TE AYUK bitʼil baat ta isla Sangir Besar ta Indonesia te ayix tal cheʼoxeb jaʼbil, laniwan ata oxtul hermanaetik ta tiʼmar. Manchukme naʼbil sbaik yuʼun te ya snojptesik ta Biblia te ants winiketik, te kʼalal ya xbajtik ta tiʼmar ma yuʼunuk ya xbajt scholik skʼop Dios. ¿Bin ya spasikix-a?

Nail, ya x-ochik ta mar ta sleel mukʼul tonetik, te jich smukʼulik bitʼil pelota yuʼun fútbol, sok ya slokʼesik tal ta tiʼmar. Ta patil, ya snajkan sbaik ta chʼin sillaetik sok ya smajulanik ta martillo te tonetik yuʼun ya stopʼik sok jich smukʼul ya xkʼotik bitʼil jpʼij ston mut. Tey-abi ya stsobik ta cubeta te tonetik yuʼun ya yichʼik bael ta snaik, ta skaj te toyol ay ya xmoik bael ta escalera. Ya yotsesik ta mukʼul costal te tonetik yuʼun ya schonik kʼalal ya xkʼax te camionetik swenta ya stuuntesik ta spasel carreteraetik.

Jtul te hermanaetik-abi Hulda sbiil. Te Hulda jaʼ bayalxan tiempo ya xjuʼ yuʼun ya x-aʼtej ta tiʼmar. Te jayeb takʼin ya sta kʼalal ya schon te tonetik jaʼ ya yakʼbey te sfamilia. Pero ta jun buelta la snop te ya stuuntes te takʼin yuʼun ya sman stablet swenta ya stuuntes te JW Library^®. Te Hulda snaʼoj te ya xkoltayot ta scholelxan ta lek skʼop Dios sok ta snopelxan ta lek te Biblia te videoetik sok te junetik te ay ta JW Library^®.

Ta jun u sok olil, aʼtej cheb ora ta jujun sab te Hulda. Te jayeb tonetik la stopʼtiklan noj yuʼun jun chʼin camión. Jich la stabey stojol te tablet.

Te Hulda jich la yal: «Bayal lujbon sok kʼuxubik kok jkʼab ta stopʼtiklanel te tonetik. Pero, chʼay ta koʼtan kʼalal jmanojix-a te jtablet sok te la jtuuntes ta scholelxan ta lek te skʼop Dios sok yuʼun ma wokoluk ya jchajpan jba yuʼun te tsoblejetik». Jaʼnix jich la yal te bayal tuun yuʼun te tablet te kʼalal jajchelto-a te COVID-19, melel spisil te bintik la yichʼ pasel ta congregación la yichʼ pasel ta videollamada. ¡Tseʼel koʼtantik yuʼun te la sta te bin skʼanoj te Hulda!