1. Jich bitʼil ya yal Mateo 7:13, 14, ¿bin yuʼun jich kʼoem bitʼil jun biaje te skuxlejal te j-abatetik yuʼun Jehová?

TE SKUXLEJAL te j-abatetik yuʼun Jehová jich kʼoem bitʼil jun biaje. Te banti yakotik ta baele, jaʼ ta achʼ balumilal te banti jaʼ ya xwentainwan te jTatik Jehová. Ta jujun kʼajkʼal ya jpastik tulan yuʼun ya xbeenotik ta be te ya x-ikʼawan bael ta kuxlejalil. Te bitʼil chʼin te bee, jich bitʼil la yal te Jesuse, ay wokol ya kaʼiytik te ya xbeenotik tey-ae (kʼopona Mateo 7:13, 14). Ta skaj te jmulawilotike ayniwan baeltik ya xlokʼotik ta chʼin be-abi (Gál. 6:1).

2. ¿Bin ya kiltik ta artikulo ini? (Ilawil-euk te rekuadro « Te pekʼel oʼtanil ya skoltayotik ta sjeltayel te jtaleltik»).

² Ya skʼan ya jpastik tulan ta sjeltayel te jpensartik, te bin ya jpastik sok te jtaleltik teme ya jkʼantik te spisil-ora ya xbeenotik ta be yuʼun kuxlejal. Jaʼ te bin la yalbey skʼoplal te jpuk-kʼop Pablo kʼalal la yalbey te jchʼuunjeletik ta Corinto te lekuk ya xkʼot te stalelike (2 Cor. 13:11). Te bin la yal te Pablo jaʼnix jich ya xtuun kuʼuntik ta ora ini. Ta artikulo ini ya kiltik bitʼil ya skoltayotik te Biblia sok te kamigotaktik te tulan schʼuunel yoʼtanik yuʼun ya jeltaytik te jpensartik, te bin ya jpastik sok te jtaleltike. Jaʼnix jich ya kiltik binwan-ora wokol ya kaʼiytik schʼuunel te bin ya yal talel te organisasion yuʼun Jehová. Sok ya kiltik bin yuʼun mukʼ skʼoplal te pekʼel oʼtanil swenta ya jeltaytik te jtaleltik sok yuʼun ma jkom jbatik ta abatinel ta stojol te Jehová.

3. ¿Bin-utʼil ya skoltayotik te sKʼop Dios?

³ ¿Bin yuʼun wokol ya kaʼiytik snaʼel te bin ay ta jpensartik sok ta koʼtantik? Melel jloʼlaywanej te koʼtantike sok wokol  ta naʼbeyel sba (Jer. 17:9). Joʼotiknix ya jloʼlay jbatik (Sant. 1:22). Jaʼ yuʼun mukʼ skʼoplal te ya jtuuntestik te Biblia yuʼun ya kiltik te bin ay ta koʼtantike. Te Biblia «ya stsahtay te jpensartic soc bintic ya scʼan ya spas te coʼtantique» (Heb. 4:12, 13). Jaʼ pajal kʼoem sok te aparato yuʼun rayos X te ya yil te bin ay ta yutilto te jbakʼetaltike. Pero jaʼnax teme pekʼel koʼtantik ya jpas ta jkuxlejaltik te bin ya yal te Biblia sok te bin ya yalik te machʼatik akʼbil yaʼtelik yuʼun Dios ta jtojoltik.

4. ¿Bin-utʼil chiknaj ta ilel te kaj stoy sba te ajwalil Saúl?

⁴ Kiltik te bin la spas te ajwalil Saúl te maba la yakʼ ta ilel spekʼelil yoʼtan. Bayal la stoy sba te la skuy te ma puersauk ya sjeltay te spensar sok te stalele (Sal. 36:1, 2; Hab. 2:4). Kʼalal albot ta jamal te yakuk smiltiklan te amaleketik, te Saúl la skʼaxuntaybey smantal te Jehová sok maʼyuk smul la yaʼiy sba te kʼalal tal ta tojobtesel yuʼun te j-alwanej Samuel. La smak sba ta kʼop, maba mukʼ skʼoplal la yil te skʼaxuntayel mantal sok la yakʼbey smulin yantik te bin la spase (1 Sam. 15:13-24). Pero ma sbabialuk buelta te ya skʼaxuntay mantal te Saúl (1 Sam. 13:10-14). Mel-oʼtantik sba te la yakʼ chʼiuk ta yoʼtan te toybaile. Ta skaj te ma la sjeltay te stalele tojobtesot yuʼun te Jehová sok pʼajot yuʼun.

