1, 2. Albeya skʼoplal sok jun ejemplo bitʼil ya xjuʼ ya jpastik te bin ya yal Proverbios 4:25.

JNOP KAʼIYTIK te jich ya xkʼot ta pasele. Jtul ermana te ayix yaʼbilal ya sjultes ta yoʼtan te bintik lek kʼax ta skuxlejal te kʼalal achʼixto-ae. Manchukme ma jichukix skuxlejal ta ora ini, ya spas tulan yuʼun ya x-abatin ta stojol te Jehová (1 Cor. 15:58). Ta jujun kʼajkʼal ya snopilan te bitʼil ya xkuxin ta Nichimal Kʼinal sok te sfamilia sok te yamigotak. Yan ermana ya xjul ta yoʼtan te bin ma lek pasbote, pero maba ya skʼej ta yoʼtan (Col. 3:13). Jtul ermano ma xchʼay ta yoʼtan te bintik chopol la spas ta nameye, pero jaʼ ya xbajt ta yoʼtan te jun yoʼtan ya yakʼ sba ta ora ini (Sal. 51:10).

² ¿Bin-a te pajal yakik ta spasel te oxtul ermanoetik-abi? Jaʼ te ya xjul ta yoʼtanik te bin kʼax ta skuxlejalik, pero ma jaʼuk ya xbajt ta yoʼtanik. Jaʼ ya stʼojan sitik ta yilel te bin ya staik ta pajel chaʼbeje (kʼopona Proverbios 4:25).

3. ¿Bin yuʼun mukʼ skʼoplal te jaʼ ya xbajt ta koʼtantik yilel te bin yakotik ta smaliyele?

³ ¿Bin yuʼun mukʼ skʼoplal te jaʼ ya xbajt ta koʼtantik yilel te bin yakotik ta smaliyele? Nopa awaʼiy te ay machʼa yak ta beel, pero sutoj sit ta spat, maniwan najt ya xbeen. Jaʼnix jich te joʼotike, maniwan bayal bin ya jpastik ta stojol te Jehová teme jaʼ ya xbajt ta koʼtantik yilel te bin jilix ta jpatike (Luc. 9:62).

4. ¿Bin ya kiltik ta artikulo ini?

⁴ Ta artikulo ini ya kiltik oxchajp te bin kʼaxem ta jkuxlejaltik *  te maniwan jlokʼesojtik ta koʼtantike: jaʼ te bin ya jnaʼulantik, te ya jkʼej kilinbatik sok te bin chopol la jpastik ta nameye. Ya kiltik tekstoetik te ya skoltayotik yuʼun ya xchʼay ta koʼtantik te bin jilix ta jpatik sok te jaʼuk ya xbajt ta koʼtantik stael te utsilal (Filip. 3:13).

5. Jich bitʼil ya yal Eclesiastés 7:10, ¿bin-a te ma skʼan ya kaltike?

⁵ (Kʼopona Eclesiastés 7:10). Te bersikulo ya yal te ma chopoluk teme ya jnoptik: «¿Bin yuʼun te jaʼ lek te bin kʼaxemixe?». Jaʼ ma lek teme ya jnoptik: «¿Bin yuʼun jaʼ lekxan te bin kʼaxemix te bitʼil ta ora ini?». Jaʼ majtanil yuʼun Jehová te ya xjul ta koʼtantik te bin lek kʼaxem ta jtojoltike. Te bin ma leke, jaʼ teme ya jpajaltaytik te bin kʼax ta jtojoltik sok te bin yak ta kʼaxel ta ora ini sok te ya jnoptik te maʼyukix yutsil te jkuxlejaltike.

6. ¿Bin yuʼun ma skʼan ya jnopilantik te jaʼ lekxan te bin kʼaxix ta jkuxlejaltike? Ala jun ejemplo.

