1. ¿Bin la yal te ajwalil Salomón ta Eclesiastés 7:20?

 TE AJWALIL Salomón jich la yal: «Mayuc ni jtuhluc ta bahlumilal te toj yoʼtan, te ya spas te bin lec, te ma ba ya sta smul» (Ecl. 7:20). ¡Melelnix-a! Jpisiltik jmulawilotik (1 Juan 1:8). Jaʼ yuʼun, jpisiltik ya jkʼantik te ya spasbotik perdón te Dios sok te yantike.

2. ¿Bin-utʼil ya kaʼiy jbatik te kʼalal ya spasbotik perdón te kamigotike?

² Jpisiltik ay bin kalojtik o jpasojtik te ma lek la yaʼiy sba yuʼun te kamigotik. Yuʼun lek ya kil jbatik yan buelta sok, la jkʼanbeytik perdón. ¿Bin-utʼil la kaʼiy jbatik te kʼalal la spasbotik perdón te kamigotike? ¿Mabal jichuk te lek la kaʼiy jbatik sok la yakʼ stseʼelil koʼtantik? Yuʼun-nix jich-a.

3. ¿Bin ya kilbeytik skʼoplal ta artículo ini?

³ Jpisiltik ya jkʼantik te jaʼ lekil kamigotik te Jehová, pero ayniwan bin ya jpastik o ya kaltik te maba ya smulane. Jich yuʼun, ¿bin yuʼun seguro ayotik te ya skʼan spasbotik perdón te Jehová? Te kʼalal ya spas perdón te Jehová, ¿bin yuʼun te jkʼaxel ma pajaluk sok te perdón ya yakʼ te ants winiketik? Sok ¿machʼatik ya spasbey perdón te Diose?

4. ¿Bin yuʼun seguro ayotik te ya spas perdón te Jehová?

⁴ Te Jehová ya yalbotik ta Biblia te ya spasbotik perdone. Jich bitʼil ta wits Sinaí, te Jehová la yal te tʼujbil taleliletik yuʼun ta stojol te Moisés. Ta swenta jtul chʼul-abat jich la yal: «¡Jehová! ¡Jehová! te ay bayel scʼuxul yoʼtan soc te ay yutsil yoʼtan, ma orahuc ya xʼilin, mero mucʼ scʼuxul yoʼtan soc stalel jun yoʼtan, ay scʼuxul yoʼtan ta stojol bayel  ta mil, ya spas perdón yuʼun te bin chopol, te toybahil, soc te mulile» (Éx. 34:6, 7). Te Jehová jaʼ Dios te ay skʼuxul yoʼtan sok ya snaʼ yoʼbolil jbatik, spisil-ora ya spasbey perdón te machʼatik ya sujtes yoʼtanike (Neh. 9:17; Sal. 86:15).

5. Jich bitʼil ya yal Salmo 103:13, 14, ¿bin ya spas te Jehová te bitʼil ya snaʼbotik jbatik ta leke?

⁵ Te bitʼil jaʼ Jpaswanej kuʼuntik te Jehová, ya snaʼbotik jbatik ta lek. ¿Mabal jichuk te yan-nax ya kaʼiytik-a te bitʼil ya snaʼ te bin ya xkʼax ta stojol jujuntul ants winik ta swolol Balumilal? (Sal. 139:15-17). Jich yuʼun ya yil spisil te banti ya xchʼayotike ta swenta te mulil la skʼasesbotik jilel te jmeʼ jtatike. Sok ma jaʼuknax-abi, te Jehová ya snaʼ te bin yuʼun jich jtaleltike, melel snaʼoj spisil te bin kʼaxem ta jkuxlejaltike. ¿Bin ya spas Jehová ta swenta spisil-abi? Te bitʼil ya snaʼbotik jbatik ta leke, jaʼ ya xtijbot yoʼtan yuʼun ya snaʼ yoʼbolil jbatik (Sal. 78:39; kʼopona Salmo 103:13, 14).

6. ¿Bin-utʼil yakʼoj ta ilel te Jehová te ya skʼan spasbotik perdón?

