1. ¿Bin ya smulanik te machʼatik sbabial buelta ya xkʼotik ta tsoblej? (Jaʼnix jich ilawil te foto).

 JNOP KAʼIYTIK te jtul winik sok te yinam ya xkʼotik ta sbabial buelta ta tsoblej. Kʼax la smulanik te slekil yoʼtan te hermanoetik sok te talel kʼaxel ya yakʼbey sbaik yil skʼuxul yoʼtanik. Te kʼalal sujt bael ta snaik, te ants jich la yalbey te smamalal: «Te testigoetik yuʼun Jehová ma pajal stalelik sok te yantik, ya jmulanbey te stalelike».

2. ¿Bin yuʼun te ay machʼatik yijkitayojik te Jehová?

² Te kʼuxul oʼtanil te ya xchiknaj ta congregación maʼyuk bin pajal sok. Pero, te testigootik yuʼun Jehová jmulawilotik-euk (1 Juan 1:8). Jaʼ yuʼun, kʼalal ya jnaʼbeytikxan sba te kermanotaktike ya jtatikxan ta ilel te banti ya xchʼayike (Rom. 3:23). Mel-oʼtantik sba, te ay machʼatik yijkitayojik te Jehová ta skaj te bin ma lek ya spasik te yantike.

3. ¿Bin-utʼil ya xchiknaj ta ilel machʼatik-a te smelelil jnopojeletike? (Juan 13:34, 35).

³ Kiltik yan buelta te texto te banti lokʼem tal te artículo ini (kʼopona Juan 13:34, 35). ¿Bin-utʼil ya xchiknaj ta ilel machʼatik-a te smelelil jnopojeletik yuʼun Cristo? Jaʼ ta swenta te skʼuxul yoʼtanik, ma jaʼuk ta swenta te kʼax tojil ants winiketik. Te Jesús jich la yal: «Jichme ya  snaʼik spisil te ants winiketik te jaʼex jnopojelex kuʼun», maba la yal: «Jichme ya anaʼik te jaʼex jnopojelex kuʼun». Jich yuʼun, te Jesús jamal la yakʼ ta naʼel te spisilik ya snaʼik machʼatik-a te smelelil jnopojeletik yuʼun ta swenta te kʼux ya yaʼiy sbaik.

4. ¿Bin ya xjuʼ ya sjojkʼoybey sbaik chaʼoxtul ants winiketik?

⁴ Te machʼatik maba testigoetik yuʼun Jehová, jichniwan ya xjuʼ ya sjojkʼoybey sbaik: «¿Bin yuʼun te kʼuxul oʼtanil ya yakʼ ta ilel machʼatik-a te smelelil jnopojeletike? ¿Bin-utʼil la yakʼbey yil te skʼuxul yoʼtan te Jesús te jnopojeletik yuʼune? Sok ¿bin-utʼil ya xjuʼ ya jkʼayinbeytik stalel te Jesús?». Te machʼatik kichʼojtikix jaʼ, ya skʼan ya jpasbey jbatik te jojkʼoyeletik-abi. Jaʼ-abi ya xbajt skoltayotik ta yakʼelxan ta ilel kʼuxul oʼtanil, kʼaxtoxan-a te kʼalal ay bin ma lek ya spasik te yantike (Efes. 5:2).

5. ¿Bin la skʼan la yal te Jesús ta Juan 15:12, 13?

⁵ Te Jesús jamal la yal te kʼax mukʼ skʼoplal te kʼuxul oʼtanil ya yakʼik ta ilel te jnopojeletik yuʼune (kʼopona Juan 15:12, 13). Kiltik te mantalil la yakʼbey te jnopojeletik yuʼune: «Jaʼ te talel kʼaxel kʼuxme xa awaʼiy aba ta awoʼtanik jich te bin-utʼil kʼux ya kaʼiyex ta koʼtane». ¿Bin la skʼan la yal te Jesús? Jaʼnix la yal te kʼuxul oʼtanil-abi, jaʼ te bin ya xtijbot yoʼtan yuʼun te jtul jchʼuunjel swenta ya yakʼ te skuxlejal ta stojol te yermano. b

6. ¿Bin-utʼil ya yakʼ ta ilel te Biblia te kʼax mukʼ skʼoplal te kʼuxul oʼtanile?

⁶ Te Biblia ya yal te kʼax mukʼ skʼoplal te kʼuxul oʼtanil. Bayal machʼatik ya smulanik te textoetik ini: «Jkʼuxul-oʼtanil  stukel te Diose» (1 Juan 4:8), «kʼuxukme xa awaʼiy ta awoʼtan te apatxujk jichnix te bin-utʼil kʼux ya awaʼiy aba te jaʼate» (Mat. 22:39), «te kʼuxul oʼtanil ya schʼaybey skʼoplal bayal muliletik» (1 Ped. 4:8), «te kʼuxul oʼtanil maʼyuk bin-ora ya xlaj skʼoplal» (1 Cor. 13:8). Te texto ini sok yantikxan ya yakʼ ta ilel bin yuʼun te mukʼ skʼoplal te ya jchʼitestik te kʼuxul oʼtanil sok te ya kakʼtik ta ilel te tʼujbil talelil ini.

