1, 2. Teme mato chapalat yuʼun ya awichʼ jaʼ, ¿bin yuʼun ma skʼan te ya xchebaj awoʼtan? (Ilawil te fotoetik te ay ta yelaw te revista).

 TEME awakʼoj ta awoʼtan te ya awichʼ jaʼ, kʼax tseʼel koʼtantik yuʼun. ¿Chapalatbalix yuʼun jich ya apas? Teme chapalatix ya awaʼiy aba sok teme jich ya snop te ancianoetike, mame xjalajat ta snopilanel. Jichme tseʼel awoʼtan ya x-abatinat ta stojol te Jehová.

² ¿Jaxan teme la awichʼ albeyel te mato chapalat yuʼun ya awichʼ jaʼe? O ¿teme mato chapal ya awaʼiy abae? Mame xchebaj awoʼtan. Chikan teme jchʼielat o ayix awaʼbilal, pasaxan tulan yuʼun ya xjuʼ ya awichʼ jaʼ.

3. ¿Bin la yichʼ jojkʼoybeyel te Felipe yuʼun te etíope-winik, pero binwan ya jojkʼoybey jbatik? (Hechos 8:36, 38).

³ (Kʼopona Hechos 8:36, 38). Jtul etíope-winik jich la sjojkʼoybey te Felipe: «¿Aybal bin ya smakon te ya kichʼ jaʼe?». Chikan ta ilel te ya skʼan ya yichʼ jaʼ. Te bitʼil mukʼ skʼoplal te ichʼjaʼ, ¿chapalbalix ta spasel?

4. ¿Bin-utʼil la yakʼ ta ilel te etíope-winik te la skʼan la snopxane?

⁴ Te etíope-winik «kʼot ta Jerusalén ta yichʼel ta mukʼ te Diose» (Hech. 8:27). Jaʼ la schʼuun te bin schʼuunoj te judioetike. Melel snaʼoj te bin ya yal ta Génesis kʼalal ta Malaquías sok tey la snop ta swenta te Jehová. Pero ya skʼan ya snopxan. Jaʼ yuʼun, ¿bin yak ta spasel-a te kʼalal taot ta be yuʼun te Felipee? Yak ta skʼoponel te balbil jun yuʼun te j-alwanej Isaías (Hech. 8:28). Ma orauknax ta ichʼbeyel swentail te bin yak ta skʼoponele. Te etíope-winik ma tikʼuk la yaʼiy-a te bin snopojixe, la skʼan la snopxan.

5. ¿Bin la spas te etíope-winik ta swenta te bin snopojix?

 ⁵ Te etíope-winik «yichʼoj tulan yaʼtel ta swentainbeyel spisil skʼulejal te Candace, te ajwalil ants ta skʼinal Etiopía» (Hech. 8:27). Maniwan ayuk bayal stiempo, melel bayal yaʼtel. Pero la yakʼbey yorail ta yichʼel ta mukʼ te Jehová. Ma tikʼuknax-a te la snop te bin smelelile, ayto binxan la spas. La spas tulan yuʼun kʼot ta Jerusalén ta yichʼel ta mukʼ te Jehová. Bayalniwan been sok la slajin stakʼin, pero te bin ya skʼane jaʼ te yichʼel ta mukʼ te Jehová, manchukme ay swokolil.

6, 7. ¿Bin la spas te etíope-winik yuʼun ya yichʼ yip te skʼuxul yoʼtan ta stojol te Jehová?

⁶ Te Felipe la yakʼbey snop te etíope-winik te bintik mukʼ skʼoplal, jich bitʼil ta swenta te Jesús te jaʼ Mesías (Hech. 8:34, 35). Ya jnaʼtik te tijbot yoʼtan te etíope-winik ta swenta te bin la spas te Jesús ta stojol. ¿Bin ya spasix-a? Juʼniwan te maʼyuk bin la spasxane, te jaʼnax la schʼuun te bin ya schʼuun te judioetik sok te ichʼbil ta mukʼ yuʼune. Pero stsakojix yip te skʼuxul yoʼtan ta stojol te Jehová sok te Jesús, jaʼ yuʼun la snop te ya yichʼ jaʼe sok te ya x-och ta jnopojel yuʼun te Jesús. Te Felipe la yil te chapalix, jaʼ yuʼun la yakʼbey yichʼ jaʼ.

