1. 1) ¿Bin tʼujbil majtanil yakotik ta smaliyel? 2) ¿Bin ya skʼan ya yal te ya kakʼ smukʼul koʼtantik ta stojol te Jehová? (Ilawil te nota).

 JPISILTIK te machʼatik kʼux ta koʼtantik te Jehová ay bin tʼujbil ya jmaliytik jaʼ te ya yichʼ lajinel te chamel, te mel-oʼtan sok te lajele (Apoc. 21:3, 4). Ya skoltay te machʼatik pekʼel yoʼtanik ta spasel ta Nichimal Kʼinal te Balumilale (Sal. 37:9-11). Jaʼnix jich ya skoltayotik yuʼun lek ya kil jbatik sok, kʼaxtoxan-a te bitʼil ta ora ini. ¡Kʼax tʼujbil te bin ya jmaliytike! ¿Bin yuʼun seguro ayotik te ya xkʼot ta pasel te bin yaloj te Diose? Melel ya jnaʼtik te ya xkʼot ta pasel te bin ya yale. Jich yuʼun ay swentail te bin yuʼun ya kakʼ smukʼul koʼtantik ta stojol te Jehová (Sal. 27:14). * ¿Bin-utʼil ya xchiknaj te ya kakʼ smukʼul koʼtantik ta stojole? Jaʼ te ya jmaliytik sok stseʼelil koʼtantik te ya xkʼot ta pasel te bin jamal yaloje (Is. 55:10, 11).

2. ¿Bin spasojix te Jehová?

² Te Jehová yakʼoj ta ilel te ya skʼotes ta pasel te bin ya yale. Kiltik jun ejemplo. Te Jehová jamal la yal ta libro yuʼun Apocalipsis te ay jun grupo ta jkʼajkʼaleltik te talemik ta spisil ta chajp nacionetik, tsʼumbaliletik sok kʼopiletik swenta jun-nax ya yichʼik ta mukʼ te Diose. Ta jkʼajkʼaleltik, te grupo-abi jaʼik te bayal ta tul ants winiketik (Apoc. 7:9, 10). Tey-a ay winiketik, antsetik sok alaletik te yanyantik stsʼumbalik, skʼopik sok slumalik, jun-nax ya yichʼik ta mukʼ te Dios sok slamalil yoʼtanik (Sal. 133:1; Juan 10:16). Ya scholik skʼop Dios sok sbujtsʼ yoʼtanik, sok spisil-ora chapalik yuʼun ya yalbeyik te machʼatik jich ya smulanik te bin tʼujbil yakik  ta smaliyele (Mat. 28:19, 20; Apoc. 14:6, 7; 22:17). Teme tey ochem akʼoplal-a ta grupo-abi, mukʼ skʼoplal ta awoʼtan te bin tʼujbil ya jmaliytike.

3. ¿Bin ya skʼan te Satanás?

³ Te Satanás ya skʼan te ma schʼuun koʼtantik te bin ya jmaliytike. Te bin ya skʼane, jaʼ te ya jnoptik te maʼyuk jkʼoplaltik ta yoʼtan te Jehová sok te ma skʼotes ta pasel te bin jamal yaloje. Teme ya schebajtes koʼtantik te Satanás, ya xjuʼ ya xiwotik sok ma x-abatinotikix ta stojol te Jehová. Jich bitʼil ya xbajt kiltik, te Diablo kʼan schebajtesbey yoʼtan te Job ta swenta te smukʼul yoʼtan yuʼun jich maba ya yichʼix ta mukʼ-a te Jehová.

4. ¿Bin ya kilbeytik skʼoplal ta artículo ini? (Job 1:9-12).

⁴ Ta artículo ini ya jnopbeytik skʼoplal bintik la stuuntes te Satanás yuʼun kʼan schebajtesbey yoʼtan te Job (kʼopona Job 1:9-12). Jaʼnix jich ya kiltik bin ya yakʼ jnoptik te ejemplo yuʼun Job sok bin yuʼun mukʼ skʼoplal te ayuk ta koʼtantik te kʼuxotik ta yoʼtan te Jehová sok te ya skʼotes ta pasel te bin jamal yaloje.

5, 6. ¿Bin-utʼil oranax jelon skuxlejal te Job?

