Te Pablo jich la stsʼibay: «Ta scuenta te Ley chamenonix ta stojol te Ley, scuenta yuʼun ya xcuxajon ta stojol te Diose» (Gál. 2:19).

Te bin la stsʼibay te Pablo jaʼ te bin yak ta scholbeyel te congregacionetik ta Galacia, melel ay chaʼoxtulik te la yakʼ sbaik ta loʼlayel yuʼun te lotil jnojpteswanejetik, te ya yakʼik ta nopel te yuʼun ya sta skolelik ya skʼan ya schʼuunik spisil te mantaliletik te ay ta Ley yuʼun Moisés, tey ochem skʼoplal-a te circuncisión. Pero te Pablo snaʼoj te ma sujawanix te Dios yuʼun ya yichʼik te circuncisión sok slekil yoʼtan la yakʼ ta ilel te lotil te bin yakik ta yalele sok la yakʼbey smukʼul yoʼtan te hermanoetik (Gál. 2:4; 5:2).

Te Biblia ya yal ta jamal te machʼa ya xlaj, jkʼaxel maʼyukix bin ya snaʼ (Ecl. 9:5). Kʼalal te Pablo la yal «chamenonix ta stojol te Ley», la skʼan la yal te ma spasix te bin ya yal te Ley yuʼun Moisés. Pero snaʼoj te bitʼil schʼuunej yoʼtan te la yakʼ sba ta lajel te Jesús, ya sta te skuxlejal ta stojol te Dios.

Te bin kʼax ta stojol te Pablo jaʼ «ta scuenta te Ley». ¿Binwan-utʼil? La yal te «ma ba toj ya xʼilot yuʼun Dios te winic ta scuenta spasel bin ya yal te Ley, [jaʼnax] ta scuenta schʼuhunel te Jesucristo» (Gál. 2:16). Manchukme ma xyichʼix pasel te Ley, pero mukʼ skʼoplal. Te Pablo jich la yalbey te machʼatik ay ta Galacia: «Jaʼ la yichʼ aqʼuel ta patil yuʼun te tey me ya xchicnaj ta jamal a te smulic te machʼatic ya scʼaxintayic te mandalile. Jaʼ to te cʼalal tal te stsʼumbal Abrahame, jaʼ te machʼa la yalbey scʼoplal te Diose» (Gál. 3:19, TZOXCH). Te Ley la yal ta jamal te jmulawil ants winiketik ma xjuʼ te tsʼakal ya spasik te bin ya yal te Ley, jaʼ yuʼun ya skʼan te tojil winik te machʼa ya yakʼ sba ta lajel. Jaʼ yuʼun te Ley la yakʼbey yil te pueblo te jaʼ tsʼumbalil te Jesús. Jaʼ yuʼun te machʼa ya yakʼ schʼuunel yoʼtan ta stojol te Jesucristo, ya xjuʼ te toj ya xkʼot ta sit te Dios (Gál. 3:24). Tojil winik kʼot te Pablo ta swenta te Ley la yakʼ schʼuunel yoʼtan ta stojol te Jesús. Jich chamenix kʼot «ta stojol te Ley» pero kuxul kʼot «ta stojol te Diose». Te Ley maʼyukix yuʼel ta stojol, pero te Diose ay stukel.

Te Pablo jaʼnix jich la yalbey te Romanoetik: «Quermanotac, chamenex ta stojol te Ley ta scuenta te sbaqʼuetal te Cristo [...]. Pero yoʼtic libre ayotiquix yuʼun te Ley, te bin utʼil chamenotiquix ta stojol te bin la smosohinotic» (Rom. 7:4, 6). Ta versiculoetik ini sok ta Gálatas 2:19, te Pablo ma jaʼuk la skʼan la yal te ya xlajik jich bitʼil jmulawil yuʼun te Ley. Te bin la skʼan la yale, jaʼ te libre ya xjilikix ta swenta te Ley, jaʼnax ta swenta te schʼuunel yoʼtanik te bitʼil la yakʼ sba ta lajel te Jesucristo.