⁷ Te ejemplo yuʼun te etíope-winik ya skoltayat yuʼun ya awichʼ jaʼ. Jichnix ya xjuʼ ya awal sok yip awoʼtan: «¿Aybal bin ya smakon te ya kichʼ jaʼe?». Ta ora ini, yame kiltik bin talelil yuʼun te etíope-winik ya xjuʼ ya anopbey: jaʼ te ya anopxan, te ya apas ta akuxlejal te bin la anop sok te ya awakʼbey yichʼ yip te skʼuxul awoʼtan ta stojol te Jehová.

8. Jich bitʼil ya yal Juan 17:3, ¿bin ya skʼan ya apas?

⁸ (Kʼopona Juan 17:3). ¿Labal stijbat awoʼtan te bin la yal te Jesús yuʼun ya xjajch anop te Biblia? Bayal machʼatik jich kʼaxem ta stojolik. Jaʼnix jich te joʼotike ya stijbotik koʼtantik yuʼun ma jkom jbatik ta snopel te sKʼop Dios. Melel maʼyuk bin-ora ya xlaj koʼtantik ta snaʼbeyel sba te smelelil Diose (Ecl. 3:11). Sbajtelkʼinal ya xbajt jnoptik ta stojol. Te kʼalal ya jnaʼbeytikxan sba te Jehová, ya xnoptsajotikxan ta stojol (Sal. 73:28).

9. ¿Bin ya skʼan ya jpastik teme la jnoptikix te bintik kʼunik ta nopele?

⁹ Kʼalal ya xjajch jnoptik ta swenta te Jehová, jaʼ ya jnoptik te bintik ma tulanuk, jich bitʼil la yal te jpuk-kʼop Pablo «te bintik kʼun ta nopel». Ma jaʼuk yak ta yalel te yuʼun maʼyuk skʼoplal «te bintik  kʼun ta nopel»; jaʼ yak ta yalel te bin pajal kʼoem sok te leche te ya xtuun yuʼun te alaletik (Heb. 5:12; 6:1). Jaʼnix jich la yalbey te jchʼuunjeletik te ma jaʼuknax ya snopik te bin kʼun ta nopele, te jaʼuk ya snopik te bin kʼubul ay ta sKʼop Dios. ¿Yabal yikʼbat awoʼtan ta snopel te bintik kʼubul ay ta sKʼop Diose? ¿Yabal apas tulan yuʼun ya yichʼxan yip te schʼuunel awoʼtan, ta snopelxan ta swenta te Jehová sok te skʼanojel yoʼtane?

10. ¿Bin yuʼun ay machʼatik wokol ya yaʼiyik te bin ya snopik?

¹⁰ Ayniwan machʼatik wokol ya yaʼiyik te ay bin ya snopik. ¿Jaxan te jaʼate? ¿Labal awichʼ nojptesel ta skʼoponel sok ta snopel jun te kʼalal ayat ta escuela-a? ¿Labal amulan snopel? O ¿jich la awaʼiyik te chʼajiltik sba snopele? Teme jiche, mame jaʼukatnax. Pero, te Jehová ya skoltayat. Kʼax toj stukel sok jaʼ lekil Jpʼijubteswanej.

11. ¿Bin yuʼun te jaʼ Mukʼul Jpʼijubteswanej te Jehová?

¹¹ Te Jehová ya yal te jaʼ Mukʼul Jpʼijubteswanej (Is. 30:20, 21). Jaʼ Jpʼijubteswanej te lamal yoʼtan, lek yoʼtan, te ya x-ichʼawan ta wenta sok te spisil-ora jaʼ ya yil te bin lek ya spasik te machʼatik ya spʼijubteslan (Sal. 130:3). Maʼyuk bin ya yakʼbotik jpastik te bin ma xjuʼ kuʼuntike. Ayuk ta koʼtantik te jaʼ te machʼa la schajpan te jchinamtik, te jaʼ mukʼul majtanil (Sal. 139:14). Jaʼnix jich la yakʼ ta koʼtantik te ay bin ya jkʼan ya jnoptik, te ma jkom jbatik ta snopel sok te yakuk jmulantik. Jaʼ yuʼun ta ora ini ya skʼan te yakuk jmulantik snopel te bin ay ta sKʼop Dios (1 Ped. 2:2). ¿Bin ya xjuʼ ya apas? Akʼa ta awoʼtan te bin ya akʼan ya apase, kʼopona sok nopa ta spisil-ora te Biblia (Jos. 1:8). Ta swenta te koltayel yuʼun te Jehová, yame amulanxan skʼoponel te Biblia sok te ya akʼan ya anopxan ta stojole.

