1, 2. 1) ¿Bin ya xkʼot ta pasel te kʼalal ay machʼa ya yichʼ jaʼ? 2) ¿Bin ya kilbeytik skʼoplal ta artículo ini?

 TE KʼALAL ya yakʼbeyik sujtib te cheb jojkʼoyeletik te ya yichʼik pasbeyele, ya sjakʼik sok spisil yoʼtanik. Te sfamiliaik sok te yamigotak kʼax tseʼel yoʼtanik. Te kʼalal la yichʼikix jaʼ-ae, chikan ta sit yelawik te kʼax tseʼel yoʼtanik sok tulan ya spakʼ skʼabik te machʼatik yakik ta yilele. Ta jujun semana bayal ta mil te machʼatik jich ya spasike. Jich ya x-ochik ta testigo yuʼun Jehová.

² Teme yakat ta snopel te ya awichʼ jaʼ, ya skʼan ya yal-abi te yakat ta sleel te Jehová, sok jaʼ jich ya xkʼoat bitʼil kʼajkʼ ta ijkʼal kʼinal (Sal. 14:1, 2). Te artículo ini yichʼoj pasel ta atojol chikan teme jchʼielato o ayix awaʼbilal. Ya kiltik oxchajp te bin yuʼun ya kakʼ jbatik ta abatinel ta stojol te Jehová. ¿Jaxan teme kichʼojtikix jaʼ? Te artículo ini ya yakʼbotik yip koʼtantik yuʼun ya x-abatinotik ta stojol te Jehová te Dios kuʼuntik ta sbajtelkʼinal.

3. Te bitʼil j-abatotik yuʼun Jehová ¿bin yuʼun kʼux ta koʼtantik te bin smelelil sok te bin stojil ta pasel? (Salmo 119:128, 163).

³ Te Jehová jich la yalbey ta mantal te j-abatetik yuʼune: «Cʼuxuc ta awoʼtanic te bin smelelil» (Zac. 8:19). Jaʼnix jich, te Jesús la yal te mukʼ skʼoplal te ya yichʼ leel te bin stojil ta pasel (Mat. 5:6). Ya skʼan ya yal-abi te ya jpastik tulan ta spasel te bin lek sok te bin toj ta sit te Dios. ¿Kʼuxbal ta awoʼtan te bin smelelil sok te bin stojil ta pasele? Ya jnaʼtik te jiche. Jaʼ yuʼun ya apʼaj te spasel lot, te bintik ma meleluk sok te bintik chopol (kʼopona Salmo 119:128, 163). Te machʼatik ya spasik lot jaʼ ya skʼayinbeyik stalel te Satanase, te jaʼ ajwalil yuʼun te balumilal (Juan 8:44; 12:31). Te bin ya skʼan te Satanase, jaʼ te ya sbolobtesbey skʼoplal te sbiil te Jehová. Jaʼto tal ta tsʼunbil kʼinal Edén te Satanás yak ta yalel lotiletik ta stojol te Dios te banti la yal te ma la lekil ajwaliluk te Jehová, te ya xloʼlaywan sok te ma la xyakʼbey te bintik lek te  ants winiketik (Gén. 3:1, 4, 5). Ta swenta te lotiletik ya yal te Satanás bayal ants winiketik ya skuyik te manix lekuk stalel-a te Jehová. Kʼalal te ants winiketik ma kʼuxuk ta yoʼtanik te bin smelelil, te Satanás ya stijbey yoʼtanik yuʼun ya spasik te bintik ma stojiluk sok spasemal yoʼtanik ya spasik te bin ma lek (Rom. 1:25-31).

4. ¿Bin-utʼil yakʼoj ta ilel te Jehová te jaʼ Dios yuʼun te bin smelelil? (Jaʼnix jich ilawil te dibujo).

⁴ Te Jehová, jaʼ te Dios yuʼun te bin smelelil sok yutsil yoʼtan ya yakʼbey snop te bin smelelil te ants winiketik te kʼux ya x-aʼiyot yuʼune (Sal. 31:5). Jich ya sjambey sit sok ya yakʼ ta libre ta swenta te lotiletik ya yal te Satanás. Jaʼnix jich ya snojptes te j-abatetik yuʼun swenta lekuk stalelik sok te ya spasik te bin stojil, jaʼ-abi ya x-akʼbotik slamalil yoʼtanik sok lek skʼoplalik (Prov. 13:5, 6). ¿Jichbal kʼoem ta pasel ta akuxlejal te kʼalal jajch anop te Bibliae? Awilojix te maʼyuk bin pajal sok te nojptesel ya yakʼ te Jehová (Sal. 77:13). Jaʼ yuʼun ya akʼan ya apas ta akuxlejal te tojil mantaliletik yuʼun te Jehová (Mat. 6:33). Te bitʼil ya akʼan ya awakʼ ta naʼel te bin smelelil, ya awakʼ ta ilel te lotil spisil te bin ya yal te Satanás ta stojol te Dios. ¿Bin-utʼil ya xjuʼ ya apas?

