1. ¿Bin spasoj ta jtojoltik te Jehová?

TE Jehová jaʼ la yikʼotik tal ta stojol (Juan 6:44). Kʼalal yak ta yilel-a te millón ta tul ants winiketik ta swolol Balumilal, jaʼ la yil ta jtojoltik te bin lek ay ta koʼtantik (1 Crón. 28:9). Te Jehová ya snaʼbotik jbatik ta lek, ya snaʼ te bin yaʼiyel ya kaʼiy jbatik sok kʼuxotik ta yoʼtan. ¿Mabal jichuk te ya yakʼbotik slamalil koʼtantik?

2. ¿Bin ejemplo la yal te Jesús yuʼun ya yakʼ jnaʼtik te kʼuxotik ta yoʼtan te Jehová?

² Kʼuxat ta yoʼtan te Jehová jaʼnix jich ta stojol te yantik kermanotaktik. Yuʼun ya xkʼot ta koʼtantik-a, te Jesús la yal jun ejemplo. Teme jtul jkanantuminchij ay 100 ta kojt tuminchijetik yuʼun, ¿binwan ya spas teme ay ya schʼay jkojtuke? «¿ma bal yacuc yihquitay hilel ta wits te balunlajuneb yoʼwinic (99) ta coht, ya xbaht sle te jcoht chʼayem hilel?». Kʼalal ya stae ma x-ilin, tseʼelnax yoʼtan yuʼun. ¿Bin ya skʼan ya yal-abi? Jaʼ te mukʼ skʼoplal ta yoʼtan Jehová te jujunkojt tuminchijetik, jaʼ yuʼun te Jesús jich la yal: «Te Atatic ay ta chʼulchan ma scʼan te ya xchʼay jtuhluc haʼi alaletic ini» (Mat. 18:12-14).

3. ¿Bin ya kilbeytik skʼoplal ta artículo ini?

³ Ma jkʼantik te ay bin ya jpastik o ya kaltik te ya xchebaj yoʼtan yuʼun te kermanotaktike. Ta artículo ini ya kilbeytik sujtib te jojkʼoyeletik ini: ¿Bin ya xjuʼ ya jpastik yuʼun ma xchebaj yoʼtanik te yantike? Sok ¿bin ya xjuʼ ya jpastik teme ay machʼa ay bin ma lek la spasbotike? Pero nail ya kilbeytik skʼoplal te «alaletic ini» te la yichʼ albeyel skʼoplal ta capítulo 18 yuʼun te Mateo.

4. ¿Machʼatik-a te «alaletic ini»?

⁴ Te «alaletic ini» jaʼik te jnopojeletik yuʼun te Jesús. Chikan  jayeb yaʼbilalik jich kʼoemik bitʼil «alaletic», melel ya yakʼ sbaik ta nojptesel yuʼun (Mat. 18:3). Manchukme yanyantik-a te banti talemik, te stsʼumbalik, te bin ya smulanik sok te stalelike pero spisilik ay schʼuunel yoʼtanik ta stojol te Jesús. Jaʼnix jich te Jesús kʼux ta yoʼtan-euk (Mat. 18:6; Juan 1:12).

5. ¿Bin yaʼiyel ya yaʼiy sba te Jehová te kʼalal ya yichʼ utsʼinel te j-abatetik yuʼune?

⁵ Mukʼ skʼoplal ta yoʼtan Jehová spisil te «alaletic ini». Yuʼun ya xkʼot ta koʼtantik te bin yilel ya yil te alaletik te Jehová, ya skʼan ya jnoptik te bin yilel ya kiltik te joʼotike. Mukʼ skʼoplal ta koʼtantik, jaʼ yuʼun ya jkʼan ya jkanantaytik, melel maʼyuk yipik sok maʼyuk spʼijilik te bitʼil machʼatik ayix yaʼbilalik. Ma jmulantik te ay machʼa ya yichʼ utsʼinel, pero teme ay machʼa ya yutsʼin jtul alal ya x-ilinotik yuʼun. Jichnix ya xkʼot ta pasel ta stojol-euk te Jehovae, ya skʼan ya skanantay te j-abatetik yuʼune, jaʼ yuʼun te kʼalal ay machʼa ya yichʼ utsʼinel, ya x-ilin yuʼun (Is. 63:9; Mar. 9:42).