7. ¿Bin yuʼun ma xjuʼ yuʼun te Satanás te ya yakʼ te jun-nax ayik te ants winiketik, sok te ya yakʼbey sba yil skʼuxul yoʼtanike?

⁷ Bayal ants winiketik jich ya sjojkʼoybey sbaik: «¿Bin-utʼil ya xjuʼ ya jnaʼ banti ay te smelelil religione? Spisil ya yalik te ya yakʼik ta nopel te smelelil kʼop, pero ta smelelil yanyantik-a te bin ya yakʼik ta nopel ta swenta te Diose». Te Satanás schiknajtesoj bayal lotil religionetik sok jaʼ ya yakʼ te ma snaʼix bin ya spasik te ants winiketik. Pero, te Satanás ma xjuʼ ya yakʼ te jun-nax familia ya xkʼot spisil te ants winiketik sok te ya yakʼbey sba yil skʼuxul yoʼtanik, melel jaʼnax te Jehová ya xjuʼ te jich ya spase. Ya jnaʼtik te jaʼ talem ta stojol Jehová te kʼuxul oʼtanil. Jaʼnax te machʼatik yichʼojik te chʼul espíritu sok te bendición yuʼun Dios, ya xjuʼ te kʼux ya yaʼiy sbaik ta smelelil (1 Juan 4:7). Jaʼ yuʼun, te Jesús la yal te kʼuxul oʼtanil ya yakʼ ta naʼel machʼatik-a te smelelil jnopojeletik yuʼune.

8, 9. ¿Bin yaʼiyel la yaʼiy sbaik te machʼatik la yilik te kʼux ya yaʼiy sbaik te testigoetik yuʼun Jehová?

⁸ Jich bitʼil la yal te Jesús bayal ants winiketik staojik ta ilel machʼatik-a te smelelil jchʼuunjeletik ta swenta te skʼuxul yoʼtanike. Jich bitʼil jtul hermano te Ian sbiil ya xjul ta yoʼtan te sbabial buelta kʼot ta mukʼul tsoblej te la yichʼ pasel ta jun estadio te nopol ay ta sna. Aytonax cheʼoxeb u te kʼot ta estadio–abi ta yilel tajimal, jich ya yal: «Ma pajal sok te mukʼul tsobleje. Te Testigoetik lek yoʼtanik, leknax schajpanoj sbaik sok toj ya yakʼ sbaik te alaletike». Sok jich ya yalxan: «Te bin chajpnax la kile, jaʼ te tseʼelnax yoʼtanik sok lamalnax yoʼtanik, jaʼ te bin yakon ta sleel-ae. Ma xjulix ta koʼtan te discursoetik la skʼasesike, pero jaʼ ma xchʼay ta koʼtan te bin yilel stalelik te testigoetik yuʼun Jehová». cJich la yal ta swenta te talel kʼaxel kʼux ya kaʼiy jbatike. Te bitʼil kʼux ta koʼtantik te kermanotaktik, lek koʼtantik ta stojolik sok ya kichʼtik ta mukʼ.

⁹ Jtul hermano te John sbiil jaʼnix jich kʼax lek la yil te testigoetik te kʼalal kʼot ta sbabial buelta ta tsoblej. Yan-nax la yil-a te slekil yoʼtanik sok te kʼax lek stalelike, jich la yal: «Te kʼuxul oʼtanil ya yakʼik ta ilel la yakʼbon jnaʼ te jaʼik te smelelil religione». d Ay bayalxan experienciaetik te ya yakʼ ta ilel te jaʼik te smelelil jnopojeletik te testigoetik yuʼun Jehová.

10. ¿Bin-ora ya yichʼ pasel ta prueba te skʼuxul koʼtantik? (Jaʼnix jich ilawil te nota).

¹⁰ Jmulawilik-euk te kermanotaktik, ya sta yorail te ay bin ya yalik o ya spasik te ma lek ya kaʼiy jbatik yuʼun (Sant. 3:2). e Kʼalal jich ya xkʼot ta pasel ya yichʼ pasel ta prueba te skʼuxul  koʼtantik. ¿Bin ya skoltayotik yuʼun ya kakʼtik ta ilel skʼuxul koʼtantik? Kiltik te ejemplo yuʼun te Jesús (Juan 13:15).

11. ¿Bin la yakʼik ta ilel te Santiago sok te Juan? (Jaʼnix jich ilawil te dibujoetik).