5. ¿Bin ya yakʼ jnoptik te bin kʼax ta stojol te Saúl?

⁵ Swenta ma jpastik te bin la spas te Saúl, jojkʼoybey jbatik ini: «¿Yabal jle bin ya jmak jba-a yuʼun ma jpas te bin ya yal te Bibliae? ¿Pekʼelbal skʼoplal ya kil te skʼaxuntayel mantale? ¿Yabal kakʼbey smulin yantik te bin ya jpase?». Teme ay jich jpasojtike, yame skʼan ya jeltaytik te jpensartik sok te jtaleltike. Teme maʼuke, ya xjuʼ ya xchʼi toybail ta koʼtantik sok maba ya skʼan ya yamigoinotikix-a te Jehovae (Sant. 4:6).

6. ¿Bin yuʼun ma pajal stalelik te Saúl sok te David?

⁶ Kiltik bin yuʼun ma pajal stalelik te ajwalil Saúl sok te ajwalil David. Te David la smulan «te ley yuʼun Jehová» (Sal. 1:1-3). Snaʼoj-a te ya yichʼik koltayel yuʼun Jehová te machʼatik pekʼel yoʼtanik, pero ya yichʼik pʼajel te machʼatik toyol ya yakʼ sbaike (2 Sam. 22:28). Jaʼ yuʼun te David la yakʼ ta yoʼtan te ley yuʼun Dios, jich la stsʼibay: «Ya calbe yutsilal te Jehová te ya yaʼbon jnaʼ bin lec ta pasel, ta ahcʼabal ya snohpteson te coʼtane» (Sal. 16:7).

7. ¿Bin ya jpastik teme pekʼel koʼtantik?

⁷ Teme pekʼel koʼtantike, ya kakʼtik te ya stojobtes jpensartik te Biblia yuʼun maba ya jpastik te bin chopole. Te sKʼop Dios jich kʼoem te ya skʼoponotik tal ta jpatik sok jich ya yalbotik: «Ha te be ini, tʼuna me». Jaʼme ya yakʼ jnaʼtik teme yakotik ta stʼunel yan bee (Is. 30:21). Teme ya jchʼam kaʼiytik te bin ya yal te Jehová, lek ya xkʼootik (Is. 48:17). Jich maba ya kichʼtik tojobtesel sok ma jtatik kʼexlal yuʼun. Nopolxan ya kaʼiy jbatik ta stojol te Jehová, melel jich ya yilotik te bitʼil yal snichʼan (Heb. 12:7).

8. Jich bitʼil ya yal Santiago 1:22-25, ¿bin yuʼun jich kʼoem bitʼil jun espejo te sKʼop Diose?

⁸ Te sKʼop Dios jich kʼoem bitʼil jun espejo (kʼopona Santiago 1:22-25). Jteb ma spisil te ants winiketik ya yil sbaik ta espejo te kʼalal ya xlokʼik bael ta snaik. Jich ya kiltik teme ay bin ya skʼan ya jlekubtestik ta jsit kelawtike. Jaʼnix jich te kʼalal ya jkʼopontik te Biblia ta jujun kʼajkʼal, ya kiltik teme ay bin ya skʼan ya jlekubtestik ta jpensartik o ta jtaleltik. Bayal ermanoetik ya skʼoponik ta jujun sab te teksto yuʼun te jujun kʼajkʼal swenta ya x-aʼtej ta spensarik. Jich ta sjunal kʼajkʼal ya sleik bin-utʼil ya  spas ta skuxlejalik te teksto la skʼoponike. Jaʼnix jich ya skʼan ya jkʼopontik ta jujun kʼajkʼal te Biblia sok te ya jnopilan ta koʼtantik. Maba wokol ta pasel yilel, pero mukʼ skʼoplal, melel ya skoltayotik yuʼun maba ya kijkitaytik te be yuʼun kuxlejalil.

