1. ¿Bin la jnoptik ta tsoblej ta jujun jaʼbil 2023?

 ¡KʼAX tʼujbil kʼax te tsoblej yuʼun jujun jaʼbil ta 2023! a Tey la yichʼ jamaltesbeyel skʼoplal cheʼoxeb te bin jchʼuunojtik sok la yichʼ akʼel anuncioetik ta swenta te scholel skʼop Dios. Jich bitʼil la kichʼtik albeyel te ayniwan chaʼoxtul ants winiketik te ya xbajt yakʼ sbaik ta stojol te Jehová te kʼalal la yichʼix lajinel-a te Mukʼul Babilonia. Jaʼnix jich la kichʼtik albeyel ta noviembre 2023 te maba ya jpastikix informar te jayeb ora ya jcholtik skʼop Dios. ¿Yabal skʼan ya yal-abi te ma kʼax bayalix skʼoplal te scholel skʼop Dios ta ora ini? ¡Maʼuk, ma jichuk!

2. ¿Bin yuʼun kʼax mukʼ skʼoplal te ya jcholtikxan te skʼop Diose? (Marcos 13:10).

² Jujun kʼajkʼal te ya xkʼaxe, kʼax mukʼxan skʼoplal te ya jcholtik te skʼop Dios. ¿Bin yuʼun? Melel maʼyukix bayal tiempo. Jnop kaʼiytik te bin la yal te Jesús ta swenta te scholel skʼop Dios ta slajibal kʼajkʼal, jich bitʼil ya yal Marcos 13:10 (kʼopona). Ta sjun Mateo, te Jesús la yal te ya yichʼ cholel te lek yachʼil kʼop ta swolol Balumilal te kʼalal mato xtal-a «te slajibal kʼajkʼale» (Mat. 24:14). Jaʼ yak ta yalbeyel skʼoplal te ya yichʼ lajinel te chopol balumilal yuʼun te Satanás. Te Jehová snaʼojix «te bin kʼajkʼalil sok te jayeb ora» ya xkʼot ta pasel spisil te bin yaloje (Mat. 24:36; 25:13; Hech. 1:7). Sok te jujun kʼajkʼal ya xkʼaxe yak ta noptsajel tal te yorail-abi (Rom. 13:11). Pero te bitʼil mato xkʼot te yorail-abi ya skʼan te ya jcholtikxan te skʼop Dios.

3. ¿Bin yuʼun ya jcholtik skʼop Dios?

 ³ Kʼax mukʼ skʼoplal te ya jojkʼoybey jbatik ini: ¿bin yuʼun te ya jcholtik skʼop Diose? Jaʼ ta swenta te skʼuxul koʼtantik. Te kʼalal ya jcholtik te skʼop Dios, ya kakʼtik ta ilel te kʼux ta koʼtantik te lek yachʼil kʼop, te ants winiketik, te Jehová sok te sbiil. Kilbeytik skʼoplal ta jujunchajp.

KʼUX TA KOʼTANTIK TE LEK YACHʼIL KʼOP

4. ¿Bin ya jpastik te kʼalal ya kichʼtik akʼbeyel jun lekil noticia?

⁴ Nopa awaʼiy te kʼalal la awichʼ akʼbeyel jun lekil noticia. Laniwan awichʼ albeyel te ay machʼa ta afamilia te ya x-ayin jtul snichʼan o laniwan awichʼ japbeyel jun aʼtelil te ayix talel tiempo yakat ta sleel. ¿Bin yaʼiyel la awaʼiy aba? Kʼax tseʼelniwan awoʼtan te la akʼan la awalbey te afamilia sok te awamigotak. ¿Mabal jichuk la awaʼiy aba te kʼalal la awaʼiy te lek yachʼil kʼop yuʼun te Wentainel yuʼun te Diose?

5. ¿Bin yaʼiyel la awaʼiy aba te kʼalal yakat ta snopel-a te Bibliae?

⁵ Juluk ta awoʼtan te kʼalal yakat ta snopel-a te Bibliae. La anop te kʼuxat ta yoʼtan te Jehová, te ya skʼan ya x-ochat ta sfamilia, sok te jamal yaloj te ya xbajt slajin te bintik kʼux sok te wokolil sok te ya xbajt chaʼkuxajtes ta achʼ balumilal te machʼatik lajemik awuʼune (Mar. 10:​29, 30; Juan 5:​28, 29; Rom. 8:​38, 39; Apoc. 21:​3, 4). Spisil-abi kʼot ta awoʼtan (Luc. 24:32). Kʼux la awaʼiy ta awoʼtan te nojpteseletik te la yakʼbat te Jehová sok la akʼan acholbey yaʼiy te yantik ants winiketike (paja awil sok Jeremías 20:9).