¹¹ Te Jesús maba ya smaliy-a te tojukik te jnopojeletik sok skʼuxul yoʼtan la skoltaylan ta slekubtesel te stalelik, jich lek ya x-ilotik yuʼun-a te Jehová. Ta jun buelta te jpuk-kʼop Santiago sok Juan la yalbeyik te snanik te yakuk yalbey te Jesús te mukʼuk skʼoplal ya xkʼotik ta Wentainel (Mat. 20:20, 21). Te chaʼtul jpuk-kʼopetik-abi la yakʼik ta ilel stoybail yoʼtanik sok sbikʼtal yoʼtanik (Prov. 16:18).

12. ¿Bin-utʼil ya jnaʼtik te ma jaʼuknax te Santiago sok te Juan te la yakʼik ta ilel te ma lek stalelik?

¹² Ma jaʼuknax te Santiago sok te Juan te la yakʼik ta ilel te ma lek stalelik. Kiltik bin la spasik te yantik jpuk-kʼopetik: «Te kʼalal la yaʼiyik stojol te yantikxan lajuntule, la yilintayik te chaʼtul jnopojeletik te jun smeʼ statike» (Mat. 20:24). Jnop kaʼiytik te tulan te bin jajch yalbey sbaik. Te yantik jpuk-kʼopetik jichniwan la yalbeyik te Santiago sok te Juan: «¿Machʼa ya akuy abaik-a te ya akʼanik te mukʼ akʼoplalik ya xkʼoex ta Wentainel? Ma jaʼukexnax te tulan aʼtejemex sok te Jesuse, jaʼnix  jich snujpʼ te mukʼ jkʼoplaltik ya xkʼootik-euk». Ta swenta-abi, te jpuk-kʼopetik maba la yakʼbeyix sba yilik kʼuxul oʼtanil.

13. ¿Bin-utʼil la yiltiklan te jpuk-kʼopetik te Jesús manchukme jmulawiletik? (Mateo 20:25-28).

¹³ ¿Bin la spas te Jesús? Maba ilin. Maba la yal te ya sle yantik jpuk-kʼopetik te pekʼelxan yoʼtanik, te spisil-ora kʼux ya yaʼiy sbaik sok te jaʼ lekikxane. Te bin la spase, jaʼ te sok slekil yoʼtan la stojobteslan, melel snaʼoj te lek yoʼtanike (kʼopona Mateo 20:25-28). Te Jesús spisil-ora la yakʼtiklanbey yil skʼuxul yoʼtan, manchukme ma jaʼuk-a te sbabial sok te slajibal buelta te ya yut sbaik ta swenta te machʼa mukʼxan skʼoplale (Mar. 9:34; Luc. 22:24).

14. ¿Bin-utʼil chʼiik tal te jpuk-kʼopetik yuʼun Jesús?

¹⁴ Te Jesús la yichʼ ta wenta te bitʼil chʼiik tal te jpuk-kʼopetike (Juan 2:24, 25). Ta tiempo-abi, te jwolwanejetik yuʼun te religión jaʼ ya skʼanik-a te mukʼ skʼoplal ya yichʼik ilel sok te ayuk mukʼ yaʼtelike (Mat. 23:6; paja sok te video Sjajchibal lugaretik ta sinagoga, te ay ta nota yuʼun estudio ta Mateo 23:6). Te jwolwanej judioetik jaʼ mukʼxan skʼoplal ya skuy sbaik-a (Luc. 18:9-12). f Te Jesús snaʼoj-a te talelil-abi ya xjuʼ ya x-och ta yoʼtan te jpuk-kʼopetik (Prov. 19:11). Ma ya smaliy te tojukik sok ma x-ilin te kʼalal ay banti ya xchʼayik. Snaʼoj-a te lek yoʼtanik, jaʼ yuʼun sok slamalil yoʼtan la skoltaylan te yakuk yijkitay te stoybail yoʼtanik sok te sbikʼtal yoʼtanik, te jaʼuk ay yuʼunik te pekʼel oʼtanil sok te kʼuxul oʼtanil.

15. ¿Bin ya yakʼ jnoptik te bin kʼot ta pasel ta stojol te Santiago sok te Juan?