⁶ Te Jehová yakʼoj ta ilel te ya skʼan spasbotik perdón. Ya xkʼot ta yoʼtan ta lek te jaʼ ta skaj te Adán te jmulawilotik sok te ya xlajotike (Rom. 5:12). Maʼyuk bin ya xjuʼ ya jpastik yuʼun ya jkoltay jbatik lokʼel ni jaʼuk ta swenta te bin ma lek kʼot ta jtojoltike (Sal. 49:7-9). Pero te Dios la snaʼ yoʼbolil jbatik, jaʼ yuʼun la skoltayotik. Jich bitʼil ya yal ta Juan 3:16, ta swenta skʼuxul yoʼtan te Jehová la stikun tal te jip jtul sNichʼan yuʼun ya xlaj ta jtojoltik (Mat. 20:28; Rom. 5:19). Te Jesús laj ta jwentatik yuʼun libre ya xkʼotik te machʼatik ya yakʼ schʼuunel yoʼtanik ta stojole (Heb. 2:9). ¿Yabal xtal ta koʼtantik te skʼuxul la yaʼiy te Jehová kʼalal la yil te laj te jip jtul sNichʼan ta jtojoltike? Jich yuʼun, ¿bin-nix yuʼun la yakʼ ta lajel-a te sNichʼan te Jehová teme maba ya skʼan ya spasbotik perdón?

7. Albeya skʼoplal chaʼoxtul ants winiketik te ya yalbey skʼoplal te Biblia te pasbotik perdón yuʼun te Jehová sok slekil yoʼtan.

⁷ Te Biblia ya yalbey skʼoplal bayal ants winiketik te pasbotik perdón yuʼun te Jehová sok slekil yoʼtan (Efes. 4:32). ¿Aybal machʼa ya xjul ta awoʼtan? Jaʼniwan ya xtal ta awoʼtan te ajwalil Manasés. Kʼax ma lek stalel sok la spas tulan muliletik ta stojol te Jehová. La yakʼ ta ichʼel ta mukʼ  lotil diosetik sok la yakʼ ta chikʼbil majtanil te snichʼnab ta stojol te lotil diosetik. Jaʼnix jich la yotses lokʼomba ta templo yuʼun Jehová, te banti chʼultesbile. Te Biblia jich ya yal ta stojol: «Cʼax bayel chopol bintic la spas ta stojol Jehová, ha to cʼalal la shachbe yilimba» (2 Crón. 33:2-7). Pero kʼalal la yakʼ ta ilel te Manasés te sujtesojix yoʼtan ta smelelil, te Jehová la spasbey perdón sok slekil yoʼtan sok la yakʼ te chaʼoch ta ajwalil (2 Crón. 33:12, 13). Yan te machʼa jich la spase jaʼ te ajwalil David, la spas tulan muliletik jich bitʼil te mulwej sok te milaw. Pero te kʼalal la snaʼ te bintik ma lek la spas sok la sujtes yoʼtan ta smelelil, pasbot perdón yuʼun te Jehová (2 Sam. 12:9, 10, 13, 14). Jaʼ yuʼun seguro ayotik te ya skʼan ya spas perdón te Jehová. Jich bitʼil ya xbajt kilbeytik skʼoplal, te perdón yuʼun Jehová ma spaj te bin-utʼil ya spas perdón te ants winiketik.

8. ¿Bin yuʼun jaʼnax lekil juez te Jehová, sok bin-utʼil ya yakʼ ta ilel te kʼalal ya spas perdón?

⁸ Te Jehová jaʼ «te Jchahpanwanej yuʼun swohlol te bahlumilal» (Gén. 18:25). Te lekil juez ya skʼan ya snaʼ ta lek bin swentail te leyetik. Te Jehová jich ya spas, melel ma jaʼuknax Juez, jaʼnix jich Jpasley kuʼuntik (Is. 33:22). Jaʼnax Jehová ya snaʼ te bintik lek sok te bintik ma leke. ¿Bintikxan ya skʼan ya snaʼbey swentail te lekil juez? Te kʼalal mato yaloj mantal-ae, ya skʼan ya yilbey ta lek skʼoplal te bintik kʼot ta pasele. Jaʼ yuʼun maʼyuk machʼa jich ya xchajpanwan te bitʼil te Jehová.