6. ¿Bin ya yakʼbat anop te bin kʼax ta stojol te Ernest sok te Rose?

⁶ Kiltik te bin kʼax ta stojol jtul hermano te Ernest sbiil. b Ya yal te aytonax lajuneb yaʼbilal-a te kʼalal laj te spapa.  Jich ya yalxan: «Jich ya jojkʼoybey jba: ‹¿Bajtbal ta chʼulchan te jpapa o lajix ta sbajtelkʼinal?›. Ma lek ya kil-a te alaletik te kuxulikto te smeʼ statike». Te Ernest jteb ma spisil-ora ya xbajt ta mukenal, ya skejan sba sok jich la yal ta skʼoponel Dios: «Awokoluk, Dios, ya jkʼan ya jnaʼ banti ay te jpapae». Te kʼalal ay 27 yaʼbilal-a, japbot nojptesel ta Biblia sok la skʼan. Kʼax tseʼel yoʼtan la yaʼiy sba te kʼalal la snaʼ te maʼyuk bin ya snaʼikix te machʼatik lajemik, te jich kʼoem te wayalike, sok te ya yal te Biblia te ya xchaʼkuxajike (Ecl. 9:​5, 10; Hech. 24:15). Te Ernest la stabey sujtib te jojkʼoyeletik te spisil-ora la spasbey sbae. Kʼax tseʼel yoʼtan la yaʼiy sba yuʼun te bin yak ta snopel ta Biblia. Te yinam, te Rose sbiil, jajch snop-euk te Biblia sok kʼax tseʼel yoʼtan yuʼun te bin yak ta snopele. Ta patil, ta 1978 la yichʼik jaʼ. Sok sbujtsʼ yoʼtanik, la yalbeyik te bin schʼuunojik te sfamiliaik, te yamigotakik sok spisil te ants winiketik. Ta swenta-abi, te Ernest sok te Rose skoltayojik kʼaxem ta 70 ta tul ants winiketik ta snaʼbeyel sba te Jehová sok yuʼun ya yichʼik jaʼ.

7. ¿Bin ya jpastik teme kʼux ta koʼtantik te bin ya yal te Biblia? (Lucas 6:45).

⁷ Teme kʼux ta koʼtantik te nojptesel te ya yakʼ te Biblia, ya jpuktik ta alel (kʼopona Lucas 6:45). Jich ya kaʼiy jbatik bitʼil te jnopojeletik ta sbabial siglo te jich la yalik: «Ma xjuʼ ya kijkitaykotik ta yalbeyel skʼoplal te bintik kilojtik sok te bintik kaʼiyojkotik stojole» (Hech. 4:20). Kʼax kʼux ta koʼtantik te smelelil kʼop, jaʼ yuʼun ya jkʼan ya jcholbeytik yaʼiy te yantik ants winiketike.

KʼUX TA KOʼTANTIK TE ANTS WINIKETIK

8. ¿Bin ya stijbotik koʼtantik yuʼun ya kalbeytik te lek yachʼil kʼop te yantik ants winiketike? (Ilawil te recuadro « Otsesa jnopojeletik sok skʼuxul awoʼtan»; jaʼnix jich ilawil te foto).

⁸ Kʼux ta koʼtantik te ants winiketik jich bitʼil te Jehová sok te Jesús (Prov. 8:31; Juan 3:16). Ya jnaʼbeytik yoʼbolil sba te machʼatik maʼyuk smukʼul yoʼtanik sok te ma jokinbilik «yuʼun Dios» (Efes. 2:12). Te ants winiketik ini ya xkʼax swokolik, te joʼotike ya xjuʼ ya jkoltaytik ta swenta te lek yachʼil kʼop yuʼun te Wentainel yuʼun te Dios. Te skʼuxul koʼtantik sok te snaʼbeyel yoʼbolil sba te yantik ya stij koʼtantik yuʼun ya kalbeytik te lek yachʼil kʼope. Melel ya xjuʼ ya x-akʼbot smukʼul yoʼtanik yuʼun, te yakuk sta stseʼelil yoʼtanik ta ora ini sok te yakuk staik «te smelelil kuxlejalile», jaʼ te kuxlejalil ta sbajtelkʼinal ta achʼ balumilal (1 Tim. 6:19).

9. ¿Bin ya kalbeytik te ants winiketik te nopol ya xkʼot ta pasele, sok bin yuʼun? (Ezequiel 33:​7, 8).

