1. ¿Bintik wokolil ya jsitintaytik te abatotik yuʼun te Jehová?

¿YAKOTIKBAL ta kʼaxel ta tulan wokolil? Ayniwan jtul ermano ta kongregasion te ay bin ma lek spasojbotik (Sant. 3:2). O yaniwan ya slabanotik te joʼtaktik ta eskuela o ta kaʼteltik ta skaj te ya x-abatinotik ta stojol te Jehová (1 Ped. 4:3, 4). ¿Aybal machʼa ta afamilia te ma xyakʼat bael ta tsoblejetik o ya xlokʼat ta scholel skʼop Dios? (Mat. 10:35, 36). Teme tulan te bin yak ta kʼaxel ta jtojoltik, yaniwan xchebaj koʼtantik yuʼun. Pero jnaʼojtik te biluk wokolil ya xtal ta jtojoltik, te Jehová ya yakʼ jpʼijiltik sok kiptik ta stsʼikel te wokolile.

2. Jich bitʼil ya yal te Romanos 15:4, ¿bin-utʼil ya skoltayotik te skʼoponel te Biblia?

² Te Jehová ya xcholbotik ta Biblia bin-utʼil te ants winiketik te maba tojik la sitintayik tulan wokolil. Jich spasoj yuʼun ay bin ya yakʼ jnoptik-a. Jaʼ te bin la stsʼibay te jpuk-kʼop Pablo ta Romanos 15:4 (kʼopona). Te kʼalal ya jkʼopontik te relatoetik ini, ya yakʼ smukʼul koʼtantik, jaʼ yuʼun ma tikʼuknax-a te ya jkʼopontik te Biblia, ya skʼan ya kakʼtik te ya sjelontes te jpensartik sok te yakuk xkʼot ta koʼtantik. Kʼalal ya jkʼantik koltayel yuʼun jun wokolil, ya skʼan ya jpastik ini: 1) skʼoponel Dios, 2) jnop kaʼiytik, 3) jnopilan ta koʼtantik sok 4) ya jpas ta jkuxlejaltik. Ta patil ya kilbeytik skʼoplal te bin ya skʼan ya yal ta jujun  chajp. * Jaʼnix jich ya kilbeytik skʼoplal ta swenta te ajwalil David sok te jpuk-kʼop Pablo.

3. Te kʼalal mato xjajchotik ta skʼoponel-a te Biblia, ¿bin ya skʼan jpastik, sok bin yuʼun?

³ 1) Skʼoponel Dios. Te kʼalal mato xjajch jkʼopontik-a te Biblia, akʼa jkʼanbeytik koltayel te Jehová yuʼun jich ya xkʼot ta koʼtantik-a. Jich bitʼil teme yakotik ta sleel bin-utʼil ta chapel jun wokolil, jkʼanbeytik te Jehová te yakuk skoltayotik ta stael ta sKʼop te bin-utʼil ta pasel (Filip. 4:6, 7; Sant. 1:5).

4. ¿Bin ya skoltayotik yuʼun ya xkʼot ta koʼtantik te bin ya jkʼopontik ta Biblia?

⁴ 2) Jnop kaʼiytik. Te kʼalal ay bin ya jnop ta jpensartik, jaʼ jun mukʼul majtanil yuʼun te Jehová. Te kʼalal ya jkʼopontik te Biblia, jnop kaʼiytik te bin yak ta kʼoel ta pasel sok te teyuk ya kaʼiy jbatik-ae. Jpastik tulan ta yilel te bin la yil sok te bin yaʼiyel la yaʼiy sba te machʼa yak ta cholbeyel skʼoplale.

5. ¿Bin-a te snopilanel ta koʼtantik sok bin ya skoltayotik ta spasel?

