1, 2. 1) ¿Bin yuʼun la yal te jpuk-kʼop Pablo te jaʼ «mukʼxan skʼoplal» te kʼuxul oʼtanile? 2) ¿Bintik jojkʼoyeletik ya kakʼbeytik sujtib ta artículo ini?

 KʼALAL te jpuk-kʼop Pablo la yal te oxeb taleliletik ini: te chʼuunel oʼtanil, te bin ya jmaliytik sok te kʼuxul oʼtanile, jich la yal ta slajibal: «Te bin mukʼxan skʼoplal ta spisil jaʼ te kʼuxul oʼtanile» (1 Cor. 13:13). ¿Bin yuʼun te jich la yale? Melel ta pajel chaʼbej maba ya jkʼantikix te chʼuunel oʼtanil ta swenta te bintik yaloj ta jamal te Dios te ya spas ta swenta te achʼ balumilal, melel kʼoemix ta pasel ta yorail-abi. Pero yananix skʼan kʼux ya kaʼiytik stukel-a te ants winiketik sok te Jehová. Te kʼuxul oʼtanil-abi ya xmukʼubxan bael ta sbajtelkʼinal.

² Te bitʼil spisil-ora ya skʼan ya kakʼtik ta ilel kʼuxul oʼtanil, kakʼbeytik sujtib oxeb jojkʼoyeletik. Sbabial, ¿bin yuʼun ya skʼan te talel kʼaxel kʼux ya kaʼiy jbatike? Schebal, ¿bintik-utʼil ya xjuʼ ya kakʼtik ta ilel te kʼux ya kaʼiy jbatike? Yoxebal, ¿bin ya skʼan ya jpastik yuʼun maba ya xpejkʼaj yip te skʼuxul koʼtantik?

3. ¿Bin yuʼun mukʼ skʼoplal te talel kʼaxel kʼux ya kaʼiy jbatike?

³ ¿Bin yuʼun ya skʼan te talel kʼaxel kʼux ya kaʼiy jbatike? Melel te kʼalal jich ya jpastike ya kakʼtik ta ilel te smelelil jchʼuunjelotik. Te Jesús jich la yalbey te jpuk-kʼopetik yuʼune: «Jichme ya snaʼik spisil te ants winiketik te jaʼex jnopojelex kuʼun: teme talel kʼaxel kʼux ya awaʼiy aba ta awoʼtanike» (Juan 13:35). Jaʼnix jich, te kʼuxul oʼtanil jun-nax ya yakʼotik. Jaʼ yuʼun te jpuk-kʼop Pablo jich la yal: «Ya yakʼ te jun-nax ya xkʼootik ta smelelil» (Col. 3:14). Sok ay yan swentail te bin yuʼun mukʼ skʼoplal te talel kʼaxel kʼux ya kaʼiy jbatike. Te jpuk-kʼop Juan jich la stsʼibaybey te yermanotak: «Te machʼa kʼux ta yoʼtan te Diose, jaʼnixme  jich kʼuxuk ta yoʼtan te yermanoe» (1 Juan 4:21). Jaʼ yuʼun te kʼalal ya kakʼbeytik yil skʼuxul koʼtantik te kermanotaktik, jich ya kakʼtik ta ilel te skʼuxul koʼtantik ta stojol te Jehová.

4, 5. ¿Bin-utʼil snitojbey sba skʼoplal te skʼuxul koʼtantik ta stojol te Dios sok ta stojol te kermanotaktik? Ala junuk ejemplo.

⁴ ¿Bin-utʼil snitojbey sba skʼoplal te kʼuxul oʼtanil ta stojol te Dios sok te kʼuxul oʼtanil ta stojol te kermanotaktike? Yuʼun ya kichʼbeytik swentail, jnop kaʼiytik ta swenta te bin-utʼil te koʼtantik stsakoj sba sok te yantikxan te bintik ay ta jbakʼetaltike. Kʼalal jtul doctor ya stsakbotik te jkʼabtik yuʼun ya yaʼiy te bitʼil ya x-aʼtej te koʼtantike, jich ya snaʼ teme lek o ma lek ta aʼtel. ¿Bin ya snojptesotik te ejemplo ini?

⁵ Jich bitʼil te doctor te ya stsakbey skʼab te machʼa yak ta yilel yuʼun ya snaʼ teme lek yak ta aʼtel o maʼuk te yoʼtane, jaʼnix jich te joʼotik ya xjuʼ ya jnaʼtik bin-utʼil ay te skʼuxul koʼtantik ta stojol te Jehová te kʼalal ya kiltik jayebto kʼux ta koʼtantik te kermanotaktike. Teme ya kiltik te yak ta pejkʼajel yipe, jaʼniwan jich-euk te skʼuxul koʼtantik ta stojol te Jehová. Pero teme kʼayemotik ta yakʼbeyel yil skʼuxul koʼtantik te kermanotaktike, jich ya xchiknaj ta ilel te yichʼoj yip ta lek te skʼuxul koʼtantik ta stojol te Jehová.