¹⁵ Ay bin ya yakʼ jnoptik te bin kʼot ta pasel ta stojol te Santiago sok Juan. Manix lek-a te la skʼanik te jaʼ mukʼ skʼoplal ya xkʼotik ta Wentainel. Pero jaʼnix jich ma lek te bin la spasik te yantik jpuk-kʼopetik te ilinik yuʼun. Yan stukel te Jesús la yakʼbey yil skʼuxul yoʼtan sok slekil yoʼtan te 12 ta tul jpuk-kʼopetik. ¿Bin ya yakʼ jnoptik? Ma jaʼuknax ay swentail te kʼalal ya xchʼayik te yantike, jaʼnix jich te bin yilel ya kiltik te kʼalal ya xchʼayike. Jaʼ yuʼun, te kʼalal ay bin ma lek ya spas jtul hermano, jnop kaʼiytik: «¿Bin yuʼun te ya x-ilinon yuʼune? ¿Yuʼunbal ya skʼan ya jlekubtes jtalel? ¿Aybal bin ma lek yak ta kʼaxel ta stojol te hermanoe? ¿Mabal jaʼuk lek te ya kakʼ ta ilel skʼuxul koʼtan sok te ma xkichʼ ta wenta manchukme snujpʼ te ya x-ilinone?». Teme spisil-ora kʼux ta koʼtantik te yantik, ya kakʼtik ta ilel te smelelil jnopojelotike.

16. ¿Binxan ya yakʼ jnoptik te ejemplo yuʼun te Jesús?

¹⁶ Te ejemplo yuʼun te Jesús jaʼnix jich ya yakʼ jnoptik te ya skʼan ya jpastik tulan yuʼun ya xkʼot ta koʼtantik bin yuʼun jich stalelik te hermanoetik (Prov. 20:5). Melelnix-a, te Jesús ya snaʼ te bin ay ta yoʼtan te yantike, te joʼotike maʼuk. Pero, te bin ya xjuʼ ya jpastik jaʼ te lamaluk koʼtantik ta stojol te hermanoetik te kʼalal ay banti ya xchʼayik (Efes. 4:1, 2; 1 Ped. 3:8). Jun te bin ya skoltayotike jaʼ te ya jnaʼbeytikxan sbaik ta lek. Kiltik jun ejemplo.

17. ¿Bin kʼot ta pasel kʼalal jtul superintendente yuʼun circuito la spas tulan ta snaʼbeyel sba jtul hermano?

 ¹⁷ Jtul superintendente yuʼun circuito te abatin ta África oriental la snaʼbey sba jtul hermano te jich yilel te tulan yoʼtan. ¿Jichbal la yil spisil-ora te hermanoe? Jich ya yal: «Maba la jpʼaj, te bin la jpase jaʼ te la jnaʼbeyxan sba ta lek». Kʼot ta yoʼtan te jich stalel te hermano ta skaj te bin kʼax ta skuxlejal. Jich ya yal: «Kʼax lek la kil te hermano te kʼalal kʼot ta koʼtan te bayal yak ta spasel tulan ta sjeltayel te skuxlejal sok te yak ta juʼel yuʼun. Leknax la kamigoin jbatik». Teme ya jpastik tulan ta snaʼbeyelxan sba te hermanoetik sok te ya xkʼot ta koʼtantik bin yuʼun te jich stalelik, maba wokol ya kiltik te ya kakʼbeytik yil skʼuxul koʼtantik.

18. ¿Bin ya skʼan ya jnop kaʼiytik teme ay bin ma lek la spas jtul hermano? (Proverbios 26:20).

¹⁸ Ayniwan baeltik ya skʼan ya xkʼopojotik sok te hermano te ay bin la spas te ma lek la kaʼiy jbatik yuʼune. Pero, nail jnop kaʼiytik: «¿Yabal jnaʼ ta lek te bin kʼot ta pasel?» (Prov. 18:13). «¿Spasemalbal yoʼtan la spas?» (Ecl. 7:20). «¿Aybal jich jpasoj-euk te bin la spase?» (Ecl. 7:21, 22). «Teme ya xkʼopojon sok te hermano, ¿mabal yakuk xmukʼubxan te kʼope?» (kʼopona Proverbios 26:20). Teme jich ya jnop kaʼiytik-abi, yaniwan kiltik te jaʼ lek te ya jchʼaytes ta koʼtantik te bin la spas sok te ya kakʼtik ta ilel skʼuxul koʼtantik.

19. ¿Bin ya skʼan ya kakʼ ta koʼtantik spasel?

¹⁹ Te testigoetik yuʼun Jehová ya yakʼik ta ilel te jaʼik te smelelil jnopojeletik yuʼun Cristo. Pero, ¿bin-utʼil ya kakʼtik ta ilel ta jujuntul? Jaʼ te ya kakʼbeytik yil skʼuxul koʼtantik te kermanotaktik manchukme ay banti ya xchʼayik. Teme jich ya jpastik, te ants winiketik yaniwan staik ta ilel banti ay te smelelil religión sok yaniwan skʼan ya yichʼik ta mukʼ te Jehová, te Dios te ay skʼuxul yoʼtan. Jaʼ yuʼun kakʼtik ta ilel te kʼuxul oʼtanil te ay yuʼunik te smelelil jnopojeletik yuʼun Cristo.