¿Bin yuʼun te jtul «Amigo» la yal teme ya xnujpun sok te Rut «ya x-akʼbot swokol» ta swenta te bintik ayix yuʼune? (Rut 4:1, 6).

Ta namey kʼinal, teme jtul winik te nujpunem ya xlaj, pero teme maʼyuk yal snichʼnab jil, ya yil swokolik. ¿Binwan ya xkʼot ta pasel sok te skʼinale? ¿Yabal xtupʼ skʼoplal te sbiile? Spisil ini ya yichʼ albeyel skʼoplal ta Ley yuʼun Moisés.

Teme jtul winik ya xlaj o teme ya schon te skʼinal ta skaj te maʼyuk stakʼine, te sbankil o jtul sfamilia ya xjuʼ te ya schaʼman te kʼinale. Jich te kʼinal jaʼ yuʼun ya xjil te sfamilia (Lev. 25:23-28; Núm. 27:8-11).

¿Bin ya yichʼ pasel yuʼun ma xtupʼ skʼoplal-a te sbiil te machʼa laje? Te sbankil o yijtsʼin te machʼa laje, ya xnujpun sok te sjawan yuʼun jich ya yakʼbey yal sok jich ma stupʼ skʼoplal-a te sbiil te machʼa laj sok jich ya yichʼbey jilel-a te skʼinale. Jaʼ la stʼunik te costumbre, te ya xnujpun sok te sbankil o yijtsʼin te machʼa laje. Jich ya yichʼ akʼel ta ilel te ya yichʼ kanantayel-euk te meʼba antse (Deut. 25:5-7; Mat. 22:23-28). Jich kʼax ta stojol-euk te Rut.

Jnop kaʼiytik te bin kʼax ta stojol te Noemí te nujpunem sok-a te Elimélec. Pero, te kʼalal laj te smamalal soknix te chaʼtul skerem-al, maʼyukix machʼa ya xkanantayot yuʼun-a (Rut 1:1-5). Kʼalal sujt ta Judá te Noemí, la yalbey te yalib Rut te yakuk yalbey te Boaz, te jaʼ jtul sfamilia te Elimélec te yakuk schaʼman te kʼinale (Rut 2:1, 19, 20; 3:1-4). Pero, te Boaz snaʼoj te aytoxan sfamiliaik te jaʼ snujpʼ te ya sman te kʼinale (Rut 3:9, 12, 13). Te Biblia ya yal te jaʼ «Amigo».

Te Amigoe la yal te ya skʼan ya sman te kʼinal (Rut 4:1-4). Manchukme snaʼoj te toyol stojol te kʼinal sok te ayix yaʼbilal-a te Noemí soknix te ma xjuʼ ya staix yal yuʼun ya yichʼ jilel te skʼinal te Elimélec. Te kʼinal-abi jaʼme yuʼun ya xjil te Amigoe, jaʼ yuʼun kʼax leknax ta ilel te bin yak ta japbeyele.

Pero, te Amigo ma la skʼan la schaʼman te kʼinal, kʼalal la snaʼ stojol te ya skʼan ya xnujpun sok te Rut. Jich la yal: «Ma xjuʼ ya jman, melel ya xjuʼ ya yakʼbon jwokol ta swenta te bintik ayix kuʼune» (Rut 4:5, 6). ¿Bin yuʼun te jich la spase?

Teme jaʼ te Amigo o yan sfamiliaik ya xnujpun sok te Rut sok teme ya x-ayin yal, te alale jaʼme ya yichʼ jilel spisil te skʼinal te Elimélec. ¿Bin-utʼil ya xjuʼ «ya x-akʼbot swokol» ta swenta te bintik ayix yuʼun te Amigoe? Te Bibliae maba ya yal, pero ya kiltik cheʼoxebuk te bin yuʼune.

• Sbabial, te Amigo laniwan snop te ya xchʼay stakʼin, melel te skʼinal te Elimélec jaʼ yuʼun ya xjil te yal te Rut.

• Schebal, jaʼ te ya skʼan ya smakʼlin te Noemí sok te Rut.

• Yoxebal, teme te Rut sok te Amigo ya staxan yal snichʼnabik, yame skʼan ya spuk sbaik-a te kʼinale.

• Schanebal, teme maʼyuk yan snichʼnab te Amigo, te yal te Rut jaʼ ya yichʼ jilel spisil te skʼinale soknix te skʼinal te Elimélec. Jaʼ yuʼun, te skʼinal te Amigo jaʼ ya xjil ta skʼab te stsʼumbal te Elimélec. Jaʼ yuʼun, te Amigo ma la skʼan la schaʼman te kʼinale sok jich ma la skoltay te Noemí. Jaʼ la yakʼbey ta swenta te Boaz, melel jaʼ yan sfamiliaik te ya xjuʼ ya schaʼman te kʼinale. Te Boaz la schʼuun stukel. ¿Bin yuʼun? Melel ma skʼan «ya xtupʼ skʼoplal-a te sbiil» te machʼa laje (Rut 4:10).

Te bin mukʼ skʼoplal ta yoʼtan te Amigo, jaʼ te manchuk ya xtupʼ skʼoplal te sbiil sok te bintik ay yuʼune. ¡Kʼax ma lek te bin la spase! Sok maʼyuk bin lek lokʼ yuʼun-a, melel tupʼ skʼoplal ta jkʼaxel te sbiile. Jaʼnix jich, ma la yichʼ te majtanil te jaʼ la yichʼ stukel te Boaz: jaʼ te la yichʼ tsʼibayel te sbiil ta stsʼumbal te Mesías, Jesucristo. Mel-oʼtantik sba te Amigo, melel la sta swokol ta skaj te ma la skʼan la skoltay te machʼa ya skʼan koltayele (Mat. 1:5; Luc. 3:23, 32).