʼil ya yal te Eclesiastés 7:16, 20, ¿bin yilel stalel te machʼa ya stoy sba?

⁵ Te machʼa ya stoy sba jaʼnax ya yichʼ sba ta mukʼ. Te Satanás jaʼ ya skʼan te joʼotiknax ya kichʼ jbatik ta wenta, te ma jaʼuk ya kichʼtik ta wenta te Jehová, kʼaxtoxan-a teme ayotik ta wokol. Jich bitʼil, ¿aybal bin-ora la kichʼtik lebeyel jmultik te ma joʼukotik ay bin la jpastik? ¿Aybal bin ma stojiluk la kichʼtik pasbeyel? Te Satanás jaʼ ya smulan te jaʼuk ya kakʼbeytik smulin te Jehová o te hermanoetik. Soknix jaʼ ya skʼan te joʼotiknix ya jnoptik te bin ya jpastik, te ma jkʼanbeytik koltayel te Jehová te ya yakʼ ta Biblia (kʼopona Eclesiastés 7:16, 20).

6. ¿Bin ya yakʼ jnoptik te bin kʼax ta stojol jtul hermana?

⁶ Kiltik bin kʼax ta stojol jtul hermana ta Países Bajos te ma xkujchix yuʼun ya yaʼiy te bintik ma lek ya spasik te hermanoetik. Jich la yaʼiy te ma skʼan ya yilix te hermanoetik, jich ya yal: «Kʼax jtukel la kaʼiy jba. Jaʼnax ya kil te bintik ma lek ya spasik, jich yuʼun la kalbey te jmamalal te yakuk xbootik ta yan congregación». Pero la yil te JW Broadcasting^® yuʼun marzo 2016 te  banti ya yalbey skʼoplal te ma jaʼuk ya skʼan ya kiltik te bintik ma lek ya spasik te yantik. Te hermana jich ya yal: «Kʼot ta koʼtan te ya skʼan te pekʼeluk ya kakʼ jba sok te jaʼuk ya kil te banti ya xchʼayone, te ma jaʼuk ya jkʼan ya jeltaybey stalel te hermanoetik ta congregación. Te Broadcasting jaʼ la skoltayon yuʼun jaʼuk ya xbajt ta koʼtan spasbeyel yaʼtel te Jehová». Kʼalal ya xkʼaxotik ta wokolil ma skʼan ya xchʼay ta koʼtantik te Jehová. Akʼa jkʼanbeytik yuʼun yakuk skoltayotik, te jichuk ya kiltik te hermanoetik te bin-utʼil ya yil stukel. Te jTatik te ay ta chʼulchan ya yil te banti ya xchʼayik sok ya spasbey perdón, jaʼnix jich ya skʼan ya jpastik-euk (1 Juan 4:20).

7. ¿Bin kʼax ta stojol te ajwalil Uzías?

⁷ Te stoybail yoʼtan te Uzías, te ajwalil yuʼun Judá, jaʼ la yakʼ te ma la schʼuun te tojobtesel akʼbot sok ay bin la spas te ma jaʼuk ay ta swenta spasele. Jaʼ jtul pʼijil winik te tsalawan ta guerra, te la spas tsʼajkʼetik sok te la smulan aʼtel ta lumkʼinal. Te Jehová la yakʼ te «lec cʼoht yuʼun te bin la spase» (2 Crón. 26:3-7, 10). Pero te Biblia ya yal «te cʼalal la sta yip, la stoy sba, hich la sta jinel yuʼun». Te Jehová la yal te jaʼnax te sacerdoteetik ya xjuʼ ya schikʼik pom ta templo. Pero te jtoyba oʼtan Uzías la skʼaxuntay te mantale. Jich yuʼun te Jehová la yakʼbey kʼaʼel chamel te Uzías, jaʼ laj bael yuʼun (2 Crón. 26:16-21).

8. ¿Bin-utʼil ya skoltayotik te 1 Corintios 4:6, 7 yuʼun ma jtoy jbatik?

