1. Jich bitʼil la yal te Mateo 24:9, ¿bin yuʼun ma yanuknax ya kiltik-a te ya skontrainotik te balumilale?

TE Jehová la spasotik yuʼun ayuk skʼuxul koʼtantik sok te kʼuxuk aʼiybilotike. Jaʼ yuʼun kʼux ya kaʼiytik sok yaniwan xiwotik te kʼalal ay machʼa ya skontrainotik. Jtul ermana te ay ta Europa te Georgina sbiil, jich ya yal: «Te kʼalal ay 14 kaʼbilal-ae, te jmama la skontrainon yuʼun te ya x-abatinon ta stojol te Jehová. Jich la kaʼiy ta pʼajbilon sok la jnop te joʼon-niwan ma lekone». * Jtul ermano te Danilo sbiil jich ya yal: «Kʼalal la yutonik sok la smajonik te soldadoetik ta skaj te testigoon yuʼun Jehová, xiwon sok maʼyuk jkʼoplal la kaʼiy jba». Manchukme kʼux ya kaʼiytik, pero ma skʼan te yan-nax ya kiltik-ae, melel jich la yal te Jesús te ya xkʼot ta pasele (kʼopona Mateo 24:9).

2, 3. ¿Bin yuʼun ya skontrainotik te ants winiketik?

² Ma yuʼunukotik te balumilal, jaʼ yuʼun ya kichʼtik kontrainel jich bitʼil kʼax ta stojol te Jesús (Juan 15:17-19). Manchukme ya kichʼtik ta wenta te ajwaliletik, ma jchʼuuntaytik soknix ma xkichʼtik ta mukʼ te bin ya yichʼik ta mukʼe. Jaʼnax jDiostik stukel te Jehová sok ya jkoltaybeytik skʼoplal te Wentainel yuʼun te Dios, yan te Satanás sok te machʼatik ya xtʼunot yuʼun ya skontrainik (Gén. 3:1-5, 15). Ya jpuktik ta alel te jaʼnax te Wentainel yuʼun Dios ya slajinbey skʼoplal te wokoliletik sok te nopolix ya slajin te skontratak (Dan. 2: 44; Apoc. 19:19-21). Jaʼ ya x-akʼbot stseʼelil yoʼtanik yuʼun te machʼatik pekʼel yoʼtanik, yan te machʼatik chopolik ma lek ya yaʼiyik (Sal. 37:10, 11).

³ Ya skontrainotik te ants winiketik yuʼun te jaʼ ya jpas ta jkuxlejaltik te bin ya yal te Diose, melel ma jichuk ya spas stukelik. Ta ora ini te ants winiketik lek ya yilikix te bin chopol ta pasel, jich bitʼil la spasik ta Sodoma sok ta Gomorra (Jud. 7). Bayal ants winiketik ya slabanotik sok ma skʼan ya yilotikix ta swenta te jaʼ ya jpastik te bin ya yal te Biblia (1 Ped. 4:3, 4).

4. ¿Bin taleliletik ya skoltayotik yuʼun ya xkujch kuʼuntik te kontrainel?

⁴ ¿Bin taleliletik ya skoltayotik yuʼun ya xkujch kuʼuntik te kontrainel sok te labanele? Ya skʼan ya schʼuun koʼtantik te jaʼ ya skoltayotik te Jehová. Te chʼuunel oʼtanil jich koem bitʼil majkilal te ya xjuʼ ya stupʼbey «spisil scʼahcʼal yaʼtejib a te machʼa chopole» (Efes. 6:16). Jaʼnix jich ya skʼan te ayuk skʼuxul koʼtantik, melel te kʼuxul oʼtanil «ma xʼilin» sok ya xkujch yuʼun spisil te bin ma lek ya kichʼtik pasbeyel (1 Cor. 13:4-7, 13). Kiltik bin-utʼil ya skoltayotik ta sitintayel te kontrainel te skʼuxul koʼtantik ta stojol te Jehová, ta stojol te kermanotaktik sok ta stojol te jkontrataktik.

5. ¿Bin-utʼil koltayot te Jesús ta swenta te kʼux ta yoʼtan te sTate?