5. ¿Bin ya xjuʼ ya apas yuʼun ya awakʼ ta naʼel te bin smelelil sok te bin stojil ta pasel?

⁵ Ta swenta te bin ya apas ta akuxlejal jich ya awakʼbey yil te yantik te ya apʼaj te lotiletik yuʼun te Satanás, te kʼux ta awoʼtan te bin smelelil, te ya akʼan te jaʼ ajwalil awuʼun te Jehová sok te ya akʼan ya achʼuun te tojil mantaliletik yuʼune. Yuʼun ya awakʼ ta ilel ta akuxlejal ya awalbey ta jamal te Jehová te ya x-abatinat ta stojol ta sbajtelkʼinal. Ta patil ya skʼan ya awichʼ jaʼ yuʼun ya awakʼ ta ilel te la awakʼix aba ta abatinel ta stojol te Jehová. Jich yuʼun te skʼuxul koʼtantik ta stojol te bin smelelil sok te bin stojil ta pasel jaʼ ya stijbotik koʼtantik yuʼun ya kichʼtik jaʼ.

6. Jich bitʼil ya yal te Salmo 45:4, ¿bin yuʼun kʼux ta koʼtantik te Jesucristo?

⁶ ¿Bin yuʼun kʼux ta awoʼtan te Jesucristo? Ta Salmo 45:4 (kʼopona) tey ya yalbotik-a te bin yuʼun. Te Jesús ya skoltaybey skʼoplal te bin smelelil, te pekʼel oʼtanil sok te bin stojil ta pasel. Jich yuʼun teme kʼux ta awoʼtan te bin smelelil sok te bin toj ta pasel, jaʼnix jich kʼux ta awoʼtan te Jesús. Nopanax awaʼiy te Jesús maba  xiw ta skoltaybeyel skʼoplal te bin smelelil sok te bin toj ta pasel (Juan 18:37). Pero, ¿bin-utʼil ya yakʼ ta ilel te pekʼel oʼtanil?

7. ¿Binxan ya amulan ta swenta te spekʼelil yoʼtan te Jesús?

⁷ Ta swenta te bin la yal te Jesús sok te bin la spas, jich la yakʼ ta ilel te spekʼelil yoʼtan. Melel jaʼ ya yakʼ te spisil-ora ya x-ichʼot ta mukʼ te sTate, ma jaʼuk te ya x-ichʼot ta mukʼ yuʼun te yantike (Mar. 10:17, 18; Juan 5:19). ¿Bin ya anop ta swenta te spekʼelil yoʼtan te Jesús? ¿Mabal jaʼuk ya stijbat awoʼtan te kʼuxuk ta awoʼtan sok te ya akʼayinbey te stalele? Ya jnaʼtik te jiche. ¿Bin yuʼun ay spekʼelil yoʼtan? Melel pekʼel yoʼtan te Jehová, sok jaʼ ya skʼayinbey ta lek te stalel te sTate (Sal. 18:35; Heb. 1:3). ¿Mabal jaʼuk ya yakʼ xnoptsajotik ta stojol te Jesús?

8. ¿Bin yuʼun ya jmulantik te jaʼ ajwalil kuʼuntik te Jesús?

⁸ Ya jmulantik te jaʼ Ajwalil kuʼuntik te Jesús, melel jaʼ kʼax lekil ajwalil. Jaʼ pʼijubtesot yuʼun te Jehová sok jaʼ otsesot ta Ajwalil yuʼun (Is. 50:4, 5). Jaʼnix jich nopanax awaʼiy te skʼuxul yoʼtan la yakʼ ta ilel te Jesús ta jtojoltik (Juan 13:1). Te bitʼil jaʼ Ajwalil kuʼuntik te Jesús, ya skʼan te kʼuxuk ta koʼtantik. Jaʼnix la yal te machʼatik kʼux ya x-aʼiyot yuʼune ya yakʼik ta ilel te skʼuxul yoʼtanik kʼalal ya schʼuunbeyik te smantale (Juan 14:15; 15:14, 15). ¡Jaʼ mukʼul majtanil te ya xjuʼ kamigointik te sNichʼan te Jehová!