⁸ ¿Yabal xjuʼ ya jtoy jbatik sok ya jkʼaxuntaytik kʼop jich bitʼil la spas te Uzías? Kiltik te ejemplo yuʼun te José, ay lek yaʼtel, jaʼ jtul anciano te ichʼbil ta mukʼ, ya skʼases discursoetik ta mukʼul tsoblej, sok ay bintik ya xjojkʼoybot yuʼun te superintendente yuʼun circuito. Pero jich ya yal: «La jmukʼulin jba ta koʼtan sok te bintik jnopoj spasel. Ma la kichʼ ta wenta te Jehová sok la jkuy te tulan schʼuunel koʼtan, jich yuʼun ma la kichʼ ta wenta te mantaliletik sok te consejoetik yuʼun te Jehová». Te José la spas jun tulan mulil sok la yichʼ lokʼesel ta congregación. Aytonax cheʼoxeb jaʼbil te chaʼsujte, jich ya yal: «Te Jehová snojptesejon te jaʼ mukʼ skʼoplal te ya jpas te bin ya skʼanbon,  ma jaʼuk te privilegio kichʼojtik». Juluk ta koʼtantik te spisil te bintik ya jnaʼtik spasel sok te kaʼteltik kichʼojtik ta congregación, jaʼ yakʼojbotik te Dios (kʼopona 1 Corintios 4:6, 7). Teme ya jtoy jbatike, ma xtuunotik yuʼun te Jehová.

9. ¿Bin la spas te Satanás sok te Eva ta skaj te ay sbikʼtal yoʼtanik?

⁹ Kʼalal ya kalbeytik skʼoplal te bikʼtal oʼtanil, jaʼniwan ya xtal ta koʼtantik te Satanás. Te bitʼil chʼul-abat yuʼun-a te Jehová, laniwan smulan bayal privilegioetik te akʼbot spas yuʼun te Jehová. Pero ma tikʼuk la yaʼiy-a, jaʼ la skʼan te yakuk yichʼ ichʼel ta mukʼ jich bitʼil te Jehová. Jaʼ ya skʼan te yakuk jkʼayinbeytik stalel sok te manchuk tseʼeluk koʼtantik yuʼun te bintik ay kuʼuntik, jaʼ jich la sloʼlay te Eva. Sok skʼuxul yoʼtan te Jehová la yalbey te Adán sok Eva te ya xjuʼ ya sloʼbeyik sit spisil te teʼetik, pero jaʼnax jpejt teʼ ma xjuʼ ya sloʼbeyik site (Gén. 2:16). Pero te Satanás la sloʼlay te Eva sok la yalbey te jaʼ lek te ya sloʼbey sit te teʼe. Ma tikʼuk la yaʼiy-a te bin akʼbot yuʼun te Jehová sok ma la yal wokol yuʼun. Jich la skʼaxuntaybey skʼop te Jehová sok ta patil, laj (Gén. 3:6, 19).

10. ¿Bin-utʼil ayin sbikʼtal yoʼtan te David?

¹⁰ Kiltik te bin kʼax ta stojol te ajwalil David. Akʼbot bayal sbiluk yuʼun te Jehová, ay skʼulejal, mukʼ skʼoplal sok la stsal te skontratak. Te David la yal bayal wokol yuʼun te bitʼil bayal bin akʼbot yuʼun te Jehová (Sal. 40:5). Pero te David ayin sbikʼtal yoʼtan, jaʼ yuʼun chʼay ta yoʼtan te bin akʼbil yuʼun te Jehová, ma tikʼuk la yaʼiy-a. Manchukme bayal yinam, la smulanbey yinam yan winik, jaʼ te bin ma lek ya yil te Jehová. Te antse Bat-Seba sbiil, te smamalal jaʼ te Urías. Te David ayin sbikʼtal yoʼtan te jich yal ta mulil sok te Bat-Seba sok la staik alal. Maba jaʼuknax-abi, la yakʼ ta milel te Urías (2 Sam. 11:2-15). ¿Bin ay ta yoʼtan te David? Sok ¿Yuʼunbal la skuy te ma x-ilot yuʼun te Jehová? Ta jun tiempo jun yoʼtan la yakʼ sba ta stojol te Jehová, pero ayin sbikʼtal yoʼtan sok jaʼ la spas te bin la skʼan yoʼtan te la sta swokol yuʼun.  Ta patil la yal ta jamal te smul sok la sujtes yoʼtan. La yalbey bayal wokol te Jehová te pasbot perdón (2 Sam. 12:7-13).

