1. ¿Bin yuʼun te Jesús la skʼanbey te Jehová te akʼa skanantay te jnopojeletik?

TE KʼALAL junxan-nix ajkʼabal kuxul-a te Jesuse, la smel yoʼtan yuʼun te bin ya sitintay te jnopojeletike, jaʼ yuʼun la skʼanbey te sTat te akʼa skanantay te jnopojeletik ta stojol te machʼa chopole (Juan 17:14, 15). Te Jesús snaʼoj te kʼalal ya sujt bael ta chʼulchan, te Satanás ya skontrain te machʼa ya skʼan ya x-abatinik ta stojol te Dios, jaʼ yuʼun te lum yuʼun te Jehová ya skʼan kanantayel.

2. ¿Bin yuʼun ya jnaʼtik te ya sutbotik jkʼoptik te Jehová?

² Te Jehová la sutbey skʼop te sNichʼan ta skaj te kʼux ta yoʼtan. Teme ya jpastik tulan yuʼun lekuk ya yilotik te Jehová, jaʼnix jich kʼuxotik ta yoʼtan sok ya sjakʼbotik jkʼoptik te kʼalal ya jkʼanbeytik koltayel sok kanantayel. Te bitʼil jaʼ jtul Tatil yuʼun kʼuxul oʼtanil, spisil-ora ya skanantay te yal snichʼnab. Teme ma jichuk ya spase, maniwan yak ta skʼotesel ta pasel te bin ya skʼan ya yal te sbiil o maniwan lek skʼoplal ya xkʼot.

3. ¿Bin yuʼun ya jkʼantik te ya skanantayotik te Jehová?

³ Ta ora ini ya jkʼantikxan bayal kanantayel yuʼun te Jehová, melel te Satanás la yichʼ chʼojel koel tal ta Balumilal sok «bayel yilimba» (Apoc. 12:12). Yakʼbeyoj ta yoʼtan te ants winiketik te kʼalal ya skontrainotik ya skuyik «te yac spasbelic yaʼtel Dios» (Juan 16:2). Te machʼatik ma schʼuunik te Diose, ya skontrainotik ta skaj te ma jchʼik jbatik ta bin ya spas te ants winiketik. Manchukme jich-abi ma xiwotik, melel te Biblia jich ya yal: «Jun yoʼtan ta jtojoltic te Cajwaltic,  ya me yaʼbeyex yip awoʼtanic soc ya me scanantayex yuʼun te bin chopole» (2 Tes. 3:3). Kiltik chaʼchajp te bin-utʼil ya skanantayotik te Jehová.

4. Jich bitʼil ya yal te Efesios 6:13-17, ¿bin ya yakʼbotik te Jehová yuʼun ya skanantayotik?

⁴ Te Jehová ya yakʼbotik jun majkilal ta swenta skʼop Dios yuʼun ya skanantayotik ta swenta te kontrainel yuʼun te Satanás (kʼopona Efesios 6:13-17). Te majkilal ini tulan sok bayal ya xtuun kuʼuntik, pero jaʼnax ya skanantayotik teme ya jtuuntestik ta spisil-ora. Yame kiltik bin ya skʼan ya yal ta jujunchajp.

5. ¿Bin-a te sinturon yuʼun te smelelil kʼop sok bin yuʼun te ya skʼan ya jlaptike?

⁵ Te sinturon yuʼun te smelelil kʼop, jaʼ spisil te bintik ya yal te Biblia. ¿Bin yuʼun ya skʼan ya jlaptik?, melel te Satanás «ha tatil yuʼun lot» (Juan 8:44). Bayalix jaʼbil yak ta spasel lot sok juʼem yuʼun sloʼlayel «spisil te bahlumilale» (Apoc. 12:9). Spisil te bintik smelelil ay ta Biblia ya skanantayotik ta swenta te lotiletik. ¿Bin-utʼil ya jlaptik te sinturon? Jaʼ te ya jnoptik ta swenta te Jehová sok te yakuk kichʼtik ta mukʼ «ta scuenta espíritu soc ta smelelil» sok te yakuk jpastik te bin lek (Juan 4:24; Efes. 4:25; Heb. 13:18).

6. ¿Bin-a te smajkil tanil ta toj-oʼtanil sok bin yuʼun ya skʼan ya jlaptik?

