JTUL hermana te Lisa * sbiil, kʼalal jajch snop te smelelil kʼop jich la yal: «Te bin la yikʼbon koʼtan jaʼ te yutsil yoʼtan te hermanoetik». Jaʼnix jich kʼot ta stojol-euk te Anne. Jich ya yal: «Kʼalal la jnaʼbey sba te Testigoetik, jaʼ la yikʼbonxan koʼtan te slekil yoʼtanik ma jaʼuk te bin ya yakʼik ta nopele». Ta ora ini te hermanaetik-abi ya smulanik skʼoponel te Biblia sok ya snopilan ta yoʼtanik, pero te yutsil yoʼtan te hermanoetik jaʼ koltayotik yuʼun.

¿Bin-utʼil ya xjuʼ ya kakʼbeytik yil slekil koʼtantik te ants winiketik sok te ya xkoltayotik yuʼune? Kiltik chaʼchajp ta swenta te bin ya kaltik sok te bin ya jpastik. Ta patil ya kilbeytik skʼoplal machʼatik ya skʼan ya kakʼbeytik yil yutsil koʼtantik.

Ta capítulo 31 yuʼun te Proverbios ya yalbey skʼoplal te lekil inamil sok ya yal te «soc yutsil yoʼtan ya xnohpteswan» (Prov. 31:26). Te inamil-abi ya yakʼ ta ilel yutsil yoʼtan ta swenta te bin ya yal sok te bin-utʼil ya yal. Te meʼil tatiletik ya skʼan te ya xkʼopoj sok yutsil yoʼtanik. Te meʼil tatiletik ya snaʼik te ya yutsʼinbey yoʼtan te yal snichʼnabik teme ya yutike. Te alnichʼanetik maba lek ya yaʼiy sbaik teme sok yilinba ya xkʼoponotik yuʼun te smeʼ statik. Pero teme ya skʼoponik sok skʼuxul yoʼtanik te yal snichʼnabike, jich ya schʼam yaʼiyik te bin ya yichʼik albeyel sok ya schʼuunikxan mantal.

Chikan teme meʼil tatilotik o maʼuk, ¿bin ya xjuʼ ya jpastik yuʼun ya xkʼopojotik sok yutsil koʼtantik? Te bin ya yal ta sjajchibal te Proverbios 31:26 ya xjuʼ ya skoltayotik. Jich ya yal: «Ay spʼijil yoʼtan ya xcʼopoj». Jaʼ ini ya skʼan ya yal te ya jtsatik ta lek te kʼopetik ya jtuuntestik sok te bin-utʼil ya kaltik. Jaʼ yuʼun jich ya skʼan ya jojkʼoybey jbatik: «Te bin ya x-och kal, ¿yabal yakʼ jajchuk ilinba o ya slamantes te kʼop jajcheme?» (Prov. 15:1). Teme nail ya jnoptik te bin ya kaltik, ya kakʼtik ta ilel jpʼijiltik.

Yan texto jich ya yal: «Ay machʼa te hich ya xʼehchenteswan te bin utʼil espada te scʼopique» (Prov. 12:18). Ya jtsajtaytik te bin ya kaltik teme nail ya jnoptik bin-utʼil ya xjuʼ ya xkoltayot o ya x-utsʼinot te ants winik te bin ya kalbeytik sok te bin-utʼil ya kalbeytike. Teme sok yutsil koʼtantik ya xkʼopojotik maba ya jtuuntestik kʼopiletik te ya x-ejchenteswan sok te ilinemotik-a te ya xkʼopojotike (Efes. 4:31, 32). Te bin ma lek ya jnoptik sok te bin ma lek ya kaltik ya skʼan jelontestik ta bin lek. Ta swenta-abi te Jehová ya yakʼbotik jun lekil ejemplo. Kʼalal ay ta xiwel-a te Elías, te chʼul-abat te la stikun talel te Jehová la yakʼbey smukʼul yoʼtan sok «sajsaj cʼop te cʼun xlamet ta aʼiyel» (1 Rey. 19:12). Te yutsil oʼtanil ma jaʼuknax ya skʼan ya xchiknaj ta jkʼoptik, jaʼnix jich ta swenta te bin ya jpastik. Kiltik bin-utʼil.