⁵ 3) Jnopilan ta koʼtantik. Jaʼ te ya jnopilan ta koʼtantik te bin ya jkʼopontik sok te bin ya snojptesotik. Ya skoltayotik yuʼun ya xkʼot ta lek ta koʼtantik te bin yakotik ta skʼoponel. Teme maba ya jnopilan ta koʼtantik te bin ya jkʼopontik ta Biblia, jich kʼoem te bitʼil maba ya yichʼ spisil te bintik ya yichʼ jun weʼelil yuʼun bujtsʼan ya xlokʼ-a. Te bin ya skoltayotike, jaʼ te ya jnopilan ta koʼtantik te bin sujtib ya kakʼbeytik te jojkʼoyeletik ini: «¿Bin la spas te machʼa la jkʼoponbeytik skʼoplal ta Biblia yuʼun la schajpan te bin yak ta kʼaxel ta stojole? ¿Bin-utʼil koltayot yuʼun te Jehová? ¿Bin-utʼil ya xjuʼ ya skoltayon te bin jnopoj yuʼun ya stsʼijk kuʼun-a te wokoliletik?».

6. ¿Bin yuʼun ya skʼan ya jpastik ta jkuxlejaltik te bin ya jnoptike?

⁶ 4) Ya jpas ta jkuxlejaltik. Te Jesús la yal teme maba ya jpas ta jkuxlejaltik te bin ya jnoptike, jichotik bitʼil jtul winik te ya spas sna ta yajkʼolal jiʼ. Tulan ya x-aʼtej, pero tojolnax te bin la spase, melel kʼalal ya xtal tulan jaʼal o snojel jaʼ, ya xjin te nae (Mat. 7:24-27). Jaʼ pajal kʼoem sok teme ya jkʼopontik Dios, ya jnop kaʼiytik sok ya jnopilan ta koʼtantik pero teme maba ya jpas ta jkuxlejaltik te bin ya jnoptike, maʼyuk skʼoplal ya xkʼot spisil, te kʼalal ya jsitintaytik tulan wokolil, ya xjuʼ ya xpejkʼaj te schʼuunel koʼtantik. Yan teme ya jnoptik sok te ya jpastik ta jkuxlejaltik te bin ya jnoptik ta Biblia, leknax te bin ya jtatik ta nopel, ay slamalil koʼtantik sok ya xtulanubxan te schʼuunel koʼtantik (Is. 48:17, 18). Te kʼalal ya kilbeytik skʼoplal ta swenta te ajwalil David akʼa jtʼuntik te bin chanchajp la kilbeytikix skʼoplale.

7. ¿Machʼa ya kilbeytik skʼoplal?

⁷ ¿Aybal bin ma lek spasbeyejotik jtul kamigotik o jtul jfamiliatik? Teme aye, lek teme ya kilbeytik skʼoplal te bin la spas te Absalón, te snichʼan te ajwalil David. Te Absalón ay bin ma lek la spasbey te state sok kʼan spojbey te bitʼil ay ta ajwalile (2 Sam. 15:5-14, 31; 18:6-14).

8. ¿Bin ya xjuʼ ya jpastik yuʼun ya skoltayotik te Jehová?

⁸ 1) Skʼoponel Dios. Te kʼalal ya jkʼopontik te relato, kalbeytik te Jehová te bin-utʼil ya kaʼiy jbatik yuʼun te bin ma lek la kichʼtik pasbeyele (Sal. 6:6-9). Ta  patil jkʼanbeytik koltayel yuʼun ya jtatik tekstoetik te ya yakʼbotik kiltik bin ya skʼan ya jpastik.

9. ¿Bin-utʼil ya achol te bin kʼax ta stojol te David sok te Absalón?

⁹ 2) Jnop kaʼiytik. Jnop kaʼiytik te bin kʼot ta pasel sok te bin-utʼil la yaʼiy sba yuʼun te ajwalil David. Te Absalón bayal jaʼbil la spas tulan yuʼun ya yuʼuntaybey yoʼtan te ants winiketik (2 Sam. 15:7). Kʼalal la yil te yorailix-a la stikun jtsajtaywanejetik ta Israel, yuʼun jaʼ ya skʼan te jaʼ ya stsaot ta ajwalil. La smonbey yoʼtan te Ahitofel, te jaʼ mero yamigo te David sok te jaʼ tojobteswanej yuʼun. Te Absalón stukelnax la yotses sba ta ajwalil, kʼan stsak sok kʼan smil te David te ayniwan ta tulan chamel-a (Sal. 41:1-9). Kʼalal la yaʼiy stojol te David, an bael ta Jerusalén. Te soldadoetik yuʼun te Absalón, la yochintayik te swiniktak te David, la yichʼik tsalel te soldadoetik sok la yichʼ milel te Absalón.