⁶ Te smajkil tanil ta toj-oʼtanil, jaʼ te mantaliletik yuʼun te Jehová. ¿Bin yuʼun ya skʼan ya jlaptik? Jich bitʼil jtul soldado ya xkanantayot yuʼun te smajkil stan, jaʼnix jich te majkil tanil ta toj-oʼtanil ya skanantayotik yuʼun ma xyutsʼin koʼtantik te bintik ay ta balumilal (Prov. 4:23). Te Jehová ya yalbotik te kʼuxuk ta koʼtantik sok te ya x-abatinotik ta stojol sok spisil koʼtantik (Mat. 22:36, 37). Jaʼ yuʼun te Satanás ya skʼan te jaʼuk kʼux ta koʼtantik te bin ya sjapbotik te balumilal, jaʼ te bintik ma smulan te Jehová (Sant. 4:4; 1 Juan 2:15, 16). Teme ma xjuʼ yuʼun te ya jkʼaxuntaybeytik smantal te Jehová, te Satanás yananix spas tulan yuʼun ya xyalotik ta mulil-a.

7. ¿Bin-utʼil ya jlaptik te smajkil tanil ta toj-oʼtanil?

⁷ Ya jlaptik te smajkil tanil ta toj-oʼtanil teme ya jchʼuuntik te bin ya yalbotik te Jehová ta swenta te bin lek sok te bin ma leke (Sal. 97:10). Ay ants winiketik ya yalik te malaj libre ayotik teme ya jchʼuuntik te mantaliletik yuʼun te Jehová. Pero teme ma jchʼuuntik te bin ya yalbotik te Biblia, jich kʼoemotik bitʼil jtul soldado te ya slokʼes te smajkil stan ta yorail te guerra ta skajnax te kʼax al ya yaʼiye. ¿Melel te ma lek te bin la spase? Te machʼatik kʼux ta yoʼtan te Jehová maba wokol ya yaʼiyik schʼuunel «te mandariletic yuʼune», melel jaʼ jun koltayel (1 Juan 5:3).

8. ¿Bin ya skʼan ya yal te jlapojtik te jteptik sok te chapalukotik ta scholel te lek yachʼil kʼop?

⁸ Jaʼnix jich te Pablo ya yal te ya skʼan jlapojtik te jteptik sok te chapalukotik ta scholel te lek yachʼil kʼop. Jaʼ ya skʼan ya yal-abi te spisiluk-ora chapalukotik ta scholel te skʼop Dios. Te kʼalal ya jcholbeytik skʼop Dios te yantik, ya xtulanubxan te schʼuunel koʼtantik. Ya yakʼbotik smukʼul koʼtantik te bitʼil te ermanoetik ta swolol balumilal ya scholik te skʼop Dios, ya spasik ta yaʼtelik, ta eskuela, ta negosioetik, ta nanatik, te kʼalal ya xbajtik ta manbajel, te kʼalal ya yulaʼtayik te sfamiliaik te ma Testigouk, ya scholbeyik skʼop Dios te machʼatik ya snaʼbeyik sba sok jaʼnix jich ya spasik te kʼalal ma xjuʼ ya xlokʼ ta snaik. Teme ya kijkitaytik te scholel skʼop Dios ta skaj te ya xiwotik, ya jta jwokoltik yuʼun. Jich ya xkʼootik bitʼil jtul soldado te ya slokʼes te  step ta yorail guerra, ya sta yejchen ta ora, ma xjuʼ ya skanantay sba sok jich ma xjuʼ ya schʼuunbeyix te bin ya yal te machʼa ya xwolot yuʼun.

9. ¿Bin yuʼun ya skʼan jlapojtik te majkilal yuʼun schʼuunel oʼtanil?

⁹ Te majkilal yuʼun schʼuunel oʼtanil, jaʼ ya skʼan ya yal te schʼuunel koʼtantik ta stojol te Jehová. Ya smukʼulin koʼtantik te ya skʼotes ta pasel spisil te bintik yaloje sok te schʼuunel koʼtantik ya skoltayotik yuʼun ya jtupʼbeytik «spisil scʼahcʼal yaʼtejib a te machʼa chopole». Ya skʼan ya jlaptik te majkilale, melel jaʼ ya skoltayotik yuʼun ma x-och ta koʼtantik te lotil nojptesel ya yalik te machʼatik la yijkitayik ta schʼuunel te Jehová sok te labanel te ya xjuʼ ya xchebaj koʼtantik yuʼun. Teme maʼyuk schʼuunel koʼtantik, ma xjuʼ kuʼuntik ya jchʼuunbeytik skʼop te Jehová te kʼalal ay machʼa ya stenotik ta spasel te bin chopole. Yan teme ya jkoltaybeytik skʼoplal te bin jchʼuunejtik ta kaʼteltik o ta eskuela, te schʼuunel koʼtantik yak ta skanantaybelotik (1 Ped. 3:15). Jaʼnix jich te kʼalal ya jpʼajtik jun aʼtelil te ban ya kichʼtik tojel ta lek te ya smakotik ta spasel te yaʼtel te Jehová, yak ta skanantaybelotik te schʼuunel koʼtantik (Heb. 13:5, 6). Teme jun koʼtan ya kakʼ jbatik manchukme ya kichʼtik kontrainel, te majkilal  yuʼun te schʼuunel oʼtanil yak ta skanantaybelotik (1 Tes. 2:2).