9. ¿Bin-a te pajal sok te bitʼil la yichʼ jaʼ te Jesús sok te jnopojeletike?

⁹ Te mantalil la yakʼ te Jesús ta stojol te jnopojeletik yuʼune, jaʼ te yakuk yichʼik jaʼ (Mat. 28:19, 20). Melel jaʼ jich la spas te Jesús. Manchukme jteb ma pajaluk te bitʼil la yichʼik jaʼ te Jesús sok te jnopojeletike, aynix-a te bin pajal la spasike (ilawil te recuadro « Ma pajaluk te bitʼil la yichʼ jaʼ te Jesús sok te jnopojeletik yuʼune»). Kʼalal la yichʼ jaʼ te Jesús, la yak sba ta stojol te sTat yuʼun ya spasbey te skʼanojel yoʼtan (Heb. 10:7). Jteb ma pajaluk jichnix ya spasik te jnopojeletike. Kʼalal ya yichʼik jaʼ, ya yakʼik ta ilel ta komon sitil te yakʼojix sbaik ta stojol te Jehová sok te bin mukʼxan skʼoplal ta yoʼtanik ta ora ini, jaʼ spasbeyel te skʼanojel yoʼtan te Diose. Jich ya stʼunik te bitʼil la spas te Jesucristoe.

10. ¿Bin yuʼun kʼux ta awoʼtan te Jesús sok bin ya stijbat awoʼtan spasel?

¹⁰ Schʼuunojix awoʼtan te Jesús te jaʼ jip jtul sNichʼan te Jehová sok te jaʼ Ajwalil te tsabil yuʼun te Diose. Anaʼojix te pekʼel yoʼtan te Jesús sok te ya skʼayinbey te stalel te sTate. Jaʼnix jich anopojix te la yakʼtiklanbey sweʼel te machʼatik ayik ta wiʼnal, la yakʼbey smukʼul yoʼtan te machʼatik ayik ta mel-oʼtan sok la slekubteslan te machʼatik ayik ta chamel (Mat. 14:14-21). Sok awilojix te jaʼ ya swentain te congregación ta ora ini (Mat. 23:10). Sok anaʼojix te bitʼil jaʼ Ajwalil yuʼun te Wentainel yuʼun Dios bayal bin lek ya spas ta jtojoltik ta pajel chaʼbej. ¿Bin-utʼil ya awakʼ ta ilel te skʼuxul awoʼtan ta stojol? Jaʼ te ya atʼunbey te stalele (Juan 14:21). Jaʼ yuʼun te bin ya skʼan ya apase jaʼ te ya awakʼ aba ta stojol te Jehová sok te ya awichʼ jaʼ.

11. ¿Bin ya stij koʼtantik yuʼun ya kichʼtik jaʼ sok bin yuʼun?

¹¹ ¿Bin ya stij koʼtantik yuʼun ya kichʼtik jaʼ? Jaʼ ta swenta te mantalil te kʼax mukʼ skʼoplal la yal te Jesús. Jich la yal: «Kʼuxukme xa awaʼiy ta awoʼtan te Jehová te Dios awuʼun ta spisil awoʼtan, ta spisil akuxlejal, ta spisil apʼijil sok ta spisil awip» (Mar. 12:30). ¿Jichbal ya awaʼiy te skʼuxul awoʼtan ta stojol te Diose?

12. ¿Bin yuʼun kʼux ta awoʼtan te Jehová? (Jaʼnix jich ilawil te fotoetik).

 ¹² Bayal bin yuʼun te kʼux ta koʼtantik te Jehová. Sok anopojix te jaʼ «sloqʼuib-haʼ yuʼun cuxlejal» sok «spisil te bintik lek akʼbilotik sok te lekil majtaniletik» (Sal. 36:9; Sant. 1:17). Spisil te bin lek ay awuʼun talem ta stojol te Jehová te ay yutsil yoʼtan sok skʼuxul yoʼtan.

13. ¿Bin yuʼun jaʼ jun mukʼul majtanil te stojol kolel?