⁶ Teme spisil-ora ya jnoptik te jaʼ lekxan te bin kʼaxix ta jkuxlejaltike, jaʼnaxniwan ya xjul ta koʼtantik te bin leke sok maniwan ayuk skʼoplal ya kiltik te wokolil te kʼax ta jtojoltike. Jaʼ jich la spasik te israeletik te kʼalal lokʼikix ta Egipto-ae, chʼay ta yoʼtanik te wokolil kʼax yuʼunik tey-ae sok jaʼnax jul ta yoʼtanik te bujtsʼan weʼelile. Jich la yalik: «Ya jnaʼtic te chay la jweʼtic ta Egipto te mayuc stojol, soc te pepino, melón, tux-ac, cebolla soc axux» (Núm. 11:5). ¿Yuʼun-nixbal melel-a te ma la stoj te sweʼelike? Maʼuk. Bayal la stojik, melel la yichʼik tulan mosoinel (Éx. 1:13, 14; 3:6-9). Pero oranax chʼay ta yoʼtanik te swokolike sok jaʼnax la snaʼik te bin leke. Ma jaʼuk bajt ta yoʼtanik te bin la spas ta stojolik te Jehovae, jaʼ bajt ta yoʼtanik snaʼulanel te bin la smulanik ta Egipto. Jaʼ yuʼun ilin te Jehová (Núm. 11:10).

7. ¿Bin koltayot jtul ermana yuʼun ma bayaluk ya smel yoʼtan?

⁷ ¿Bin ya skoltayotik yuʼun maba ya  jmel koʼtantik te kʼalal ay bin ya xjul ta koʼtantike? Kiltik te bin kʼax ta stojol jtul ermana te och ta Betel ta Brooklyn ta 1945. Cheʼoxeb jaʼbil ta patil nujpun sok jtul betelita sok tey abatinik bayal jaʼbil. Ta 1976 tsakot ta chamel te smamalale. Jaʼ yuʼun kʼalal la snaʼ stojol te nopol ya xlajixe, la yalbey te yinam te bin ya xjuʼ ya spas te kʼalal stukel ayix-ae. Jich la yalbey: «Te jayeb jaʼbil nujpunemotike, tseʼelnax koʼtantik. Bayal ants winiketik ma jichuk snujpunelik. Manchukme ma xchʼay ta awoʼtan te bin lek kʼax kuʼuntike, mame xbajt ta awoʼtan snaʼulanel. Kʼunkʼunme ya xpejkʼaj te amel-oʼtane. Mame xchebaj awoʼtan sok mame xbajt ta awoʼtan te awokole. Tseʼeluk awoʼtan yuʼun te bin ay awuʼune [...] Jaʼ majtanil yuʼun Dios te ya xjul ta koʼtantik te bin leke». ¡Kʼax tʼujbil te bin la yal te ermano!

8. ¿Bintik lek la sta te ermana ta swenta te ma jaʼuk bajt ta yoʼtan snopilanel te bin kʼax ta skuxlejale?

⁸ Te ermana la yichʼ ta wenta te bin albot yuʼun te smamalale sok jun yoʼtan abatin ta stojol te Jehová, laj te kʼalal 92 yaʼbilal-ae. Cheʼoxeb jaʼbil ta nailal, jich la yal: «Kʼalal ya jnopilan ta koʼtan te kʼaxem ta 63 jaʼbil abatinemon ta stojol te Jehová, ya xjuʼ ya kal ta jamal te jtabeyoj sbujtsʼ te jkuxlejale». ¿Bin yuʼun? Jich la yalxan: «Te bin ya yakʼbon stseʼelil koʼtan jaʼ te jun-nax ayon sok te ermanoetik sok te ya xbajt jokin jbatikxan ta Nichimal Kʼinal yuʼun ya x-abatinotik ta stojol te Mukʼul Jpaswanej kuʼuntik, te Jehová Dios». * ¡Kʼax lekil ejemplo te ermana te la stʼojan sit-a te bin ya sta ta pajel chaʼbeje!