10. ¿Bin-a te smajkil jolal yuʼun kolel sok bin yuʼun ya skʼan ya jlaptik?

¹⁰ Te smajkil jolal yuʼun kolel, jaʼ te bin ya yakʼbotik te Jehová ta pajel chaʼbej, te ya skoltayotik lokʼel ta lajel sok ya smajtantes te machʼatik ya xpasbot te skʼanojel yoʼtan (1 Tes. 5:8; 1 Tim. 4:10; Tito 1:1, 2). Jich bitʼil te smajkil jolal ya skanantaybey sjol jtul soldado, jaʼnix jich te smajkil jolal yuʼun kolel ya skanantaybotik te jpensartik. ¿Bin-utʼil? Jaʼ ya skoltayotik yuʼun jaʼuk ya xbajt ta koʼtantik te bin sjapoj te Dios sok te manchuk jaʼ ya xbajt ta koʼtantik te wokoliletik. ¿Bin-utʼil ya jlaptik te smajkil jolal yuʼun kolel? Jaʼ te yakuk jpastik tulan yuʼun jichuk snopojibal kuʼuntik bitʼil te Jehová sok te ma jaʼuk ya smukʼulin koʼtantik te kʼulejalil, jaʼ ya skʼan ya smukʼulin koʼtantik te Jehová (Sal. 26:2; 104:34; 1 Tim. 6:17).

11. ¿Bin-a te espada yuʼun te espiritu sok bin yuʼun ya skʼan ya jtuuntestik?

¹¹ Te espada yuʼun te espiritu, jaʼ te Biblia. Ay yuʼel yuʼun ya yakʼ ta ilel te lotiletik sok ya skoltay te ants winiketik ta yijkitayel te lotil nojpteseletik sok te bintik ma lek kʼayemik ta spasel (2 Cor. 10:4, 5; 2 Tim. 3:16, 17; Heb. 4:12). Ya jnoptik stuuntesel ta lek te Biblia te kʼalal ya jnop ta jtukeltik sok te kʼalal ya snojptesotik te organisasion yuʼun te Dios (2 Tim. 2:15). Te majkilal ta swenta skʼop Dios, ma jaʼuknax te kanantayel ya yakʼbotik te Jehová. Kiltik yan.

12. ¿Machʼaxan ya skoltayotik sok bin yuʼun?

¹² Jtul soldado te pʼijubenix ta lek ya snaʼ te ma xjuʼ yuʼun stsalel ta stukel ipal soldadoetik, ya skʼan ya xkoltayot yuʼun te sjoʼtak. Jaʼnix jich koem ta jtojoltik, ma xjuʼ kuʼuntik ya jtsal ta jtukeltik te Satanás sok te sjoʼtak, ya jkʼantik te ya skoltayotik te kermanotaktik. Te Jehová yakʼojbotik te kermanotaktik ta swolol Balumilal yuʼun ya skoltayotik (1 Ped. 2:17).

13. Jich bitʼil ya yal te Hebreos 10:24, 25, ¿bin-utʼil ya skoltayotik te tsoblejetik?

¹³ Jun te bin-utʼil ya skoltayotik te kermanotaktik, jaʼ te ya xbootik ta tsoblejetik (kʼopona Hebreos 10:24, 25). Jpisiltik aynix ya xchebaj koʼtantik, pero ¿mabal jichuk te kʼalal ya xbootik ta tsoblejetik leknax ya kaʼiy jbatik? Te komentario ya yakʼ te ermanoetik, te demostrasionetik sok te diskursoetik, ya yakʼ yip koʼtantik yuʼun ya x-abatinotikxan ta stojol te Jehová. Jaʼnix jich ya skoltayotik te kʼalal ya xkʼopojotik sok te kermanotaktik te kʼalal mato jajchem-a sok te kʼalal lajix-a te tsoblejetik (1 Tes. 5:14). Jaʼnix jich ta tsoblejetik ya xjuʼ ya jkoltaytik te yantik sok ya yakʼ stseʼelil koʼtantik (Hech. 20:35; Rom. 1:11, 12). Pero ma jaʼuknax-abi, jaʼnix jich ya jnoptik bin-utʼil ya jcholtik skʼop Dios sok ta snojptesel yantik. Jich bitʼil ya kichʼtik nojptesel yuʼun ya jtuuntestik ta lek te publikasionetik sok te bideoetik te ay ta aʼtejibaletik yuʼun nojpteswanej. Jich yuʼun akʼa jchajpan jbatik ta lek te kʼalal ya xbootik ta tsoblejetik, jchʼam kaʼiytik ta lek te bin ya yichʼ alel sok akʼa jpas ta jkuxlejaltik. Teme jich ya jpastike, chapalotik ta lek ta yakʼel guerra sok jich ya xkʼootik bitʼil «lequil soldado yuʼun Jesucristo» (2 Tim. 2:3).