⁵ Te kʼalal mato ya yichʼ milel-a te Jesús yuʼun te skontratak, jich la yalbey te jnopojeletik yuʼun: «Pero ya jpas te bin la spason tal ta mandar te Tatil scuenta yuʼun ya snaʼic te machʼatic ayic ta bahlumilal te cʼux ta coʼtan te Tatile» (Juan 14:31). Te skʼuxul yoʼtan te Jesús ta stojol te Jehová, jaʼ koltayot ta sitintayel te wokoliletik. Jaʼnix jichotik-euk te skʼuxul koʼtantik ta stojol te Jehová, jaʼ ya skoltayotik.

6. Jich bitʼil la yal te Romanos 5:3-5, ¿bin-utʼil ya kaʼiy jbatik te kʼalal ya kichʼtik kontrainel?

⁶ Te skʼuxul koʼtantik ta stojol te Jehová, jaʼ skoltayojotik yuʼun ya xkujch kuʼuntik te kontrainel. Jich bitʼil te jpuk-kʼopetik kʼotik ta stojol te jchajpanwanejetik albotik te yakuk yijkitayik te scholel skʼop Dios, pero ta skaj te ay skʼuxul yoʼtanik ta stojol te Jehová, jaʼ la schʼuunbeyik te «smandar Dios te bin utʼil te smandar winiquetique» (Hech. 5:29; 1 Juan 5:3). Jaʼnix jich ta ora ini te skʼuxul yoʼtan te kermanotaktik ta stojol te Jehová, jaʼ ya xkoltayotik yuʼun ya xkujch yuʼunik te utsʼinel sok te kontrainel yuʼun te chopol ajwaliletik. Te kʼalal ya skontrainotik te ants winiketik, ma xchebaj koʼtantik yuʼun, jaʼ ya yakʼ stseʼelil koʼtantik (Hech. 5:41; kʼopona Romanos 5:3-5).

7. ¿Bin ya skʼan ya jpastik te kʼalal ya skontrainotik te jfamiliatik?

⁷ Te bin wokolniwan ya kaʼiytik sitintayel, jaʼ te ya skontrainotik te jfamiliatik. Te kʼalal ya snaʼik stojol te yakotik ta snopel te skʼop Dios, ay ya yalik te la kichʼtik loʼlayel o te sojkemix joltik (paja sok Marcos 3:21). Sok ayniwan ya xkaj yutsʼinotik, pero ma skʼan te yan ya kiltik-ae, melel te Jesús la yal «te scontra te winic ha nix te machʼatic ay yuʼun ta sna» (Mat. 10:36). Manchukme jich-abi, te joʼotik ma jkontraintik te jfamiliatik. Te bitʼil kʼux ya kaʼiytik te Jehová, jich kʼux ya kaʼiytik-euk te yantik (Mat. 22:38, 39). Mame jkʼaxuntaytik te mantaliletik te ay ta Biblia ta skajnax te jaʼ ya jpasbeytik te bin ya skʼan yoʼtan te yantike.

8, 9. ¿Bin koltayot jtul ermana te kʼalal la yichʼ kontrainel?

⁸ Te Georgina te la kalbeytik skʼoplal ta parrafo 1, jun yoʼtan la yakʼ sba manchukme kontrainot yuʼun te smama, jich ya yal:  «Ta jchebaltik jajchotik ta snopel te Biblia sok te Testigoetik. Pero wakeb u ta patil te kʼalal kʼan bookonix ta tsoblejetik, jelon ta jkʼaxel te stalele. La jnaʼ stojol te jaʼ yak ta kʼop sok te machʼatik la yijkitayik ta schʼuunel te Jehová sok jajch skontrainon. Jaʼnix jich ya yuton, ya sniton ta jol, ya stsakon ta jnukʼ sok ya schʼoj bael ta kʼaʼpal te publikasionetik. Pero la kichʼ jaʼ te kʼalal ayix 15 kaʼbilal-a. Yuʼun ya kijkitay-a te Jehová, te jmama la yotseson ta jun reformatorio te banti ya yichʼ chukel te jchʼieletik te ay bin chopol ya spasik. Tey-a ya stuuntesik droga sok ya spasik tulan mulil. Teme jaʼ te machʼa kʼuxotik ta yoʼtan te machʼa ya skontrainotik, jaʼ kʼax wokolxan ta sitintayel».