6. Teme pejkʼajem yip te skʼuxul koʼtantik ta stojol te kermanotaktik, ¿bin yuʼun ya kaltik te ya xjuʼ ya jta jwokoltik yuʼune? (1 Juan 4:​7-9, 11).

⁶ Teme yak ta pejkʼajel te skʼuxul koʼtantik ta stojol te kermanotaktik ya xjuʼ ya jta jwokoltik. ¿Bin yuʼun te jich ya kaltike? Melel teme jich ya xkʼot ta pasele ya xjuʼ ya kijkitaytik yamigoinel te Jehová. Jich ya yakʼ ta ilel te bin la stsʼibay te jpuk-kʼop Juan: «Te machʼa maba kʼux ta yoʼtan te yermano te ya yilbey site, ma xjuʼ kʼux ta yoʼtan te Dios te ma xyilbey sit stukele» (1 Juan 4:20). ¿Bin ya snojptesotik-abi? Jaʼnax ya xjuʼ ya kakʼbeytik stseʼelil yoʼtan te Jehová teme talel kʼaxel kʼux ya kaʼiy jbatike (kʼopona 1 Juan 4:​7-9, 11).

7, 8. ¿Bintik-utʼil ya xjuʼ ya kakʼtik ta ilel te kʼux ya kaʼiy jba ta koʼtantike?

⁷ Te Biblia bayal buelta ya yakʼbotik te mantalil ini: «Talel kʼaxel kʼuxme xa awaʼiy aba ta awoʼtanik» (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Pero te kʼuxul oʼtanil ya xchʼi ta koʼtantik; maʼyuk machʼa ya xjuʼ ya yil. Pero, ¿bin-utʼil ya xjuʼ ya kakʼbeytik yil te yantik te kʼux ya kaʼiytik ta koʼtantike? Ta swenta te bintik ya kaltik sok te bin ya jpastike.

⁸ Ay bayal te bin-utʼil ya xjuʼ ya kakʼbeytik yil te kʼux ya kaʼiy ta koʼtantik te kermanotaktike. Te Biblia ya yalbotik cheʼoxeb ejemplo. «Talel cʼaxel smelelil yac acʼopon abahic» (Zac. 8:16). «Talel kʼaxel lamalukme awoʼtanik» (Mar. 9:50). «Jaʼme nailuk xa awakʼik ta ilel te talel kʼaxel ya awichʼ abaik ta mukʼe» (Rom. 12:10). «Talel kʼaxel lekme xa awil abaik ta jujuntul» (Rom. 15:7). «Talel kʼaxel […] pasbeya abaik perdón» (Col. 3:13). «Talel kʼaxel xa akoltay abaik ta skuchel te awokolike» (Gál. 6:2). «Talel kʼaxel akʼbeya aba smukʼul kʼinal awaʼiyik» (1 Tes. 4:18). «Talel kʼaxel xa awakʼbey aba yip awoʼtanik» (1 Tes. 5:11). «Talel kʼaxel kʼoponbeya abaik Dios» (Sant. 5:16).

9. ¿Bin yuʼun ya kaltik te yakʼbeyel smukʼul yoʼtan te yantik kʼax mukʼ skʼoplal yuʼun ya kakʼbeytik yil skʼuxul koʼtantik? (Jaʼnix jich ilawil te fotoetik).

⁹ Kilbeytikxan skʼoplal ta lek junuk te bin-utʼil ya xjuʼ ya kakʼtik ta ilel te skʼuxul koʼtantik te la kiltik ta párrafo 8. Te Pablo jich la yal: «Talel kʼaxel akʼbeya aba smukʼul kʼinal awaʼiyik». ¿Bin yuʼun ya kaltik te yakʼbeyel smukʼul yoʼtan te yantik kʼax mukʼ skʼoplal yuʼun ya kakʼbeytik yil skʼuxul koʼtantik? Jun libro te ya yal ta swenta te Biblia ya schol ta aʼiyel te kʼopil la stuuntes te Pablo ta griego  te yichʼoj kʼasesel «yakʼel mukʼul kʼinal» ya skʼan ya yal te «ya xtejkʼajotik ta stsʼeel te machʼa yak ta kʼaxel ta wokol yuʼun ya yichʼ akʼbeyel smukʼul kʼinal yaʼiy». Jich yuʼun, te kʼalal ya kakʼbeytik smukʼul kʼinal yaʼiy jtul hermano te yak ta kʼaxel swokole, ya jkoltaytik yuʼun jun yoʼtan ya x-abatinxan ta stojol te Jehová. Jujun buelta te ya kakʼbeytik smukʼul kʼinal yaʼiy jtul hermano o hermana ya kakʼbeytik yil te kʼux ta koʼtantike (2 Cor. 7:​6, 7, 13).