14. ¿Binxan koltayel ay kuʼuntik?

¹⁴ Jaʼnix jich ya skoltayotik bayal ta miyon chʼul-abatetik. Teme jnaʼojtikix bin ya xjuʼ ya spas jtulnax chʼul-abat, ¿jaʼuktobalix-a teme spisil ya xkoltaywanik? (Is. 37:36). Maʼyuk jtuluk winik o pukuj te ya spaj sba sok te bitʼil bayal ta miyon chʼul-abatetik yuʼun te Jehová.  Manchukme jtukel ayotik, sjokinejotik stukel te Jehová (Juec. 6:16). Akʼa juluk ta koʼtantik te ma jtukeltikuk te jaʼ ya skoltayotik te Jehová te kʼalal ay ya xchebaj koʼtantik yuʼun te ay bin ya yalbotik o ya spasbotik te joʼtaktik ta aʼtel, ta eskuela o jtul jfamiliatik te ma Testigouk.

15. Jich bitʼil ya yal te Isaías 54:15, 17, ¿bin yuʼun maʼyuk machʼa ya xjuʼ ya skom te j-abatetik yuʼun te Dios?

¹⁵ Te Balumilal jaʼ ay ta skʼab te Satanás, jaʼ yuʼun ya skontrainotik, ta skaj te maba ya jchʼik jbatik ta bin ya spasik sok te ma xbootik ta guerra. Ya kakʼtik ta naʼel te sbiil te Dios, ya jpuktik ta alel te jaʼnax te Wentainel ya yakʼ lamalkʼinal sok ya jchʼuuntik te mantaliletik yuʼune. Ya jpuktik ta alel te jaʼ jpas lot sok jaʼ jmilawal te ajwalil yuʼun te Balumilal (Juan 8:44). Soknix ya jpuktik ta alel te nopolix ya yichʼ lajinel te balumilal ini. Te Satanás sok te sjoʼtak, ma xjuʼ ya skom te ya kichʼtik ta mukʼ te Jehová. Manchukme bayal yuʼel te Satanás, ma juʼem yuʼun skomel te scholel skʼop Dios ta swolol Balumilal. Jaʼ yuʼun te jaʼ yak ta skanantaybelotik te Jehová (kʼopona Isaías 54:15, 17).

16. ¿Bin-utʼil ya skoltay Jehová te lum yuʼun ta yorail te tulan wokolil?

¹⁶ ¿Bin ya xkʼot ta pasel ta pajel chaʼbej? Ta yorail te tulan wokolil, te Jehová ay chaʼchajp te bin-utʼil ya skoltayotik. Sbabial, ya skoltay te j-abatetik yuʼun te kʼalal «te ajwaliletic te ayic ta bahlumilal» ya slajin te Mukʼul Babilonia, te jaʼ te spisil te lotil relijionetik te ayik ta swolol Balumilal (Apoc. 17:16-18; 18:2, 4). Schebal, ya skoltay te lum yuʼun te kʼalal ya slajin ta Armajedon spisil te bintik ay yuʼun te Satanás (Apoc. 7:9, 10; 16:14, 16).

17. ¿Bin yuʼun te jaʼ lek te nopol ayotik ta stojol te Jehová?

¹⁷ Teme nopol ayotik ta stojol te Jehová, te Satanás ma xjuʼ ya yutsʼinotik, melel jaʼ ya xbajt yichʼ lajinel ta sbajtelkʼinal (Rom. 16:20). Akʼa jlaptik te majkilal sok mame ayuk bin-ora ya jlokʼestik. Mame jtukeltay jbatik, jkoltaytik te kermanotaktik sok akʼa jchʼuunbeytik te mantaliletik yuʼun te Jehová. Teme jich ya jpastike, te jTatik Jehová ya yakʼbotik yip koʼtantik sok ya skanantayotik (Is. 41:10).