10. ¿Bin ma la spas te ajwalil David?

¹⁰ Jnop kaʼiytik bin-utʼil la yaʼiy sba te David, melel kʼux ta yoʼtan te Absalón sok ay smukʼul yoʼtan ta stojol te Ahitofel. Pero maba jun yoʼtan la yakʼ sbaik, la yakʼbeyik bayal swokol sok kʼan smilik. Te David juʼniwan te lajuk snop ta stojol te yamigotak te jun la yakʼ sbaik sok te Absalón. Juʼ te jaʼuknax la snop te bin yaʼiyel la yaʼiy sba sok te stukeluk lokʼ bael ta anel o ma la snaʼix te bin la spas, laniwan yakʼ sba ta tsalel te jichuke, pero ma jichuk la spas. Juʼ yuʼun stsalel, te wokolile. ¿Binwan-utʼil la spas?

11. ¿Bin la spas te ajwalil David te kʼalal yak ta kʼaxel tulan swokol-ae?

¹¹ 3) Jnopilan ta koʼtantik. ¿Bin ya xjuʼ ya jnoptik ta swenta te relato ini? Ya xjuʼ ya jojkʼoybey jbatik: «¿Bin la spas te David ta skoltayel sba?». Ma la yakʼ te uʼuntayot yuʼun te xiwel sok ma orauknax la sta ta nopel te bin la spase, jaʼ la skʼopon te Jehová ta skʼanbeyel koltayel. Jaʼnix jich la skʼanbey koltayel te yamigotak. Oranax ya spas te bin ya sta ta nopele. Manchukme kʼux la yaʼiy te bin pasbote, maba ilin sok maba chʼay te smukʼul yoʼtan. Te bin la spase, jaʼ te la smukʼulinxan yoʼtan te Jehová sok te yamigotak.

12. ¿Bin-utʼil koltayot yuʼun Jehová te David?

¹² ¿Bin-utʼil koltayot yuʼun Jehová te David? Teme ya jlebeytikxan skʼoplal, ya jnoptik bin-utʼil te Jehová la yakʼbey yip te David ta stsʼikel te swokole (Sal. 3:1-8; sjajchibal aʼiyej). Te Jehová la yakʼbey bendision te bin la sta ta nopel te David sok la skoltaybey te yamigotak te kʼalal yakik ta guerra.

13. ¿Bin-utʼil ya jnopbeytik stalel te David teme ay machʼa ay bin ma lek ya spasbotik? (Mateo 18:15-17).

¹³ 4) Ya jpas ta jkuxlejaltik. Jojkʼoybey jbatik: «¿Bin-utʼil ya xjuʼ ya jtʼunbey te ejemplo yuʼun te David?». Jun te bin ya skʼan pasele, jaʼ te ya jchajpantik ta ora te kʼope. Jaʼ chikan te bin ya xtal ta jtojoltik, ya xjuʼ ya jpastik te bin la yal te Jesús te ya jtatik ta Mateo kapitulo 18 (kʼopona Mateo 18:15-17). Pero mame jaʼuk ya stsalotik te bin yaʼiyel ya kaʼiy jbatik sok te bin ya jtatik ta nopel spasel. Jkʼanbeytik te Jehová slamalil koʼtantik sok jpʼijiltik ta sitintayel te wokolil. Akʼa smukʼulin koʼtantik te kamigotaktik sok akʼa jchʼuuntik te koltayel ya yakʼbotike (Prov. 17:17). Te binxan mukʼ skʼoplale, jaʼ te ya jpastik te bin ya yalbotik te Jehová ta Biblia (Prov. 3:5, 6).

