Te kʼalal ikʼbilix bael ta Egipto-a te José yuʼun te madianetike, te Biblia ya yal te lokʼik bael ta Canaán te Jacob sok spisil te sfamilia yuʼun bajtik ta nainel ta Egipto. Kʼotik ta kuxinel ta Gosén te banti nopol ay te mukʼul jaʼ Nilo te ya sta sba sok te mar Mediterráneo (Gén. 47:1, 6). Te israeletik «mero tsobolic soc bayel yipic», ta skaj-abi xiwik te egipsioetik jaʼ yuʼun la smosoinik (Éx. 1:7-14).

Ay chaʼoxtul te machʼatik ya skontrainik te bin ya yal te Biblia ya yalik te lotil te la yichʼik mosoinel ta Egipto te israeletike. Pero ay prueba te ya yakʼ ta ilel te ayin mosoetik ta namey Egipto te talemik ta stsʼumbal Sem. *

Jun ejemplo, te arqueologoetik la staik ta jokʼel namey lumetik ta norte yuʼun Egipto. Te John Bimson te ya yilbey skʼoplal te Bibliae la yal te ay pruebaetik tabil te ayin kʼaxem ta 20 ta chajp lumetik te banti kuxinik te stsʼumbal Sem. Te egiptólogo James Hoffmeier jaʼnix jich ya yal: «Ta jaʼbilniwan 1800 kʼalal ta 1540 te kʼalal mato jaʼuk jkʼajkʼaleltik-ae, bayal te machʼatik talemik ta stsʼumbal Sem te ayik ta kuxinel ta Asia occidental bajtik ta kuxinel ta Egipto». Sok la yalxan: «Ta tiempo-abi jaʼ skʼajkʼalel-a te Abraham, Isaac sok Jacob, jich yuʼun te bintik kʼot ta pasel ta yorail-abi jaʼnix pajal sok te bin ya yalbey skʼoplal te libro yuʼun Génesis».

Ta sur yuʼun Egipto ay tabilxan pruebaetik. Jun papiro te la yichʼ tsʼibayel ta jaʼbilniwan 2000 kʼalal ta 1600 te kʼalal mato jaʼuk jkʼajkʼaleltik-ae, la yichʼ tabeyel sbiilik bayal mosoetik, kʼaxem ta cuarenta ta tul te mosoetik-abi talemik ta stsʼumbal Sem te abatinik ta jun na ta sur yuʼun Egipto. Aʼtejik ta spasel weʼelil, jalab sok koltaywanik ta aʼtel. Te Hoffmeier jich la yal: «Te bitʼil bayal stsʼumbal Sem kuxinik ta Tebaida ta sur yuʼun Egipto ayniwan tsobolxan ta tul kuxinik ta skʼinal Egipto, pero jteb ma spisilik kuxinik ta banti nopol ay te mukʼul jaʼ Nilo te ya sta sba sok te mar Mediterráneo».

Te arqueólogo David Rohl la yal te ay biililetik yuʼun mosoetik te la yichʼ tael ta papiro te «jich yilel te la yichʼ lokʼesel ta Biblia». Jun ejemplo ta swenta-abi, jaʼ te Isacar, Aser sok Sifra (Éx. 1:3, 4, 15). Te Rohl jich la sta ta nopel: «Jaʼ-abi ya yakʼ ta naʼel ta jamal te yuʼun-nix la yichʼik mosoinel ta Egipto-a te israeletike».

Te Bimson la yal: «Ay pruebaetik te ya yakʼ ta naʼel te smelelil te bintik ya scholbey skʼoplal te Biblia ta swenta te mosoinel ta Egipto sok te beenik ta jochol takin kʼinale».