1. ¿Bin yuʼun ay j-abatetik yuʼun Jehová te stukel ya yaʼiy sbaik?

JPISILTIKNIWAN ay jtukel kaʼiyoj jbatik, pero ay chaʼoxtulik te baeltiknax te jich ya yaʼiy sbaik. Ay yantik te spisilnanix-ora stukel ya yaʼiy sbaik-a, manchukme jokinbil yuʼun bayal ants winiketik. Ay machʼatik te wokol ya yaʼiyik te ya xkʼayik ta jun congregación. Ay yantik te kʼayemik sok te sfamiliaik, jaʼ yuʼun wokol ya yaʼiyik te ya xbajtik ta yan lugar. Ay machʼatik te ay machʼa lajem yuʼunik te stukel ya yaʼiy sbaik sok ay hermanoetik te mato jaluk yochelik ta organización, stukel ya yaʼiy sbaik ta skaj te ya xpʼajotik yuʼun te sfamiliaik sok te yamigotak te ma Testigouk.

2. ¿Bintik jojkʼoyeletik ya kakʼbeytik sujtib ta artículo ini?

² Te Jehová ya snaʼbotik jbatik ta lek sok ya xkʼot ta yoʼtan te bin yaʼiyel ya kaʼiy jbatik. Jaʼ yuʼun ya snaʼ te bin-ora jtukel ya kaʼiy jbatik sok ya skʼan ya skoltayotik. Ta artículo ini ya kakʼbeytik sujtib te jojkʼoyeletik: ¿Bin-utʼil ya skoltayotik te Jehová yuʼun ma jtukeltikuk ya kaʼiy jbatik?, ¿bin ya xjuʼ ya jpastik teme jtukel ya kaʼiy jbatik? Sok ¿bin ya xjuʼ ya jpastik teme stukel ya yaʼiy sbaik te hermanoetik?

3. ¿Bin-utʼil la yakʼ ta ilel te Jehová te la smel yoʼtan ta stojol te Elías?

³ Te Jehová ya smel yoʼtan ta stojol te j-abatetik yuʼune.  Nopol ay ta jtojoltik sok ya snaʼ te bin-ora chebajem koʼtantike (Sal. 145:18, 19). Kiltik te bin-utʼil koltayot te alwanej Elías te kuxin ta yorail tulan wokolil ta lum Israel. Te j-abatetik yuʼun te Jehová la yichʼik nutsel yuʼun te skontratak sok yoʼtanuk ya smilik te Elías (1 Rey. 19:1, 2). Te Elías la skuy te maʼyukix yan j-alwanej, jaʼ yuʼun la smel yoʼtan (1 Rey. 19:10). Te Jehová la skoltay te Elías la stikun jtul chʼul-abat yuʼun ya yalbey te ma stukeluk ay sok te ayto israeletik te jun yoʼtan yakʼoj sbaik (1 Rey. 19:5, 18).

4. Jich bitʼil ya yal te Marcos 10:29, 30, ¿bin-utʼil ya smel yoʼtan te Jehová ta stojol te machʼatik ma xyichʼik koltayel yuʼun te sfamilia sok te yamigotak?

⁴ Te Jehová snaʼoj te jpasojtik tulan yuʼun ya x-abatinotik ta stojol. Ayniwan ma skoltayotikix te jfamiliatik sok te kamigotaktik te ma x-abatinik ta stojol te Jehová. Ta jun buelta te jpuk-kʼop Pedro jich la yalbey te Jesús: «Te hoʼotcotic quihquitayejcotic hilel spisil soc jtʼunojatcotic; ¿bin ya jtahcotic a?» (Mat. 19:27). Te Jesús sok slekil yoʼtan la yaltiklanbey te jnopojeletik yuʼun te ya sta sfamiliaik te pajal schʼuunel yoʼtanik soke (kʼopona Marcos 10:29, 30). Te jTatik te ay ta chʼulchan ya yal ta jamal te ya skoltay te machʼatik ya x-abatinik ta stojol (Sal. 9:10). Kiltik bin-utʼil ya skoltayotik te Jehová teme jtukel ya kaʼiy jbatik.

5. ¿Bin yuʼun lek te ya skʼan ya xjul ta koʼtantik te bin-utʼil skoltayojotik te Jehová?

⁵ Jnoptik te bin-utʼil yakal skoltaybelotik te Jehová (Sal. 55:22). Jaʼme ya skoltayotik yuʼun ya jnaʼtik tsajtayel jbatik. Jtul hermana te Carol sbiil * te jaʼnax Testigo ta sna, jich ya yal: «Te bin skoltayejon yuʼun ma jtukeluk ya kaʼiy jba, jaʼ te ya xtal ta koʼtan te bin-utʼil skoltayejon te Jehová ta yorail wokol. Jaʼme ya yakʼbon jnop te maʼyuk bin-ora ya yijkitayon ta jtukel te Jehová ta pajel chaʼbej».

