Ay albilkʼopetik te cholbil skʼoplal liʼi te pajal yorail kʼotik ta pasel. Spisil ya yakʼ ta ilel te ayotikix ta slajibal kʼajkʼal (Dan. 12:4).

• Tekstoetik: Apoc. 11:7; 12:13, 17; 13:1-8, 12.

  Albilkʼop: «Te chambahlam te xiweltic sba» bayal jaʼbil swentainoj te ants winiketike. Ta slajibal kʼajkʼal la yichʼ ejchentesel te sjukebal sjol. Ta patil bael lekub te yejchen sok «spisil machʼatic ayic ta bahlumilal» la stʼunik. Te Satanas ya stuuntes te chambalam ini swenta ya «baht yaʼbe guerra te jayeb xan stsʼumbal te antse».

  Te bitʼil kʼot ta pasel: Te kʼalal kʼaxix-a te Pulemal, chiknaj talel ajwaliletik te la skontrainik te Jehová. Kʼaxem ta 3,000 jaʼbil ta patil, ta yorail te Primera Guerra Mundial pejkʼaj yip te Gran Bretaña. Pero la sta yip yan buelta kʼalal la sjokin sba sok te Estados Unidos. Te Satanas stuuntesoj spisil te politika te ay ta skʼab swenta ya skontrain te lum yuʼun te Diose, kʼaxemtoxan-a ta slajibal kʼajkʼal ayotikixe.

• Teksto: Dan. 11:25-45.

  Albilkʼop: Te ajwalil ta norte sok te ajwalil ta sur ya stsal sbaik yuʼun ya swentainik te balumilale.

  Te bitʼil kʼot ta pasel: Te Alemania ya spas guerra sok te Gran Bretaña sok Estados Unidos. Ta 1945 te Unión Soviética sok te yantik nasionetik te jun ay soke, jaʼ la sbiilinik ajwalil ta norte. Ta 1991 laj yip te Unión Soviética, ta patil bael te Rusia sok te sjoʼtak jaʼ la sbiilinik ajwalil ta norte.

• Tekstoetik: Is. 61:1; Mal. 3:1; Luc. 4:18.

  Albilkʼop: Te Jehová la stikun tal te «jal-cʼop» swenta ya sjam te be te kʼalal mato x-och ta Ajwalil-a te Cristoe. Te grupo te jaʼik te «jal-cʼop» jajch scholbeyik te «lec yachʼil cʼop» te machʼatik mansoike.

  Te bitʼil kʼot ta pasel: Ta 1870 te Charles Russell sok te sjoʼtak jajch snopik ta lek te Biblia swenta ya snaʼik te bin ya yakʼ ta nopel ta smelelil. Ta 1881 jajch yakʼik ta naʼel te kʼax mukʼ skʼoplal te ya scholik skʼop Dios te j-abatetik yuʼun Dios. Jajch slokʼesik artikuloetik jich bitʼil «Se solicitan 1.000 predicadores» sok «Ungidos para predicar».

• Teksto: Mat. 13:24-30, 36-43.

  Albilkʼop: Jtul winik ya stsʼun trigo ta skʼinal. Ta patil, tal te skontra sok la stsʼun ak tey-a. Chʼi te ak sok la sten te trigoe. Ta yorail te kʼajoj parte la yichʼ akʼel te trigo sok te ake.

  Te bitʼil kʼot ta pasel: Jaʼto tal ta 1870 chiknajxan ta ilel banti ma pajalik te smelelil sok te lotil jchʼuunjeletike. Ta slajibal tal kʼajkʼal ya yichʼ tsobel te smelelil jchʼuunjeletik sok parte ya yichʼik akʼel ta stojol te lotil jchʼuunjeletike.

• Teksto: Dan. 2:31-33, 41-43.

  Albilkʼop: Te yok te pasbil ta takʼin sok ajchʼal jaʼ yok te lokʼomba te pasbil ta bayal ta chajp takʼin.

  Te bitʼil kʼot ta pasel: Te ajchʼal jaʼ te ants winiketik te wentainbilik yuʼun te Gran Bretaña sok Estados Unidos te maba ya schʼuunbeyik smantal te ajwalil yuʼunike. Ta skaj-abi, te ajwaliletik ini ma xjuʼ tulan ya xwentainwanik jich te bitʼil tulan te takʼine.

• Tekstoetik: Mat. 13:30; 24:14, 45; 28:19, 20.

  Albilkʼop: Te «trigo» ya yichʼ tsobel sok ya yichʼ kʼejel ta «snahul», sok ya yichʼ akʼel «te aʼbat te jun yoʼtan soc pʼij» yuʼun ya swentain te j-abatetike. Te «lec yachʼil cʼop yuʼun te cuentahinel yuʼun Dios» ya xpujk ta alel ta «spisil nacionetic».

  Te bitʼil kʼot ta pasel: Ta 1919 la yichʼ akʼbeyel yaʼtel te j-abat te jun yoʼtan sok pʼij yuʼun ya swentain te lum yuʼun Dios. Jaʼto tal-abi te Estudianteetik yuʼun Biblia jajch yakʼbeyikxan yipal ta scholel skʼop Dios. Ta ora ini te testigoetik yuʼun Jehová ya scholik skʼop Dios ta kʼaxem ta 200 nasion sok territorioetik sok ya slokʼesik informasion te lokʼem skʼoplal ta Biblia ta kʼaxem ta mil kʼopiletik.