6. Jich bitʼil ya yal 1 Corintios 1:26-29, te ants winiketik ¿bin yilel ya yilik te jnopojeletik yuʼun te Jesús?

⁶ ¿Binxan yuʼun te jnopojeletik yuʼun te Jesús jich kʼoem bitʼil «alaletic»? ¿Machʼatik mukʼ skʼoplal ya yil te ants winiketik? Jaʼ te jkʼulejetik te machʼatik naʼbil sbaik ta lek sok te machʼatik yichʼoj mukʼ yaʼtelik. Pero te jnopojeletik yuʼun te Jesús ma jichuk stukelik, jaʼ yuʼun te ants winiketik jich ya yilik bitʼil «alaletic» te maʼyuk skʼoplalik (kʼopona 1 Corintios 1:26-29). Yan stukel te Jehová ma jichuk ya yil.

7. ¿Bin-utʼil ya skʼan Jehová te yakuk kil jbatik sok te kermanotaktik?

⁷ Te Jehová kʼux ta yoʼtan spisil te j-abatetik yuʼun chikan te jayebix tiempo te yakik ta abatinel ta stojole. Teme mukʼ skʼoplal ta sit Jehová te kermanotaktik, jaʼnix jich ya skʼan ya kiltik-euk. Ya skʼan te kʼuxuk ta koʼtantik spisil te kermanotaktik (1 Ped. 2:17). Ya skʼan ya jpastik tulan yuʼun ya jkoltaytik sok ya jkanantaytik te kermanotaktik. Teme ay machʼa ay bin la kalbeytik te kʼux la yaʼiy, ma skʼan ya jnoptik te manchuk ya yichʼ ta wenta sok te akʼa chʼayuk ta yoʼtane. ¿Bin yuʼun te ay machʼa oranax kʼux ya yaʼiy te ay bin ya x-albote? Jaʼniwan yuʼun te bitʼil yichʼoj chʼitesele, jaʼ yuʼun jteb stael te kʼalal ay bin ya yichʼ albeyel o yachʼiliktowan ta organización te mato ya snaʼik te bin-utʼil ma xyichʼik ta wenta te bintik ma lek ya spas te yantik. Chikan biluk-a te ya xkʼot ta pasele, pero ya skʼan ya jpastik perdón. Yan te machʼa oranax ya x-iline, ya skʼan ya slekubtes te stalele. Mukʼ skʼoplal te jichuk ya spas yuʼun jun yoʼtan ya yaʼiy sba-a sok yuʼun lek ya yaʼiy sba-euk-a te yantike.

8. ¿Bin jelontesbot spensar te jnopojeletik yuʼun te Jesús?

⁸ ¿Bin yuʼun te Jesús la yalbey skʼoplal te «alaletic ini»? Te jnopojeletik jich la sjojkʼoyik: «¿Machʼa a te cʼax hich mucʼ scʼoblal a te bin utʼil yantic ta banti ay te cuentahinel yuʼun te chʼulchane?» (Mat. 18:1). Ta yorail-abi te judioetik jaʼ mukʼ skʼoplal ya yilik te naʼbiluk sbaik ta lek sok te mukʼ skʼoplal ya x-ilotik. Jtul winik jich la yal: «Te winiketik jaʼ ya skʼanik te yakuk x-ichʼotik ta mukʼ, te naʼbiluk sbaik sok te lekuk ya x-ilotik».

9. ¿Bin-a te ya skʼan ya spasik te jnopojeletik yuʼun te Jesús?