9. Jich bitʼil ya yal Levítico 19:18, ¿bin yuʼun ay wokol ya kaʼiytik spasel perdon?

⁹ (Kʼopona Levítico 19:18). ¿Bin yuʼun ay wokol ya kaʼiytik spasel perdon? Wokol ya kaʼiytik kʼalal jaʼ jtul ermano, jtul kamigotik o jtul jfamiliatik te ay bin ma lek ya spasbotik. Ta jun buelta jtul ermana la  skuy ta j-elekʼ yan ermana, la yal te elkʼanbot stakʼine. Te ermana te kuyot ta j-elekʼe maba ya xchʼay ta yoʼtan-a te bin kʼot ta pasele, manchukme la yichʼ kʼanbeyel perdon. Maniwan ay jich kʼaxem ta jtojoltik, pero ayniwan kaʼiyojtik te ma xjuʼ ya xchʼay ta koʼtantik te bin la kichʼtik pasbeyele.

10. ¿Bin ya skoltayotik yuʼun maba ya jkʼej kilinbatik?

¹⁰ ¿Bin ya skoltayotik yuʼun maba ya jkʼej kilinbatik? Jun te bin ya skoltayotike, jaʼ te ya xjul ta koʼtantik te spisil ya yil stukel te Jehovae. Ya yil spisil te jwokoltik sok te bin ma stojiluk ya kichʼtik pasbeyele (Heb. 4:13). Kʼux ya yaʼiy te kʼalal ay jwokoltik ya yile (Is. 63:9). Sok jamal yaloj te ya stupʼ te wokolil jtaojtik ta skaj te ay bin ma stojiluk la kichʼtik pasbeyele (Apoc. 21:3, 4).

11. ¿Bin lekilal ya jtatik teme maba ya jkʼej kilinbatik?

¹¹ Ay bin lek ya jtatik te kʼalal maba ya jkʼej ta koʼtantik te bin ma lek ya kichʼtik pasbeyel. Jich kʼot ta stojol te ermana te kuyot ta j-elekʼe. La slokʼes ta yoʼtan te bin pasbote. Kʼot ta yoʼtan teme ya jpasbeytik perdon te yantike, jaʼnix jich ya spasbotik perdon te Jehová (Mat. 6:14). Snaʼoj-a te maba lek te bin pasbot yuʼun te ermana, pero maba la skʼejix ta yoʼtan. Jich la staxan stseʼelil yoʼtan sok jaʼ bajt ta yoʼtan spasbeyel yaʼtel te Jehová.

12. ¿Bin ya jnoptik ta swenta te bin ya yal 1 Juan 3:19, 20?

¹² (Kʼopona 1 Juan 3:19, 20). Ta jpisiltik ayniwan baeltik te jich ya kaʼiytik te ay jmultike. Jaʼniwan ya xjul ta koʼtantik te bin la jpastik te kʼalal mato kichʼojtik jaʼ-ae o kichʼojtikniwanix jaʼ-a. Stalelnanix-a te jich ya kaʼiy jbatike (Rom. 3:23). Manchukme ya jpastik tulan ta spasel te bin leke, «jpisiltic bayel buelta ya xjelawotic» (Sant. 3:2; Rom. 7:21-23). Maba lek ya kaʼiy jbatik te kʼalal ya xjul ta koʼtantik te bin chopol la jpastike, pero ya xjuʼ ya skoltayotik. ¿Bin-utʼil? Ya skoltayotik yuʼun ya jeltaytik te jkuxlejaltik sok te ya kakʼ ta koʼtantik te maba ya jpastikix yan buelta (Heb. 12:12, 13).

13. ¿Bin yuʼun ma skʼan ya jnoptik te jmulinojtikto te bin la jpastik ta nameye?