⁵ Te Job kʼax lek-a te skuxlejale: lek yamigoinej sba sok te Jehová, bayalik ta tul ta sfamilia sok jun-nax ayik, jaʼnix jich jaʼ jkʼulej winik (Job 1:1-5). Pero ta jun nax kʼajkʼal laj yuʼun spisil-abi. Ta sbabial, laj te skʼulejale (Job 1:13-17). Ta patil, laj spisil te snichʼnabe, te bayal kʼux ta yoʼtane. Jnop kaʼiytik te joʼukotike. Te meʼil tatiletik kʼax kʼux ya yaʼiyik te kʼalal ya xlaj te yal snichʼnabike, jaʼ yuʼun jnop kaʼiytik te swokolik kʼax ta stojol te Job sok te yinam, te skʼuxul la yaʼiyik sok te bayal la smel yoʼtanik kʼalal la snaʼik stojol te laj te lajuntul yal snichʼnabike. ¡Jaʼ yuʼun, te Job la schʼiʼ te snajtil kʼuʼ ta skaj te swokole sok la skejan sba ta lum! (Job 1:18-20).

⁶ Ta patil te Satanás la yakʼbey kʼaʼel chamel te Job sok la yakʼ te maʼyuk skʼoplal ilote (Job 2:6-8; 7:5). Ta nail tal-ae ya x-ichʼot ta mukʼ yuʼun te ants winiketik sok ya xleot te kʼalal ya skʼanik tojobtesele (Job 31:18). Pero ta patil ma skʼan ya slakʼikix sok kʼax bayal la yutsʼinik. Pʼajot yuʼun te sfamilia, te yamigotak sok te j-abatetik yuʼun (Job 19:13, 14, 16).

7. 1) ¿Bin swentail la skuy te Job te yak ta kʼaxel swokole, sok bin ma la spas? 2) ¿Bintik wokolil ya xjuʼ ya xkʼax ta stojol jtul j-abat yuʼun Dios jich bitʼil kʼax ta stojol te Job? (Ilawil te dibujo yuʼun te párrafo 7).

⁷ Te Satanás ya skʼan ya yakʼbey snaʼ te Job te ay ta kʼaxel swokol ta skaj te ma lek ilbilix yuʼun te Jehová. Jaʼ yuʼun la stuuntes te tulan ikʼ yuʼun ya xyal te na te banti yakik ta weʼel uchʼel te lajuntul snichʼnab te Job (Job 1:18, 19). Jaʼnix jich la yakʼ talel kʼajkʼ ta chʼulchan sok maba jaʼuknax laj te chambalametik yuʼun te Job, jaʼnix jich laj te j-abatetik yuʼune (Job 1:16). Chikan ta ilel te ma jichuknax chiknaj talel te ikʼ sok te kʼajkʼe. Jaʼ yuʼun te Job la skuy te jaʼ la yakʼ te Jehová sok la skuy te ay bin la spas te ma lek la yil te Jehová. Manchukme jich kʼot ta stojol te Job, maʼyuk bin-ora la schopolkʼoptay te sTat ta chʼulchan. Kʼoem ta yoʼtan te bayal bin lek akʼbil yuʼun te Jehová te jayebix tal jaʼbile, jaʼ yuʼun teme tseʼel yoʼtan ta swenta te bin lek akʼbile, jaʼnix jich ya skʼan junuk yoʼtan ta sitintayel te bin ma leke. Jaʼ yuʼun jich la yal: «¡Bayeluc me yutsil sbihil te Jehová!» (Job 1:20, 21; 2:10). Manchukme laj te skʼulejal, laj snichʼnab sok tsakot ta chamel, jun yoʼtan la yakʼ sba ta stojol te Jehová. Pero te Satanás maba la skom sba.

8. ¿Binxan la stuuntes te Satanás yuʼun ya yakʼbey swokol te Job?

 ⁸ Te Satanás ay binxan la stuuntes yuʼun ya yakʼbey swokol te Job. Te oxtul lotil yamigotak la yalbeyik te Job te maʼyuk skʼoplale. Te winiketik ini la yakʼik ta naʼel te yak ta kʼaxel swokol ta skaj te bayal bin ma lek la spase (Job 22:5-9). Jaʼnix jich kʼan yakʼbeyik schʼuun te manix ayuk bin-ora lek ya x-ilot yuʼun-a te Diose, manchukme bayal bintik lek la spas (Job 4:18; 22:2, 3; 25:4). Te bin ya skʼanike, jaʼ te manchuk ya schʼuun te Job te kʼux aʼiybil yuʼun te Dios, te ma xkanantayot sok te maʼyuk skʼoplal te ya x-abatin ta stojol te Jehovae. Ta swenta te bin albote laniwan snop te maʼyuk bin-ora ya xkʼax te swokole.