11. Jich bitʼil ya yal te Efesios 5:3, 4, ¿bin yuʼun ma skʼan te ay bikʼtal koʼtantik?

¹¹ ¿Bin ya yakʼ jnoptik te bin kʼax ta stojol te David? Jaʼ te ya kalbeytik wokol te Jehová ta swenta spisil te bin yakʼojbotike (kʼopona Efesios 5:3, 4). Ya skʼan te tseʼeluk koʼtantik yuʼun te bin ay kuʼuntik. Te machʼatik ya kakʼbeytik nojptesel ta Biblia yakuk yil te bintik tʼujbil akʼbil yuʼun te Jehová sok te ya yal wokol yuʼun. Teme jich ya spasike, te kʼalal ya xlokʼ jun semana yanyantik-a te bin ya yalbeyik wokol ta oración te Jehová (1 Tes. 5:18). ¿Jichbal ya jpastik te joʼotike? Teme ya jnop ta koʼtantik te bin spasoj te Jehová ta jtojoltik, jich ya kalbeytik bayal wokol sok tseʼel koʼtantik yuʼun te bin yakʼojbotik. Jich maʼyuk sbikʼtal koʼtantik.

12. ¿Bin la spas te Judas Iscariote ta skaj te sbikʼtal yoʼtane?

¹² Kalbeytik skʼoplal te Judas Iscariote. Jnaʼojtik te akʼawan ta kʼabal, pero aynix te bin lek la spase (Luc. 6:13, 16). Te Jesús la stsa jich bitʼil jpuk-kʼop sok la yakʼ smukʼul yoʼtan ta stojol, melel la yakʼbey skanantay te takʼin te ya xtuun ta swenta scholel skʼop Dios. Ya xjuʼ ya kaltik te jaʼ pajal sok te majtan takʼin te ya yichʼ akʼel ta obra mundial. Bayal buelta albotik yuʼun te Jesús te manchuk ya x-ayin sbikʼtal yoʼtanik (Mar. 7:22, 23; Luc. 11:39; 12:15). Pero te Judas ma la yichʼ ta wenta sok ta patil la yaʼiy elekʼ.

13. ¿Bin-utʼil la yakʼ ta ilel te Judas te ay sbikʼtal yoʼtane?

¹³ Te Judas la yakʼix ta ilel-a te ay sbikʼtal yoʼtan te kʼalal mato ya xlaj-a te Jesús. Te Simón te ay skʼaʼel chamel-a, la yikʼ ta sna te Jesús sok te jnopojeletik, tey ayik-euk-a te María sok te Marta. Te kʼalal yakik ta weʼel-a, te María la stejkʼan sba sok la smalbey lekil perfume ta sjol te Jesús. Te Judas sok te yantik jnopojeletik ilinik yuʼun. Laniwan snopik te ya xtuun te takʼin ta swenta te scholel skʼop Dios. Ilin yuʼun te Judas, melel jaʼ ya skʼan ya yelkʼan te takʼine. Ta patil te Judas la yakʼ ta kʼabal te Jesús ta skaj te sbikʼtal yoʼtan (Juan 12:2-6; Mat. 26:6-16; Luc. 22:3-6).

14. ¿Bin-utʼil la spas ta skuxlejalik jtul hermano sok yinam te bin ya yal te Lucas 16:13?

