TA YORAIL te Segunda Guerra Mundial, jtul soldado jich tulan la yalbey jtsojb testigoetik yuʼun Jehová: «Teme maba ya xbaex ta yakʼbeyel guerra te Francia o te Inglaterra, ¡apisilik ya xlajex!». Manchukme nopol ay tey-a jtsojb soldadoetik yuʼun te SS te leknax chapalik ta stujkʼik, maʼyuk ni jtuluk hermano la schʼuun te bin albotike. ¡Maba xiwik! Jaʼ lekil ejemplo ta stojol spisil te testigoetik yuʼun Jehová, te bitʼil maba ya xbootik ta guerrae. Maba ya jchʼik jbatik ta spasel te bintik ma lek ya spasik te ants winiketik manchukme ya yalbotik te ya kichʼtik milel yuʼune.

1. JUN-NAX SNACIONIK-A TE J-ABATETIK YUʼUN DIOS

Ta namey kʼinal, te Jehová la stsa jun nación yuʼun Israel yuʼun ya xkʼot ta j-abatetik yuʼun. Jich la yal ta stojol te israeletik: «Haʼex me tsahbil cʼulejalil cuʼun ya cʼohex ta yohlil spisil te pueblohetic» (Éx. 19:5). Jaʼnix jich akʼtiklanbot skʼinalik. Jaʼ yuʼun kʼalal ya x-albotik ta mantal te ya xbajt yakʼbeyik guerra yantik nacionetik, te israeletik maba ya smilik yantik j-abatetik yuʼun Dios. *

Ta ora ini, te j-abatetik yuʼun Dios «talemik ta spisil ta chajp nacionetik, tsʼumbaliletik, lumetik sok kʼopiletik» (Apoc. 7:9). Te yakuk xbajtik ta guerra, ya skontrainik sok ya smilik te machʼatik pajal schʼuunel yoʼtanik soke.

 2. TE JEHOVÁ JAʼ YA YALBEY TE ISRAELETIK TE YAKUK XBAJTIK TA GUERRA

Ta namey kʼinal, jaʼ te Jehová te machʼa ya yal te bin-ora sok bin yuʼun ya xbajtik ta guerra te israeletik. Jich bitʼil te kʼalal albotik te yakuk xbajt smilik te cananeoetik, melel ya yichʼik ta mukʼ lotil diosetik, ya spasik mulwej sok ya yakʼik ta chikʼbil majtanil te chʼin alaletik. Te Jehová la yaltiklanbey ta mantal te israeletik te yakuk smilik spisil te ants winiketik te ayik ta Kʼinal te albil skʼoplal ya yichʼik, yuʼun ma jichuk ya spasik-euk (Lev. 18:24, 25). Kʼalal te israeletik ayikix-a te ta Kʼinal te albil skʼoplal ya yichʼik, ay albotik yuʼun te Dios te ya xjuʼ ya skoltay sbaik ta skʼab te skontratak (2 Sam. 5:17-25). Pero maʼyuk bin-ora albotik te ya xjuʼ te stukeliknax ya staik ta nopel te ya xbajtik ta guerra, melel te kʼalal jich ya spasik te ma jichuk albilik yuʼun te Jehová, ya sta swokolik yuʼun (Núm. 14:41-45; 2 Crón. 35:20-24).

Ta ora ini, te ants winiketik ma yichʼojikix albeyel yuʼun Jehová te ya xjuʼ ya xbajtik ta guerra. Te nacionetik jich ya spasik ta swentanax te bin ya skʼan yoʼtanike, ma jaʼuk te bin ya skʼan yoʼtan te Diose. Melel ya skʼan te ayukxan skʼinalik, te ayuk stakʼinik, te ya schʼik sbaik ta política o ta swentanax te ma pajaluk te snopojibal yuʼunik. Pero ¿lekbal ya yil Dios te machʼatik ya xbajtik ta guerra ta swenta te sbiil te Dios yuʼun ya skoltaybey skʼoplal te bintik schʼuunojik o yuʼun ya slajinik te skontratak te Diose? Maʼuk. Te Jehová ya yal te jaʼnax ya xbajt skanantay te smelelil j-abatetik yuʼun sok te ya xbajt slajinlan te skontratak te ya xbajt slajin ta jun guerra te Armagedón sbiil (Apoc. 16:14, 16). Ta yorail-abi, te machʼatiknax ya xbajt yaʼiyik guerra jaʼ te machʼatik ayik ta chʼulchan, ma jaʼuk te j-abatetik yuʼun liʼ ta Balumilal (Apoc. 19:11-15).

3. TE ISRAELETIK MABA YA SMILIK TE MACHʼATIK YA YAKʼ SCHʼUUNEL YOʼTANIK TA STOJOL TE JEHOVÁ

Ta namey kʼinal, te israeletik bayal buelta la snaʼbey yoʼbolil sbaik te machʼatik la yakʼ schʼuunel yoʼtanik ta stojol te Dios sok jaʼnax la smilik te machʼatik snujpʼnix ya yichʼik lajinel-ae. Kiltik cheb ejemplo. Manchukme te Jehová  la yal te la yichʼ lajinel te Jericó, te israeletik maba la smilik te Rahab ta swenta te schʼuunel yoʼtane, sok ma laj-euk te sfamiliae (Jos. 2:9-16; 6:16, 17). Ta patil, maba la smilik te machʼatik ayik ta Gabaón, melel la yakʼik ta ilel te la yichʼik ta mukʼ te Dios (Jos. 9:3-9, 17-19).