14. ¿Bin-ora ya xjuʼ ya skoltayotik te bin yal te 2 Timoteo 1:12-16 sok 4:6-11, 17-22?

¹⁴ ¿Yabal skontrainotik te jfamiliatik te ya x-abatinotik ta stojol te Jehová? O ¿ayotikbal ta kuxinel ta jun nasion te banti makbil te kaʼteltike? Teme jiche, ya xjuʼ ya skoltayotik te 2 Timoteo 1:12-16 sok 4:6-11, 17-22. * Jaʼ la stsʼibay te Pablo te kʼalal ay ta chukel-ae.

15. ¿Bin ya xjuʼ ya jkʼanbeytik te Jehová?

¹⁵ 1) Skʼoponel Dios. Te kʼalal mato jkʼoponojtik-a te bersikuloetik, kalbeytik ta jamal te Jehová te jwokoltik sok te bin yaʼiyel ya kaʼiy jbatik. Jkʼanbeytik te Jehová te yakuk skoltayotik ta stael ta skuxlejal te Pablo relatoetik te ya xjuʼ ya skoltayotik.

16. ¿Bin yak ta kʼaxel ta stojol te Pablo?

¹⁶ 2) Jnop kaʼiytik. Jnop kaʼiytik te ayukotik ta chukel ta Roma jich bitʼil te Pablo. Manchukme ay yichʼojix chukel-a, pero ta ora ini ya snaʼ te ya yichʼix milel, ijkitayot yuʼun te sjoʼtak sok lujbenix ya yaʼiy sba (2 Tim. 1:15).

17. ¿Bin juʼ te lajuk spas te Pablo?

¹⁷ Te jaʼuk bajt ta yoʼtan te bin kʼax ta stojol ta namey te Pablo sok te yanuk te bin la sta ta nopel spasele, maba bajt ta chukel te jichuke. Juʼ te la yilintay te winiketik ta Asia te ijkitayot yuʼune sok te ma la smukʼulinix yoʼtan te yantik yamigotak, pero ma jichuk la spas. ¿Bin yuʼun te la smukʼulinxan yoʼtan te yamigotak sok te Jehová?

18. ¿Bin yilel stalel la yakʼ ta ilel te Pablo?

¹⁸ 3) Jnopilan ta koʼtantik. Ya xjuʼ ya jojkʼoybey jbatik: «¿Bin la spas te Pablo yuʼun ya skoltay sba?». Manchukme snaʼoj te nopol ya xlajix-ae maba chʼay ta yoʼtan te bin mukʼ skʼoplal, jaʼ te ya yalbey yutsilal te Jehová. Jaʼnix jich la sle bin-utʼil la yakʼbey smukʼul yoʼtan te yantik soknix la skʼopon sok spisil yoʼtan te Jehová (2 Tim. 1:3). Ma jaʼuk bajt ta yoʼtan snopilanel te bitʼil ijkitayot, jaʼ te la yal wokol yuʼun te kʼux aʼiyot sok te koltayot yuʼun te yamigotak. Jaʼnix jich maba la skom sba ta snopel te sKʼop Dios (2 Tim. 3:16, 17; 4:13). Te bin mukʼ skʼoplal ta yoʼtane, jaʼ te kʼux aʼiybil yuʼun te Jehová sok te Jesús, te maba ijkitayot sok te ya x-akʼbot bayal bendision yuʼun te jun yoʼtan la yakʼ sbae.

19. ¿Bin-utʼil koltayot yuʼun Jehová te Pablo?

¹⁹ Te Jehová la yalbey te Pablo te ya yichʼ kontrainel te bitʼil jaʼ j-abat yuʼune (Hech. 21:11-13). ¿Bin-utʼil koltayot yuʼun Jehová te Pablo? Jaʼ te la sjakʼbey te skʼope sok la yakʼbey yip yoʼtan (2 Tim. 4:17). Jaʼnix jich la yakʼbey snaʼ te Pablo te ya yichʼ majtantesel te bitʼil la spas tulan sok la stijbey yoʼtan te yamigotak yuʼun yakuk yakʼbeyik koltayel te Pablo.

