Yuʼun lek ya yilotik te Jehová, ya skʼan te ayuk schʼuunel koʼtantik ta stojol. Pero te Biblia ya yal te «ma jpisiltikuk ay kuʼuntik te chʼuunel oʼtanile» (2 Tes. 3:2). Kʼalal te jpuk-kʼop Pablo la stsʼibay te kʼopetik ini, jaʼ yak ta yalbeyel skʼoplal-a te machʼatik ya xkontrainot yuʼun, jaʼ «te chopol ants winiketik te ya skʼan ya yutsʼinotik». Manchukme jich-abi, te bin la yal ta swenta te chʼuunel oʼtanil jaʼnix jich ya xkʼot ta stojol yantik ants winiketik. Jich bitʼil te ay machʼatik ma schʼuunik te pruebaetik te ya yakʼ ta ilel te yuʼunix ay a te Diose, te ja spasoj spisil te bintik ay (Rom. 1:20). Ay yantik ants winiketik te jaʼnax ya schʼuunik te ay machʼa toyol ay ta stojol te ants winiketik. Pero te bitʼil jich ya schʼuunike, ma jaʼuk te schʼuunel oʼtanil te ya skʼan te Jehová.

Yuʼun lek ya yilotik te Dios, ya skʼan ya schʼuun koʼtantik te yuʼun-nix ay-a te Diose sok te ya smajtantes te machʼatik tulan ay te schʼuunel yoʼtan ta stojol (Heb. 11:6). Te chʼuunel oʼtanil, jaʼ jun talelil te ya yakʼ te sit te chʼul espíritu. Teme ya jkʼantik te chʼul espíritu-abi, ya skʼan ya jkʼanbeytik te Jehová ta oración (Luc. 11:​9, 10, 13). Jaʼnix jich, ya skʼan te ya jkʼopontik te Biblia —te sKʼop te lokʼem tal ta yoʼtan— ta patil ya jnopilantik te bin la jkʼopontik sok ya jpastik ta jkuxlejaltik. Teme jich ya jpastike, te chʼul espíritu ya xjuʼ ya x-aʼtej ta jtojoltik sok ya skoltayotik ta stael te chʼuunel oʼtanil te lek ya yil te Jehová.