⁹ Te skʼuxul koʼtantik jaʼnix jich ya stij  koʼtantik yuʼun ya kalbeytik te yantik ants winiketik te nopol ya yichʼix lajinel te balumilal ini (kʼopona Ezequiel 33:​7, 8). Ya jmel koʼtantik yuʼun te ma snaʼik te bin nopol ya xkʼot ta pasel te ants winiketik ta territorio sok te jfamiliatik te ma jaʼukik Testigo. Te Mateo 24:21 jich ya yal:«Yame xtal tulan wokolil te maʼyuk jich kʼoem ta pasel kʼalalto tal ta sjajchibal te balumilale sok maʼyuk bin-ora jich ya xkʼotxan ta pasel ta patil». Ya jkʼantik te yakuk snaʼik te bin ya xkʼot ta pasel ta yorail te ichʼel ta kʼop: ta sbabial ya yichʼ lajinel spisil te lotil religionetik sok ta yorail te Armagedón ya yichʼ lajinel te chopol balumilal ini (Apoc. 16:​14, 16; 17:​16, 17; 19:​11, 19, 20). Ya jkʼanbeytik te Jehová te yakuk schʼamxan yaʼiyik te skʼop Dios te ants winiketik sok te yakuk x-abatinik ta stojole. Pero ¿bin ya xkʼot ta stojol te ants winiketik te ma schʼam yaʼiyik te bin nopol ya xkʼot ta pasele?

10. ¿Bin yuʼun mukʼ skʼoplal te ya kalbeytik te ants winiketik te bin nopol ya xkʼotix ta pasele?

¹⁰ Jich bitʼil la kiltik ta yan artículo, te Jehová yaniwan sta ta nopel te ya yakʼbey skolel te machʼatik ya sujtes yoʼtanik te kʼalal ya yilik te ya yichʼ lajinel te Mukʼul Babilonia. Jaʼ-abi ya skoltayotik ta snaʼel te kʼax mukʼ skʼoplal te ya kalbeytik te ants winiketik te bin nopol ya xkʼot ta pasel. ¿Bin yuʼun? Melel te bin ya kalbeytik ta ora ini jaʼniwan te bin ya xjul ta yoʼtanik ta pajel chaʼbej (paja awil sok Ezequiel 33:33). Te bin ya kalbeytike yaniwan xjul ta yoʼtanik sok jich ya skʼan ya yichʼik ta mukʼ te Jehová. Jich bin-utʼil te jchukel ta Filipos te la skʼan la snop te smelelil kʼop te kʼalal kʼax jun tulan nijkel, jaʼnix jich ay ants winiketik ta kʼajkʼal ini te maniwan skʼan ya snopik te smelelil kʼop, pero jaʼtoniwan ya skʼanik-a te kʼalal ya yilik te «nijkel» yuʼun te ya yichʼ lajinel te Mukʼul Babilonia (Hech. 16:​25-34).

KʼUX TA KOʼTANTIK TE JEHOVÁ SOK TE SBIILE

11. ¿Bin-utʼil-a te ya kalbeytik yutsil skʼoplal sok te ya kichʼtik ta mukʼ te Jehová? (Apocalipsis 4:11; jaʼnix jich ilawil te fotoetik).

¹¹ Ya jpuktik ta alel te lek yachʼil kʼop, melel kʼux ta koʼtantik te Jehová sok kʼux ta koʼtantik te schʼul biil. Te kʼalal ya jcholtik te skʼop Diose, ya kalbeytik yutsil skʼoplal te Jehová. Jnaʼojtik te Jehová snujpʼ te ya yichʼ albeyel yutsil skʼoplal sok ichʼel ta mukʼ ta swenta te ay yuʼele (kʼopona Apocalipsis 4:11). ¿Bin-utʼil ya kalbeytik yutsil skʼoplal sok ya kichʼtik ta mukʼ te Diose? Jaʼ te kʼalal ya kalbeytik te yantik ants winiketik te jaʼ Jehová te machʼa la  spas spisil te bintik ay sok te la yakʼ te jkuxlejaltik. Jaʼnix jich ya jtuuntestik te jtiempotik, te kiptik sok te jtakʼintik yuʼun ya jcholtik te skʼop Dios chikan te bantito kʼalal ya xjuʼ kuʼuntike (Mat. 6:33; Luc. 13:24; Col. 3:23). Ya kalbeytik skʼoplal te Jehová, melel kʼux ta koʼtantik. Pero, jaʼnix jich ya jkʼan ya kalbeytik skʼoplal te sbiil sok te bin ya skʼan ya yal. ¿Bin yuʼun?

12. ¿Bin-utʼil ya jchʼultesbeytik te sbiil te Jehová te kʼalal ya jcholtik skʼop Dios?