6. ¿Bin-utʼil ya xkoltayotik te machʼatik stukel ya yaʼiy sbaik te bin ya yal te 1 Pedro 5:9, 10?

⁶ Jnoptik te bin-utʼil te Jehová yakal  skoltaybel te hermanoetik te stukel ya yaʼiy sbaik (kʼopona 1 Pedro 5:9, 10). Te Hiroshi te jaʼnax stukel Testigo ta sfamilia, jich ya yal: «Jpisiltik ya xkʼax jwokoltik. Pero te kʼalal ya kiltik te jpisiltik yakotik ta spasel tulan yuʼun ya x-abatinotik ta stojol Jehová, ya yakʼ smukʼul koʼtantik manchukme maʼyuk jfamiliatik ta organización».

7. ¿Bin-utʼil ya skoltayat te oración?

⁷ Ma jkom jbatik ta spasbeyel yaʼtel te Jehová. Mukʼ skʼoplal te yakuk kalbeytik te Jehová te bin yaʼiyel ya kaʼiy jbatik (1 Ped. 5:7). Kiltik bin ya yal te Massiel, te kontrainot yuʼun te sfamilia te kʼalal och ta abatinel ta stojol te Jehová, jich ya yal: «Te bin skoltayejon yuʼun ma jtukeluk ya kaʼiy jba, jaʼ te ya jkʼopon te Jehová sok spisil koʼtan. Jich kʼoem te jaʼ jun Tatil kuʼun te jujun kʼajkʼal ya jkʼopon sok ya kalbey te bin yaʼiyel ya kaʼiy jbae».

8. ¿Bin-utʼil ya skoltayat te ya akʼopon sok te ya anopilan ta awoʼtan te bin ya yal te Biblia?

⁸ Mukʼ skʼoplal te ya jkʼopontik ta jujun kʼajkʼal te Biblia sok te yakuk jnop ta koʼtantik te relatoetik te ya yakʼ kiltik te kʼuxotik ta yoʼtan te Jehová. Te Bianca te ma lek bin ya x-albot yuʼun te sfamilia, jich ya yal: «Jaʼ ya skoltayon te kʼalal ya jkʼopon sok ya jnopilan ta koʼtan te bintik kʼaxem ta skuxlejal te j-abatetik yuʼun te Dios ta namey soknix ta ora ini». Ay chaʼoxtul hermanoetik te ya snop ta yoʼtanik textoetik te ya x-akʼbot smukʼul yoʼtanik, jich bitʼil te Salmo 27:10 sok te Isaías 41:10. Ay yantik te kʼalal ya schajpan sbaik ta tsoblej o te ya skʼoponik te Biblia jaʼ ya stuuntesik te audio, jich koltaybilik yuʼun ma stukeluk ya yaʼiy sbaik.

9. ¿Bin-utʼil ya skoltayat teme ya xbaat ta tsoblejetik?

⁹ Ya skʼan ya jpastik tulan yuʼun ya xbootik spisil-ora ta tsoblejetik, melel ya yakʼ smukʼul koʼtantik sok jich ya jnaʼbeytikxan sba te hermanoetik (Heb. 10:24, 25). Te Massiel te la kalbeytik skʼoplal ta párrafo 7, jich ya yal: «Manchukme ya xiwon ta kʼop, la kal ta ya xboon ta tsoblejetik sok te ya kakʼ jcomentario. Jaʼ la skoltayon yuʼun jun-nax ayon sok te congregación».

10. ¿Bin yuʼun mukʼ skʼoplal te ya kamigointik te machʼatik jun yoʼtan yakʼoj sbaik?

¹⁰ Kamigointik te machʼatik jun yoʼtan yakʼoj sbaik. Jaʼuk ya kamigointik te hermanoetik te lek stalelik, manchukme yanyantik yaʼbilalik o stsʼumbalik. Te Biblia ya yal te «ay spʼijil-oʼtanil ta yohlil te  mamaletic» (Job 12:12). Pero te machʼatik ayix yaʼbilalik bayal bin ya xjuʼ ya snopik ta stojol te jchʼieletik. Jich bitʼil te David manchukme jaʼ pekʼelto yaʼbilal bitʼil te Jonatán, pero kʼax lek la yamigoin sbaik (1 Sam. 18:1). Talel kʼaxel la skoltay sbaik yuʼun ya x-abatinik ta stojol te Jehová manchukme ay la sitintayik tulan wokolil (1 Sam. 23:16-18). Te Irina te jaʼnax stukel Testigo ta sfamilia, jich ya yal: «Te hermanoetik jich ya xkʼotik bitʼil jfamiliatik, ya xjuʼ ya stuuntes te Jehová yuʼun ya skoltayotik».