9. ¿Bin yuʼun ay ya skʼan ya kichʼtik tojobtesel yuʼun jtul kamigotik?

⁹ ¿Aybal bin-ora kajotik ta namajel ta stojol te Jehová? (Sal. 73:2, 3). Teme ay jtul awamigo te maba xiw ta stojobtesbelate, ¿labal achʼam awaʼiy sok labal apas te bin la yalbate? Lek teme la achʼuun spasele, ta melel ya kaltik wokol yuʼun te la yalbotike (Prov. 1:5).

10. ¿Bin ya skʼan ya jpastik teme ya stojobtesotik jtul kamigotik?

¹⁰ Te sKʼop Dios ya yal te «ya xcoltaywan te ehchen ya yacʼ te machʼa cʼuxat ta yoʼtan» (Prov. 27:6). ¿Bin ya skʼan ya yal-abi? Nopa awaʼiy te tekʼelat ta tiʼ kaye te banti ya xkʼax bayal karroetik, pero ya xchʼay awoʼtan ta yilel te aselular sok nijil ya xkajat ta kʼaxel bael. Tey-abi, jtul awamigo oranax ya stsakat ta akʼab sok ya snitat sujtel ta apat. Ta skaj te tulan la stsakate yaxub jilel te akʼabe. Pero lek te oranax la spase, jich maba lajat ta tenel ta karro. Yaniwan xjalaj skʼuxul te akʼabe, pero maba ya x-ilinat ta stojol te awamigo, ya awalbey wokol yuʼun te la skoltayate. Te ejemplo ini jaʼ pajal sok te bin ya spas jtul kamigotik te kʼalal ya yalbotik te ma jichuk ya xkʼopojotik o ma jichuk jtaleltik te bitʼil ya yal te sKʼop Diose, ta naile yaniwan x-ilinotik o ma lek ya kaʼiy jbatik yuʼun, pero te machʼatik ya x-ilinik ma snaʼik kʼinal (Ecl. 7:9). Jaʼ lek te yakuk kalbeytik wokol te kamigotik yuʼun te maba xiw ta yalbelotik te bin la sta ta ilele.

11. ¿Bin yuʼun ay machʼatik ya spʼajik te tojobtesel ya x-akʼbotik yuʼun jtul lekil amigo?

¹¹ ¿Bin yuʼun ay machʼatik ya spʼajik te tojobtesel ya x-akʼbotik yuʼun jtul lekil amigo? Jaʼ ta skaj te ya stoy sbaike. Te jtoybaetike jaʼ ya skʼan ya yaʼiyik «te bin ya smulanic» sok «qʼuejel ya [...] yacʼ schiquinic ta stojol te smelelil cʼop» (2 Tim. 4:3, 4). Maʼyuk machʼa ya yaʼiybeyik skʼop, melel ya skuyik te kʼax pʼijik sok te mukʼ skʼoplalike. Pero te jpuk-kʼop Pablo jich la yal: «Teme ay machʼa mucʼ ya spʼis sba, te melel mayuc scʼoblal, ha nix ya sloʼloy sba» (Gál. 6:3). Te ajwalil Salomón jaʼnix jich la yal: «Ha lec xan te querem te pobre te ay spʼijil yoʼtan te bin utʼil jtuhl ajwalil te mamalix soc ma snaʼ qʼuinal, te ma xyichʼ ta cuenta bin ya xʼaʼbot snaʼ» (Ecl. 4:13).