¹³ Manchukme la jsujtesix koʼtantik sok la spasbotikix perdon te Jehová, aytoniwan jmultik ya kaʼiytik. Teme jich ya kaʼiy jbatike, ya xjuʼ ya yutsʼin koʼtantik (Sal. 31:10; 38:3, 4). ¿Bin yuʼun te jich ya kaltike? Jich kʼax ta stojol jtul ermana, maba lek ya yaʼiy sba-a ta skaj te bin chopol la spas te nameye. Jich ya yal: «La jnop te tojolnax te ya jpas tulan ta abatinel ta stojol te Jehová, la jkuy te maʼyuk bin-ora ya jta te jkolele». Bayalniwan machʼatik jich ya yaʼiy sbaik bitʼil te ermanae. Pero ya skʼan ya jkanantaytik te koʼtantik yuʼun maba ya jnoptik te jmulinojtikto te bin la jpastik ta nameye. Te Satanás ya skʼan te yakuk jnoptik te maʼyuk bin-ora ya xlekub te jtaleltike, pero ma jichuk ya yilotik te Jehovae (paja sok 2 Corintios 2:5-7, 11).

14. ¿Bin-utʼil ya jnaʼ te maba ya snop te Jehová te ma xjuʼ ya jlekubtes te jtalele?

¹⁴ Jichniwan ya jojkʼoybey jbatik: «¿Bin-utʼil ya jnaʼ te maba ya snop te Jehová te ma xjuʼ ya jlekubtes te jtalele?». Te kʼalal jich ya jojkʼoybey jbatik, tey la kakʼbeytikix-a te sujtibe. ¿Bin yuʼun te jich ya kaltike? Ayix tal bayal jaʼbil Te J-ilkʼinal ta toyol la yalbey skʼoplal binwan yaʼiyel ya kaʼiy jbatik teme ya jchaʼpastik te bin ma lek ta skaj te maba jilem kuʼuntik te bin kʼayemotik ta spasel ta nameye. Jich la  yal: «Mame xa anop te ma xjuʼ awuʼun sjeltayel te atalele sok te ma xjuʼ ya ata perdon yuʼun te amule. Jichme ya smulan te Satanás te ya anop ta awoʼtane. Te bitʼil ya amel awoʼtan sok te ya awilintay aba, jichme ya awakʼ ta ilel te ya akʼan ya alekubtes te atalele. Jich yuʼun mame xlujbat ta skʼoponel te Diose, kʼanbeya perdon sok te yakuk skoltayat ta slekubtesel te akuxlejale. Kʼopona te Jehová jich te bitʼil ya spas jtul chʼin alal te kʼalal ya skʼopon te stat te kʼalal ay ta wokole, chikan jayeb buelta ya xjuʼ ya awalulanbey te bin ya akʼane, yame awil te ya skoltayat sok yutsil yoʼtan te Jehová».

15, 16. ¿Bin-utʼil yaʼiyoj sba chaʼoxtul ermanoetik ta swenta te kʼux aʼiybilik yuʼun te Jehová?

¹⁵ Bayal ermanoetik staoj smukʼul yoʼtanik snaʼel te kʼux aʼiybilik yuʼun te Jehovae. Ayix tal cheʼoxeb jaʼbil, jtul ermano tijbot yoʼtan te kʼalal la skʼopon jun eksperiensia ta seksion «La Biblia les cambió la vida». Ta artikulo-abi, jtul ermana tulan la yaʼiy schʼuunel te kʼux aʼiybil yuʼun te Jehová ta skaj te bin kʼax ta skuxlejale. Manchukme yichʼojix jaʼ-a, maba ya xlokʼ ta yoʼtan te bin-utʼil ya yaʼiy sbae. Pero jajch snop ta yoʼtan bin yuʼun la yakʼ skuxlejal te Jesús, jaʼ-abi jaʼ koltayot yuʼun ya sjeltay te snopojibal yuʼune. *