20. ¿Bin-utʼil ya jkʼayinbeytik te schʼuunel yoʼtan te Pablo te tsʼibaybil ta Romanos 8:38, 39?

²⁰ 4) Ya jpas ta jkuxlejaltik. Jojkʼoybey jbatik: «¿Bin-utʼil ya xjuʼ ya jkʼayinbey stalel te Pablo?». Jich bitʼil kʼax ta stojol te Pablo, jnaʼojtik te ya kichʼtik kontrainel yuʼun te schʼuunel koʼtantike (Mar. 10:29, 30). Yuʼun jun koʼtan ya kakʼ jbatik, ya skʼan jkʼopontik te Jehová sok spisil koʼtantik sok te yakuk jnoptik te Biblia. Mame xchʼay ta koʼtantik te bin mukʼ skʼoplale, jaʼ te ya kalbeytik yutsil skʼoplal te Jehová. Jnaʼojtik ta lek te Jehová maʼyuk bin ora ya yijkitayotik sok te maʼyuk bin ya xmakot yuʼun ya yakʼ ta ilel te skʼuxul  yoʼtan ta jtojoltik (kʼopona Romanos 8:38, 39; Heb. 13:5, 6).

21. ¿Bin koltayot te Aya sok te Hector ta sitintayel te swokolike?

²¹ Chikan bin yak ta kʼaxel ta jtojoltik, te ejemploetik ta Biblia ya xjuʼ ya yakʼ yip koʼtantik. Te Aya te jaʼ prekursora ta Japón, ya yal te jaʼ koltayot te ejemplo yuʼun te Jonás ta stsalel te xiwel ya yaʼiy te kʼalal ya xlokʼ ta scholel skʼop Dios. Te Hector jtul jchʼiel kerem ta Indonesia te ya x-abatin ta stojol Jehová manchukme ma Testigouk te smeʼ stat, ya yal te jaʼ koltayot te ejemplo yuʼun te Rut te ya snopxan ta stojol te Jehová sok te ya x-abatin ta stojole.

22. ¿Bin-utʼil ya skoltayotik te bideoetik, audiodramaetik sok te libro Ejemplos de fe?

²² ¿Banti ya jtatik ejemploetik ta Biblia te ya yakʼ yip koʼtantik? Ta bideoetik, audiodramaetik sok ta libro Ejemplos de fe. * Te kʼalal mato kilojtik, kaʼiyojtik sok jkʼoponojtik-a te informasion, jkʼanbeytik te Jehová te yakuk skoltayotik ta stael te bin ya skoltayotik ta jkuxlejaltik. Jnop kaʼiytik te joʼukotik te machʼa yak ta yalbeyel skʼoplal te Biblia. Akʼa jnopilan ta koʼtantik te bin la spas sok te bin-utʼil koltayot yuʼun te Jehová ta sitintayel te swokole. Ta patil jpastik ta jkuxlejaltik te bin la jnoptike. Jaʼnix jich kalbeytik wokol te Jehová yuʼun te koltayel ya yakʼbotik sok ya kakʼtik ta ilel te kʼalal ya kakʼbeytik smukʼul yoʼtan sok ya jkoltaytik te yantike.

23. ¿Bin ya yalbotik te Jehová ta Isaías 41:10, 13?

²³ Te Satanás ay ta skʼab te balumilale, jaʼ yuʼun ayniwan tulan o ay baeltik te ma jnaʼtik te bin ya jpastike (2 Tim. 3:1). Pero ma skʼan ya xiwotik, melel te Jehová ya snaʼ te bin yak ta kʼaxel ta jtojoltik. Kʼalal ya jkʼantik koltayel, te Jehová ya stsakotik ta swaʼel kʼab (kʼopona Isaías 41:10, 13). Jnaʼojtik te ya skoltayotik te Jehová sok te Biblia ya yakʼbotik yip koʼtantik ta sitintayel te wokolil ya xtal ta jtojoltik.