⁹ Te Georgina ya schol kaʼiytik te bin koltayot yuʼun kujch yuʼun te utsʼinele, jich ya yal: «Te kʼalal jajch skontrainon te jmama, tey ora laj ta kʼoponel kuʼun spisil-a te Biblia. Kʼot ta koʼtan te jaʼ te smelelile sok nopol la kaʼiy jba ta stojol te Jehová. Ta jujun kʼajkʼal ya jkʼopon sok jich ya kaʼiy te ya yaʼiybon te jkʼope. Te kʼalal tey ayon ta kuxinel-a, jtul ermana la yikʼon ta skʼoponel te Biblia ta sna. Te ermanoetik la yakʼbonik smukʼul koʼtan sok jich kʼoon bitʼil sfamiliaik. Tey la jta ta ilel-a te Jehová jaʼ bayalxan yip te bitʼil te machʼa ya skontrainotik».

10. ¿Bin-a te jnaʼojtik ta leke?

¹⁰ Te jpuk-kʼop Pablo la stsʼibay te maʼyuk machʼa «ya spitotic loqʼuel ta stojol te scʼuxul yoʼtan Dios te ay ta scuenta te Cajwaltic Cristo Jesús» (Rom. 8:38, 39). Manchukme ya xkʼax jwokoltik, te Jehová maʼyuk bin ora ya yijkitayotik, ya yakʼbotik smukʼul koʼtantik sok yip koʼtantik. Jich bitʼil te bin kʼax ta stojol te Georgina, jaʼnix jich te Jehová ya yakʼbotik koltayel ta swenta te kermanotaktik.

11. Jich bitʼil la yal te Jesús ta swenta te kʼuxul oʼtanil ta Juan 15:12, 13, ¿bin-utʼil koltayotik te jnopojeletik? Akʼa jun ejemplo.

¹¹ Te kʼalal junxan-nix ajkʼabal ya xlaj-a te Jesús, la yalbey te jnopojeletik yuʼun te talel kʼaxeluk kʼux ya yaʼiy sbaik (kʼopona Juan 15:12, 13). Snaʼoj-a te jaʼ ya xkoltayotik yuʼun jich jun-nax ayik-a sok te yakuk xkujch yuʼunik te kontrainel. Jnop kaʼiytik ta swenta te kongregasion yuʼun Tesalónica, manchukme la yichʼik kontrainel jaʼ ejemplo kʼotik ta swenta te kʼuxul oʼtanil sok te kujch yuʼunike (1 Tes. 1:3, 6, 7).  Te Pablo la stijbey yoʼtanik yuʼun ya yakʼikxan ta ilel kʼuxul oʼtanil (1 Tes. 4:9, 10). Te kʼuxul oʼtanil jaʼ ya xtijbot yoʼtanik yuʼun ya yakʼbeyik smukʼul yoʼtan te machʼatik ayik ta mel-oʼtan sok yuʼun ya skoltayik te machʼa maʼyuk yip yoʼtanik (1 Tes. 5:14). La schʼuunik te bin la yichʼ alel, melel jun jaʼbil ta patil te Pablo jich la yal: «Te scʼuxul awoʼtanic yac ta pʼohlel ta stojol yantic» (2 Tes. 1:3-5). Te skʼuxul yoʼtanik, jaʼ koltayotik ta sitintayel te wokoliletik sok te kontrainel.

12. ¿Bin-utʼil la yakʼik ta ilel skʼuxul yoʼtanik te ermanoetik ta yorail guerra?

¹² Kiltik te bin kʼax ta stojol te Danilo sok te yinam. Te kʼalal kʼax guerra ta slumalik, ma la yijkitay sbaik ta tsoblejetik, lokʼik ta scholel skʼop Dios sok talel kʼaxel la yakʼbey sba sweʼelik sok te ermanoetik. Ta jun buelta kʼot soldadoetik ta sna te Danilo, jich ya yal: «La yalbonik te akʼa kijkitay ta schʼuunel te Jehová, pero ma la jkʼan, jaʼ yuʼun la smajonik sok kʼan smilonik, pero kʼaxel akʼax te bala. Te kʼalal sujtikix bael-ae, la yalik te ya schaʼsujtik tal yuʼun ya stsak yutsʼinik te kiname. Ta oranax te ermanoetik la stikunotik bael ta yan lum. Maʼyuk bin-ora ya schʼay ta koʼtan te skʼuxul yoʼtan la yakʼik ta ilele. Te kʼalal kʼootike, te ermanoetik la yakʼbotik jweʼeltik sok la skoltayotik ta stael kaʼteltik sok jnatik. Te bitʼil jich la spasike, ta patil juʼ la jkoltaytik yantik ermanoetik te jaʼnix jich lokʼik ta snaik ta skaj te guerra». Te skʼuxul yoʼtan te kermanotaktik, jaʼ ya skoltayotik ta sitintayel te kontrainel.