⁹ Te Jesús snaʼoj te jnopojeletik yuʼun ya skʼan ya spasik tulan ta yijkitayel te bin kʼayemik ta spasel. Jaʼ yuʼun te Jesús  jich la yaltiklanbey: «Te machʼa mucʼ ta awohlilic, hichuc me te bin utʼil ihtsʼinal, soc te machʼa jpasaw ta mandar, hichuc me te bin utʼil machʼa ay ta aʼbatinel» (Luc. 22:26). Yuʼun jichukotik «te bin utʼil ihtsʼinal», ya skʼan ya jnoptik te jaʼ mukʼ skʼoplal te yantike (Filip. 2:3). Teme ya jpastik tulan yuʼun pekʼeluk ya kakʼ jbatik, maba ya kutsʼinbeytik yoʼtan te yantike.

10. ¿Bin tojobtesel la yal te Pablo te ya skʼan te ayuk ta koʼtantik?

¹⁰ Spisil te kermanotaktik ay bin lek ya snaʼik spasel. Yame jtatik ta ilel teme jaʼnax ya xbajt ta koʼtantik yilel te slekil talelik. Ya skʼan ayuk ta koʼtantik te tojobtesel la yalbey te jpuk-kʼop Pablo te corintoetik: «Machʼa ya yacʼat te toyol ayat yuʼun te yane? ¿Bin ay awuʼun te ma ba awichʼoj? Teme ha la awichʼe ¿bin yuʼun te yac atoy aba yuʼun te sjel te ma ba awichʼoje?» (1 Cor. 4:7). Jaʼ yuʼun mame jkuytik te joʼotik mukʼ jkʼoplaltik te bitʼil te yantike. Teme jtul hermano ya skʼases ta lek sdiscurso o teme jtul hermana ya yakʼ bayal nojptesel ta Biblia, jaʼ ya skʼan ya yalbeyik yutsil skʼoplal te Jehová.

11. ¿Bin ya yakʼ jnoptik te albil kʼop la yal te Jesús ta swenta te ajwalil sok te j-abat?

¹¹ Te kʼalal te Jesús la yaltiklanbeyix-a te jnopojeletik yuʼun te manchuk ya yakʼ xchebaj yoʼtanik te yantik, la schol jun lokʼombakʼop ta swenta jtul ajwalil sok te j-abatetik yuʼun. Te ajwalil la spasbey perdón te j-abat te ma xjuʼ stojel yuʼun te sbete. Ta patil te j-abat ini la suj ta stojel sbet te yan j-abat. Jich yuʼun te ajwalil la yakʼ ta chukel te j-abat te ma la snaʼbey yoʼbolil sba te yane. ¿Bin ya yakʼ jnoptik? Te Jesús jich la yal: «Ha nix hich ya spasbeyex te Jtat ay ta chʼulchan teme ma spisiluc awoʼtan yac apasbe abahic perdón ta tuhlutuhl soc awermanotac» (Mat. 18:21-35).

12. Teme ma jpastik perdón, ¿bin yaʼiyel ya yaʼiy sba te yantik?

¹² Te bin la spas te j-abate ma jaʼuknax la yutsʼin sba, jaʼnix jich la yutsʼin te yantike. Ma lek te bin la spas ta stojol te sjoy ta abatil te la yakʼ «ta otsesel ta cárcel ha to cʼalal la stoj te sbete». Jaʼnix jich te bin la spase, la yutsʼinbey yoʼtan te yantik j-abatetik. Jaʼ yuʼun te Jesús jich la yal: «Cʼalal la yilic bin cʼoht ta pasel te yantic smohlol ta aʼbatil, bayel la smel yoʼtanic yuʼun». Jaʼnix jich te bin ya jpastike ya xjuʼ ya x-utsʼinbot yoʼtan te yantike. Teme ay machʼa ay bin ma lek ya spasbotik sok te ma jpastik perdón, ¿binwan ya xkʼot ta pasel? Ya kutsʼinbeytik yoʼtan teme ma jpasbeytik perdón, teme ma kakʼbeytik skʼuxul koʼtantik sok teme ma xkichʼtik ta wenta. Jaʼnix jich ma lek ya yaʼiy sbaik te hermanoetik yuʼun te congregación teme ya yilik te ay machʼa ma lek ya kil jbatik sok.