10. ¿Bin yuʼun ya kaltik te snitojbey sba skʼoplal te snaʼbeyel yoʼbolil sba te yantik sok te yakʼel mukʼul kʼinal?

¹⁰ Snitojbey sba skʼoplal te snaʼbeyel yoʼbolil sba te yantik sok te yakʼel mukʼul kʼinal. ¿Bin yuʼun te jich ya kaltike? Melel, te machʼa ya snaʼbey yoʼbolil sba te machʼa yak ta kʼaxel swokol, ya skʼan ya yakʼbey smukʼul kʼinal yaʼiy sok ay bin ya skʼan ya spas yuʼun ya xjuʼ ya skoltay. Jaʼ yuʼun nail ya jnaʼbeytik yoʼbolil sba te machʼa yak ta kʼaxel swokol sok jaʼ-abi ya stij koʼtantik yuʼun ya kakʼbeytik smukʼul kʼinal yaʼiy. Jichnix ya spas-euk te Jehová. Te Pablo la yal te bitʼil ya snaʼbey yoʼbolil sba te ants winiketik te Jehová jaʼ ya xtijbot yoʼtan yuʼun ya yakʼtiklanbey smukʼul kʼinal yaʼiyik. La yal te Jehová jaʼ «te Tatil te ya snaʼ yoʼbolil jbatik, jaʼ te Dios te ya yakʼ smukʼul kʼinal kaʼiytik» (2 Cor. 1:3). Te Pablo la yal te «ya snaʼ yoʼbolil jbatik» te Jehová. Sok la yal te jaʼ te banti ya xlokʼ talel o «te Tatil te ya snaʼ yoʼbolil jbatik». Te bitʼil ya snaʼ yoʼbolil jbatike ya xtijbot yoʼtan yuʼun ya yakʼ smukʼul kʼinal kaʼiytik «ta spisil te jwokoltik» (2 Cor. 1:4). Jich te bin-utʼil te jaʼ te ya xlokʼ talel ta slokʼib jaʼ te ya slamantes te takin tiʼil, te Jehová ya yakʼbey smukʼul kʼinal yaʼiy te machʼatik yakik ta kʼaxel ta wokol. ¿Bin ya xbajt skoltayotik yuʼun ya jnaʼbeytik yoʼbolil sba te yantik sok yuʼun ya kakʼbeytik smukʼul yoʼtanik, jich te bin-utʼil ya spas te Jehová? Jaʼ te schʼitesel taleliletik te ya skoltayotik ta yakʼel ta ilel mukʼul kʼinal. Kiltik chaʼoxchajp.

11. Jich bitʼil ya yal Colosenses 3:12 sok 1 Pedro 3:​8, ¿bintik taleliletik ya skoltayotik yuʼun kʼuxuk ta koʼtantik sok ya jmukʼubtesbeytik kʼinal yaʼiyik te yantik?

¹¹ ¿Bin ya skoltayotik yuʼun spisil-ora kʼuxuk ya kaʼiy jbatik sok ya jmukʼubtesbey jba kʼinal kaʼiytik jujun kʼajkʼal? Ya skʼan te ayuk kuʼuntik te taleliletik ini: te ya xkʼot ta koʼtantik te swokol te yantik, te kʼuxuk ya kaʼiy jbatik jich bitʼil te machʼatik jun-nax smeʼ statik sok te ayuk yutsil koʼtantik (kʼopona Colosenses 3:12; 1 Pedro 3:8). Kʼalal ay kuʼuntik te yutsil skʼuxul koʼtantik sok yantikxan taleliletik te pajal kʼoemik sok, ya skoltayotik yuʼun ya jmukʼubtesbeytik kʼinal yaʼiyik te yantik kʼalal ya xkʼax swokolik. Te Jesús jich la yal: «Te bintik nojel ta oʼtanil jaʼ ya xlokʼ ta alel. Te machʼa lek yoʼtane jaʼ ya yalbey skʼoplal te bintik lek skʼejoj ta yoʼtane» (Mat. 12:​34, 35). Chikan ta ilel te smukʼubtesbeyel kʼinal yaʼiy te kermanotaktik mukʼ skʼoplal, melel tey ya xchiknaj-a te skʼuxul koʼtantike.