11. ¿Bin ya skʼan ya jpastik yuʼun ayuk lekil kamigotaktik?

¹¹ Ayniwan machʼatik wokol ya yaʼiyik te ya sta yamigoik ta skaj te ya xiwik ta kʼope. Kiltik bin ya yal te Ratna te jaʼ jtul hermana te ya xiw ta kʼop sok te la yichʼ kontrainel kʼalal jajch snop te Bibliae, jich ya yal: «Kʼot ta koʼtan te ya jkʼan koltayel yuʼun te hermanoetik». Wokolniwan ya kaʼiytik te ay machʼa ya jcholbeytik te bin yaʼiyel ya kaʼiy jbatik. Te kamigotaktik ya smulanik te ya yakʼbotik smukʼul koʼtantik sok te ya skʼan ya skoltayotik, pero yuʼun jich ya xjuʼ ya spasik ya skʼan ya kalbeytik te bin yaʼiyel ya kaʼiy jbatik.

12. ¿Bin-utʼil ya skoltayotik te scholel skʼop Dios ta stael lekil kamigotaktik?

¹² Ya jta lekil kamigotaktik teme ya xlokʼotik ta scholel skʼop Dios sok yanyantik hermanoetik. Te Carol te la kalbeytik skʼoplal ta párrafo 5, jich ya yal: «Bayal jtaoj kamigotak te kʼalal ya xlokʼon ta scholel skʼop Dios sok te hermanaetik sok te kʼalal ya xkoltaywanon ta spasel yantik aʼteliletik. Te Jehová jaʼ stuuntesoj te kamigotak yuʼun ya skoltayonik». Ay bin lek ya xlokʼ kuʼuntik-a teme ya jpastik tulan ta yamigoinel te hermanoetik te jun yoʼtan yakʼoj sbaike. Jaʼ ya stuuntes te Jehová yuʼun ya skoltayotik te kʼalal ayotik ta wokol, jich bitʼil te kʼalal jtukel ya kaʼiy jbatik (Prov. 17:17).

13. ¿Bin ya skʼan ya jpastik ta jpisiltik?

¹³ Jpisiltik ya xkoltaywanotik yuʼun ayuk lamalkʼinal sok kʼuxul oʼtanil ta congregación. Jich maʼyuk machʼa stukel ya yaʼiy sba (Juan 13:35). Te bin ya jpastik sok te bin ya kaltik ya xjuʼ ya skoltayotik. Jtul hermana jich ya yal: «Te kʼalal la jnop te Biblia, jaʼ kʼot ta jfamilia te congregación. Te manchuk la skoltayonike, ma ochon ta testigo yuʼun Jehová te jichuke». ¿Bin ya xjuʼ ya jpastik yuʼun ya jkoltaytik te machʼatik stukeliknax ayik ta organización?

14. ¿Bin-utʼil ya xjuʼ ya kamigointik te machʼatik ochelikto ta congregación?

¹⁴ Kamigointik te yantik. Ya xjuʼ ya jpatbeytik yoʼtan sok slekil koʼtantik te machʼatik ochelikto ta congregación (Rom. 15:7). Pero ma jaʼuknax te ya jpatbeytik yoʼtane, ya skʼan te ya kamigoin jbatik ta lek sok. Jaʼ yuʼun kakʼtik ta ilel slekil koʼtantik, te ayuk skʼoplal ta koʼtantik sok te yakuk xkʼot ta koʼtantik te swokolik, pero ma skʼan ya jchʼik jbatik ta skuxlejalik. Ayniwan wokol ya yaʼiyik te ya yalbotik te bin yaʼiyel ya yaʼiy sbaik, pero mame skʼan ya jsujtik yuʼun ya scholbotik. Akʼa jpasbeytik jojkʼoyeletik sok yutsil koʼtantik sok akʼa jchʼam kaʼiytik te bin ya yalike. Ya xjuʼ ya jojkʼoybeytik te bin-utʼil la snaʼbeyik sba te Jehová.

15. ¿Bin-utʼil te ancianoetik ya skoltayik te yantik hermanoetik ta congregación?

 ¹⁵ Kʼalal te hermanoetik sok te ancianoetik mukʼ skʼoplal ta yoʼtanik te yantik, ya xmukʼubxan schʼuunel yoʼtanik te congregación. Te Melissa te nojptesot ta Biblia yuʼun te smama, jich ya yal: «Ya kal bayal wokol yuʼun te ay bayal hermanoetik te la skoltayonik jich bitʼil jmeʼ jtat. Te kʼalal ya jkʼan ya xkʼopojon, ay machʼa ya yaʼiybon jkʼop». Jaʼnix jich te Mauricio stukel la yaʼiy sba te kʼalal la skom sba ta scholel skʼop Dios te machʼa ya xnojptesot ta Biblia, jich ya yal: «Te bin la skoltayon jaʼ te ayon ta yoʼtan te ancianoetik. Ya slokʼesik tiempo yuʼun ya skʼopononik, ya sjokinonik ta scholel skʼop Dios, ya scholbonik te bin mukʼ skʼoplal la snopik ta Biblia sok ya sjokinonik ta tajimal». Te Melissa sok te Mauricio yakʼoj sbaik ta abatinel ta stojol te Jehová ta spisil-ora.

