Te bintik ya sjojkʼoyik te machʼatik ya skʼopon te june
¿Bin-utʼil ya skʼan ya kichʼbeytik swentail te Salmo 12:7?
Te versículo-ini, jaʼ ya yalbey skʼoplal te ants winiketike.
Ta Salmo 12:1-4, ya yal te: «Chʼayemiquix bahel ta yohlil te ants-winiquetic te machʼatic jun yoʼtanique». Ta patil ta Salmo 12:5-7, jich ya yal:
«‹Ta scaj te utsʼinel yuʼun te pobrehetic
soc te ahcan yuʼun te machʼatic mayuc bin ay yuʼunic,
ya xhahchonix,
ya jcoltay te machʼatic scʼanojic coltayel›.
Te bintic yaloj ya spas te Jehová, mayuc bin capal tey a
hich ayic te bin utʼil plata te lecubtesbil ta horno pasbil ta lum, te huqueb buelta yichʼoj lecubtesel.
Haʼat, Jehová, yac acanantayotcotic;
ya me acoltayotcotic spisil ora ta scʼabic te jcaj tsʼumbalil ini».
Te versículo 5 ya yakʼ ta ilel te ya xbajt skoltaylan Jehová te machʼatik ya yichʼik utsʼinel.
Te versículo 6 jich ya yal: «Te bintic yaloj ya spas te Jehová, mayuc bin capal tey a, hich ayic te bin utʼil plata te lecubtesbil». Sok jich ya kaltik-euk te jchʼuunjelotik (Sal. 18:30; 119:140).
Ay cheʼoxeb Bibliaetik te kʼasesbil ta yantik kʼopiletik te banti te Salmo 12:7 jich yichʼoj kʼasesel: «Jaʼat ya akananataylan». Te bitʼil jaʼ nail la yichʼ alel ta swenta «te bintic yaloj» te Jehová, ay machʼatik ya yalik te texto ini, ya skʼan ya yal te Dios ya skanantay te sKʼope. Sok jnaʼojtik te Jehová skanantayoj te Biblia o te sKʼop ta swenta te machʼatik ya skʼan ya slajinik te Bibliae (Is. 40:8; 1 Ped. 1:25).
Jaʼnix jich, te Jehová ya skanantay te ants winiketik te ya yalbey skʼoplal te versículo 5, ya skoltay sok ya skanantay te machʼatik ya yichʼik «utsʼinel» sok «te machʼatic scʼanojic coltayel» (Job 36:15; Sal. 6:4; 31:1, 2; 54:7; 145:20).
Jich yuʼun, jich bitʼil ya yal te versículo 7, ¿machʼa ya skanantay te Jehová? ¿Jaʼbal te sKʼope o jaʼ te ants winiketike?
Kʼalal ya jnoptikxan te salmo ini, ya jtatik ta ilel te jaʼ te ants winiketike.
Ta sjajchibal te Salmo 12, te David ya yalbey skʼoplal te j-abatetik yuʼun Dios te loʼlaybilik yuʼun te chopol ants winiketik. Ta patil, ta versículo 3 ya yal te Jehová ya slajin te machʼatik chopol ya xkʼopojik. Te salmo ya yakʼ kiltik te ya xjuʼ ya smukʼulin koʼtantik te ya xbajt skoltay Jehová te lum yuʼun, melel smelelil te bin ya yale.
Jich yuʼun, te machʼatik ya skanantay te Jehová jich bitʼil ya yal te versículo 7, jaʼ te ants winiketik, te machʼatik yichʼojik utsʼinel yuʼun te chopol ants winiketik.
¿Bin yuʼun-abi te ay Bibliaetik te kʼasesbil ta yantik kʼopiletik te jich ya yal: «Jaʼat ya akanantaylan»? Te traducción-abi, ya yakʼ ta ilel te jichnix ya yal-a te Escrituras Hebreas. Pero ta Septuaginta griega, jich ya yal: «Jaʼ ya skanantayotik». Jaʼ-abi, ya yakʼ ta naʼel te j-abatetik yuʼun Jehová te yichʼojik utsʼinel sok kontrainel, ya yichʼik kanantayel ta stojol te «jcaj tsʼumbalil» yuʼun winiketik te ya smulanik spasel te bin chopol (Sal. 12:7, 8). Ta jun traducción yuʼun te Escrituras Hebreas ta kʼopil arameo, te versículo ini jich ya yal: «Jaʼat, KAJWAL, ya akanantay te machʼatik toj yoʼtanik, ya akoltaylan ta spisil-ora ta stojol te jkaj tsʼumbalil ini te chopole». Jaʼ ini jaʼ yan prueba te ya yakʼ ta ilel te bin ya yal te Salmo 12:7, ma jaʼuk ya yalbey skʼoplal te sKʼop Diose.
Jich yuʼun, te versículo ini ya yakʼbey smukʼul yoʼtan te machʼatik jun yoʼtanik te ya xbajt yichʼik koltayel yuʼun te Diose.