¹³ Te stojol kolel jaʼ mukʼul majtanil yakʼoj te Jehová. ¿Bin yuʼun te jich ya kaltike? Nopanax awaʼiy te jayebto kʼux ya yaʼiy sbaik te Jehová sok te Jesús. Melel te Jesús jich la yal: «Kʼuxon ta yoʼtan te Tatil» sok la yalxan «kʼux ta koʼtan te Tatile» (Juan 10:17; 14:31). Te kʼalal kʼax bayal jaʼbil, la stsakxan yip te bitʼil kʼux ya yaʼiy sbaike (Prov. 8:22, 23, 30). Nopanax awaʼiy te skʼuxul la yaʼiy te Jehová te kʼalal la yak te ya xkʼax swokol te sNichʼan sok te ya xlaje. Pero, te bitʼil kʼuxat ta yoʼtan te Jehová sok te kʼux ta yoʼtan te ants winiketik, la yakʼ te sNichʼan ta lajel yuʼun ya ata akuxlejal ta sbajtelkʼinal (Juan 3:16; Gál. 2:20). ¿Aybal bin mukʼxan skʼoplal te ya stij koʼtantik yuʼun kʼuxuk ta koʼtantik te Diose?

14. ¿Bin-a te kʼax mukʼ skʼoplal ya skʼan ya apas ta akuxlejal?

¹⁴ Te kʼalal ya anopxan ta stojol te Jehová, te skʼuxul awoʼtan ya stsakxan yip ta stojol. Ya jnaʼtik te ya akʼan te ya stsakxan yip  te skʼuxul awoʼtan ta stojol te Jehová ta ora ini sok ta sbajtelkʼinal, ya xjuʼ awuʼun spasel. Ta swenta te bin ya awal sok te bin ya apas ya xjuʼ ya awakʼbey stseʼelil yoʼtan te Jehová. Sok skʼuxul yoʼtan ya stijbat ta awoʼtan te jichuk ya apas (Prov. 23:15, 16). Ta swenta te bin ya apas ta akuxlejal ya awakʼ ta ilel teme yuʼunix kʼux ta awoʼtan-a te Jehová (1 Juan 5:3). Jaʼme kʼax lek teme ya apas ta akuxlejal te bin ya smulan te Jehová.

15. ¿Bin-utʼil ya awakʼ ta ilel te kʼux ta awoʼtan te Jehová?

¹⁵ ¿Bin-utʼil ya awakʼ ta ilel te kʼux ta awoʼtan te Jehová? Sbabial, ya skʼan ya awalbey ta oración te ya awakʼ aba ta abatinel ta stojol te smelelil Diose (Sal. 40:8). Ta patil ya awichʼ jaʼ yuʼun ya awakʼ ta ilel ta komon sitil te la awakʼix aba ta stojole. Jich bitʼil la kalbeytik skʼoplal ta sjajchibal te artículo, bayal stseʼelil koʼtantik te kʼalal ya kichʼtik jaʼ, pero jkʼaxel ma pajaluk te jkuxlejaltik bitʼil ta nailale. Jaʼto tal-abi ma jaʼuk ya apasix te bin ya skʼan awoʼtan, jaʼ ya apasix te bin ya skʼan yoʼtan te Jehová (Rom. 14:8; 1 Ped. 4:1, 2). Kʼax mukʼ skʼoplal te jich ya apase, melel jaʼ ya skoltayat yuʼun ya amulan te lekil kuxlejalil. Kiltik bin yuʼun.

16. Jich bitʼil ya yal te Salmo 41:12, ¿bin-utʼil ya xmajtantesot yuʼun Jehová te machʼatik ya yakʼ sbaik ta stojole?

¹⁶ Te Jehová jaʼnax te machʼa ya yakʼ ta ilel yutsil yoʼtan. Chikan jayeb ya awakʼbey yan-nanix yakʼbatxan bayal stukel-a (Mar. 10:29, 30). Manchukme kuxulat ta jun balumilal te nopol ya yichʼix lajinel, te Jehová ya yakʼbat stseʼelil awoʼtan, jaʼtonaxme sjajchibal te jich ya awaʼiy abae. Te be la atʼun te kʼalal la awichʼ jaʼ, maʼyuk bin-ora ya skʼan ya awijkitay; ya xjuʼ ya x-abatinat ta stojol te Jehová ta sbajtelkʼinal. Ya xchʼixan te skʼuxul awoʼtan ta stojol te Jehová sok ya xkuxinat ta sbajtelkʼinal jich bitʼil te Jehová (kʼopona Salmo 41:12).

17. ¿Bin-a te maʼyuk yuʼun te Jehová te ya xjuʼ ya awakʼbeye?