¹⁶ ¿Bin-utʼil koltayot te ermano te eksperiensia la skʼopone? Jich la yal: «Te kʼalal jchʼielonto-a kʼayon ta yilel pornografia, pero juʼ kuʼun yijkitayel. Maba bayal kʼajkʼal ta patil chaʼkajon ta yilel. La jle koltayel ta stojol te ansianoetik ta jkongregasion, sok jich kʼunkʼun kaj kijkitay. Yalojbonik te kʼuxon ta yoʼtan sok te ya snaʼbon yoʼbolil jba te Diose. Manchukme jich-abi, ay baeltik maʼyuk jkʼoplal ya kaʼiy jba sok te maniwan kʼuxon ta yoʼtan te Diose». Jaʼnix jich la yal te bayal koltayot te eksperiensia la skʼopone, jich la yalxan: «Ta ora ini kʼoem ta koʼtan te kʼalal ya jnop te maʼyuk bin-ora ya spasbon perdon te Jehová, yakon ta spʼajel te la yakʼ sba ta lajel te sNichʼan ta swenta te jmule. La jsetʼ  lokʼel te artikulo yuʼun ya jkʼopon sok ya jnopilan ta koʼtan te kʼalal xtal ta koʼtan te ma kʼuxon ta yoʼtan te Jehová».

17. ¿Bin-utʼil maba la yakʼ nainuk ta yoʼtan te bin chopol la spas te Pabloe?

¹⁷ Te eksperiensiaetik ini ya sjultes ta koʼtantik te bin kʼax ta stojol te jpuk-kʼop Pablo. Te kʼalal mato j-abat yuʼun Dios-a, bayal bin chopol la spas. Ya xjul ta yoʼtan-a te bin la spase, pero ma jaʼuk bajt ta yoʼtan snopilanel sjunal kʼajkʼal (1 Tim. 1:12-15). La yal te jaʼ smajtan yuʼun Jehová te la yakʼ sba ta lajel te Jesuse (Gál. 2:20). Jich maba la yakʼ xnain ta yoʼtan te bin smulinoj ya yaʼiye sok jaʼ bajt ta yoʼtan te ya x-abatin ta stojol te Jehovae.

18. ¿Bin la jnoptik ta artikulo ini?

¹⁸ ¿Bin la jnoptik ta artikulo ini? Sbabial, jaʼ majtanil yuʼun Jehová te ya xjul ta koʼtantik te bin lek kʼaxem ta jtojoltike, pero te bin ya xtal ta pajel chaʼbej jaʼ kʼax lekxan. Schebal, ayniwan machʼa te ay bin chopol la spasbotik, pero teme ya jpasbeytik perdon maba ya smakotik ta spasbeyel yaʼtel te Jehová. Yoxebal, teme ayto jmultik ya kaʼiytik, maba ya yakʼ te ya x-abatinotik sok stseʼelil koʼtantik ta stojol te Jehová. Jaʼ yuʼun, jich bitʼil la spas te Pablo, ya skʼan te ayuk ta koʼtantik te la spasbotikix perdon jmultik te Jehovae.

19. ¿Bin-utʼil ya jnaʼtik te maba ya xjulix ta koʼtantik ta achʼ balumilal te bin ma lek kʼax ta jtojoltike?

¹⁹ Ta achʼ balumilal, te banti ya jmulantik te kuxinel ta sbajtelkʼinal, maba ya xjulix ta koʼtantik te bin ma lek kʼax ta jtojoltike. Te Biblia ya yal «te bin ay ta nahil mayuquix ta naʼel, jcʼaxel ma xnaʼotix» (Is. 65:17). Ay chaʼoxtulotik te ayix jaʼbil te yakotik ta abatinel ta stojol te Jehová sok te ayix kaʼbilaltik, pero nopanax awaʼiy te ta achʼ balumilal jich ya xkʼootik bitʼil achʼix kerem (Job 33:25). Jich yuʼun mame skʼan te jaʼ ya xbajt ta koʼtantik yilel te bin jilix ta jpatike, jaʼuk ya jtʼojan jsitik-a te bin ya jtatik ta pajel chaʼbeje.