9. ¿Bin koltayot te Job swenta ma laj yip yoʼtan sok ma xiw?

⁹ Jnop kaʼiytik ini. Te Job nakal ta tan sok kʼajkʼal ajkʼabal yakʼ ta kʼaxel swokol (Job 2:8). Bayal bin ma lek albot yuʼun te yamigotak sok la spasik tulan te ma lek skʼoplal ya x-ilote. Te bitʼil bayal yak ta kʼaxel swokol te Job, jkʼaxel maʼyuk skʼoplal ya yaʼiy sba soknix te kʼax kʼux ya yaʼiy te laj te snichʼnabe. Ta sjajchibal maʼyuk bin ya yal (Job 2:13-3:1). Te bitʼil maʼyuk bin la yale, te yamigotak la skuyik te ya yijkitay te Jpaswanej yuʼune, pero jkʼaxel ma jichuk. Ta patil, te Job laniwan yil te yamigotak sok jich la yaltiklanbey: «¡Ha to cʼalal ya xchamon ya cal te jun te coʼtane!» (Job 27:5). ¿Bin koltayot swenta ma laj yip yoʼtan sok ma xiw manchukme bayal swokol? Jaʼ te la smukʼulin yoʼtan te ya xkoltayot yuʼun te Dios te kʼalal ya xkʼax swokole. Snaʼoj teme ya xlaje, ya xchaʼkuxajtesot yuʼun te Jehová (Job 14:13-15).

10. ¿Bin ya yakʼ jnoptik te bin kʼax ta stojol te Job?

¹⁰ Te bin kʼax ta stojol te Job ya yakʼ jnoptik te ma xjuʼ ya sujotik te Satanás yuʼun ya kijkitaytik te Jehová sok ya snaʼ Jehová  spisil te bin ya xkʼax ta jtojoltik. Te bin kʼax ta skuxlejal te Job sok te ejemplo yuʼune ay yantikxan te bin ya yakʼ jnoptik. Kiltik cheʼoxebuk.

11. ¿Bin-a te seguro ayotik teme spisil-ora ya smukʼulin koʼtantik te Jehová? (Santiago 4:7).

¹¹ Te Job la yakʼ ta ilel teme spisil-ora ya smukʼulin koʼtantik te Jehová, ya xkujch kuʼuntik biluk prueba sok ya xjuʼ kuʼuntik stsalel te Satanás. ¿Bin ya xlokʼ kuʼuntik-a? Te Biblia jamal ya yalbotik te ya x-an ta jtojoltik te Diablo (kʼopona Santiago 4:7).

12. ¿Bin-utʼil la stsak yip te smukʼul yoʼtan te Job ta swenta te chaʼkuxajele?

¹² Ya skʼan te tulanuk te smukʼul koʼtantik ta swenta te chaʼkuxajel. Jich te bin-utʼil la kiltikix ta yan articuloe, te Satanás ya stuuntes te xiwel ta swenta te lajel yuʼun ma junukix koʼtantik ta stojol te Dios. Jnop kaʼiytik ta swenta te Job. Te Satanás la yal te kʼalal ya xkʼax swokol te ya xjuʼ ya xlaj yuʼun te Job, ya yijkitay te Jehová. ¡Pero jkʼaxel ma jichuk! Manchukme kʼax tulan swokol sok la skuy te ya xlajixe, te Job maʼyuk bin-ora la yijkitay te Diose. ¿Pero bin-utʼil kujch yuʼun spisil-abi? Melel snaʼoj te lek yoʼtan te Jehová sok smukʼulinej yoʼtan, te ya snaʼ bin-ora, ya schajpan spisil. Snaʼoj ta lek te ya xchaʼkuxajtesot yuʼun Dios ta pajel chaʼbej manchukme ma xkoltayot te kʼalal kuxulto-ae. Te Job schʼuunoj ta lek te ay chaʼkuxajel. Jaʼnix jich teme tulan te schʼuunel koʼtantik ta swenta te chaʼkuxajel, spisil-ora jun koʼtantik ta stojol te Dios manchukme ya kichʼtik albeyel te ya kichʼtik milele.