16, 17. ¿Bin-utʼil ya xjuʼ ya jkoltaytik te hermanoetike?

¹⁶ Jkoltaytik te yantik (Gál. 6:10). Jtul misionero te Leo sbiil te ay ta abatinel ta yan lugar, jich ya yal: «Te kʼalal ay bin ya xkʼax ta jtojoltik, te bin ya jkʼantik jaʼ te ay machʼa ya skoltayotik. Yato xjul ta koʼtan te ay jun buelta la jta jun accidente. Bayal xiwon, pero te kʼalal kʼoon ta jnae jtul hermano sok yinam la yikʼonik ta weʼel ta sna. Ma jnaʼix te bin la yakʼbonik jweʼe, pero te bin jil ta koʼtane jaʼ te la yaʼiybonik te jkʼope, leknax la kaʼiy jba yuʼun».

¹⁷ Jpisiltik ya jmulantik te ya xbootik ta mukʼul tsoblejetik, melel ya jokintik te hermanoetik sok ya kalbeytik skʼoplal te bin ya xkʼaxe. Pero kiltik te bin ya yal te Carol te la kalbeytikix skʼoplale, jich ya yal: «Wokol ya kil te kʼalal ya xboon ta mukʼul tsoblejetik, manchukme ay bayal hermanoetik, pero jaʼnax ay sok te sfamiliaik, jich yuʼun jtukel ya kaʼiy jba». Ay hermanoetik te wokol ya yilik te ya xbajtik ta sbabial buelta ta mukʼul tsoblej ta skaj te lajemix te sjoyike. ¿Aybal machʼa ya jnaʼbeytik sba te jich yak ta kʼaxel ta stojole? ¿Yabal xjuʼ ya kikʼ ta jnatik yuʼun jun-nax ya kiltik te reunión especial?

18. Jich bitʼil ya yal 2 Corintios 6:11-13, ¿bin-utʼil ya xjuʼ kakʼtik ta ilel slekil koʼtantik?

 ¹⁸ Jokin jbatik sok. Kʼalal ay bin ya jpastik kikʼtik yanyantik hermanoetik sok hermanaetik soknix te machʼatik stukel ya yaʼiy sbaik, akʼa kalbeytik te bin ay ta koʼtantik (kʼopona 2 Corintios 6:11-13). Te Melissa te la kalbeytik skʼoplal ta párrafo 15, jich ya yal: «Ya jmulantik te ay familiaetik ya yikʼotik ta snaik o te ya xbootik ta viaje sok». ¿Aybal machʼa ta congregación ya xjuʼ ya kakʼbeytik yil yutsil koʼtantik?

19. ¿Bin-ora ya skʼan te nopol ayotik ta stojol te hermanoetik?

¹⁹ Te kʼalal ay bin ya spasik te ants winiketik ta jujun jaʼbil, ay hermanoetik te ya skʼanik te nopol ayotik ta stojolik. Ay hermanoetik te ma Testigouk te sfamiliaik jich yuʼun wokol ya yilik te kʼalal ya spasik te kʼinetik. Jaʼnix jich ay machʼatik wokol ya yaʼiyik kʼalal te sfamiliaik ya spasbeyik skʼinul te machʼa lajem yuʼunik. Kʼalal ya jkʼasestik tiempo sok te hermanoetik-abi, jich ya kakʼbeytik yil te ya jmel koʼtantik yuʼun te bin yak ta kʼaxel ta stojolik (Filip. 2:20).

20. ¿Bin-utʼil ya skoltayotik te bin la yal te Jesús ta Mateo 12:48-50 kʼalal jtukel ya kaʼiy jbatik?

²⁰ Ayniwan baeltik te stukel ya yaʼiy sba jtul hermano. Pero mame xchʼay ta koʼtantik, te Jehová ya snaʼ te bin yaʼiyel ya kaʼiy jbatik. Ya stuuntes te hermanoetik yuʼun ya yakʼbotik koltayel (kʼopona Mateo 12:48-50). Jich yuʼun te kʼalal ya jkoltaytik te hermanoetik, jich ya kakʼtik ta ilel te ya kaltik wokol yuʼun. Chikan bin yaʼiyel ya kaʼiy jbatik maʼyuk bin-ora te jtukel ayotik, te Jehová sjokinejotik spisil-ora.