9. ¿Bin ya yichʼ ta wenta te Jehová teme ay machʼa ya spasbey perdón o maʼuk?

⁹ Te Jehová ma jichuk bitʼil te juecetik ta Balumilal. Spisil-ora ya snaʼ ta lek te bintik kʼoem ta pasel te kʼalal ya xtalik ta stojole (Gén. 18:20, 21; Sal. 90:8). Ma jaʼuknax ya yichʼ ta wenta te bin ya yil sok te bin ya yaʼiyik stojol te ants winiketik. Ya xkʼot ta yoʼtan ta lek te bin ya spas te ants winiketik ta swenta te ADN yuʼunik, te bitʼil chʼiik tal, te banti yakik ta kuxinel, te spensarik sok te bin yaʼiyel ya yaʼiy sbaike. Jaʼnix jich, te Jehová ya snaʼ te bin ay ta koʼtantik, te ya skʼan ya yal te ya snaʼ te bin ya stij koʼtantik spasel, te bin yuʼun ya jpastik sok te bin ya skʼan koʼtantike. Spisil ya yichʼ ta wenta sok spisil ya yil (Heb. 4:13). Jich yuʼun kʼalal ya spas perdón ya snaʼ ta lek te bintik kʼoem ta pasele.

10. ¿Bin yuʼun spisil-ora stojil te bin ya sta ta nopel spasel te Jehová? (Deuteronomio 32:4).

¹⁰ Spisil-ora stojil te bin ya sta ta nopel spasel te Jehová. Jkʼaxel maʼyuk machʼa ya stsa. Te kʼalal ya spas perdón ma jaʼuk ya yichʼ ta wenta te bin chikan-nax ta ilel, teme ay stakʼin, te bin yilel skuxlejal o te bin ya snaʼ spasel te ants winike (1 Sam. 16:7; Sant. 2:1-4). Te Jehová ma xjuʼ ya sujtik o ya jtojtik ta takʼin (2 Crón. 19:7). Ma jaʼuknax ay bin ya sta ta nopel spasel ta swenta te tenbil ya yaʼiy sbae (Éx. 34:7). Te Jehová jaʼ te lekil Juez, melel ya xkʼot ta yoʼtan ta lek te bin ya xkʼax ta jtojoltik sok te bin yaʼiyel ya kaʼiy jbatik (kʼopona Deuteronomio 32:4).

11. ¿Bin yuʼun maʼyuk bin ya spaj te perdón ya yakʼ te Jehová?

¹¹ Te machʼatik la stsʼibayik te Escrituras Hebreas snaʼojik ta lek te maʼyuk bin ya spaj te perdón yuʼun Jehová. Ay baeltik la stuuntesik te kʼopil ta hebreo sok ay jun libro te banti la yal «te jaʼnax ay ta swenta yakʼel perdón te Dios ta stojol te machʼa la sta smul». Te libro jaʼnix jich ya yal: «Maʼyuk  bin-ora jaʼ ya yalbey skʼoplal te kʼalal ya spasbey sbaik perdón te ants winiketike» (Sinónimos del Antiguo Testamento, traducción y adaptación de Santiago Escuain). Jaʼnax ya xjuʼ ya spasbey perdón ta jkʼaxel te Jehová te machʼa la sta smul te sujtesoj yoʼtane. ¿Bin-utʼil ya kaʼiy jbatik te kʼalal ya spasbotik perdón te Jehovae?

12, 13. 1) ¿Bin-utʼil ya yaʼiy sba te machʼa ya xpasbot perdón yuʼun te Jehová? 2) ¿Aybal bin-ora ya xlaj te perdón yuʼun Jehová?