¹⁷ Te kʼalal ya awakʼ aba ta stojol sok ya awichʼ jaʼ, ay bin ya awakʼbey te kʼax mukʼ skʼoplal te jTatik te ay ta chʼulchan. Spisil te bintik lek ay awuʼun sok te stseʼelil awoʼtane,  jaʼ yakʼojbat te Jehová. Te yajwal te chʼulchan sok Balumilal ay bin ya xjuʼ ya awakʼbey te maʼyuk yuʼune, jaʼ te jun awoʼtan ta stojol sok te ya awakʼ aba ta abatinel sok spisil awoʼtan (Job 1:8; 41:11; Prov. 27:11). Jaʼ te bin lek ya xjuʼ ya apas ta akuxlejal. Te skʼuxul awoʼtan ta stojol te Jehová ya stijbat awoʼtan yuʼun ya awichʼ jaʼ.

18. ¿Bintik jojkʼoyeletik ya skʼan ya apasbey aba?

¹⁸ Ta swenta te bin la kiltikixe, ¿yabal awichʼik jaʼ? Jaʼatnax ya xjuʼ ya awakʼbey sujtib te jojkʼoyel-abi. Te bin ya xjuʼ ya skoltayat jaʼ te ya ajojkʼoybey aba: «¿Chapalonbal yuʼun ya kichʼ jaʼ?» (Hech. 8:36). Ayuk ta awoʼtan te oxchajp te bin yuʼun ya awichʼ jaʼ. Sbabial, jaʼ te skʼuxul awoʼtan ta stojol te bin smelelil sok te bin stojil ta pasel. Jojkʼoybeya aba: «¿Yabal jkʼan te ya sta yorail te jaʼnax ya yalik te bin smelelil sok te ya spasik te bin leke?». Schebal, jaʼ te skʼuxul awoʼtan ta stojol te Jesucristo. Jojkʼoybeya aba: «¿Yabal jkʼan te jaʼ Ajwalil kuʼun te Jesucristo sok te ya jkʼayinbey te stalele?». Te yoxebal, jaʼ te skʼuxul awoʼtan ta stojol te Jehová jaʼme te bin mukʼxan skʼoplale. Jojkʼoybeya aba: «¿Yabal jkʼan ya x-abatinon ta stojol Jehová yuʼun jich ya kakʼbey stseʼelil yoʼtan?». Teme la awal te yake, ¿bin yuʼun te ma xa awichʼ jaʼ? ¿Bin ya smakat? (Hech. 16:33).

19. ¿Bin yuʼun ma skʼan te ya xjalajat ta snopel teme ya awichʼ jaʼe? Ala jun ejemplo (Juan 4:34).

¹⁹ Teme mato anaʼoj teme ya awichʼ jaʼe, nopa te ejemplo la yakʼ te Jesús (kʼopona Juan 4:34). Te Jesús la yal te jaʼ jich kʼoem bitʼil sweʼel te spasbeyel te skʼanojel yoʼtan te sTate. ¿Bin yuʼun? Melel leknax ya kaʼiy jbatik te kʼalal ya xweʼotike. Te Jesús snaʼoj te kʼalal ay bin ya skʼanbotik te Jehová, jaʼ ta swenta jlekilaltik. Maʼyuk bin ya skʼanbotik te ya yakʼ jwokoltik. Te skʼanojel yoʼtan te Diose jaʼ te yakuk awichʼ jaʼ (Hech. 2:38). Jaʼ yuʼun, teme ya achʼuun te mantalil ta swenta te ichʼjaʼ, lek ya xkʼoat ta lokʼel yuʼun. Teme ya awichʼ akʼbeyel weʼelil te kʼax bujtsʼane, ¿maniwan ya xjalajat ta snopel teme ya aweʼe? Jaʼnix jich ma skʼan te ya xjalajat ta snopilanel teme ya awichʼ jaʼ.

20. ¿Bin ya kilbeytik skʼoplal ta yan artículo?

²⁰ ¿Binwan ya xmakotik chaʼoxtul yuʼun ya yichʼik jaʼ? Yaniwan snopik te mato chapalike. Melelnix-a te kʼax mukʼ skʼoplal te ya awakʼ aba ta stojol te Jehová sok te ya awichʼ jaʼ. Jaʼ yuʼun nopa ta lek, ma animaltiknax ya ata ta nopel sok pasa tulan te chapalukat ta leke. Pero, teme ya akʼan ya awichʼ jaʼ, ¿bin ya skoltayat yuʼun ya apas? Jaʼ ya kiltik ta yan artículo.