¹² Te bitʼil kʼux ta koʼtantik te Jehová, ya jkʼan ya jchʼultesbeytik te sbiile (Mat. 6:9). Ya jkʼan ya jchʼultesbeytik te sbiil ta swenta te lotiletik te yaloj te Satanás ta stojol (Gén. 3:​1-5; Job 2:4; Juan 8:44). Jaʼ yuʼun, te kʼalal ya jcholtik te skʼop Dios sok spisil koʼtantik, ya jkoltaybeytik skʼoplal te Jehová sok ya kaltik te bin smelelil ta stojole. Ya jkʼantik te spisiluk te ants winiketik ya snaʼik te jaʼ jkʼuxultaywanej, te jaʼ tojil ajwalil sok te nopolix te Wentainel yuʼun ya xbajt slajin te wokolil sok ya xbajt yichʼ talel lamalkʼinal sok tseʼelil oʼtanil ta stojol te ants winiketik (Sal. 37:​10, 11, 29; 1 Juan 4:8). Te kʼalal ya jpastik spisil ini, ya jchʼultesbeytik te sbiil te Jehová. Jaʼ yuʼun, tseʼel koʼtantik te ya jkʼotestik ta pasel te kaʼteltik kichʼojtik jich bitʼil Testigoetik yuʼun. ¿Bin yuʼun te jich ya kaltike?

13. ¿Bin yuʼun tseʼel koʼtantik te bitʼil testigootik yuʼun Jehová? (Isaías 43:​10-12).

¹³ Te Jehová stsaojotik yuʼun stestigo ya xkʼootik (kʼopona Isaías 43:​10-12). Ayix talel jaʼbil, te Cuerpo Gobernante jich la yal ta jun carta: «Maʼyuk yan mukʼul majtanil jich bitʼil te jbiilinojtik testigoetik yuʼun Jehová». c Kaltik jun ejemplo. Jnop kaʼiytik te ayotik ta ichʼel ta kʼop, melel ay  machʼa la slebotik jmultik, sok ya jkʼantik te ayuk machʼa ya skoltay jkʼoplaltik. Jaʼniwan ya jtsatik te machʼa ya jnaʼbeytik sba ta lek, te ya smukʼulin koʼtantik sok te lek skʼoplal, yuʼun jich ya xchʼuunbot-a te bin ya yale. Jaʼnix jich, te Jehová tsaojotik yuʼun ya kaltik te jaʼ te smelelil Dios, melel ya snaʼbotik jbatik sok ya smukʼulinotik yoʼtan. Te bitʼil jaʼ jun mukʼul majtanil ya kiltik te Testigootik yuʼun ya jpastik tulan yuʼun ya kakʼtik ta naʼel te sbiil sok yuʼun ya kaltik te ma meleluk te bin albil ta stojole. Jich ya jpastik te kaʼteltik te bitʼil Testigootik yuʼune (Sal. 83:18; Rom. 10:​13-15).

YA JCHOLTIK SKʼOP DIOS KʼALALTO TA SLAJIBAL

14. ¿Bintik-a te nopol ya xbajt kiltike?

¹⁴ ¡Kʼax tʼujbil te bin ya xkʼot ta pasele! Ta swenta te bendición yuʼun te Jehová, ya jmaliytik te bayalxan ants winiketik ya snopik te smelelil kʼop te bitʼil mato xtal te tulan wokolile. Jaʼnix jich ya yakʼbotik stseʼelil koʼtantik te ay ants winiketik te ya xbajt yijkitayik te chopol balumilal yuʼun te Satanás ta yorail te tulan wokolil sok te ya sjokinotik ta yichʼel ta mukʼ te Jehová (Hech. 13:48).

15, 16. ¿Bin ya jpastikxan, sok bin-ora ya kijkitaytik spasel?

¹⁵ Te bitʼil mato kʼoem yorail-abi, bayalto kaʼteltik te ya skʼan ya jpastik. Ay ta jwentatik te yalel te lek yachʼil kʼop yuʼun te Wentainel yuʼun te Dios ta swolol Balumilal. Jaʼnix jich ya skʼan ya kalbeytik te ants winiketik te yakix ta noptsajel talel te slajibal te chopol balumilal ini. Te kʼalal ya xkʼot yorail te ichʼel ta kʼope, yame staik ta ilel te ants winiketik te talem ta stojol Jehová spisil te bin la kaltike (Ezeq. 38:23).

¹⁶ Jich yuʼun, ¿bin kakʼojtik ta koʼtantik spasel? Te bitʼil kʼux ta koʼtantik te lek yachʼil kʼop, te ants winiketik, te Jehová sok te sbiile, ya xbajt jcholtikxan te skʼop Dios sok sbujtsʼ koʼtantik jaʼto te kʼalal ya yal te Jehová: «¡Ticʼuquix a!».