12. 1) ¿Bin yuʼun ya skʼan ya jkanantay jbatik? 2) ¿Bin jojkʼoyel ya xbajt kakʼbeytik sujtib ta ora ini?

¹² Jpisiltik ya jkʼan ya jchʼuuntik te mantalil ini: «Mame xkijkitaytik ta yakʼel ta ilel te talel kʼaxel kʼux ya kaʼiy jbatik» (1 Juan 4:7). Pero ma skʼan ya xchʼay ta koʼtantik te bin la yal te Jesús: «Jteb ma spisiluk te ants winiketik yame xpejkʼaj te skʼuxul yoʼtanike» (Mat. 24:12). Te Jesús ma jaʼuk la skʼan la yakʼ ta naʼel te ya yijkitay skʼuxultayel sbaik te jnopojeletik yuʼune. Pero ya skʼan ya jkanantay jbatik te manchuk ya jkʼayinbeytik stalel te ants winiketik te maʼyuk skʼuxul yoʼtanik. Ta swenta ini, kilbeytik sujtib te yan jojkʼoyel: ¿aybal bin-utʼil ya xjuʼ ya jnaʼtik teme maba pejkʼajem yip te skʼuxul koʼtantik ta stojol te kermanotaktike?

13. ¿Bin ya xjuʼ ya spas ta prueba te skʼuxul koʼtantik?

 ¹³ Jun te bitʼil ya xjuʼ ya jnaʼtik te maba pejkʼajem yip te skʼuxul koʼtantik ta stojol te kermanotaktik, jaʼ te kʼalal ya kiltik te bin yaʼiyel ya kaʼiy jbatik kʼalal ay bin ya xkʼot ta pasel ta jkuxlejaltik (2 Cor. 8:8). Jun te bin-utʼil ya xjuʼ ya xkʼot ta pasel jaʼ te bin la yal te jpuk-kʼop Pedro: «Te bin tulanxan skʼoplale, jaʼ te talel kʼaxel kʼuxuk xa awaʼiy abaik sok spisil awoʼtanik, melel te kʼuxul oʼtanil ya schʼaybey skʼoplal bayal muliletik» (1 Ped. 4:8). Jich ya yichʼ pasel ta prueba te skʼuxul koʼtantik kʼalal ay banti ya xchʼayik te kermanotaktik o ay bin ya spasik te kʼux ya kaʼiytike.

14. Jich bin-utʼil ya yal 1 Pedro 4:​8, ¿bin yilel te kʼuxul oʼtanil te ya skʼan ya kakʼtik ta ilele? Ala junuk ejemplo.

¹⁴ Kilbeytik skʼoplal te bin la yal te jpuk-kʼop Pedro. Ta sbabial parte yuʼun te versículo 8 ya yal te bin yilel ya skʼan ya kakʼtik ta ilel te skʼuxul koʼtantik: «Kʼuxuk xa awaʼiy abaik sok spisil awoʼtanik». Te kʼopil griego te la stuuntes te Pedro «sok spisil awoʼtanik» ya skʼan ya yal «te ya slim bael sba». Te schebal parte yuʼun te versículo ya yal te binxan ya spas te kʼuxul oʼtanil-abi: jaʼ te ya schʼaybey skʼoplal te smul te kermanotaktik. Te kʼuxul oʼtanil jich kʼoem bitʼil te pakʼ te ya slim bael sba jaʼto te kʼalal ya  schʼaybey skʼoplal «bayal muliletik». Kʼalal te texto ini ya yal: schʼaybey skʼoplal ya skʼan ya yal «spasel perdón». Jich te bin-utʼil te pakʼ te ya smuk te bin ma tʼujbiluk ta ilele, te kʼuxul oʼtanil ya xjuʼ ya smuk o ya schʼaybey skʼoplal te banti ya xchʼayik te kermanotaktike.

15. ¿Bin ya jpastik teme yichʼoj yip ta lek te skʼuxul koʼtantik ta stojol te yantike? (Colosenses 3:13).

¹⁵ Te kʼuxul oʼtanil ya kaʼiytik ta stojol te kermanotaktik ya skʼan te yichʼojuk yip ta lek yuʼun ya xjuʼ ya jpasbeytik perdón, manchukme ay mero tulan ya kaʼiytik spasel (kʼopona Colosenses 3:13). Te kʼalal ya jpasbeytik perdón te yantik, ya kakʼtik ta ilel te yichʼoj yip ta lek te skʼuxul koʼtantik sok te ya jkʼan ya kakʼbeytik stseʼelil yoʼtan te Jehová. ¿Binxan ya xjuʼ ya skoltayotik yuʼun ya jpasbeytik perdón te yantik sok te maba ya x-ilinotik ta ora yuʼun te bintik ma jmulantik te ya spasike?