13. ¿Bin-utʼil ya skoltayotik te chʼul espiritu yuʼun ya kichʼtikxan ta mukʼ te Jehová te kʼalal ay machʼa ya skontrainotik?

¹³ Te Jesús la yal te ya skʼan te kʼuxuk ta koʼtantik te jkontrataktik (Mat. 5:44, 45). Ma kʼunuk ta pasel, pero te schʼul espiritu te Jehová jaʼ ya skoltayotik. Te lekil taleliletik ya skoltayotik yuʼun ya xkujch kuʼuntik te kontrainel, jich bitʼil te skʼuxul koʼtantik, te ya xkujch kuʼuntik, yutsil koʼtantik, pekʼel koʼtantik sok te ya xjuʼ skomel jbatik (Gál. 5:22, 23). Te machʼatik ya xkontrainwanik ay jelonem stalelik, jaʼ yuʼun te ya yakʼik ta ilel te lekil taleliletik te jaʼniwan te inamil, te mamalalil, te nichʼanil o te spatxujk sok ay ochikix ta Testigo. Jaʼ yuʼun teme tulan ya kaʼiytik te kʼux ta koʼtantik te jkontratik, akʼa jkʼanbeytik  schʼul espiritu te Jehová (Luc. 11:13). Jaʼ lek te jaʼuk ya jpastik ta spisil-ora te bin ya yal te Diose (Prov. 3:5-7).

14, 15. ¿Bin-utʼil koltayot jtul ermana ta yakʼbeyel yil skʼuxul yoʼtan te smamalal te bin ya yal te Romanos 12:17-21?

¹⁴ Kiltik bin kʼax ta stojol te Yasmín te ay ta kuxinel ta Oriente Medio. Te kʼalal och ta testigo yuʼun Jehová, albot yuʼun te smamalal te la yichʼ loʼlayel sok te akʼa yijkitay ta schʼuunel te Diose. La yichʼ utel yuʼun te smamalal sok la skʼanbey te sfamiliatak, jtul jwolwanej yuʼun jun relijion sok jtul jnaʼojel te yakuk yalbeyik chopol skʼoplal sok akʼbot smulin te jaʼ yak ta xatel te sfamilia. Ta jun buelta bajt ta jun tsoblej yuʼun jaʼnax bajt sbolkʼoptay te ermanoetik. Jaʼ yuʼun ya x-okʼ te Yasmín ta skaj te bayal ya x-utsʼinote.

¹⁵ Akʼbot smukʼul yoʼtan sok yip yoʼtan yuʼun te ermanoetik ta tsoblejetik sok albot yuʼun te ansianoetik te akʼa spas te bin ya yal te Romanos 12:17-21 (kʼopona). Te Yasmín jich ya yal: «Ma kʼunuk la kaʼiy spasel te bin ya yal te Biblia, pero la jkʼanbey koltayel te Jehová sok la jpas tulan-euk. Jaʼ yuʼun te kʼalal te jmamalal sok spasemal yoʼtan ya yakʼbey yabakul te piso, te joʼone ya jkus, te kʼalal ya yuton maʼyuk bin ya kal sok te kʼalal ya stsakot ta chamel, ya jkanantay».

16, 17. ¿Bin ya snojptesat te bin kʼax ta stojol te Yasmín?

¹⁶ Te Yasmín ya schol te ay bin lek lokʼ-a te kʼalal la yakʼbey yil skʼuxul yoʼtan te smamalal jich ya yal: «Jajch yakʼ smukʼul yoʼtan ta jtojol, melel snaʼoj te ma jpas lote. Ya yaʼiybon jkʼop te kʼalal ya kalbeytik skʼoplal ta swenta te skʼop Dios sok akuerdo ay te ayuk lamalkʼinal ta yutil na. Ta ora ini ya stijbonix koʼtan yuʼun ya xboon ta tsoblejetik. Lekix ya kil jbatik, ayix lamalkʼinal sok ay smukʼul koʼtan te yakuk x-och ta skʼop Dios sok te jun-nax ya x-abatinotik ta stojol te Jehová».