¹² Te kʼalal ya xkʼot ta koʼtantik te la spasbotikix perdón te Jehová, xkuxetnax kʼinal ya kaʼiytik. Ya skʼan ya yal-abi te ya yakʼbotik slamalil koʼtantik sok maʼyuk bin ya yalbotik te koʼtantike. Jich ya kaʼiy jbatik te kʼalal jaʼ ya spasbotik perdón te Jehovae ma jichuk te kʼalal ya spasbotik perdón te ants winiketike (Hech. 3:19). Te kʼalal ya spasbotik perdone ya xjuʼ te ya jchaʼkamigointik. Jich kʼoem te maʼyuk bin-ora jtaoj jmultik.

¹³ Kʼalal te Jehová ay machʼa la spasbeyix perdón, maʼyuk bin-ora ya schaʼyalbey te smule o ya yakʼbey castigo ta swenta te bin la spase (Is. 43:25; Jer. 31:34). Te Jehová jich ya yakʼbey te smul te ants winik «te bin utʼil snamalil yiloj sbahic banti ya xlocʼ tal cʼahcʼal soc te smahlib cʼahcʼal» (Sal. 103:12). * Kʼalal ya jnoptik ta swenta te bin-utʼil ya spas perdón te Jehovae ya stij koʼtantik ta yalel wokol sok ta yichʼel ta mukʼ (Sal. 130:4). Pero, ¿machʼatiknax ya spasbey perdón te Jehovae?

14. ¿Bin la jnoptikix ta swenta te bin-utʼil ya spas perdón te Jehovae?

¹⁴ Jich te bin-utʼil la kiltikixe, ma jaʼuknax ya spas perdón te Jehová teme ma tulan te mulile. Jaʼnix jich la jnoptikix te ya stuuntes spʼijil te Jehová, melel jaʼ Jpaswanej kuʼuntik, Jpasley sok jaʼ Juez te kʼalal ya sta ta nopel teme ay machʼa ya spasbey perdón o maʼuk. Jich yuʼun, ¿bintik-a te ya sta ta ilel te Jehovae?

15. Jich bitʼil ya yal Lucas 12:47, 48, ¿bin ya yichʼ ta wenta te Jehová kʼalal ay machʼa ya spasbey perdón?

¹⁵ Te bin ya yichʼ ta wenta te Jehová jaʼ  teme snaʼoj-a te machʼa ay bin ma lek la spase. Te Jesús jich jamal la yal ta Lucas 12:47, 48 (kʼopona). Kʼalal jtul ants winik spasemal yoʼtan ya spas te bin ma lek ya yil te Diose, ya spas tulan mulil. Ya xjuʼ te maba ya xpasbot perdón yuʼun te Jehová (Mar. 3:29; Juan 9:41). Pero ayuk ta koʼtantik te aynix baeltik ya jtatik ta ilel te bin ma lek la jpastike. Jich yuʼun, ¿yabal xjuʼ ya spasbotik perdón te Jehová? Yak. Ta swenta-abi ay binxan ya yichʼ ta wenta te Jehová.

16. ¿Bin ya skʼan ya yal te sujtesel oʼtanil, sok bin yuʼun mukʼ skʼoplal te jich ya skʼan pasel?

¹⁶ Yanxan te bin ya yichʼ ta wenta te Jehová jaʼ teme la sujtesix yoʼtan ta smelelil te machʼa ay bin ma lek la spase. ¿Bin ya skʼan ya yal te sujtesel oʼtanil? Jaʼ te ya sjeltay te stalel o te bin snopoj ya spase. Jaʼnix jich ma lek ya yaʼiy sba sok jkʼaxel ya smel yoʼtan yuʼun te bin ma lek la spas o yuʼun ma la spas te bin lek ya skʼan pasele. Ma jaʼuknax te ma lek ya yaʼiy sba yuʼun-abi, jaʼnix jich te pejkʼajem-a te schʼuunel yoʼtane. Kalbeytikxan skʼoplal te ajwalil Manasés sok te David. Manchukme la spasik tulan mulil, pasbotik perdón yuʼun te Jehová, melel la sujtes yoʼtanik ta smelelil (1 Rey. 14:8). Jich yuʼun te Jehová ya spasbey perdón jaʼnax teme ya yakʼ ta ilel te sujtesojix yoʼtan te machʼa la spas te bin ma leke. Maba jaʼuknax te ya yal te ma lek ya yaʼiy sba yuʼun te bin la spase. Ya skʼan te ay binxan ya spase. * Ta swenta-abi ay binxan ya yichʼ ta wenta te Jehová.