¹⁴ Te Jesús jich la yalbey te jnopojeletik: «Ma xhuʼ yac awacʼ abahic ta aʼbatinel yuʼun Dios soc yuʼun te cʼuhlejalil» (kʼopona Lucas 16:13). Yakto ta kʼoel ta pasel te bin la yal te Jesús. Kiltik te bin la yal jtul hermano sok yinam ta Rumania te kʼalal japbotik jun aʼtelil te lek ya xtojotike, jich ya yalik: «Ay bayal jbetik ta banco, jich yuʼun te aʼtelil-abi la kiltik bitʼil jun bendición yuʼun Jehová». Pero te aʼtelil japbotike, jaʼ ya xmakotik ta spasbeyel yaʼtel te Jehová. Pero ay bin la staik ta nopel spasel te kʼalal la skʼoponik te artículo «Mantengámonos leales con un corazón unificado», yuʼun te La Atalaya 15 yuʼun agosto 2008, jich ya yalik: «Te jaʼuk bootik ta sleel bayal takʼin ta yan nación, ma jaʼuk yakotik ta spasbeyel yaʼtel te Jehová. Ya jnaʼtik ta lek teme jich ya jpastik, ya xpejkʼaj te yip schʼuunel koʼtantik». Jich yuʼun la spʼajik te bin japbotike. ¿Bin kʼot ta stojolik? Te hermano la sta yaʼtel ta slumalnix, te yinam jich ya yal: «Spisil-ora ya skoltayotik te Jehová». Kʼax tseʼel yoʼtanik, melel te yajwalike jaʼ te Jehová, ma jaʼuk te takʼine.

15. ¿Bin ya skʼan ya jpastik yuʼun maba ya xyalotik ta spejtsʼ te Satanás?

¹⁵ Teme ayix stoybail koʼtantik sok sbikʼtal koʼtantik, ¿yabal xjuʼ ya jlokʼestik? Yak, melel te Pablo la yal te machʼatik ay bin ma lek ya spasik ya xjuʼ ya xlokʼik ta spejtsʼ te Satanás (2 Tim. 2:26). Jaʼ jich la spas te David te kʼalal tojobtesot yuʼun te Natán, la sujtes yoʼtan sok la yamigoinxan te Jehová. Mame xchʼay ta koʼtantik, te Jehová jaʼ bayalxan yuʼel te bitʼil te Satanás. Teme ya jkʼanbeytik koltayel, ma xyalotik ta spejtsʼ te Pukuje.

16. ¿Bin ya skoltayotik yuʼun maba ya xyalotik ta spejtsʼ te Satanás?

¹⁶ Ya skʼan te ta sjajchibalto ya jpʼajtik te pejtsʼetik yuʼun te Satanás. Jaʼnax ya xjuʼ kuʼuntik stsalel ta swenta te koltayel yuʼun te Jehová. Ma skʼan ya jmukʼulin jba koʼtantik. Ay j-abatetik te ayix bayal jaʼbil te ayik ta abatinel ta stojol te Jehová te la stoy sbaik sok te ayin sbikʼtal yoʼtanik. Akʼa jkʼanbeytik te Jehová yuʼun yakuk skoltayotik ta yilel teme chʼiemix ta koʼtantik o ta bin ya jpastik te taleliletik ini te maba ya smulane (Sal. 139:23, 24). Ma skʼan ya xyalotik ta spejtsʼ te Satanás.

17. ¿Bin nopolix ya xkʼot ta pasel ta stojol te Pukuje?

¹⁷ Te Satanás bayalix jaʼbil te yak ta sloʼlayel te ants winiketik. Pero nopolix ya yichʼ chukel sok te ya yichʼ lajinel (Apoc. 20:1-3, 10). ¡Ya jkʼantik te yakuk xkʼotix ta pasele! Te bitʼil mato xkʼot ta pasel, ya skʼan te ya jtsajtay jbatik yuʼun maba ya xyalotik ta spejtsʼ te Satanás. Ma skʼan ya kakʼtik te ya swentainotik te toybail sok te bikʼtal oʼtanil. Jchʼuuntik spasel te consejo ini: «Ma xawacʼ yochintayex te pucuje, hich ya xlocʼ ta ahnel ta atojolic» (Sant. 4:7).