12. ¿Bin yuʼun ya skʼan ya jnoptik ta swenta te skuxlejal te Jesús sok te bitʼil la schol skʼop Dios?

¹² Pasa tulan ta snopilanel ta awoʼtan ta swenta te skuxlejal te Jesús sok te bitʼil la schol skʼop Dios. Jich bitʼil te chujkultik sba te kuxinel ta ora ini, mukʼ skʼoplal te ya jtʼunbeytik te stalel te Cristo yuʼun ya x-abatinotik ta stojol te Jehová (1 Ped. 2:21). Te Jesús jamal la yalbey te jnopojeletik te ya sta swokolik (Luc. 14:27, 28). Pero snaʼoj te jaʼnix jich jun yoʼtan ya x-ayinik-euk (Juan 16:33). Nopa ta swenta skuxlejal te Jesús sok akʼa ta awoʼtan te ya akʼayinbey te stalel ta jujun kʼajkʼal.

13. ¿Bin-a te ya akʼanbeyxan te Jehová sok bin yuʼun?

¹³ Te kʼalal ay bin ya jnoptike, ma jaʼuknax ya jkʼantik yuʼun ya jtatik jpʼijiltik. Te bin ya jkʼantike jaʼ te ya jnaʼbeytik sba te Jehová, te kʼuxuk ta koʼtantik sok te ayuk schʼuunel koʼtantik ta stojol (1 Cor. 8:1-3). Mame xa akom aba ta snaʼbeyelxan sba te Jehová, sok mame xa akom aba ta skʼanelxan schʼuunel awoʼtan (Luc. 17:5). Sok slekil yoʼtan ya yakʼbat te bin ya akʼanbeye. Teme yichʼoj yip te schʼuunel awoʼtan ta swenta te bin ya yakʼ ta nopel te Dios, jichme ya xchʼixan te schʼuunel awoʼtan (Sant. 2:26).

14. ¿Bin-utʼil la yakʼ ta naʼel te jpuk-kʼop Pedro te kʼax mukʼ skʼoplal te yakuk jpastik te bin ya jnoptike? (Jaʼnix jich ilawil te dibujo).

¹⁴ Te jpuk-kʼop Pedro la yal te mukʼ skʼoplal te ya skʼan ya spas ta skuxlejalik te  bin ya snopik te jnopojeletik yuʼun te Cristo. Jich la yakʼ ta nopel te kʼalal la yal te ejemplo yuʼun te Noé. Te Jehová la yalbey te Noé te ya xtal pulemal yuʼun ya slajin spisil te chopol ants winiketik ta yorail-abi. Pero ma tikʼuk-a te ya snaʼik te bin ya xkʼot ta pasel. Te Noé sok te sfamilia ya skʼan te ay bin ya spasik yuʼun ya xkolik-a. Te Pedro la yal «te kʼalal yak ta pasel-a te arca» jaʼ la yalbey skʼoplal te kʼalal mato xtal-a te Pulemal (1 Ped. 3:20). Te Noé sok te sfamilia jich la spasik te bitʼil albot yuʼun te Jehová sok la spasik te mukʼul arca (Heb. 11:7). Te Pedro la spajaltaybey skʼoplal te bin la spas te Noé sok te ichʼjaʼ. Jich la yal: «Jaʼ pajal sok te ichʼjaʼ te ya yakʼbeyex akolelik ta ora ini» (1 Ped. 3:21). Te bitʼil yakat ta schajpanel aba yuʼun ya awichʼ jaʼ, jaʼ pajal sok te bin la spas te Noé sok te sfamilia te kʼalal la spasik te arca. ¿Bin ya skʼan ya apas yuʼun ya awichʼ jaʼ?