12. Ta swenta te bin ya yal Gálatas 2:11-14, ¿bin ya jnoptik ta swenta te bin la spas te jpuk-kʼop Pedro?

¹² Te jpuk-kʼop Pedro la yakʼ ta ilel jun lekil ejemplo kʼalal tojobtesot ta komonsitil yuʼun te Pablo (kʼopona Gálatas 2:11-14). Te lajuk skʼane la yilintay te Pablo ta skaj te bitʼil akʼbot te tojobtesele. Pero te Pedro ay spʼijil yoʼtan, jaʼ yuʼun la yichʼ ta mukʼ te tojobtesel sok maba la skʼej yilinba ta stojol te Pablo. Jaʼ yuʼun ta patil la yal te jaʼ yermano te kʼux ta yoʼtane (2 Ped. 3:15).

13. ¿Bin nail ya skʼan ya jpastik te kʼalal ay machʼa ya jtojobtestik?

¹³ Teme jich ya kiltik te ya skʼan ya jtojobtestik jtul kamigotik, ¿bin ya skʼan ya jnoptik ta nail? Ta nail ya skʼan ya jnoptik teme maba kʼax toj ya kaʼiy jbatike (Ecl. 7:16). Te machʼa kʼax toje jaʼ ya yal te bin ya snope, ma jaʼuk te bin ya snop te Jehová, sok ma snaʼbey yoʼbolil sba te yantike. Pero teme ya kiltik te yananix skʼan ya xkʼopojotik sok-a te kamigotike, kakʼbeytik snaʼ ta jamal te bin ma lek yak ta spasele sok jpasbeytik jojkʼoyel yuʼun ya sta ta ilel-a.  Lokʼemuk ta Biblia te bin ya kalbeytike sok mame xchʼay ta koʼtantik te jaʼme ya x-ichʼawan ta kʼop te Jehová, ma joʼukotik ya x-ichʼawanotik ta kʼop (Rom. 14:10). Jtuuntestik te pʼijil kʼop ay ta Biblia, sok jnaʼbeytik yoʼbolil sba te machʼatik ya kakʼbeytik te tsitsel jich bitʼil la spas te Jesuse (Prov. 3:5; Mat. 12:20). Juluk ta koʼtantik te yame skʼuxultayotik te Jehová teme ya jkʼuxultaytik-euk te yantike (Sant. 2:13).

14. ¿Bin ya schajpan ta jtojoltik te organisasion yuʼun Dios?

¹⁴ Te Jehová ya stuuntes te organisasion yuʼun swenta ya stojobtesotik ta be yuʼun kuxlejalil. Ya schajpan bideoetik, publikasionetik sok te tsoblejetik te ya skoltayotik ta spasel ta jkuxlejaltik te bin ya yal te Biblia. Spisil te nojptesel lokʼem talel ta sKʼop Dios. Te Kuerpo Gobernante ya skʼanbeyik te schʼul espiritu te Jehová swenta ya staik ta nopel bin-utʼil ya yichʼ cholel te skʼop Diose. Pero ma jaluk ya schaʼyilik te bin staojik ta nopel, melel yak ta jelonel te bin ay ta kʼoel ta pasel ta balumilal, jaʼ yuʼun te organisasion yuʼun Dios ya sle o ya sjeltay te bin ya spase (1 Cor. 7:31).

15. ¿Bin kʼoem ta stojolik chaʼoxtul publikadoretik?

¹⁵ Kʼalal te organisasion yuʼun Dios ya yachʼubtes te bitʼil kʼoem ta koʼtantik jun nojptesel yuʼun Biblia o ya yakʼxan jnoptik bitʼil ya jchʼuuntik te mantaliletik yuʼun Dios, oranax ya jchʼuuntik. Pero, ¿bin ya jpastik teme ay bin ya yakʼ xjelon ta jkuxlejaltik te bin ya sta ta nopel te organisasion? Jich bitʼil te cheʼoxeb jaʼbil kʼaxix tale, bayal takʼin lajem ta swenta te ya yichʼ pasel sok kanantayel te banti ya kichʼtik ta mukʼ te Diose. Jaʼ yuʼun te Kuerpo Gobernante la sta ta nopel te yakuk yichʼ nojesel ta lek te sNail Tsoblejetike. Ta swenta-abi, ay jun-nax la yichʼik akʼel cheʼoxeb kongregasionetik sok ay yichʼoj chonel sNail Tsoblejetik. Te takʼin-abi ya yichʼ tuuntesel yuʼun ya yichʼ pasel sNail Tsoblej ta lugaretik te banti maʼyuke. Teme ya kiltik te ya yichʼ chonel o jun-nax ya yichʼ akʼel cheʼoxeb kongregasionetik ta jlumaltik, wokolniwan ya xkʼayotik. Ta swenta-abi, ayniwan publikadoretik te namal ya xjilix yuʼunik te tsoblej. Ay yantik te tulan aʼtejik ta spasel o ta skanantayel te sNail Tsoblej maniwan ya xkʼot ta yoʼtanik bin yuʼun te ya yichʼ chonele. Yaniwan yalik te tojolnax te  la yakʼ stiempoik sok yipik ta aʼtel. Manchukme jich-abi, maba skomoj sbaik ta koltaywanej, jaʼ yuʼun ya kutsilkʼoptaytik yuʼun.