Te skʼayinbeyel stalel te Jehová jaʼ smakojbey skʼoplal te ay bin ya jpastik sok yutsil koʼtantik sok te ya xkʼopojotik sok slekil koʼtantik (Efes. 4:32; 5:1, 2). Te Lisa te la kalbeytik skʼoplal ta sbabial párrafo, la yilbey yutsil yoʼtan te Testigoetik. Jich ya yal: «Kʼalal bootik ta kuxinel ta yan lugar sok te jfamilia, cheb familia yuʼun Testigoetik la skʼanik permiso ta yaʼtelik yuʼun ya skoltayotik  ta schajpanel te jbiluktik ya kichʼtik baele. Pero mato jajchemon ta snopel-a te Biblia». Te bin la spas sok yutsil yoʼtanik te hermanoetik-abi, tijbot yoʼtan te Lisa yuʼun ya snopxan te smelelil kʼop.

Jaʼnix jich te Anne te la kalbeytik skʼoplal ta sbabial párrafo, la yil-euk te yutsil yoʼtan te Testigoetik. Jich ya yal: «Te bitʼil kʼax bolobenix te balumilal, maʼyuk machʼa ya smukʼulin koʼtan-a; wokol la kaʼiy te ya smukʼulin koʼtan te ants winiketike». Ya yalxan: «Kʼalal la jnaʼbey sba te Testigoetik la jojkʼoybey jba te bin yuʼun te ay jkʼoplal ta yoʼtanik. Pero ta swenta te slekil yoʼtan te machʼa la snojpteson ta Biblia la kakʼ smukʼul koʼtan ta stojol». ¿Bin-utʼil koltayot yuʼun-abi? Te Anne jich ya yal: «Ta patil kʼunkʼun jaʼ bajt ta koʼtan te bin yakon ta snopel».

Te bin la smulanik te chaʼtul hermanaetik-abi jaʼ te yutsil yoʼtan la yakʼik ta ilel te Testigoetik. Te bitʼil jich stalelike, jaʼ tijbot yoʼtanik yuʼun ya snopikxan te skʼop Dios. Jaʼnix jich te yutsil yoʼtanik te la yakʼik ta ilel te machʼatik ayik ta congregación jaʼ tijbotik yoʼtan yuʼun.

Ay machʼatik te maba wokol ya yaʼiyik te ya stseʼejinik o te leknax yoʼtanik ta swenta te stsʼumbalik o te yuʼun-nix jich stalelik-ae. Kʼax lek te jich ya kakʼtik ta ilele, pero teme jaʼnax ya jpastik ta swenta-abi, maniwan yakotik ta yakʼel ta ilel te yutsil yoʼtan te Diose (paja sok Hechos 28:2).

Te yutsil oʼtanil jaʼ sit te chʼul espíritu (Gál. 5:22, 23). Yuʼun ya jchʼitestik te taleliletik-abi sok te ya jpajbeytik stalel te Jehová sok te Jesús, mukʼ skʼoplal te ya kakʼ stojobtesotik te chʼul espíritu ta swenta te bin ya jnop ta koʼtantik sok te bin ya jpastik. Jaʼnix jich te bitʼil ya jkʼayinbeytik stalel te Cristo, ay skʼoplal ta koʼtantik te yantik, melel kʼux ta koʼtantik te Dios sok te jpatxujktik. Kʼalal jaʼ ya stij koʼtantik te kʼuxul oʼtanil yuʼun ya kakʼtik ta ilel te yutsil oʼtanil jaʼme tʼujbil talelil te ya smulan te Jehová.