¹⁷ Te bin kʼax ta stojol te Yasmín ya yakʼ ta ilel te kʼuxul oʼtanil «spisil wocol ya xcʼax yuʼun», «spisil ya smahliy» sok «spisil ya xcuhch yuʼun» (1 Cor. 13:4, 7). Jaʼ bayalxan yip te kʼuxul oʼtanil te bitʼil te kontrainele. Te kontrainel ya yutsʼin koʼtantik, pero te kʼuxul oʼtanil ya skʼunubtesbey yoʼtan te yantik. Kʼalal ya kakʼtik ta ilel te kʼuxul oʼtanil, ya kakʼbeytik stseʼelil yoʼtan te Jehová. Manchukme yato skontrainotik te ants winiketik, ya xjuʼ te ay stseʼelil koʼtantik. Akʼa kiltik bin-utʼil ta pasel.

18. ¿Bin yuʼun ya xjuʼ tseʼel koʼtantik manchukme ya kichʼtik kontrainel?

¹⁸ Te Jesús jich la yal: «Bayel me awutsilic cʼalal ya spʼajex te ants-winiquetic» (Luc. 6:22). Ma yuʼunuk ya jkʼantik te ya kichʼtik kontrainel o te ya kakʼ jbatik ta utsʼinel. Pero, ¿bin-utʼil ya xjuʼ te ay stseʼelil koʼtantike? Kilbeytik oxeb skʼoplal. Sbabial, te kʼalal ya xkujch kuʼuntik te jwokoltik lek ya yilotik te Dios (1 Ped. 4:13, 14). Schebal, te schʼuunel koʼtantik ya xtulanubxan (1 Ped. 1:7). Yoxebal, ya jtatik jun lekil majtanil jaʼ te kuxlejalil ta sbajtelkʼinal (Rom. 2:6, 7).

19. ¿Bin yuʼun tseʼel yoʼtanik te jpuk-kʼopetik manchukme la yichʼik majel?

¹⁹ Te kʼalal chaʼkuxaj te Jesús, te jpuk-kʼopetik akʼbot stseʼelil yoʼtanik. Manchukme la yichʼik majel sok te albotik te yakuk yijkitayik te scholel skʼop Dios, «tseʼel yoʼtanic yuʼun te lec scʼoblalic ta stojol Dios te bin utʼil aʼbot cʼaxuc swocolic ta utsʼinel» ta skaj te sbiil te Jesús (Hech. 5:40-42). Kʼux ta yoʼtanik te Jesús, melel maba la xiʼik te skontratak sok la yakʼik ta ilel te ay skʼuxul yoʼtanik kʼalal ma la skom sbaik ta scholel skʼop Dios. Ta ora ini bayal ermanoetik maba chebajem yoʼtanik manchukme ya yichʼik kontrainel. Snaʼojik te maʼyuk bin-ora ya schʼay ta yoʼtan te Jehová te bin spasojik sok te skʼuxul yoʼtan ya yakʼik ta ilel ta swenta te sbiile (Heb. 6:10).

20. ¿Bin ya kilbeytik skʼoplal ta yan artikulo?

²⁰ Te bitʼil ayto te kontrainel ta balumilal ini, ya skʼan ya xkujch kuʼuntik (Juan 15:19). Pero ma skʼan ya xiwotik. Jich bitʼil ya kiltik ta yan artikulo, te Jehová ya yakʼbey yip yoʼtan sok ya skanantay te j-abatetik yuʼun (2 Tes. 3:3). Jich yuʼun, kʼuxukxan ta koʼtantik te Jehová, te kermanotaktik soknix te jkontrataktik. Teme jich ya jpastike, jun-nax ayotik, ya xtulanub te schʼuunel koʼtantik, ya kichʼtik ta mukʼ te Jehová sok ya kakʼtik ta ilel te kʼuxul oʼtanil te jaʼ bayalxan yip te bitʼil te kontrainwanej.