13. ¿Bin ya yakʼbat anop te bin kʼax ta stojol jtul precursora?

¹³ Teme ya jpasbeytik perdón te kermanotaktik lek ya kaʼiy jbatik, jaʼnix jich te yantik lek ya yaʼiy sbaik-euk. Jich kʼax ta stojol jtul precursora te Crystal sbiil, te yato xjul ta yoʼtan te bin ma lek ya xpasbot yuʼun jtul hermana ta congregación: «Kʼax kʼux ya kaʼiy te bin ya yalbone ya x-ejchenteswan jich bitʼil jun cuchillo. Te kʼalal ya xlokʼotik ta scholel skʼop Dios, ma jkʼan te jun-nax carro ya xboon sok. Chʼay sbujtsʼ koʼtan sok stseʼelil koʼtan». Te Crystal jich ya yaʼiy te ay razón yuʼun te bitʼil ma lek ya yaʼiy sbae. Pero ma la skʼej slab yoʼtan, ma la smelix yoʼtan, la yakʼ ta ilel spekʼelil yoʼtan sok la spas ta skuxlejal te bin ya yal te artículo «Perdonemos de corazón»  yuʼun te La Atalaya 15 yuʼun octubre 1999. Jaʼ yuʼun la spasbey perdón te hermana, jich ya yalxan: «Ta ora ini kʼotix ta koʼtan te jpisiltik ya jpastik tulan yuʼun ya jel te jtaleltik sok te ya spasbotik perdón ta jujun kʼajkʼal te Jehová sok yutsil yoʼtan, jich ya kaʼiy te ayix slamalil koʼtan sok tseʼelix koʼtan».

14. 1) Jich bitʼil ya yal te Mateo 18:21, 22, ¿bin wokol la yaʼiy spasel te jpuk-kʼop Pedro, sok bin ya yakʼbat anop te bin la sjakʼ te Jesús? 2) ¿Bin ya skoltayotik teme ay jich kʼot ta jtojoltike?

¹⁴ Ya skʼan ya jpastik perdón melel jnaʼojtik te jich ya skʼan ya jpastik manchukme wokol ya kaʼiytik. Jich kʼot ta pasel ta stojol te jpuk-kʼop Pedro (kʼopona Mateo 18:21, 22). ¿Bin ya xjuʼ ya skoltayotik? Sbabial, jaʼ te ya jnopilan ta koʼtantik te jayebto buelta spasbeyojotik perdón te Jehová (Mat. 18:32, 33). Ma snujpʼuk te ya spasbotik perdón te Jehová, pero jich ya spas sok yutsil yoʼtan (Sal. 103:8-10). Jaʼnix jich ya skʼan te «talel cʼaxel cʼux ya caʼiy jbahtique», jaʼ yuʼun ya skʼan te ya jpasbeytik perdón te kermanotaktik (1 Juan 4:11). Te bin schebal ya xjuʼ ya skoltayotik, jaʼ te ya jnopilan ta koʼtantik te bin ya xkʼot ta pasel teme ya jpastik perdón. Ya jkoltaytik te machʼa ay bin ma lek la spasbotik, jun-nax ay te congregación, ya kamigointikxan te Jehová sok lek ya kaʼiy jbatik (2 Cor. 2:7; Col. 3:14). Te bin yoxebal ya skʼan ya jpastik, jaʼ te ya jkʼopontik te Jehová te jaʼ ya skʼanbotik te yakuk jpasbeytik perdón te yantik. Ma xkakʼtik te Satanás ya slajin te lamalkʼinal ay kuʼuntik sok te kermanotaktik (Efes. 4:26, 27). Ya xtuun kuʼuntik te koltayel yuʼun te Jehová yuʼun ma xyalotik ta spejtsʼ te Satanás.