Ma wokoluk ya kaʼiytik yakʼbeyel yil yutsil koʼtantik te machʼatik ay bin lek spasoj ta jtojoltik o te machʼatik ya jnaʼbeytik sbae (2 Sam. 2:6). Ya kalbeytik wokol yuʼun te jich spasojik ta jtojoltik (Col. 3:15). Pero, ¿bin ya xkʼot ta pasel teme ya jkuytik te ay machʼa ma snujpʼuk ya kakʼbeytik yil yutsil koʼtantik?

Jnop kaʼiytik ini: te Jehová ya yakʼbey yil yutsil yoʼtan spisil te ants winiketik, maʼyuk machʼa jich stalel bitʼil te Jehová. Te Biblia ay bin ya yakʼ jnoptik ta swenta ini. Ta Escrituras Griegas Cristianas bayal buelta ya yal te kʼopil yutsil oʼtanil. ¿Bin-utʼil ya yakʼ ta ilel te Dios te talelil-abi?

Jnop kaʼiytik ta swenta te yutsil yoʼtan ya yakʼ ta ilel te Jehová ta stojol bayal millón ants winiketik, kʼalal ya yakʼbey te bin ya xtuun yuʼunik ta jujun kʼajkʼal (Mat. 5:45). Manchukme mato jnaʼojbeytik sba-a yakʼojix kiltik te yutsil yoʼtan ta jtojoltik (Efes. 2:4, 5, 8). Jich bitʼil te kʼalal la yakʼ lajel ta jtojoltik te jip jtul sNichʼan. Te jpuk-kʼop Pablo la stsʼibay te ay bin lek ya jtatik te bitʼil laj ta jtojoltik te Jesús ta swenta «te yutsil yoʼtan» te Diose (Efes. 1:7). Manchukme ya jta jmultik sok ya kakʼbeytik smel yoʼtan te Jehová, yananix skoltayotik-a. Te nojptesel ya yakʼbotik sok te bin ya yalbotik jich kʼoem te bitʼil «cʼunil haʼal» (Deut. 32:2). Maʼyuk bin-ora ya xjuʼ kuʼuntik stojel te yutsil yoʼtan ya yakʼ ta ilel ta jtojoltik sok ta swenta yutsil yoʼtan te Dios ya xjuʼ ya jta jkoleltik ta pajel chaʼbej (paja sok 1 Pedro 1:13).

Ya yikʼ koʼtantik te yutsil yoʼtan te Jehová, jaʼ yuʼun ma chaʼoxtulnax ya kakʼbeytik yil yutsil koʼtantik. Jaʼ lek te ya jpastik tulan ta jujun kʼajkʼal yuʼun ya kakʼbeytik yil yutsil koʼtantik te yantik jich te bin-utʼil ya spas te Jehová (1 Tes. 5:15). Teme spisil-ora ya kakʼtik ta ilel yutsil koʼtantik, jich ya xkʼootik te bin-utʼil kʼajkʼ te ya skʼixnayotik te kʼalal ay sike. Jich leknax ya yaʼiy sbaik te kʼalal ya sjokinotik te jfamiliatik, te hermanoetik, te joytik ta aʼtel, ta escuela sok te jpatxujktike.

¿Aybal machʼa ta afamilia o ta congregación te lek ya yaʼiy sba kʼalal ay bin lek ya apas ta stojol o ya akʼopon sok yutsil awoʼtan? Ayniwan jtul hermano ta acongregacion te ya skʼan koltayel ta sna o ta sjardin, ya akoltay ta manbajel o ay banti ya skʼan ikʼel bael. ¿Bin-utʼil ya kakʼtik ta ilel yutsil koʼtantik te kʼalal ya jcholtik skʼop Dios? Jaʼ te kʼalal ya jkoltaytik te machʼa ya xtuun yuʼune.

Akʼa jtʼunbeytik stalel te Jehová sok kakʼtik ta ilel yutsil koʼtantik ta swenta te bin ya kaltik soknix te bin ya jpastik ta spisil-ora.