13. ¿Bin yuʼun ya skʼan ya kiltik ta lek te bintik la stuuntes te Satanás yuʼun la yakʼbey swokol te Job?

¹³ Ya skʼan ya kiltik ta lek te bintik la stuuntes te Satanás yuʼun la yakʼbey swokol te Job, melel jaʼnix jich ya stuuntes ta ora ini. Chikan ta ilel te ma jaʼuknax yak ta yalbeyel ta stojol te Job, jaʼnix jich ta stojol spisil te ants winiketik. Jich la yal: «Spisil bintic ay yuʼun te winic ya yacʼ yuʼun te scuxlejale» (Job 2:4, 5). Te Satanás jich la yal kʼoem te ma smeleliluk te kʼux ta koʼtantik te Jehová sok teme ay bin ya xjuʼ ya xlajotik yuʼune, yalaj kijkitaytik te Diose. Jaʼnix jich jamal ya yal te ma kʼuxotik ta yoʼtan te Jehová sok ma mukʼ skʼoplal ya yil te bin ya jpastik yuʼun ya kakʼbeytik stseʼelil yoʼtan. Te machʼatik jaʼ ya smukʼulin koʼtantik te Jehová ma sloʼlayotik te Satanás, melel ya jnaʼtikix te bintik ya stuuntese.

14. ¿Bin ya xjuʼ ya jtatik ta ilel te kʼalal ya xtal prueba ta jtojoltik sok bin ejemplo ya skoltayotik yuʼun ya xkʼot ta koʼtantik?

¹⁴ Te pruebaetik ya xtal ta jtojoltike jaʼme ya skoltayotik te banti ya skʼan ya jlekubtestik te jtaleltike. Te wokolil kʼax ta stojol te Job koltayot swenta ya yil te banti ya skʼan ya slekubtes te stalele. Jich bitʼil la sta ta ilel te ya skʼan te pekʼelxan yoʼtane (Job 42:3). Jaʼnix jich te joʼotik ya xjuʼ te ay bin ya jtatik ta ilel ta jtaleltik te ya skʼan ya jlekubtestik te kʼalal ya xtal wokol ta jtojoltik. Jaʼ jich kʼax ta stojol te Nikolái, * te la yichʼ otsesel ta cárcel manchukme ay ta tulan chamel. Jich ya yal: «Te kʼalal la kichʼ otsesel ta cárcel jich kʼoem te la kichʼ lokʼesbeyel ultrasonido: tey ya xchiknaj-a te talelil yuʼun te jtul j-abat yuʼun Dios». Te kʼalal ya jtatik ta ilel te banti ya skʼan ya jlekubtes te jtaleltike, ya skʼan ay bin ya jpastik.

15. ¿Machʼa ya skʼan ya jchʼam kaʼiytik sok bin yuʼun?

¹⁵ Ya skʼan ya jchʼam kaʼiytik te bin ya yal te Jehová ma jaʼuk te jkontrataktike. Te Job la schʼam yaʼiy ta lek te kʼalal kʼopoj sok te Jehová. Swenta ya xkʼot ta yoʼtan, te Jehová jichniwan la yalbey ini: «¿Mabal awiloj te kuʼel ta swenta te bintik  jpastiklanoje? Jnaʼoj spisil te bin kʼaxem ta atojole. ¿Yuʼunbal ma xa anaʼ te ya xjuʼ ya jkanantayate?». Te Job la yal wokol ta swenta te lek yoʼtan te Jehová, sok jich la yal sok spekʼelil yoʼtan: «La jcaʼiybat acʼoblal ta jchiquin, pero yoʼtic ya quilatix ta jsit» (Job 42:5). Te kʼalal jich la yale, nakaltoniwan ta tan, yatinoj te kʼaʼel chamel sok yak ta okʼel yuʼun te snichʼnabe. Ta yorail te swokole, te Jehová la yakʼbey snaʼ te kʼux ta yoʼtan sok te lek ya x-ilot yuʼune (Job 42:7, 8).