• Tekstoetik: Dan. 12:11; Apoc. 13:11, 14, 15.

  Albilkʼop: Jkojt chambalam te xiweltik sba te chaʼchʼix xulub ya yakʼbey ta pasel «slocʼombahil te chambahlam te xiweltic sba» sok ya yakʼbey «yichʼ icʼ».

  Te bitʼil kʼot ta pasel: Te potensia mundial yuʼun Gran Bretaña sok Estados Unidos la sjachbey skʼoplal te Sociedad de Naciones sok ay yantik nasion te koltayotik yuʼune. Ta patil, te ajwalil ta norte och tey-euk-a, pero jaʼnax ta 1926 kʼalal ta 1933. Te Sociedad de Naciones la yichʼ akʼbeyel te utsilal te jaʼnax ay ta swenta te Wentainel yuʼun Dios, jichnix ya yichʼ akʼbeyel utsilal te Organización de las Naciones Unidas (ONU).

• Teksto: Dan. 8:23, 24.

  Albilkʼop: Jtul ajwalil te kʼax chopol «ya me yacʼ bayel jinaw».

  Te bitʼil kʼot ta pasel: Te potensia mundial yuʼun Gran Bretaña sok Estados Unidos bayal bin sjinojik. Ta Segunda Guerra Mundial te Estados Unidos kʼaxtoxan jinawan kʼalal la stʼomes cheb bomba ta jun nasion te skontrainej sbaik soke.

• Tekstoetik: Dan. 11:31; Apoc. 17:3, 7-11, 16.

  Albilkʼop: Te «tsajal chambahlam te xiweltic sba» te ay lajunchʼix xulub ya xlokʼ tal ta xaab sok jaʼ swaxakebal ajwalil. Te libro yuʼun Daniel ya yalbey skʼoplal te ajwalil ini te jaʼ «te bin ilobtic sba te ya xjinawan».

  Te bitʼil kʼot ta pasel: Te Sociedad de Naciones kejchaj ta aʼtel ta Segunda Guerra Mundial. Ta patil yuʼun te guerra chiknaj te ONU. Jichnix bitʼil la yichʼ pasel ta stojol te Sociedad de Naciones, te ONU ya yichʼ akʼbeyel yutsilal te jaʼ ya skʼan akʼbeyel te Wentainel yuʼun te Diose. Te nasionetik te ya skoltayik te ONU ya xbajt slajinik te relijionetike.

• Tekstoetik: 1 Tes. 5:3; Apoc. 17:16.

  Albilkʼop: Te nasionetik ya yalbeyik skʼoplal «lamal qʼuinal, lec ay spisil», ta patil te lajunchʼix xulubiletik sok «te chambahlam te xiweltic sba» ya slajinik te «jʼantsinel-ants». Ta patil, te nasionetik ya yichʼik lajinel-euk.

  Te bitʼil ya xkʼot ta pasel: Te nasionetik ya yalik te juʼ yuʼunik stael lamalkʼinal sok te lek ayix spisil. Ta patil, te nasionetik te ya skoltayik te ONU ya slajinik te lotil relijionetike. Jaʼ jich ya xjajch te tulan wokolil. Te tulan wokolil-abi ya xlaj skʼoplal kʼalal ya yichʼ lajinel te chopol balumilal ta Armajedon.

• Tekstoetik: Ezeq. 38:11, 14-17; Mat. 24:31.

  Albilkʼop: Te Gog ya yochintay te lum yuʼun te Diose. Ta patil, te chʼul-abatetik ya stsobik te «machʼatic tsahticlambil».

  Te bitʼil ya xkʼot ta pasel: Te ajwalil ta norte sok te yantik gobiernoetik ta balumilal ya skontrainik te lum yuʼun Dios. Ta patil te kʼalal jajchix-a te kontrainele, ya yichʼ tsobel ta chʼulchan te machʼatik tsabilik te ayikto ta Balumilal-ae.

• Tekstoetik: Ezeq. 38:18-23; Dan. 2:34, 35, 44, 45; Apoc. 6:2; 16:14, 16; 17:14; 19:20.

  Albilkʼop: Te machʼa kajal ta «saquil cawu» ya xjuʼ yuʼun tsalaw kʼalal ya slajin te Gog sok te soldadoetik yuʼune. Ya yichʼ chʼojel ochel «ta pamal cʼahcʼ» te «chambahlam te xiweltic sba» sok ya yichʼ wuyel ta jkʼaxel te mukʼul lokʼomba.

  Te bitʼil ya xkʼot ta pasel: Te Jesús te Ajwalil yuʼun te Wentainel yuʼun te Dios yame xtal skoltay te lum yuʼun te Jehovae. Ya xjokinot tal yuʼun te 144,000 sok te chʼul-abatetike, ya slajinik spisil te nasionetike. Jichme ya xlaj te balumilal yuʼun te Satanase.