15. ¿Bin smakbeyoj skʼoplal te smelelil sujtesel oʼtanil?

¹⁵ Te bin ya skʼan ya jpastike, jaʼ te ya jsujtes koʼtantik ta smelelil ta swenta te jmultik (Hech. 2:37, 38). Te smelelil sujtesel oʼtanil smakojbey skʼoplal te jkʼaxel ya jeltaytik te jtaleltik. ¿Labal awijkitayix te bintik ma smulan te Jehová, jich bitʼil te antsiwej o antsinel, snukʼel may, yalel chopolkʼop o te bintik ma lek? (1 Cor. 6:9, 10; 2 Cor. 7:1; Efes. 4:29). Teme mato apasoje, pasa tulan ta yijkitayel. Kʼopojan sok te machʼa ya yakʼbat nojptesel ta Biblia o sok te ancianoetik teme ya akʼan koltayel sok tojobtesel. Teme jchʼielato sok teme ayat ta nainel sok te ameʼ atat, ya xjuʼ ya akʼanbey koltayel yuʼun ya awijkitay te bin kʼayemat ta spasel te ya smakat yuʼun ya awichʼ jaʼ.

16. ¿Bin smakojbey skʼoplal te kʼayemukotik ta spasel te aʼteliletik yuʼun te Diose?

¹⁶ Jaʼnix jich, mukʼ skʼoplal te kʼayemukat ta spasel te aʼteliletik yuʼun te Diose. Jich bitʼil te tsoblejetik sok yakʼel acomentario (Heb. 10:24, 25). Teme ochatix ta publicador, mame xa akom aba ta scholel te skʼop Dios. Teme jich ya apase, yame amulanxan spasel (2 Tim. 4:5).  Teme jchʼielato sok teme ayat ta nainel sok te ameʼ atat, jojkʼoybeya aba ini: «¿Spisilbal-ora ya yalbonik te ya skʼan ya xboon ta tsoblejetik o ta scholel skʼop Dios? ¿Yabal xlokʼ ta koʼtan spasel?». Teme lokʼem tal ta awoʼtan spasel, ya awakʼ ta ilel te ay schʼuunel awoʼtan, te ya awal wokol sok te kʼux ta awoʼtan te Jehová. Teme ya akʼaytes aba ta spasel te aʼteliletik yuʼun te Dios, jich ya awakʼ ta ilel te awichʼoj ta mukʼ sok jich kʼoem te ya awakʼbey majtaniletik te Jehová (2 Ped. 3:11; Heb. 13:15). Te Jehová ya smulan te ya kakʼbeytik majtanil sok spisil koʼtantik, ma yuʼunuk ya sujotik (paja sok 2 Corintios 9:7). Tseʼel koʼtantik te ya kakʼbeytik te bin lek te Jehová.

17, 18. ¿Bin talelil ya skoltayat yuʼun ya awichʼ jaʼ sok bin yuʼun? (Proverbios 3:3-6).

¹⁷ Teme anopoj ya awichʼ jaʼ, ayniwan bintik ya asitintay. Jich bitʼil te ya awichʼ labanel o ya awichʼ kontrainel (2 Tim. 3:12). O yakatniwan ta spasel tulan ta yijkitayel te bin ma lek ya apase, pero ayniwan baeltik ya achaʼpas. Yaniwan anop te ma chapalat yuʼun ya awichʼ jaʼ, sok te ya amel awoʼtan yuʼun. ¿Bin ya skoltayat yuʼun ma xchebaj awoʼtan? Jun talelil te mukʼ skʼoplal, jaʼ te kʼuxul oʼtanil ta stojol te Jehová.

¹⁸ Te skʼuxul awoʼtan ta stojol te Jehová jaʼ te bin mukʼ skʼoplal awuʼun (kʼopona Proverbios 3:3-6). Teme kʼax kʼux ta awoʼtan te Jehová, jaʼ ya skoltayat yuʼun ya xkujch awuʼun ta yorail wokol. Te Biblia bayal buelta ya yal te Jehová ya yakʼbey yil skʼuxul oʼtanil te j-abatetik yuʼun. Jaʼ ya skʼan ya yal te maʼyuk bin-ora ya yijkitay sok te spisil-ora kʼux ta yoʼtan te j-abatetik yuʼun (Sal. 100:5). Te jich pasbilat ta slokʼomba Dios (Gén. 1:26). Jich yuʼun, ¿bin-utʼil ya awakʼ ta ilel te kʼuxul oʼtanil ini?