16. ¿Bin-utʼil ya skoltayotik te bin ya yal Colosenses 3:23, 24 yuʼun ma xchʼay te stseʼelil koʼtantik?

¹⁶ Te bin ya skoltayotik yuʼun ma schʼay te stseʼelil koʼtantik, jaʼ te ya jnaʼtik te yakotik ta aʼtel ta stojol te Jehová sok te jaʼ yak ta swentainel te organisasion yuʼune (kʼopona Colosenses 3:23, 24). Te ajwalil David la yakʼ kiltik lekil ejemplo kʼalal la yakʼ majtanil yuʼun ya yichʼ pasel te templo. Jich la yal: «¿Machʼahon a soc machʼa a te pueblo cuʼun, te ya xhuʼ cuʼuncotic yaqʼuel hich yipal mahtaniletic ta scʼanojel coʼtancotic? Melel spisil haʼat awuʼun, soc te bin la jquichʼcotic ta acʼab ya caʼbatcotic» (1 Crón. 29:14). Kʼalal ya kakʼtik majtan takʼin, jaʼ yakotik ta yakʼbeyel Jehová te bin la yakʼbotike. Manchukme jich-abi, te Jehová ya yalbotik wokol yuʼun te ya kakʼ jtiempotik, kiptik sok te bin ay kuʼuntik yuʼun ya xkoltaywanotik ta spasel te yaʼtele (2 Cor. 9:7).

17. ¿Bin yuʼun ma skʼan ya xchebaj koʼtantik teme ay bin ya skʼan ya jeltaytik ta jkuxlejaltik?

¹⁷ Swenta ma xlokʼotik ta be yuʼun kuxlejalil ya skʼan ya jtʼuntik te ejemplo yuʼun Jesús (1 Ped. 2:21). Teme ya jtatik ta ilel te ay bin ya skʼan ya jeltaytik ta jkuxlejaltik, mame xchebaj koʼtantik yuʼun. Melel jich ya xchiknaj ta ilel te ya jkʼan ya jtʼuntik te tojobtesel yuʼun Jehová. Ma smaliy te tojuk spisil te bin ya jpastik jich bitʼil te Jesuse, melel snaʼoj te jmulawilotike.

18. ¿Bin ya skʼan ya jpastik yuʼun ya xkʼootik ta achʼ balumilal?

¹⁸ Jaʼ yuʼun jtʼojan jsitik-a te bin ya xtal ta pajel chaʼbej sok jpastik tulan ta slekubtesel te jpensartik, te bin ya jpastik sok te jtaleltike (Prov. 4:25; Luc. 9:62). Pekʼelukme koʼtantik spisil-ora sok yakuk jpastik te bin ya yal 2 Corintios 13:11: «Tseʼeluc me awoʼtanic, lecuc me ya xcʼohex». Teme jich ya jpastike, yame sjokinotik «te Dios yuʼun lamal qʼuinal soc te ay scʼuxul yoʼtane». Ma jaʼuknax ya skoltayotik yuʼun ya xkʼootik ta achʼ balumilal, jaʼnix jich ya yakʼ stseʼelil koʼtantik ta ora ini.