17. ¿Bin-a te ya jeltaytik te jkuxlejaltik, sok bin ya skoltayotik yuʼun maba ya jchaʼpastik te bin ma leke? (Isaías 55:7).

¹⁷ ¿Binxan mukʼ skʼoplal ya yil te Jehová? Jaʼ te ya jeltay te jkuxlejaltik. Jaʼ ya skʼan ya yal te ya kijkitaytik te bin ma lek ya jpastik, sok jich ya xkuxinotik te bitʼil ya skʼan te Jehová (kʼopona Isaías 55:7). Te machʼa ya sjeltay te skuxlejal ya sjeltay te spensar sok jaʼ ya spasix te bin ya skʼan yoʼtan te Jehová (Rom. 12:2; Efes. 4:23). Ya skʼan ayuk ta yoʼtan te ya yijkitay te bin ma lek ya xtal ta spensar sok te bin ya spase (Col. 3:7-10). Pero ya skʼan te ayuk ta  koʼtantik te jaʼnax ya spasbotik perdón te Jehová sok ya stupʼ te jmultik teme ya kakʼ schʼuunel koʼtantik ta swenta te laj te Jesús. Kʼalal ya yil te Jehová te ya jpastik tulan te bantito kʼalal ya xjuʼ kuʼuntik ta sjeltayel te jtaleltik, ya spasbotik perdón ta swenta te laj te sNichʼane (1 Juan 1:7).

18. ¿Bin la jnoptik ta swenta te bitʼil ya spas perdón te Jehová?

¹⁸ Jultes ta koʼtantik te bintik mukʼ skʼoplal la jnoptikix ta artículo ini. Ta swolol Balumilal maʼyuk machʼa jich ya spas perdón te bitʼil te Jehová. ¿Bin yuʼun jich ya kaltik? Sbabial, te spisil-ora ya spasbotik perdón. Schebal, te ya snaʼbotik jbatik ta lek, ya snaʼ te bin kʼaxem ta jtojoltik sok jaʼ te machʼa ya yil teme jsujtesojix koʼtantik ta smelelile. Yoxebal, te kʼalal ya spasotik perdón te Jehová maʼyuk bin-ora ya schaʼjultes ta yoʼtan. Ta swenta ini ya xjuʼ te maʼyuk bin ya yalbotikix te koʼtantik sok leknax ya yilotik.

19. ¿Bin yuʼun tseʼel koʼtantik manchukme ay banti ya xchʼayotik?

¹⁹ Te bitʼil jmulawilotik, yan-nix xchʼayotik-a. Pero ya yakʼ smukʼul koʼtantik te bin ya yal te libro Perspicacia para comprender las Escrituras, volumen 1, página 209: «Te Jehová ya snaʼbotik yoʼbolil jbatik sok ya snaʼ te ay banti ya xchʼay te j-abatetik yuʼun, jich yuʼun maba ya skʼan te spisil-ora ya jmel koʼtantik ta skaj te jmulawilotik sok ay banti ya xchʼayotik (Sl 103:8-14; 130:3). Teme jaʼ ya jpastik spisil-ora te bin ya skʼan te Dios, spisil-ora tseʼel koʼtantik (Flp 4:4-6; 1 Jn 3:19-22)». ¡Ya yakʼbotik bayal yip koʼtantik te bin la yichʼ alele!

20. ¿Bin ya kilbeytik skʼoplal ta yan artículo?

²⁰ Ya kalbeytik bayal wokol te Jehová te ya spasbotik perdón kʼalal ya jsujtes koʼtantik ta smelelile. Pero, ¿bin-utʼil ya jtʼunbeytik te ejemplo yuʼune? ¿Bin yuʼun pajal te perdón yuʼun Jehová sok te perdón kuʼuntike, sok bin yuʼun te ay ma pajaluke? ¿Sok bin yuʼun mukʼ skʼoplal te ya xkʼot ta koʼtantik-abi? Ta yan artículo ya jtabeytik te sujtibe.