16, 17. ¿Binxan ya xjuʼ ya skoltayotik yuʼun ya jpasbeytik perdón te yantike? Ala junuk ejemplo. (Jaʼnix jich ilawil te fotoetik).

¹⁶ Jaʼ xa awakʼ ta awoʼtan te bintik lek ya spas te yantik, ma jaʼuk te bin ma lek ya spasike. Nopa awaʼiy te ya atsob aba sok chaʼoxtul hermanoetik sok ta patil ya akʼan ya alokʼesik jun foto. Ya alokʼes oxeb fotoetik, melel ay repenta ma lek ya xlokʼ jun. Ta patil ya awil te ma lek lokʼ jtul hermano ta foto. ¿Bin ya apas? Ya atupʼ sok jaʼxanix ya awichʼ jilel te cheb fotoetik, melel apisilik leknax lokʼex ta foto-abi.

 ¹⁷ Jpajbeytik skʼoplal te fotoetik sok te bintik ya xjul ta koʼtantike. Jpisiltik ya xjul ta koʼtantik te bintik lek kʼaxem kuʼuntik sok te hermanoetik. Pero jnop kaʼiytik te ta yorail-abi ay jtul hermano o hermana te ay bin la yal o la spas te maba lekuke. ¿Bin ya apas teme jich ya xjul ta awoʼtane? ¿Bin yuʼun maba ya atupʼ jich te bin-utʼil ya apas sok te fotoe? (Prov. 19:11; Efes. 4:32). Te bitʼil bayal bintik lek ya xjul ta koʼtantik te jpasojtik sok te hermano-abi, ya xjuʼ ya jtupʼtik ta oranax te bintik maba lek la spase. Jaʼ mukʼ skʼoplal te ya jkʼejtik sok skʼuxul koʼtantik «te tʼujbil fotoetike».

18. ¿Bintik mukʼik skʼoplal la jnoptik ta artículo ini?

¹⁸ ¿Bin yuʼun ma skʼan ya xpejkʼaj yip te skʼuxul koʼtantik ta stojol te yantike? Melel jich te bin-utʼil la jnoptikix te kʼalal ya kakʼbeytik yil skʼuxul koʼtantik te kermanotaktike jaʼnix jich ya kakʼbeytik yil te Jehová te kʼux ta koʼtantike. ¿Bin-utʼil ya xjuʼ ya kakʼtik ta ilel te kʼux ya kaʼiytik te kermanotaktike? Jun te bin-utʼil ya xjuʼ ya jpastike jaʼ te ya kakʼbeytik smukʼul kʼinal yaʼiyik te hermanoetik. Swenta ya xjuʼ jpasbeltik, ya skʼan ya jnaʼbeytik yoʼbolil sbaik. ¿Bin ya skʼan ya jpastik yuʼun maba ya xpejkʼaj yip te skʼuxul koʼtantike? Ya skʼan ya jpastik tulan yuʼun ya jpasbeytik perdón te yantike.

19. ¿Bin yuʼun kʼax mukʼ skʼoplal te ya kakʼbey jba kiltik kʼuxul oʼtanil ta kʼajkʼal ini?

¹⁹ ¿Bin yuʼun kʼax mukʼ skʼoplal te ya kakʼbey jba kiltik kʼuxul oʼtanil ta kʼajkʼal ini? Kiltik te bin la yal te Pedro: «Ya sta yorail te ya xlaj spisil te bintik aye. Jich yuʼun […] talel kʼaxel kʼuxuk xa awaʼiy abaik» (1 Ped. 4:​7, 8). ¿Bin ya xjuʼ ya jmaliytik te ya xkʼot ta pasel ta pajel chaʼbej? Te Jesús jich la yalbey te jpuk-kʼopetik yuʼune: «Ta swenta te jbiile yame spʼajex spisil te nacionetike» (Mat. 24:9). Yuʼun jun koʼtantik ya kichʼtik ta mukʼ te Jehová manchukme ya kichʼtik pʼajel, ya skʼan te junuknax ya kakʼ jbatik. Te Satanás ya skʼan ya xatotik, pero maba ya xjuʼ yuʼun teme talel kʼaxel kʼux ya kaʼiy jbatike, melel te kʼuxul oʼtanil «ya yakʼ te jun-nax ya xkʼootik ta smelelil» (Col. 3:14; Filip. 2:​1, 2).