Ta ora ini, te soldadoetik ya smilik te machʼatik ya yakʼ schʼuunel yoʼtanik ta stojol te Dios sok ay baeltik ya smilik te machʼatik maʼyuk smulik.

4. TE ISRAELETIK YA SKʼAN TE JICHUK YA YAKʼIK GUERRA TE BITʼIL YA X-ALBOTIK YUʼUN DIOS

Ta namey kʼinal, te Jehová la yakʼtiklanbey mantaliletik te israeletik te kʼalal ya xbajtik ta guerra. Ay baeltik te Dios la yalbey te israeletik te yakuk skʼanik lamalkʼinal ta stojol te skontratakik (Deut. 20:10). Jaʼnix jich te Jehová la yal ta mantal te ya skʼan te maʼyuk yabakulik te soldadoetik sok te snailpakʼik sok te jaʼuk ya spasik te bin leke (Deut. 23:9-14). Jaʼnix jich te Jehová la yal te manchuk ya stsak yutsʼinik te antsetik te tey slumalik-a te banti la yochintayike, jich te bin-utʼil ya spasik te soldadoetik yuʼun yantik nacionetik. Teme jtul soldado yuʼun Israel ya skʼan ya xnujpun sok jtul ants te tey slumal-a te banti la yichʼ ochintayel, ya skʼan ya smaliy jun u (Deut. 21:10-13).

Ta ora ini, bayal ta chajp nacionetik yakʼojik leyetik ta swenta te guerra. Manchukme te leyetik ini jaʼ swentail te ya yichʼ kanantayel te ants winiketik, ay ma jichuk ya xkʼot ta pasel.

5. TE DIOS YA SKOLTAY TE LUM YUʼUN

Ta namey kʼinal, te Jehová la skoltay te israeletik sok ay la spas milagroetik yuʼun jich ya xjuʼ ya stsalik-a te skontratakike. Jich bitʼil te kʼalal koltayotik yuʼun la yochintayik te Jericó. Te bitʼil la schʼuunik te mantaliletik yuʼun te Jehová, te israeletik «tulan awonic», sok «hemtsʼuj cohel te tsʼahque». Jich jambot sbeik kʼoem yuʼun te Jehová, yuʼun jich ya yochintayik-a te lume (Jos. 6:20). Ta patil juʼ yuʼun stsalel te amorreoetik. ¿Bin-utʼil? «Te Jehová la yacʼ tal ta chʼulchan niwac batetic […]. Cʼax hich lajic ta niwac batetic a te bin utʼil milotic ta espada yuʼun te snichʼnab Israel» (Jos. 10:6-11).

TE SMELELIL JCHʼUUNJELETIK YA YAKʼIK TA ILEL LAMALKʼINAL

Jich bitʼil la kiltikix, te bin yak ta kʼoel ta pasel ta ora ini ma pajaluk sok te bin kʼot ta pasel ta Israel. Pero ma jaʼuknax yuʼun-abi te bin yuʼun ma xbootik ta guerra. Te Dios la yal te ta slajibal kʼajkʼal te machʼatik ya yakʼ sbaik ta nojptesel yuʼun «ma ba ya schahpanix sbahic ta yaqʼuel guerra». Soknix maba ya xbajtik ta yakʼel guerra (Is. 2:2-4). Te Jesucristo la yalbey te jnopojeletik yuʼun te akʼa ma spasik te bin ya spas «te balumilal», sok te ma schʼik sbaik ta spasel spisil te bintik ya spasike (Juan 15:19).

Te Jesucristo la yalbey te jnopojeletik yuʼun te ayukxan bin yan ya spasik. Altiklanbotik te ma skʼan ya skʼej slab yoʼtanik, te manchuk ya x-ilinik sok te manchuk ya sjachik guerra (Mat. 5:21, 22). Jaʼnix jich nojptesotik te ya skʼan te ayuk slamalil yoʼtanik sok te kʼuxuk ta yoʼtanik te skontratakike (Mat. 5:9, 44).

¿Bin ya yakʼ jnoptik? Melel maniwan jkʼantik te ya xbootik ta guerra. Pero ¿aytobal ta koʼtantik te bin ma lek te ya xjuʼ ya xat o ya sjach kʼop ta congregación? Akʼa jpastik tulan yuʼun ya jlokʼes ta koʼtantik te bintik ma leke (Sant. 4:1, 11).

Ma skʼan ya jkoltaybeytik skʼoplal te bin ya spas te ants winiketik, melel te jchʼuunjeletik ya yakʼik ta ilel lamalkʼinal sok talel kʼaxel kʼux ya yaʼiy sbaik (Juan 13:34, 35). Jaʼ yuʼun, akʼa kakʼ ta koʼtantik te ma jchʼik jbatik ta spasel te bintik ma lek jaʼto kʼalal ya xtal te skʼajkʼalel te Jehová te banti ya slajin ta sbajtelkʼinal te guerraetike (Sal. 46:9).