16. Jich te bin-utʼil ya yal Isaías 49:15, 16, ¿bin ma skʼan ya xchʼay ta koʼtantik te kʼalal ya xtal jwokoltike?

¹⁶ Ta ora ini, ayniwan ants winiketik te ma lek te bin ya yalbotik o jich ya yilotik te maʼyuk jkʼoplaltike. Ayniwan bin ma lek ya yalik ta jtojoltik o ta stojol te organización soknix «ya yalic spisil ta chahp cʼopetic ta lot» ta jtojoltik (Mat. 5:11). Te bin kʼax ta stojol te Job ya yakʼ jnoptik te ya snaʼ Jehová te ya xjuʼ kuʼuntik te jun koʼtan ya kakʼ jbatik ta stojol te kʼalal ya xtal wokolil ta jtojoltik. Te Jehová kʼuxotik ta yoʼtan sok ma xchʼay ta yoʼtan te machʼa jaʼ ya yakʼ smukʼul yoʼtan ta stojole (kʼopona Isaías 49:15, 16). Ma jaʼuk ya skʼan ya xbajt ta koʼtantik te bintik ma lek ya yalik te skontratak te Diose. Kiltik te bin la yal jtul hermano te James sbiil, te jaʼ slumal te Turquía te ay kʼaxem tulan swokolik ta sfamilia. Jich ya yal: «Kʼot ta koʼtantik teme jaʼ ya xbajt ta koʼtantik te lotiletik ya yalik ta stojol te lum yuʼun Dios, ya xchebaj koʼtantik. Jich yuʼun jaʼ bajt ta koʼtantik te bin ya xbajt spas te Wentainel sok jaʼ la kakʼ ta koʼtantik spasel te skʼanojel yoʼtan te Jehová, sok jich  ma chʼay te stseʼelil koʼtantike». Jtʼuntik te ejemplo yuʼun te Job sok jchʼam kaʼiytik te bin ya yal te Jehová. ¡Manchuk ya kakʼ schʼaytesbotik te smukʼul koʼtantik te lotiletik ya yalik te jkontrataktike!

17. ¿Bin ya yakʼ jnoptik te winiketik sok antsetik te jun yoʼtan la yakʼ sbaik te ya yal te capítulo 11 yuʼun Hebreos?

¹⁷ Te Job ma jaʼuknax te machʼa ma xiw yoʼtan sok jun yoʼtan la yakʼ sba te kʼalal kʼax ta tulan wokolil. Te carta te la stsʼibay te jpuk-kʼop Pablo ta stojol te hebreoetik, la yalbey skʼoplal bayal j-abatetik yuʼun Dios sok la yal te jaʼik «tsobol [o bayal] ta tuhl testigohetic» (Heb. 12:1). Manchukme kʼax tulan swokolik, chikan ta ilel te jun yoʼtan la yakʼ sbaik ta stojol te Jehová (Heb. 11:36-40). ¿Aybal bin lek lokʼ yuʼunik-a te la spasik tulan sok te kujch yuʼunike? Ay. Melelnix-a te ma la yilik te kʼot ta pasel spisil te bin jamal yaloj ya spas te Diose, pero maʼyuk bin-ora chʼay te smukʼul yoʼtanik ta stojol. Soknix te bitʼil yakʼoj ta yoʼtanik te lek ya x-ilotik yuʼun te Jehová ma xchebetuk yoʼtanik te ya xbajt yilik te bin yaloj ya spas te Diose (Heb. 11:4, 5). Snopilanel ta swenta te ejemploetik-abi, ya yakʼbotik kiptik yuʼun maʼyuk bin-ora ya jchʼaytik te smukʼul koʼtantik ta stojol te Jehová.

18. ¿Bin ya skʼan ya jpastik chikan bin ya xtal ta jtojoltik? (Hebreos 11:6).

¹⁸ Ta balumilal yak ta batsʼejelxan te bin ma leke (2 Tim. 3:13). Soknix te Satanás yak ta yakʼbeyel swokol te j-abatetik yuʼun Dios. Chikan bin-a te ya xtal ta pajel chaʼbej, junuk koʼtantik ta abatinel ta stojol te Jehová sok ayuk ta koʼtantik te «ha smucʼulinej coʼtantic te cuxul Dios» (1 Tim. 4:10). Juluk ta koʼtantik te bin kʼax ta stojol te Job ya yakʼ ta ilel te Jehová «bayel ya xcʼuxultaywan soc ya snaʼbotic yoʼbolil jbahtic» (Sant. 5:11). Jich te bitʼil la spas te Job, spisil-ora junuk koʼtantik ta stojol te Jehová sok ayuk ta koʼtantik te jaʼ ya smajtantes «te machʼatic ya xlehot yuʼune» (kʼopona Hebreos 11:6).