15. Jich bitʼil ya yal te Colosenses 3:13, ¿bin ya xjuʼ ya jpastik teme jtul hermano o hermana ay bin ma lek ya spasbotik?

¹⁵ Pero ¿bin ya jpastik teme ay jtul hermano ay bin ya spasbotik te ya x-ilinotik  yuʼun? Ya skʼan ya jpastik tulan, yuʼun ayuk slamalil koʼtantik. Jkʼopontik te Jehová sok kalbeytik te bin yaʼiyel ya kaʼiy jbatik. Akʼa jkʼanbeytik te yakuk yakʼbey bendición te machʼa ay bin maba lek la spasbotik sok te yakuk skoltayotik ta yilbeyel te slekil talel (Luc. 6:28). Teme ma schʼay ta koʼtantik te bin la kichʼtik pasbeyel, kiltik te bin-ora ya xjuʼ ya xkʼopojotik sok. Ya skʼan ya jnoptik te ma spasemaluk yoʼtan te bin la spasbotike (Mat. 5:23, 24; 1 Cor. 13:7). Te kʼalal ya xkʼopojotik sok, akʼa jkʼanbeytik perdón. Pero ¿teme ma skʼan ya spas perdone? Te Biblia jich ya yal: «Talel cʼaxel cuhchuc awuʼunic». Mame kaltik te maʼyuk bin-ora ya xjelon stalel te hermano (kʼopona Colosenses 3:13). Te bin mukʼxan skʼoplale, jaʼ te ma skʼan ya jkʼej kilinbatik ta stojol, melel ya xjuʼ ya yutsʼin te bitʼil lek kiloj jbatik sok te Jehová. Ma skʼan te ay bin ya yakʼ te ya schebajtesbotik koʼtantik. Jichme ya kakʼtik ta ilel te jaʼ kʼux ta koʼtantik te Jehová (Sal. 119:165).

16. ¿Bin ay ta jwentatik spasel?

¹⁶ Ya kaltik wokol yuʼun te bitʼil «jtsohb nax» ya x-abatinotik ta stojol te Jehová sok te «jtuhl nax jcanan» kuʼuntik (Juan 10:16). Te libro Organizados para hacer la voluntad de Jehová, página 165, jich ya yal: «Te bin ya skʼan ya jpastik jaʼ te junuknax ayotik sok lek ya kiltik te kermanotaktik teme jich ya kiltik te bin-utʼil ya yil te Jehová». Jich ya yilotik bitʼil «alaletic» yuʼun sok ay jkʼoplaltik ta yoʼtan. Jich ya skʼan ya kiltik-euk te kermanotaktik. Te Jehová mukʼ skʼoplal ya yil teme ya jkoltaytik sok ya jkanantaytik te kermanotaktik (Mat. 10:42).

17. ¿Bin ya skʼan ya jpastik?

¹⁷ Kʼux ta koʼtantik te kermanotaktik, jaʼ yuʼun «ma ba ya caʼbetic scʼohchinojibal o te bin ya xyahlic yuʼun» (Rom. 14:13). Ya skʼan ya jnoptik te jaʼ mukʼxan skʼoplal te kermanotaktik te bitʼil te joʼotik sok te yakuk jpasbeytik perdón. Ma skʼan ya schebaj koʼtantik yuʼun te bin ya spasik te yantik, «ha yuʼun ya me jtʼuntic bin utʼil ya xlahmaj qʼuinal yuʼun soc te talel cʼaxel ya quichʼtic quiptic a» (Rom. 14:19).