19. ¿Bin ya xjuʼ ya apas yuʼun ya awalbey wokol te Jehová ta swenta te bin spasoj ta atojol? (Gálatas 2:20).

¹⁹ Sbabial, snaʼel yalel wokol (1 Tes. 5:18). Jojkʼoybeya aba jujun kʼajkʼal ini: «¿Bin-utʼil ya yakʼbon kil te kʼuxon ta yoʼtan te Jehová ta kʼajkʼal ini?». Ta patil, te kʼalal ya akʼopon, albeya wokol yuʼun te bin la spas ta atojole. Mukʼuk skʼoplal awuʼun te skʼuxul yoʼtan ta atojol, jich te bitʼil  la yil te jpuk-kʼop Pablo (kʼopona Gálatas 2:20). Jojkʼoybeya aba ini: «¿Yabal kakʼbey yil te kʼux ta koʼtan te Jehová?». Te skʼuxul awoʼtan ta stojol yame skoltayat yuʼun maba ya stsalat te mulil sok yuʼun ya xkujch awuʼun biluk wokolil soknix te ya apasxan te aʼteliletik yuʼun te Diose. Jich ya awakʼ ta ilel ta jujun kʼajkʼal te kʼux ta awoʼtan te aTat te ay ta chʼulchan.

20. ¿Bin smakbeyoj skʼoplal te ya kakʼ jbatik ta stojol te Jehová, sok bin yuʼun te mukʼ skʼoplal te jich ya jpastik?

²⁰ Ta patil, te bitʼil stsakoj yip skʼuxul awoʼtan ta stojol te Jehová ya stijbat awoʼtan ta yalbeyel ta jun oración te ya awakʼix aba ta stojol. Te kʼalal jich ya apase, yuʼunat sbajtelkʼinal ya xkʼoat. Kʼalal ya awakʼ aba ta stojol te Jehová, ya awalbey ta jamal te spisil-ora ya x-abatinat ta stojol manchukme ta yorail wokol. Jaʼ te bin jamal ya kaltik jun-nax buelta ta jkuxlejaltik. Melel kʼax mukʼ skʼoplal, pero ayuk ta awoʼtan ini: ta spisil te bintik lek ya ata ta nopel spasel ta akuxlejal, te bin mukʼxan skʼoplale jaʼ te ya awakʼ akuxlejal ta stojol te Jehová (Sal. 50:14). Te Satanás ya skʼan slajin te skʼuxul awoʼtan ta stojol te Jehová yuʼun ya awijkitay te abatinel ta stojol. Pero mame xa awakʼ te jich ya xkʼot ta pasele (Job 27:5). Te skʼuxul awoʼtan ta stojol te Jehová ya skoltayat yuʼun ya akʼotes ta pasel te bin jamal awaloj sok te ya xnoptsajatxan ta stojol.

21. ¿Bin yuʼun ya kaltik te jaʼtonax sjajchibal te ichʼjaʼe?

²¹ Kʼalal la awakʼix aba ta stojol te Jehová, kʼopojan sok te ancianoetik ta swenta te binxan ya skʼan ya apas. Pero ayukme ta awoʼtan ini, te ichʼjaʼe mame teyuk ya xlaj skʼoplal-a, jaʼtonaxme sjajchibal te abatinel ta stojol te Jehová ta sbajtelkʼinal. Jaʼ yuʼun, jaʼ yorail te ya awakʼbey yichʼ yip te skʼuxul awoʼtan ta stojol te aTat te ay ta chʼulchan sok te ayuk bin ya apasxan yuʼun ya yichʼxan yip te skʼuxul awoʼtan ta jujun kʼajkʼal. Jaʼme ya skoltayat yuʼun ya xkʼot skʼajkʼalel te ya awichʼ jaʼ, te maʼyuk bin-ora ya xchʼay ta awoʼtan. Pero, jaʼnaxme sjajchibal. Spisilukme-ora akʼa yichʼxan yip te skʼuxul awoʼtan ta stojol te Jehová sok te sNichʼan.